Ўзбекистон Республикаси Вазирлар Маҳкамасининг 29.04.1997 й. 217-сон "Имом ал-Бухорий таваллудининг ҳижрий-қамарий тақвим бўйича 1225 йиллигини нишонлаш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

29.04.1997 й.

N 217

ИМОМ АЛ-БУХОРИЙ ТАВАЛЛУДИНИНГ

ҲИЖРИЙ-ҚАМАРИЙ ТАҚВИМ БЎЙИЧА

1225 ЙИЛЛИГИНИ НИШОНЛАШ

ТЎҒРИСИДА

Ҳадис илмининг равнақига улкан ҳисса қўшган йирик аллома, буюк ватандошимиз Имом ал-Бухорий илмий-диний меросининг халқимиз маънавий-руҳий ҳаётидаги беқиёс ўрнини ва мамлакат кенг жамоатчилигининг таклифларини ҳисобга олиб ҳамда ушбу меросни асраб-авайлаш, қадрлаш ва жамиятнинг баркамол кишиларини тарбиялашда ундан оқилона фойдаланишга шарт-шароит яратиш мақсадида Вазирлар Маҳкамаси ҚАРОР ҚИЛАДИ:

1. 1998 йилда Имом ал-Бухорий таваллудининг ҳижрий-қамарий тақвим бўйича 1225 йиллиги мамлакатимизда кенг нишонлансин.

Ушбу санага тайёргарлик кўриш ва уни ўтказиш бўйича республика ташкилий қўмитаси 1-иловага мувофиқ таркибда тузилсин.

Ташкилий қўмита ўн беш кун муддатда тегишли вазирликлар ва идоралар, Самарқанд ва Бухоро вилоятлари ҳокимликларининг таклифлари асосида ўз тадбирларини ишлаб чиқсин ва уларни бажаришга киришсин.

2. Самарқанд вилоятидаги Имом ал-Бухорий мақбараси ва масжидини таъмирлаш ҳамда бу ерда қадимий миллий меъморчилик анъаналари билан уйғунлашган замонавий иншоотлардан иборат бетакрор муҳташам ёдгорлик мажмуини барпо этиш учун лойиҳавий таклифларни тайёрловчи комиссия 2-иловага мувофиқ ташкил этилсин.

Комиссия икки ой муддат ичида ЮНЕСКО экспертларини ва халқаро ташкилотларнинг, жумладан, шаҳзода Чарльз Уэльскийнинг Меъморлик институти ва Оксфорд ислом тадқиқотлари маркази (Буюк Британия) мутахассисларини жалб қилган ҳолда тегишли таклифларни тайёрласин ва тасдиқлашга киритсин.

3. Ўзбекистон Республикаси Маданият ишлари вазирлиги Фанлар академияси, Ўзбекистон мусулмонлари идораси, Самарқанд ва Бухоро вилоятлари ҳокимликлари билан биргаликда мамлакат ҳудудидаги Имом ал-Бухорий номи ва даври билан боғлиқ қадамжолар, обидалар рўйхатини аниқласин ва уларни таъмирлаш-консервациялаш бўйича белгиланган тартибда таклиф тайёрласин.

4. Самарқанд вилояти ҳокимлиги ва Ўзбекистон Республикаси Маданият ишлари вазирлиги Имом ал-Бухорий мақбараси мажмуидаги таъмирлаш-қурилиш ишларини 1998 йилнинг август ойигача туғаллашни таъминласин.

"Ўзистиқболстат" давлат қўмитаси Имом ал-Бухорий мақбараси мажмуидаги янги иншоотлар қурилишини 1998 йилги инвестиция дастурида белгиланган тартибда инобатга олсин.

5. Ўзбекистон Республикаси Фанлар академияси Ташқи ишлар вазирлиги, Маданият ишлари вазирлиги, ЮНЕСКО ишлари бўйича Ўзбекистон Республикаси миллий комиссияси, Дин ишлари бўйича қўмита, Ўзбекистон мусулмонлари идораси ва Самарқанд вилояти ҳокимлиги билан биргаликда ва ЮНЕСКОнинг халқаро тадбирлари доирасида 1998 йил сентябрь ойида Самарқанд шаҳрида "Имом ал-Бухорий ва унинг дунё маданиятида тутган ўрни" мавзуида халқаро илмий-амалий анжуман ўтказсин.

6. Ўзбекистон Республикаси Давлат матбуот қўмитаси 1997-1998 йилларда Имом ал-Бухорий асарлари ҳамда унинг ҳаёти ва ижодига оид нашрларни ўзбек, араб, рус ва инглиз тилларида чоп этишни нашриётларнинг режасига киритсин.

7. "Ўзбеккино" давлат-акционерлик компанияси 1998 йилда Имом ал-Бухорий меросининг моҳиятини ва бугунги кундаги аҳамиятини очиб берувчи 2 қисмли ҳужжатли илмий-оммабоп фильм яратсин ва унинг хорижий тилларга дубляж қилинишини таъминласин.

8. Ўзбекистон Республикаси Алоқа вазирлиги Имом ал-Бухорий таваллудининг 1225 йиллигига бағишланган почта маркалари, откриткалар, хатжилдлар чиқарсин.

9. Ўзбекистон Телерадиокомпанияси ва бошқа оммавий ахборот воситалари Имом ал-Бухорий ҳаёти ва илмий фаолиятини, юбилейга тайёргарликнинг боришини кенг ёритсинлар.

10. Ушбу қарорда кўрсатилган тадбирларни ва ташкилий қўмита тасдиқлайдиган ишларни амалга ошириш харажатлари тенг улушларда республика бюджети ва маҳаллий бюджетлар ҳисобидан қопланиши белгилаб қўйилсин.

Бу ишга Ўзбекистон мусулмонлари идораси, ҳомийлар, шу жумладан, хорижий ҳомийларнинг ўз улушларини қўшиш ҳақидаги таклиф-истаклари қўллаб-қувватлансин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И. Жўрабеков зиммасига юклансин.

Вазирлар Маҳкамасининг Раиси                                      И. Каримов

Вазирлар Маҳкамасининг

1997 йил 29 апрелдаги

217-сон қарорига

1-ИЛОВА

Имом ал-Бухорий таваллудининг ҳижрий-қамарий тақвим

бўйича 1225 йиллигини нишонлашга тайёргарлик кўриш

ва уни ўтказиш бўйича республика ташкилий қўмитаси

ТАРКИБИ

Вазирлар Маҳкамасининг

1997 йил 29 апрелдаги

217-сон қарорига

2-ИЛОВА

Имом ал-Бухорий мақбараси мажмуини таъмирлаш

ва барпо этиш бўйича таклиф тайёрловчи комиссия

ТАРКИБИ