Ўзбекистон Республикаси Президентининг 09.11.2005 й. ПҚ-220-сон "Марғилон шаҳрининг 2000 йиллигини нишонлаш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

09.11.2005 й.

N ПҚ-220

МАРҒИЛОН ШАҲРИНИНГ 2000

ЙИЛЛИГИНИ НИШОНЛАШ

ТЎҒРИСИДА

Мамлакатимизнинг бой тарихи, миллий давлатчилигимиз ҳамда қўҳна қадриятларимизнинг шаклланиши ва ривожланишида алоҳида ўрин тутиб келган, юртимиз заминидаги қадимий цивилизация бешикларидан бири бўлган Марғилон шаҳрининг 2000 йиллик санасини муносиб нишонлаш, халқимизнинг ўлмас меросини асраб-авайлаш, кенг тарғиб этиш, юртдошларимиз, айниқса ёшларимиз қалбида Ватанга муҳаббат ва садоқат туйғуларини янада кучайтириш мақсадида:

1. ЮНЕСКО Бош конференциясининг 33-сессияси томонидан Марғилон шаҳрига асос солинганининг 2000 йиллигини нишонлашда ушбу ташкилотнинг иштирок этиши ҳақида қарор қабул қилингани маълумот учун қабул қилинсин.

2. Марғилон шаҳрининг 2000 йиллигини нишонлашга тайёргарлик кўриш ва ўтказиш бўйича республика ташкилий қўмитасининг таркиби 1-иловага мувофиқ тасдиқлансин.

3. Марғилон шаҳрининг 2000 йиллигини нишонлашга тайёргарлик кўриш ва уни ўтказиш юзасидан тадбирлар дастури 2-иловага, шаҳарнинг ижтимоий-маданий инфратузилмасини ривожлантириш дастури 3-иловага ҳамда Марғилон шаҳридаги маҳаллий корхоналар ишлаб чиқариш қувватларини ривожлантириш бўйича чора-тадбирлар дастури 4-иловага мувофиқ тасдиқлансин.

Ташкилий қўмита Марғилон шаҳрининг бугунги қиёфасини тубдан ўзгартиришга қаратилган қурилиш, реконструкция ва ободончилик ишларининг замонавий талаблар асосида амалга оширилишига алоҳида аҳамият берсин ҳамда йилнинг ҳар чорагида ўз мажлисларида мазкур қарор билан тасдиқланган тадбирлар ижросини кўриб чиқиб, унинг натижалари тўғрисида Вазирлар Маҳкамасига ахборот берсин.

4. Иқтисодиёт ва Молия вазирликлари Марғилон шаҳрининг ижтимоий-маданий инфратузилмасини ривожлантириш бўйича 3-иловада белгиланган қурилиш ва ободончилик ишларини ўз вақтида ва тўлиқ маблағ билан таъминлашни назарда тутсин.

5. "Ўздавархитектқурилиш" қўмитаси Фарғона вилояти ҳокимлиги билан биргаликда Марғилон шаҳрида қурилаётган ҳамда реконструкция қилинаётган объектларнинг лойиҳа-смета ҳужжатлари ўрнатилган тартибда экспертизадан ўтказилиб тасдиқлангандан кейингина маблағ билан таъминланиши учун масъул экани белгилаб қўйилсин.

6. "Ўзбек ипаги" уюшмаси, "Ўзбекенгилсаноат" ва "Ўздонмаҳсулот" давлат акциядорлик компаниялари, "Пахта банк" ҳамда Фарғона вилояти ҳокимлиги 4-иловага мувофиқ Марғилон шаҳрининг маҳаллий корхоналар ишлаб чиқариш қувватларини ривожлантириш ва янги иш ўринларини яратиш бўйича белгиланган вазифаларни тасдиқланган смета асосида тўлиқ ва ўз муддатларида бажарилишини таъминлаш учун масъул экани белгилаб қўйилсин.

Шунингдек тегишли маҳаллий корхоналарнинг ишлаб чиқариш қувватларини фойдаланишга туширишда, уларнинг фаолиятини такомиллаштиришда амалий ёрдам кўрсатсин ҳамда зарур асбоб-ускуналар билан жиҳозлаш мақсадида молиявий маблағларни, жумладан, хорижий инвестицияларни жалб этишни таъминласин.

7. Ўзбекистон Фанлар академияси, Маданият ва спорт ишлари вазирлиги, Ёзувчилар уюшмаси, "Маданият ва маърифат" маркази, Фарғона вилояти ҳокимлиги, ЮНЕСКО ишлари бўйича Ўзбекистон Республикаси миллий комиссияси ва халқаро ташкилотлар иштирокида, таниқли олимлар, ижодкор зиёлилар, маҳалла, хотин-қизлар ва ёшлар ташкилотлари вакилларини жалб этган ҳолда, 2007 йил март ойида "Марғилон шаҳрининг жаҳон цивилизацияси тарихидаги ўрни" мавзусида халқаро илмий конференция ва тантанали байрам тадбирларини ўтказсин.

8. "Ўзбектуризм" миллий компанияси, Фарғона вилояти ҳокимлиги билан биргаликда, бир ой муддатда, Фарғона водийсининг бой тарихий-меъморий обидалари ва зиёратгоҳлари, табиий жиҳатдан эътиборга молик сўлим масканларини кенг тарғиб этиш бўйича ҳудудий дастур ишлаб чиқсин ҳамда уни халқаро туристик ярмаркаларда реклама қилиш чора-тадбирларини белгиласин.

9. Ўзбекистон миллий телерадиокомпанияси, Ўзбекистон миллий ахборот агентлиги ва бошқа оммавий ахборот воситаларига Марғилон шаҳрининг 2000 йиллигига бағишланган юбилей тантаналарига тайёргарлик кўриш ва уларни ўтказиш билан боғлиқ тадбирларни кенг ёритиш тавсия эитлсин.

10. Мазкур қарорнинг бажарилишини назорат қилиш Ўзбекистон Республикаси Бош вазири Ш. Мирзиёев зиммасига юклансин.

Ўзбекистон Республикаси Президенти                                    И. Каримов

Ўзбекистон Республикаси

Президентининг

2005 йил 9 ноябрдаги

220-сон қарорига

1-ИЛОВА

Марғилон шаҳрининг 2000 йиллигини нишонлашга

тайёргарлик кўриш ва ўтказиш бўйича республика

ташкилий қўмитаси

ТАРКИБИ