Ўзбекистон Республикаси Президентининг 03.11.2023 й. ПҚ-355-сон "Футбол-таълим муассасалари тармоғини кенгайтириш ҳамда халқаро стандартларга мос келадиган футбол инфратузилмасини ривожлантириш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

03.11.2023 й.

N ПҚ-355

ФУТБОЛ-ТАЪЛИМ МУАССАСАЛАРИ

ТАРМОҒИНИ КЕНГАЙТИРИШ ҲАМДА ХАЛҚАРО

СТАНДАРТЛАРГА МОС КЕЛАДИГАН ФУТБОЛ

ИНФРАТУЗИЛМАСИНИ РИВОЖЛАНТИРИШ

ЧОРА-ТАДБИРЛАРИ ТЎҒРИСИДА

Мамлакатимизда профессионал футболчиларни шакллантириш тизимини сифат жиҳатидан янги босқичга олиб чиқиш, бунинг учун футбол-таълим муассасалари сонини кўпайтириш, халқаро стандартларга мос келадиган футбол инфратузилмасини янада ривожлантириш, футбол ривожланган давлатлар билан рақобат қила оладиган тренер, ҳакам ва бошқа мутахассисларни тайёрлаш мақсадида:

1. Ўзбекистон Республикаси Президентининг 2023 йил 7 апрелдаги "Оммавий ва профессионал футболни ҳар томонлама ривожлантиришнинг қўшимча чора-тадбирлари тўғрисида"ги ПҚ-115-сон қарори ижросини таъминлаш мақсадида Аргентина, Венгрия, Марокаш ва Франциянинг профессионал футболни ривожлантириш бўйича тажрибаси жойига чиқиб ўрганилганлиги ҳамда мазкур қарорни тайёрлашда уларнинг илғор ва мақбул амалиётидан фойдаланилганлиги маълумот учун қабул қилинсин.

2. Ўзбекистон футбол ассоциацияси тизимида:

Миллий футбол маркази;

Футбол бўйича республика олий спорт маҳорати мактаби негизида Футбол терма жамоалари тайёргарлик маркази;

Спорт тиббиёти ва реабилитация маркази ташкил этилсин.

Футбол бўйича республика олий спорт маҳорати мактаби балансидаги бино ва иншоотлар тегишли ҳудуди билан бирга Тошкент шаҳри футбол мактаби балансига бепул фойдаланиш ҳуқуқи асосида берилсин.

3. Ўзбекистон футбол ассоциацияси ҳузуридаги Футбол бўйича мутахассисларни тайёрлаш маркази Футбол мутахассисларини тайёрлаш ва илмий-тадқиқот маркази этиб, Республика болалар ва ўсмирлар футбол академияси - Республика футбол академияси этиб қайта номлансин.

Миллий футбол маркази тузилмасига:

Футбол мутахассисларини тайёрлаш ва илмий-тадқиқот маркази;

Футбол терма жамоалари тайёргарлик маркази;

Республика футбол академияси;

Спорт тиббиёти ва реабилитация маркази киритилсин.

4. Қуйидагилар Миллий футбол марказининг асосий вазифалари этиб белгилансин:

илғор хориж тажрибасини ўзлаштириш ҳамда тажрибали халқаро мутахассисларни жалб қилган ҳолда тренер ва футболчиларни замонавий, инновацион методикалар, илмий-таҳлилий ёндашув асосида тайёрлаш;

барча даражадаги футбол-таълим муассасаларида ягона ёндашув асосида футболчиларни тайёрлашни ташкил этиш ҳамда уларни илмий ва методик таъминлаш;

футболчиларни тайёрлашнинг барча босқичларини рақамлаштириш орқали шаффоф саралаш (селекция) ишларини ташкил этишда инсон омилини аралашувини кескин қисқартириш;

жойлардаги футбол академиялари ва мактабларидан саралаб олинган энг иқтидорли ва юқори маҳоратга эга футболчиларни - терма жамоаларга номзодларни замонавий футболга мос усул ва фалсафа асосида профессионал тайёрлаш;

футболчиларга замонавий таълим бериш, жумладан чет тили ва Ўзбекистон тарихи фанларини чуқурлаштирилган ҳолда ўргатиш, футбол соҳасига йўналтирилган касбларга ўқитиш тизимини жорий этиш;

футбол бўйича илмий-тадқиқот ишларини ташкил этиш, илғор хорижий спорт технологияларини жалб этган ҳолда соҳани ривожлантиришга эришиш;

футболчиларнинг жисмоний ҳолати ва ривожланишини доимий назорат қилиб бориш ҳамда уларга замонавий тиббий хизмат кўрсатиш, шу жумладан футбол-таълим муассасаларига спорт тиббиёти йўналишида илмий-методик ёрдам кўрсатиш ва футболчиларда ўткир, сурункали касалликларни барвақт аниқлаш ва даволашни ташкил этиш.

5. Футбол терма жамоалари тайёргарлик марказининг асосий фаолияти йўналиши этиб барча ёш тоифалари бўйича терма жамоаларнинг асосий ўқув-машғулот йиғинларини ташкил этиш, халқаро мусобақаларга тайёрлаш ва ушбу мусобақаларда иштирокини таъминлаш ҳисоблансин.

6. Миллий футбол маркази фаолиятини молиялаштириш манбалари этиб қуйидагилар белгилансин:

Давлат бюджети маблағлари;

Ўзбекистон футболини қўллаб-қувватлаш жамғармаси маблағлари;

фаолият ихтисослиги бўйича хизматларни реализация қилишдан ва Миллий футбол маркази уставидаги вазифаларга мувофиқ бўлган бошқа фаолият турларидан олинган даромадлар;

асосий машғулотлар ўтказилмайдиган вақтда бўш турган мол-мулкни ижарага беришдан тушган даромадлар;

жисмоний ва юридик шахсларнинг ҳомийлик хайриялари;

халқаро молия институтлари, хорижий ҳукумат молия ташкилотлари ва бошқа халқаро ташкилотлар грантлари;

қонунчилик ҳужжатлари билан тақиқланмаган бошқа манбалар.

7. Қуйидагилар:

Миллий футбол марказининг ташкилий тузилмаси 1-иловага мувофиқ;

Миллий футбол маркази фаолиятини ташкил этиш бўйича чора-тадбирлар дастури 2-иловага мувофиқ тасдиқлансин.

8. Белгилансинки:

а) Осиё футбол конфедерацияси (AFC) талаблари асосида футбол, футзал ва соҳил футболи тренерларига тегишли лицензиялар бериш ягона тизим асосида Футбол мутахассисларини тайёрлаш ва илмий-тадқиқот маркази орқали амалга оширилади;

б) Футбол мутахассисларини тайёрлаш ва илмий-тадқиқот маркази фаолияти билан боғлиқ ишларни жойларда самарали амалга ошириш учун ҳудудий футбол ассоциацияларида уларнинг маблағлари ҳисобидан алоҳида мутахассис лавозими киритилади;

в) 2025 йил 1 январдан бошлаб ҳудудий футбол академиялари, мактаблари ва бошқа давлат футбол-таълим муассасалари тренерларининг Футбол мутахассисларини тайёрлаш ва илмий-тадқиқот марказидан мажбурий равишда тегишли лицензияларни олгандан сўнг фаолият кўрсатиш амалиёти жорий қилинади;

г) Республика футбол академияси:

юридик шахс мақомига эга бўлган ихтисослаштирилган давлат спорт-таълим муассасаси сифатида барча ёш тоифалари бўйича терма жамоаларга профессионал футболчиларни етказиб бериш бўйича бош футбол-таълим муассасаси ҳисобланади;

ўқувчиларининг умумий контингенти 154 нафарни ташкил этиб, улар 13-19 ёш тоифаларидан иборат бўлади;

ўқувчилари "OLYMPIC" ва бошқа профессионал футбол клубларида фаолият олиб боради ҳамда республика ва халқаро миқёсдаги мусобақаларда иштирок этиши таъминланади.

Бунда, Республика футбол академиясига ҳудудий футбол академиялари, футбол мактаблари, нодавлат футбол клублари ва бошқа футбол-таълим муассасаларининг иқтидорли ва салоҳиятли ёш футболчилари профессионал ўсишни мониторинг қилишга мўлжалланган электрон дастур (платформа) орқали рейтинг тизими асосида қабул қилинади;

д) ҳудудий футбол академиялари:

юридик шахс мақомига эга бўлган ихтисослаштирилган давлат спорт-таълим муассасаси ҳисобланади ва уларнинг фаолияти футбол бўйича энг иқтидорли ёшларни аввало футбол мактаблари, нодавлат футбол клублари ва бошқа футбол-таълим муассасаларидан танлаб олиш ҳамда уларни профессионал тайёрлаш орқали Республика футбол академияси ва терма жамоаларга асосий номзодларни етказиб беришга йўналтирилади;

2024/2025 ўқув йилидан бошлаб ўқувчиларининг умумий контингенти 154 нафарни ташкил этиб, улар 12-18 ёш тоифаларидан иборат бўлади;

ҳузурида спорт клуби ташкил этилади ҳамда республика ва халқаро миқёсдаги мусобақаларда иштирок этиши таъминланади.

9. Белгилаб қўйилсинки, Миллий футбол маркази Тошкент вилояти, Юқоричирчиқ тумани, "Г.Т. Хван" МФЙ ҳудудида барпо этилаётган Футбол терма жамоалари тайёргарлик маркази ва унга туташ ҳудудда ташкил этилади.

Тошкент вилояти ҳокимлиги (З. Мирзаев) икки ой муддатда:

Футбол терма жамоалари тайёргарлик марказига туташ ҳудуддан қўшимча 9,9 гектар ер майдонини белгиланган тартибда захирага қайтариш;

захирага қайтарилган ер участкасини Ўзбекистон футбол ассоциациясига доимий фойдаланиш ҳуқуқи асосида ажратиш чораларини кўрсин.

Бунда, ажратиладиган ер майдонида Миллий футбол маркази ва унинг таркибий бўлинмалари учун зарур бино-иншоотлар, футбол майдонлари, футзал ва футбол ёпиқ иншоотлари, меҳмонхона, Спорт тиббиёти ва реабилитация маркази, сузиш ҳавзаси, ошхона каби объектлар барпо этилиши назарда тутилсин.

10. Қурилиш ва уй-жой коммунал хўжалиги вазирлиги (Б. Закиров):

Ёшлар сиёсати ва спорт вазирлиги, Ўзбекистон футбол ассоциацияси билан биргаликда бир ой муддатда илғор хорижий тажрибадан келиб чиқиб, юқори малакали мутахассисларни жалб этган ҳолда, Миллий футбол марказининг индивидуал лойиҳасини ишлаб чиқсин;

Миллий футбол марказининг бино ва иншоотларини барпо этиш учун тажрибали хорижий қурилиш компанияларини белгиланган тартибда жалб қилиш чораларини кўрсин;

мазкур қарор асосида қурилиши ва таъмирланиши кўзда тутилган иншоотлар учун энг мақбул меъморий ва техник ечимлар қўлланилишини, уларни инновацион технологияларга асосланган, энергия тежамкор ва тез барпо этиладиган енгил конструкция ва материаллардан қурилишини, шинамлик ва экологик хавфсизлик талабларига мувофиқлик юзасидан лойиҳа-смета ҳужжатларининг комплекс экспертизадан ўтказилишини таъминласин ва қурилиш-монтаж ишларининг сифатли бажарилиши устидан доимий давлат архитектура-қурилиш назоратини ўрнатсин.

11. Тикланиш ва тараққиёт жамғармаси (Ш. Вафаев) Миллий футбол марказини ташкил этиш билан боғлиқ харажатларни молиялаштириш мақсадида 2024-2025 йилларда Иқтисодиёт ва молия вазирлигига келгусида Ўзбекистон футбол ассоциациясига ажратиш учун 50 миллион АҚШ доллари миқдорида 10 йил муддатда 3 йиллик имтиёзли давр билан фоизсиз кредит ажратсин.

Иқтисодиёт ва молия вазирлиги 2027 йилдан бошлаб ҳар йили алкоголь ва тамаки маҳсулотларига ўрнатилган акциз солиғидан тушадиган тушумларнинг 2 фоизи ҳамда бошқа манбалар ҳисобидан кредитни қайтариш графигидаги суммасига (7,1 млн АҚШ доллари экв.) етарли миқдорда маблағларни йўналтирсин.

Бунда, кредит маблағлари Миллий футбол марказини илғор ва халқаро стандартларга мувофиқ барпо этиш, замонавий жиҳоз ва инвентарлар билан таъминлаш, хорижий футбол мутахассисларини жалб этиш ва профессионал футболни ривожлантириш бўйича алоҳида дастурларни амалга оширишга йўналтирилади.

Миллий футбол маркази ва Республика футбол академиясида бир нафардан профессионал футболни ривожлантириш бўйича асосий йўналишларга юқори малака ва кўникмага эга бўлган илғор хорижий тажрибани ўзлаштирган "техник директор" раҳбарлик қилади.

12. Вазирлар Маҳкамаси уч ой муддатда Миллий футбол маркази фаолиятини ташкил этиш бўйича Ҳукумат қарорини қабул қилсин.

13. Ўзбекистон футбол ассоциациясининг ҳудудий футбол академиялари фаолиятини 2023-2025 йилларда янада ривожлантириш бўйича чора-тадбирлар дастури 3-иловага мувофиқ тасдиқлансин.

14. Қуйидагилар ҳудудий футбол академиялари фаолиятини ривожлантиришнинг қўшимча йўналишлари этиб белгилансин:

ҳар бир футбол академияси учун зарур спорт инфратузилмасини яратиш (3 та табиий, 1 та сунъий қопламали футбол майдони, мини-футбол, тренажёр ва гимнастика залларини ўз ичига олган 24х60 ўлчамли ёпиқ манеж, 100 ўринли фаоллар зали, 6х15 ўлчамли ихчам сузиш ҳавзаси, 154 ўринли ётоқхона, 8 та ўқув хонаси, спорт тиббиёти ва реабилитация хонаси, 2 та маъмурий хона ва 100 ўринли ошхона);

футбол-таълим тизимининг барча босқичларини тўлиқ рақамлаштириш орқали инсон аралашувини чеклаш, футболчи-ўқувчиларни замонавий технологиялар асосида саралашни (селекция) йўлга қўйиш;

ягона ёндашув асосида футболчиларни тайёрлашнинг илғор хорижий тажрибага асосланган илмий ва методик асосларини татбиқ этиш ва узлуксиз янгилаб бориш;

фаолиятига рейтинг баҳолаш тизимини жорий қилиш, белгиланган минимал талабларни ошириш.

15. Белгилаб қўйилсинки, Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳамда туман ва шаҳар ҳокимлари:

а) футболни ривожлантириш бўйича олиб борилаётган кенг кўламли ислоҳотларни жойларда тўлақонли амалга ошириш учун масъул ҳисобланади;

б) 2024 йил сентябрь ойида Ўзбекистонда футзал бўйича Жаҳон чемпионати ўтказилиши муносабати билан:

ҳудудларда футзал жамоаларини ташкил этади, шу жумладан профессионал футбол клублари ҳузуридаги футзал бўйича асосий, ёшлар ва аёллар жамоалари фаолиятини йўлга қўяди;

ушбу жамоалар учун замонавий моддий-техника базасини яратади, уларни Ўзбекистон футбол ассоциацияси томонидан белгиланган талаблар асосида молиялаштиради;

футзал жамоаларининг республика миқёсдаги мусобақаларда мунтазам иштирок этиши чораларини кўради;

в) 2025 йил якунига қадар Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасида ҳамда маҳаллий бюджетнинг орттириб бажарилган қисми ва ҳомийлик маблағлари ҳисобидан ҳудудий футбол академиялари фаолияти учун зарур бўлган спорт инфратузилмасини яратади ҳамда уларни замонавий асбоб-ускуна ва жиҳозлар билан таъминлайди;

г) туман ва шаҳарларда футболни ривожлантириш, унинг инфратузилмасини яхшилаш учун маҳаллий бюджетнинг қўшимча маблағлари, жисмоний ва юридик шахсларнинг ҳомийлик хайриялари ҳамда қонунчилик ҳужжатларида тақиқланмаган бошқа манбалар ҳисобидан маблағ ажратилишини таъминлайди;

д) 2023 йил 31 декабрга қадар ҳудудлардаги барча стадион ва футбол майдонларини хатловдан ўтказиб, таълим ва спорт ташкилотлари ҳамда эгаси номаълум стадион ва футбол майдонлари спорт фаолияти билан боғлиқ бўлмаган бошқа мақсадларда фойдаланилишини тақиқлашни таъминлайди ҳамда уларни таъмирлаш ва мақсадли фойдаланилишини ташкил этади.

16. Ўзбекистон футбол ассоциацияси (А. Азизов), Ёшлар сиёсати ва спорт вазирлиги (А. Икрамов):

Мактабгача ва мактаб таълими вазирлиги (Х. Умарова), Олий таълим, фан ва инновациялар вазирлиги билан биргаликда 2024/2025 ўқув йилидан бошлаб мини-футбол инфратузилмалари мавжуд таълим ташкилотларида спорт секциялари фаолиятини, улар ўртасида тизимли мусобақалар ўтказилишини йўлга қўйсин;

2024-2025 йиллар давомида Футбол мутахассисларини тайёрлаш ва илмий-тадқиқот маркази томонидан таълим ташкилотларининг жисмоний тарбия ўқитувчилари учун мини-футбол бўйича қисқа муддатли курслар ташкил этсин;

Иқтисодиёт ва молия вазирлиги (Ж. Кўчқоров), Мактабгача ва мактаб таълими вазирлиги (Х. Умарова), Олий таълим, фан ва инновациялар вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари 2025 йилдан бошлаб Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасида таълим ташкилотларини янгидан қуриш, реконструкция қилишда мини-футбол майдонлари ташкил қилинишини инобатга олсин ҳамда зарур маблағлар ажратилишини назарда тутсин.

17. Шундай тартиб ўрнатилсинки, унга мувофиқ 2024 йил 1 январдан бошлаб:

профессионал футболдаги фаолиятини якунлаган футболчи ва мутахассисларга Ўзбекистон футбол ассоциациясининг ижобий хулосаси асосида уларнинг хусусий секторда амалга оширадиган футболни ривожлантириш лойиҳалари учун, истисно тариқасида, Марказий банк асосий ставкасида "Ташқи иқтисодий фаолият миллий банки" АЖ, "Асакабанк" АЖ ва "Ўзсаноатқурилишбанк" АТБ томонидан миллий валютада 1,5 миллиард сўмгача 5 йилдан кам бўлмаган муддатга имтиёзли кредит ажратилади;

ҳудудий футбол академиялари бино-иншоотлари ҳамда уларнинг ҳудудидаги бўш турган ер майдонларида давлат-хусусий шериклик шартлари асосида қонунчиликда белгиланган тартибда мақсадли футбол лойиҳаларини амалга оширишга рухсат берилади.

18. Ўзбекистон футбол ассоциацияси (А. Азизов):

Ёшлар сиёсати ва спорт вазирлиги (А. Икрамов) билан биргаликда Халқаро футбол ассоциациялари федерацияси (FIFA) ва Осиё футбол конфедерацияси (AFC) билан ҳамкорликни янада кучайтириш орқали нуфузли халқаро футбол мусобақалари ва тадбирларини Ўзбекистонда ўтказиш бўйича қўшимча чора-тадбирларни амалга оширсин;

Миллий футбол марказига икки нафар юқори даражадаги "техник директор"ни жалб қилиш чораларини кўрсин;

чуқур билим ва тажрибага эга бўлган маҳаллий ва хорижий мутахассисларни жалб қилган ҳолда Футбол мутахассисларини тайёрлаш ва илмий-тадқиқот марказида "футбол тренери", "футбол ҳаками", "футбол таҳлилчиси", "футбол селекционери" (скаут), "спорт психологи", "футбол менежери", "футбол маркетологи" каби мутахассисликларга ўқитишни йўлга қўйсин;

Ёшлар сиёсати ва спорт вазирлиги (А. Икрамов) билан биргаликда фаолиятини тугатган футболчилар ҳамда футбол бўйича етарли назарий билим ва кўникмага эга бўлган кадрларни Жисмоний тарбия ва спорт бўйича мутахассисларни қайта тайёрлаш ва малакасини ошириш институтида "футбол тренери", "футбол ҳаками", "футбол таҳлилчиси", "футбол селекционери" (скаут), "футбол менежери", "футбол маркетологи" каби мутахассисликларга қайта тайёрлашни ташкил этсин.

Соғлиқни сақлаш вазирлиги (А. Иноятов) ҳамда Олий таълим, фан ва инновациялар вазирлиги 2024/2025 ўқув йилидан бошлаб Тошкент тиббиёт академиясининг Чирчиқ филиалида "спорт шифокори", "спорт диетологи", "спорт фармакологи" билан бирга "спорт психологи" мутахассислиги бўйича кадрларни тайёрлаш тизимини йўлга қўйсин.

19. Ўзбекистон футбол ассоциацияси (А. Азизов), Ёшлар сиёсати ва спорт вазирлиги (А. Икрамов):

2024 йил 1 мартга қадар республикадаги барча стадион ва футбол майдонларининг ягона электрон реестрини ишлаб чиқсин ҳамда унинг юритилишини таъминласин;

Рақамли технологиялар вазирлиги (Ш. Шерматов) билан биргаликда 2024 йил якунига қадар футбол соҳасини ва футболчиларни тайёрлашнинг барча босқичларини рақамлаштириш чораларини кўрсин.

Бунда:

ягона реестр базасини яратиш, ишга тушириш ва техник қўллаб-қувватлаш ҳамда футбол соҳасини рақамлаштириш билан боғлиқ харажатлар Ахборот-коммуникация технологияларини ривожлантириш жамғармаси ҳисобидан амалга оширилади;

давлат органлари ва ташкилотларининг ахборот тизимлари ва ресурсларида мавжуд маълумотлар Ўзбекистон футбол ассоциацияси учун ахборот хавфсизлиги талабларига риоя этилган ҳолда, рақамли маълумотлар платформаси орқали бепул асосда тақдим этилади.

20. Белгилаб қўйилсинки:

а) 2024/2025 ўқув йилидан бошлаб:

Ўзбекистон футбол ассоциацияси Ёшлар сиёсати ва спорт вазирлиги тизимидаги спорт мактаблари ва ихтисослаштирилган спорт мактабларидаги мавжуд футбол секциялари тренерларига умумий услубий раҳбарликни амалга оширади;

ҳар бир ҳудудда оммавий ва профессионал футболни ривожлантириш, шунингдек, мавжуд футбол инфратузилмасидан самарали фойдаланишни ташкил этишга масъул бўлган спорт мактаби директорининг футболни ривожлантириш бўйича алоҳида ўринбосари лавозими жорий этилади;

б) 2024 йил 1 январдан бошлаб илғор хорижий тажрибадан келиб чиқиб, Халқаро футбол ассоциациялари федерацияси (FIFA) талабларига мувофиқ "биринчи тренер" тамойили асосида футбол тренерларини рағбатлантириш тизими йўлга қўйилади. Бунда, юқори маҳоратли футболчини босқичма-босқич тайёрлаган тренерлар футболчи билан профессионал фаолияти давомида тузиладиган шартномаларнинг суммалари ҳисобидан муносиб рағбатлантириб борилади.

21. Ўзбекистон Миллий телерадиокомпанияси (А. Хаджаев) Ўзбекистон футбол ассоциацияси (А. Азизов), Ёшлар сиёсати ва спорт вазирлиги (А. Икрамов) билан биргаликда:

2024 йил 1 июнга қадар футбол учрашувларини намойиш қилиш, футболни аҳоли ўртасида кенг тарғиб қилиш мақсадида футбол бўйича махсус телеканални ташкил қилсин;

2024 йил 1 июлга қадар Халқаро футбол ассоциациялари федерацияси (FIFA) ва Осиё футбол конфедерацияси (AFC) талабларига мувофиқ ўтказиладиган ҳамда Ўзбекистон ички мусобақаларини ёритиш учун 2 та кўчма телевизион станцияларни харид қилиш чораларини кўрсин.

22. Иқтисодиёт ва молия вазирлиги (Ж. Қўчқоров) Ўзбекистон Миллий телерадиокомпанияси талабномасига биноан 2 та кўчма телевизион станциялар ҳамда зарур моддий-техник таъминотларни харид қилиш билан боғлиқ харажатларни 2024 йилги ҳамда футбол бўйича махсус телеканалнинг маҳаллий ва хорижий футбол чемпионатлари намойишини харид қилиш билан боғлиқ харажатларни ҳар йилги Давлат бюджети параметрларида назарда тутсин.

23. Ўзбекистон Миллий ахборот агентлиги ҳамда Ўзбекистон Миллий телерадиокомпанияси мазкур қарорнинг мазмун-моҳияти ва амалий аҳамиятини ёритишга оид мақолалар, брифинглар, тематик телекўрсатувлар ташкил этсин.

24. Ёшлар сиёсати ва спорт вазирлиги (А. Икрамов) манфаатдор вазирлик ва идоралар билан биргаликда уч ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

25. Мазкур қарорнинг ижросини самарали ташкил қилишга масъул ва шахсий жавобгар этиб ёшлар сиёсати ва спорт вазири А.И. Икрамов ҳамда Ўзбекистон футбол ассоциацияси раиси А.А. Азизов белгилансин.

Қарор ижросини муҳокама қилиб бориш, масъул ташкилотлар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов ва Ўзбекистон Республикаси Президенти Администрацияси департаменти раҳбари О.Қ. Абдурахманов зиммасига юклансин.

Ўзбекистон Республикаси Президенти                                Ш. Мирзиёев

Ўзбекистон Республикаси

Президентининг

2023 йил 3 ноябрдаги

ПҚ-355-сон қарорига

1-ИЛОВА

Миллий футбол марказининг

ТАШКИЛИЙ ТУЗИЛМАСИ

                

            

Бошқарув ходимларининг умумий чекланган сони - 194,5 нафар.

*) Шифокор ва массажчилар ўқув-йиғин машғулотлари давомида шартнома асосида жалб қилинади.

**) Тиббий жиҳозлардан келиб чиқиб, қўшимча штат бирликлари Иқтисодиёт ва молия вазирлиги, Ўзбекистон футбол ассоциацияси билан келишилган ҳолда ажратилади.

***) Хизмат кўрсатувчи ходимлар сони ўрнатилган нормативлар бўйича белгиланади.

Изоҳ: Республика футбол академияси ҳамда Спорт тиббиёти ва реабилитация маркази алоҳида тузилмага эга юридик шахс ҳисобланади.

          

            

Ўзбекистон Республикаси

Президентининг

2023 йил 3 ноябрдаги

ПҚ-355-сон қарорига

2-ИЛОВА

Миллий футбол маркази

фаолиятини ташкил этиш бўйича

ЧОРА-ТАДБИРЛАР ДАСТУРИ

            

           

            

Ўзбекистон Республикаси

Президентининг

2023 йил 3 ноябрдаги

ПҚ-355-сон қарорига

3-ИЛОВА

Ўзбекистон футбол ассоциациясининг

ҳудудий футбол академиялари фаолиятини

2023-2025 йилларда янада ривожлантириш бўйича

ЧОРА-ТАДБИРЛАР ДАСТУРИ

            

               

               

Қонун ҳужжатлари маълумотлари миллий базаси (www.lex.uz),

2023 йил 4 ноябрь