Ўзбекистон Республикаси Вазирлар Маҳкамасининг 25.07.2000 й. 285-сон "Олтин топган кон бошқармасини, Олтин топган шаҳарчасини ва "Олмалиқ кон-металлургия комбинати" очиқ акциядорлик жамияти балансида бўлган бошқа объектларни Тожикистон Республикаси мулкига бериш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

25.07.2000 й.

N 285

ОЛТИН ТОПГАН КОН БОШҚАРМАСИНИ,

ОЛТИН ТОПГАН ШАҲАРЧАСИНИ ВА "ОЛМАЛИҚ

КОН-МЕТАЛЛУРГИЯ КОМБИНАТИ" ОЧИҚ АКЦИЯДОРЛИК

ЖАМИЯТИ БАЛАНСИДА БЎЛГАН БОШҚА ОБЪЕКТЛАРНИ

ТОЖИКИСТОН РЕСПУБЛИКАСИ МУЛКИГА

БЕРИШ ТЎҒРИСИДА

Ўзбекистон Республикаси Ҳукумати билан Тожикистон Республикаси Ҳукумати ўртасида Тожикистон Республикаси ҳудудида жойлашган Олтин топган кони жойлашган ердан фойдаланиш тўғрисида 1996 йил 25 майдаги Битимни ҳамда Ўзбекистон Республикаси ва Тожикистон Республикаси ҳукумат делегациялари музокараларининг 2000 йил 30 майдаги Протоколини бажариш юзасидан Вазирлар Маҳкамаси ҚАРОР ҚИЛАДИ:

1. Ўзбекистон Республикаси Давлат мулки қўмитаси "Олмалиқ кон-металлургия комбинати" очиқ акциядорлик жамияти, манфаатдор вазирликлар, идоралар ва ташкилотлар билан биргаликда бир ой муддатда Тожикистон ҳудудидаги қуйидаги мол-мулкни "Олмалиқ кон-металлургия комбинати" очиқ акциядорлик жамияти балансидан Тожикистон Республикаси мулкига бериш бўйича ҳужжатлар пакетини белгиланган тартибда расмийлаштирсин:

Олтин топган кон бошқармасининг асосий воситалари, шу жумладан, кон лаҳимлари;

Олтин топган маъдан мойдони кони;

Тожикистон Республикаси ҳудудидан ўтувчи Теракли-Олтин топган автойўли участкаси;

Тожикистон Республикаси ҳудудидан ўтувчи 35 кВ кучланишли электр узатиш линияси;

Олтин топган шаҳарчасининг муҳандислик, уй-жой-коммунал хўжалиги ва ижтимоий-маданий объектлари.

2. Ўзбекисюн Республикаси Бош вазирининг ўринбосари - Ўзбекистон Республикаси Давлат мулки қўмитаси раиси Ў.Қ. Исмоилов кўрсатиб ўтилган мол-мулкни қабул қилиб олиш-топшириш далолатномасини Ўзбекистон Республикаси Ҳукумати номидан белгиланган тартибда тасдиқлашга вакил қилинсин.

3. "Олмалиқ кон-металлургия комбинати" очиқ акциядорлик жамияти:

Тожикистон Республикаси бюджетига ва бюджетдан ташқари фондларга 1997 йилдан 1999 йил 1 февралгача бўлган даврда ҳосил бўлган қарзларни табиий офатни бартараф этиш ва конда ишлар тўхтаган пайтдан бошлаб кон бошқармасига сарфланган харажатлар учун "Олмалиқ кон-металлургия комбинати" очиқ акциядорлик жамияти томонидан кўрилган сарф-харажатларни ҳисобга олиш йўли билан Тожикистон Республикасининг тегишли органлари билан ўзаро келишган ҳолда тўласин;

Тошкент вилояти ҳокимлиги, Давлат солиқ қўмитаси, Ер ресурслари давлат қўмитаси, Ўзбекистон Республикаси Вазирлар Маҳкамаси ҳузуридаги Геодезия, картография ва давлат кадастри бош бошқармаси билан биргаликда Ўзбекистон Республикаси ҳудудидаги, илгари Олтин топган конидан фойдаланиш билан боғлиқ ерларнинг бир қисми олдинги ердан фойдаланувчиларга қайтарилишини белгиланган тартибда расмийлаштирсин;

Ўзбекистон Республикаси ҳудудидаги Теракли шаҳарчасини электр билан таъминлаш учун трансформатор кичик станциясини ва электр узатиш линиясини бутлашни таъминласин, Ўзбекистон Республикаси Энергетика ва электрлаштириш вазирлиги эса Тошкент вилояти ҳокимлигининг буюртмаси бўйича 2000 йилда уларни монтаж қилсин, кейинчалик белгиланган тартибда ўз балансига қабул қилиб олсин ва унинг ишлатилишини таъминласин.

4. Қуйидагилар:

"Ўзавтойўл" давлат-акциядорлик концерни - "Олмалиқ кон-металлургия комбинати" очиқ акциядорлик жамиятининг қўрғошин бойитиш фабрикасидан Теракли шаҳарчаси ва Тожикистон Республикаси ҳудудигача автомобиль йўли участкасини муҳандислик иншоотлари билан биргаликда жорий ҳолатига кўра балансга қабул қилсин ва уни белгиланган тартибда таснифласин;

Ўзбекистон Республикаси Энергетика ва электрлаштириш вазирлиги - Қорақиясой кичик станциясидан Тожикистон Республикаси томонига қараб чўзилган Ўзбекистон Республикаси ҳудудидаги 35 кВ кучланишли электр узатиш линияси участкасини;

Ўзбекистон почта ва телекоммуникациялар агентлиги - Олмалиқ шаҳридан Теракли шаҳарчасигача алоқа линиясини ва асбоб-ускуналарни;

Тошкент вилояти ҳокимлиги - Ўзбекистон Республикаси Коммунал хизмат кўрсатиш вазирлиги, Энергетика ва электрлаштириш вазирлиги ҳамда "Ўзавтойўл" давлат-акциядорлик концерни билан биргаликда Теракли шаҳарчасининг муҳандислик, ум-жой-коммунал ва ижтимоий-маданий объектларини жорий ҳолатига кўра балансга қабул қилиб олсин.

5. Белгилансинки, "Олмалиқ кон-металлургия комбинати" очиқ акциядорлик жамияти балансидан Энергетика ва электрлаштириш вазирлиги, Коммунал хизмат кўрсатиш вазирлиги, "Ўзавтойўл" давлат-акциядорлик концерни, Ўзбекистон почта ва телекоммуникациялар агентлиги, Тошкент вилояти ҳокимлиги балансига бепул берилаётган мол-мулк қиймати даромад (фойда)дан олинадиган солиқ объекти ҳисобланмайди.

6. Ўзбекистон Республикаси Ташқи ишлар вазирлиги мазкур қарор қабул қилинганлиги тўғрисида Тожикистон Республикаси Ҳукуматини дипломатик йўллар билан хабардор қилсин.

7. Мазкур қарорнинг бажарилишини назорат қилиш Ўзбекистон Республикаскнинг Бош вазири Ў.Т. Султонов зиммасига юклансин.

Вазирлар Маҳкамасининг Раиси                                                  И. Каримов