Ўзбекистон Республикаси Вазирлар Маҳкамасининг 07.11.2001 й. 443-сон "2002 йил ҳосили учун кузги-қишки агротехника тадбирларини ўтказиш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

07.11.2001 й.

N 443

2002 ЙИЛ ҲОСИЛИ УЧУН КУЗГИ-ҚИШКИ

АГРОТЕХНИКА ТАДБИРЛАРИНИ ЎТКАЗИШ

ЧОРА-ТАДБИРЛАРИ ТЎҒРИСИДА

2002 йил ҳосили учун кузги-қишки тадбирларнинг ўз вақтида ва сифатли ўтказилишини таъминлаш, келгуси йилда пахта, дон ва бошқа қишлоқ хўжалиги экинларидан мўлжалдаги ҳосилни олиш учун зарур шарт-шароитлар яратиш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Қишлоқ ва сув хўжалиги вазирлигининг кузги-қишки дала ишларининг Қорақалпоғистон Республикаси Вазирлар Кенгаши ва вилоятлар ҳокимликлари билан келишилган ҳажмлари ҳамда:

1018 минг гектар майдонни ғўзапоядан тозалашни 2001 йил 30 ноябргача;

далаларни (950 минг гектар) жорий текислашни 2002 йил 15 мартгача;

ерларнинг (983,9 минг гектар) шўрини ювишни 2002 йил 10 мартгача;

чигит экиш учун пушта олишни (461 минг гектар) 2002 йил 25 мартгача тугаллаш бўйича таклифи қабул қилинсин.

Кузги шудгорлаш графиги ва шўр ювиш, яхоб суви бериш ҳамда коллектор-дренаж тармоқларини тозалаш бўйича топшириқ 1 ва 2-иловаларга мувофиқ тасдиқлансин.

2. Ўзбекистон Республикаси Қишлоқ ва сув хўжалиги вазирлиги, "Ўзагромашсервис" уюшмаси, "Ўзбекнефтгаз" ва "Ўзнефтмаҳсулот" компаниялари Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда:

2002 йил ҳосили учун вилоятлар бўйича агротехника тадбирларини амалга ошириш ҳажми ва муддатларини ўн кун муддатда белгиласинлар;

ер ҳайдаш агрегатларининг икки сменада ишлашини, ёнилғи-мойлаш материалларининг узлуксиз берилишини таъминласинлар, кўчма таъмирлаш бригадалари ташкил қилсинлар, двигателлар, узеллар ва агрегатлар, бошқа зарур материалларнинг алмашув фондларини барпо этсинлар. "Ўзқишлоқхўжаликмаш-холдинг" холдинг компанияси машина-трактор парклари ва хўжаликлар буюртманомалари бўйича ер ҳайдаш агрегатлари учун эҳтиёт қисмлар тайёрлаш ва етказиб беришни ташкил этсинлар;

кузги шудгорлашни ўтказишга, ерларни текислаш ва мелиоратив ишларни бажаришга, идоравий мансублигидан ва мулкчилик шаклларидан қатъи назар, саноат, қурилиш ҳамда бошқа ташкилот ва корхоналарнинг ер ҳайдаш тракторлари ва бошқа ер қазиш техникасини шартнома асосида жалб этсинлар.

3. 2002 йил ҳосили учун кузги-қишки агротехника тадбирлари бутун комплексини ўз вақтида ва сифатли ўтказиш ишларини ташкил этиш учун 3-иловага мувофиқ таркибда ишчи комиссия тузилсин.

Ана шундай комиссиялар Қорақалпоғистон Республикаси Вазирлар Кенгашининг Раиси ва вилоятлар ҳокимлари раҳбарлигида республиканинг барча минтақаларида тузилсин.

Ишчи комиссия (И.Ҳ.Жўрабеков):

2002 йил ҳосили учун кузги-қишки тадбирларнинг бажарилишини мунтазам таҳлил қилиб борсин;

ишчи комиссия мажлисларида ҳудудий комиссиялар, республика вазирликлари ва идоралари раҳбарларининг 2002 йил ҳосили учун кузги-қишки тадбирларни амалга ошириш бўйича бажарган ишларини тинглашни амалда қўлласин.

4. Ўзбекистон Республикаси Қишлоқ ва сув хўжалиги вазирлиги (Бегалиев), "Ўзагромашсервис" уюшмаси ерларни шудгорлаш сифати устидан назоратни таъминласинлар, бунда ерларнинг зарур чуқурликда ва биртекис ҳайдалишига, шудгорлашдан олдин фосфорли, калийли ва органик ўғитлар солинишига алоҳида эътибор берсинлар.

5. "Ўзкимёсаноат", "Ўзқишлоқхўжаликкимё" компаниялари ерларни кузги шудгорлаш даврида фойдаланиш учун фосфорли ва калийли ўғитларнинг республиканинг барча минтақаларига бир маромда, шу жумладан 2001 йил ноябрь-декабрда 60 минг тонна фосфорли ва 20 минг тонна калийли ўғитлар (100 фоиз фойдали модда) етказиб берилишини таъминлаш бўйича қўшимча чора-тадбирлар кўрсинлар.

6. Ўзбекистон Республикаси Молия вазирлиги, Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси хўжаликларга 2002 йил ҳосилидан пахта ва дон харид қилишга аванс бериш учун траншларни йўналтиришда келгуси йил ҳосили учун бажарилган механизациялашган ишларга ҳақ тўлаш учун машина-трактор паркларига эҳтиёт қисмлар, узеллар ва агрегатлар сотиб олишда мақсадли фойдаланиш учун маблағлар ажратилишини назарда тутсинлар;

Қорақалпоғистон Республикаси Вазирлар Кенгаши, вилоятлар ҳокимликлари билан биргаликда, траншларни йўналтиришда кузги-қишки тадбирларни ўтказишда банд бўлган ходимлар меҳнатига ҳақ тўлаш учун маблағлар ажратилишини ва улардан белгиланган мақсадда фойдаланилишини алоҳида назоратга олсинлар.

7. Ўзбекистон Республикаси Адлия вазирлиги, Прокуратура, Олий хўжалик суди, бошқа манфаатдор вазирликлар ва идоралар иштирокида:

шартномаларнинг, энг аввало ижара шартномаларининг тўғри расмийлаштирилиши ҳамда хўжаликлари, фермерлар, тайёрлов ва хизмат кўрсатиш ташкилотлари, жойлардаги давлат ҳокимияти органлари томонидан уларнинг шартларига қатьий риоя қилиниши устидан қаттиқ назорат ўрнатсин, томонларнинг шартнома мажбуриятларининг оғишмай бажарилиши юзасидан масъулиятини оширсин:

маҳаллий адлия, молия, қишлоқ ва сув хўжалиги органлари томонидан ички хўжалик шартномалари мониторингини олиб бориш, пайдо бўлган масалаларни ҳал қилишда кўмаклашиш амалиётини давом эттирсин.

8. Қорақалпоғистон Республикаси Вазирлар Кенгаши, вилоятлар ҳокимликлари, Ўзбекистон Республикаси Қишлоқ ва сув хўжалиги вазирлиги шартнома муносабатларини мустаҳкамлаш, қишлоқ хўжалиги ишлаб чиқаришида пудрат фаолиятини рағбатлантириш, чек тизимидан фойдаланиш ҳамда фермер хўжаликлари ва пудратчилар ҳуқуқларини ҳимоя қилиш бўйича қўшимча чора-тадбирлар кўрсинлар. 4-иловага мувофиқ боғ ва токзорларни шартнома асосида ижарага бериш 2002 йил 1 январгача туталлансин.

9. Ўзбекистон Республикаси Ички ишлар вазирлиги, Прокуратураси қишлоқ хўжалиги экинлари пайҳон қилинишига йўл қўймасликка қаратилган ташкилий-профилактика тадбирларини мунтазам ўтказсинлар. Экинларни пайҳон ва нобуд қилишга доир аниқланган ҳоллар бўйича, мулкчилик шаклларидан қатъи назар, хўжаликлар ва уларнинг таркибий бўлинмалари раҳбарларига нисбатан қаттиқ чоралар кўрилсин, шу жумладан улар жиноий ва маъмурий жавобгарликка тортилсин.

10. Мазкур қарорнинг бажарилишини назорат қилиш Ўзбекистон Республикаси Президентининг Давлат маслаҳатчиси И.Ҳ. Жўрабеков ва Ўзбекистон  Республикаси Бош вазирининг ўринбосари Т. Холтоев зиммасига юклансин.

Вазирлар Маҳкамасининг Раиси                                              И. Каримов

Вазирлар Маҳкамасининг

2001 йил 7 ноябрдаги

443-сон қарорига

1-ИЛОВА

2002 йил ҳосили учун кузги шудгорлаш бўйича

ГРАФИК-ТОПШИРИҚ

Вазирлар Маҳкамасининг

2001 йил 7 ноябрдаги

443-сон қарорига

2-ИЛОВА

2001-2002 йил кузги-қишки даври учун шўр ювиш,

яхоб суви бериш ҳамда коллектор-дренаж

тармоқларини тозалаш бўйича

ТОПШИРИҚ

Вазирлар Маҳкамасининг

2001 йил 7 ноябрдаги

443-сон қарорига

3-ИЛОВА

2002 йил ҳосили учун кузги-қишки тадбирларни

уюшқоқлик билан ўтказиш бўйича ишчи комиссия

ТАРКИБИ

Вазирлар Маҳкамасининг

2001 йил 7 ноябрдаги

443-сон қарорига

4-ИЛОВА

Ихтисослаштирилмаган хўжаликлардаги

боғ ва токзорларни шартнома асосида

ижарага бериш бўйича

ТОПШИРИҚ

(гектар)