Ўзбекистон Республикаси олий таълим муассасаларига бакалаврлар тайёрлаш бўйича талабаларни қабул қилиш тартиби ва қоидалари тўғрисида Низом (ЎзР ВМ 04.07.1998 й. 320-ф-сон фармойишига 1-илова)

Функция недоступна

Вазирлар Маҳкамасининг

1998 йил 4 июлдаги

320-ф-сон фармойишига

1-ИЛОВА

Ўзбекистон Республикаси олий таълим муассасаларига

бакалаврлар тайёрлаш бўйича талабаларни қабул

қилиш тартиби ва қоидалари тўғрисида

НИЗОМ

УМУМИЙ ҚОИДАЛАР

1. Олий таълим муассасалари қабулни Ўзбекистон Республикаси Вазирлар Маҳкамасининг тегишли қарори билан тасдиқланган давлат грантлари ва тўлов-контракт асосида қабул квоталарига мувофиқ амалга оширадилар.

2. Республика олий таълим муассасаларига талабаларни қабул қилиш Ўзбекистон Республикаси таълим муассасаларига қабул қилиш бўйича Давлат комиссияси томонидан тест синовлари натижаларига (баллар) биноан рейтинг тизими бўйича амалга оширилади.

Олий таълим муассасаларига ўрнатилган қабул режасининг 50 фоизи давлат грантлари ҳисобидан, қолган 50 фоизи тўлов-контракт асосида ташкил этилади.

Олий таълим муассасаларига қабул барча учун (ҳам грантлар, ҳам контракт бўйича) тенг ҳуқуқлилик, ягона қабул қоидалари ва ягона танлов асосида амалга оширилиб, тест синовларида энг юқори балл тўплаган абитуриентларнинг давлат грантлари бўйича биринчи навбатда қабул қилиниш ҳуқуқи таъминланади. Қолган абитуриентлар тест баллари рейтинги асосида ўрнатилган тўлов-контракт квоталари дрирасида қабул қилиниш ҳуқуқига эгадирлар.

Танлов ҳар бир олий таълим муассасаси бўйича таълим йўналишлари, ўқитиш тиллари ва шаклларига кўра алоҳида ўтказилади.

Тест синовларини Ўзбекистон Республикаси Вазирлар Маҳкамаси ҳузуридаги Давлат тест маркази амалга оширади. Тест синовларини ўтказишга масъул бўлган Давлат тест маркази вакиллари Давлат комиссияси томонидан тасдиқланади.

Қорақалпоғистон Республикаси Вазирлар Кенгаши, вилоятлар, Тошкент шаҳар ҳокимликлари ва олий таълим муассасалари ректорлари жойларда тест синовларини ўтказиш учун зарур шароитларни таъминлайдилар.

3. Тест синовлари уч тилда - ўзбек, рус ва қорақалпоқ тилларида ўтказилади.

Олий таълим муассасасида таълим йўналишлари ва мутахассисликлар бўйича ўқитиш тили Ўзбекистон Республикаси Вазирлар Маҳкамасининг тегишли қарори билан тасдиқланган қабул кўрсаткичлари доирасида ҳужжатлар қабул қилинишига қадар вазирликлар ва идоралар томонидан белгиланади ва Давлат комиссияси томонидан тасдиқланади.

Абитуриент тест синовларини олий таълим муассасасида ўқийдиган тилда топширади.

Таълим йўналишлари бўйича, тест синовлари учун, тегишли фанлар мажмуаси белгиланади (1-илова).

Олий таълимнинг айрим йўналишлари (мутахассисликлари) бўйича тест синовлари билан бир қаторда қўшимча профиль (ижодий) имтиҳонлар ўтказилади (2-илова).

4. Айрим таълим йўналишлари (мутахассисликлар) бўйича ўқитиш тожик, қозоқ ёки туркман тилларида олиб бориладиган олий таълим муассасаларига қабул кўп балли тизим бўйича профиль имтиҳонлар ва тест синовлари асосида амалга оширилади (3-илова). Таълимнинг (мутахассислик)нинг ушбу йўналишларига аризалар ўрта мактабни фақат кўрсатилган тилларда тугатган абитуриентлардан қабул қилинади.

5. Ўрта мактабда испан (араб, форс, дари, ҳинд, урду, хитой, корейс, уйғур) тилини чет тили сифатида ўқиган абитуриентлар, мазкур тилдан кўп балли баҳо тизими бўйича имтиҳон топширадилар, қолган фанлар бўйича эса тест синовларидан ўтадилар.

Мазкур банд роман-герман филологияси (инглиз, немис ва француз филологияси) йўналиши бўйича ўқишга кирадиган абитуриентларга нисбатан қўлланилмайди.

6. Профиль (ижодий) ва кўп балли имтиҳонларни ўтказиш тартиби ва қоидалари Давлат комиссияси билан келишилган ҳолда Олий ва ўрта махсус таълим вазирлиги (кейинги ўринларда - Олий таълим вазирлиги деб аталади) томонидан манфаатдор вазирликлар ва идоралар билан биргаликда тасдиқланади (4 ва 5-иловалар).

7. Олий таълим муассасаларига кўзи ожиз абитуриентларни қабул қилиш Олий таълим вазирлиги белгилаган тартибда амалга оширилади (6-илова).

Тест синовлари натижалари бўйича энг кўп баллнинг камида 40 фоизини тўплаган I ва II гуруҳ ногаронлари, шу жумладан, болалигидан I ва II гуруҳ ногаронлари, етим болалар ва "Меҳрибонлик уйлари" болалар интернат-уйларида тарбияланганларни ўқишга қабул қилиш масаласи Давлат комиссияси томонидан кўриб чиқилади.

8. МДҲ фуқароларини Ўзбекистон олий таълим муассасаларига ўқиш учун уюшган ҳолда (кооперацияли) қабул қилиш, шунингдек республика фуқароларини МДҲ мамлакатларига ўқишга жўнатиш давлатлараро шартномалар ва Давлат комиссиясининг тегишли қарорига асосан амалга оширилади.

ХОРИЖИЙ ФУҚАРОЛАРНИ ҚАБУЛ ҚИЛИШ

9. Олий таълим муассасаларига хорижий фуқароларни қабул қилиш Вазирлар Маҳкамасининг "Ўзбекистон Республикасида хорижий фуқароларни ўқитиш тўғрисида" 1994 йил 24 майдаги 266-сон қарорига ҳамда ҳукуматлараро битимларга мувофиқ ёки Давлат комиссиясининг розилиги билан тўлов-контракт асосида амалга оширилади.

Хорижий фуқароларнинг олий таълим муассасаларида ўқиши учун тўлов миқдори Олий таълим вазирлиги томонидан Молия вазирлиги билан келишилган ҳолда тасдиқланади.

ҲУЖЖАТЛАРНИ ҚАБУЛ ҚИЛИШ

10. Олий таълим вазирлиги томонидан тасдиқланган Низомга мувофиқ олий таълим муассасаларида ўз фаолиятини амалга оширувчи қабул комиссиялари ташкил этилади.

Абитуриентларнинг ўқишга қабул қилиш ҳақидаги аризалари қабул комиссияси томонидан 20 июндан 20 июлгача (шу куни ҳам), Маданият ишлари вазирлиги ва Бадиий академия олий ўқув юртларида эса 20 июндан 15 июлгача қабул қилинади.

Абитуриент ўқишга кириш чоғида қуйидагиларни тақдим этади:

таълим йўналиши, ўқув тили ва шакли кўрсатилган ҳолдаги ариза;

ўрта ёки ўрта махсус маълумот ҳақидаги ҳужжатнинг асл нусхаси;

N 086-У шакл бўйича тиббий маълумотнома;

3x4 ҳажмдаги 6 та фотосурат;

I ва II гуруҳ ногиронлари, етим болалар ва "Меҳрибонлик уйлари" болалар интернат-уйларида тарбияланганлар асл нусхадаги тегишли тасдиқловчи ҳужжатларни тақдим этадилар.

Танловдан ташқари ўқишга кириш ҳуқуқига эга бўлган халқаро ва республика олимпиадалари, танловлар ва мусобақалар ғолиблари асл нусхадаги тасдиқловчи ҳужжатларни топширадилар.

Муддатли ҳарбий хизматни ўтаган ва ҳарбий қисмларнинг ўқишга юбориш ҳақидаги тавсияномаларига эга бўлган абитуриентлар ҳам уларни олий таълим муассасалари қабул комиссиясига тақдим этадилар.

Абитуриент томонидан паспорт ҳамда ҳарбий хизматга алоқадорлиги ҳақидаги ҳужжат ҳам шахсан кўрсатилади.

Кўрсатиб ўтилган ҳужжатлар мавжуд бўлганда қабул комиссияси абитуриентнинг ҳужжатларини қабул қилишни рад этишга ҳақли эмас.

Ҳужжатлар қабул қилишнинг белгиланган муддатлари тугагандан сўнг ҳужжатларга қўшимчалар ва ўзгартиришлар киритиш қатъиян ман қилинади.

Олий таълим муассасаларининг қабул комиссиялари 22 июлга қадар бўлган муддатда Давлат комиссиясига ва Давлат тест марказига таълим йўналиши, ўқув шакли ва тили кўрсатилган ҳолда, абитуриентларнинг (шу жумладан, юқорида қайд этилган тоифалари) сони ҳақида белгиланган шаклдаги маълумотни тақдим этадилар.

ПРОФИЛЬ (ИЖОДИЙ) ИМТИҲОНЛАР

11. Профиль (ижодий) имтиҳонлар тест синовларига қадар 11 июлдан 25 июлгача, тест мажмуаларида фаннинг ўрнига қараб унинг учун назарда тутилган энг кўп баллнинг 0 дан 100 фоизигача бўлган оралиқда ягона кўп балли баҳолаш тизими бўйича амалга оширилади.

Профиль (ижодий) имтиҳонлар натижалари бўйича тушган норозилик (аппеляция) аризалари, Олий таълим вазирлиги белгилаган тартибда, олий таълим муассасаси қабул комиссияси томонидан 26 июлга қадар бўлган муддатда кўриб чиқилади.

Профиль (ижодий) имтиҳонлар натижалари Давлат комиссиясига олий таълим муассасалари томонидан 27 июлгача тақдим этилади.

Профиль (ижодий) имтиҳонларнинг натижалари ҳақидаги маълумотлар белгиланган шакллар бўйича олий таълим муассасалари қабул комиссиялари томонидан Давлат тест марказига тақдим этилади:

кундузги бўлимлар учун - 1 августда;

сиртқи бўлимлар учун - 11 августда.

ТЕСТ СИНОВЛАРИГА ТАЙЁРГАРЛИК

КЎРИШ ВА УЛАРНИ ЎТКАЗИШ

12. Тест синовлари:

кундузга бўлимларда - 1 августда;

сиртқи бўлимларда - 11 августда ўтказилади.

13. Олий таълим муассасасида танланган таълим йўналишига (мутахассисликка) қараб абитуриентлар 1 ва 2-иловаларга мувофиқ икки ёки уч фан мажмуалари бўйича тест синовларидан ўтадилар.

Тест топшириқлари ўрта умумтаълим мактаблари ўқув дастурларига мувофиқ тузилади.

14. Мажмуанинг ҳар бир фани 36 топшириқни ўз ичига олади. Қуйидаги вақт меъёрлари белгиланади:

а) 72 саволга - 2 соат;

б) 108 саволга - 3 соат.

Мажмуалар қуйидаги фанлар бўйича шаклланади:

1. Она тили: ўзбек тили ва адабиёти

2. Она тили: рус тили ва адабиёти

3. Она тили: қорақалпоқ тили ва адабиёти

4. Иккинчи тил: ўзбек тили ва адабиёти

5. Иккинчи тил: рус тили ва адабиёти

6. Иккинчи тил: қорақалпоқ тили ва адабиёти

7. Математика

8. Физика

9. Кимё

10. Биология

11. Тарих

12. География

13. Чет тили: инглиз

14. Чет тили: немис

15. Чет тили: француз

Тест синовлари бошланишига қадар, 30 дақиқагача тушунтириш ишлари ўтказилади, бу вақт тест ўтказиш учун ажратилган вақт меъёрига кирмайди.

Тест синовларини ташкил этиш ва уларни ўтказиш, жойларда тест синовлари қоидаларига қатъий риоя этиш масъулияти Давлат тест маркази вакиллари, қабул комиссиялари раислари ва ҳокимликлар томонидан тайинланадиган аудиторияларнинг раҳбарларига юкланади.

Тест синови эрталаб соат 8 дан 30 дақиқа ўтганда бошланади.

Жавоблар варақаси абитуриент томонидан ҳаво ранг пастаси бўлган шарикли ручка билан тўлдирилади.

Жавоблар варақасини тўлдиришга тест синови учун белгиланган вақт меъёридан ортиқча 20 дақиқа ажратилади.

Жавоблар варақаси тўғри тўлдирилиши учун абитуриент шахсан жавобгардир. Қабул қоидалари бўйича тегишли доирачаларни нотўғри белгилаган абитуриентлар эътирози кўриб чиқилмайди.

Белгиланган вақтда тест синовларига келмаган абитуриентлар учун қўшимча тест синовлари ўтказилмайди.

АБИТУРИЕНТЛАРНИ ТЎЛОВ-КОНТРАКТ

АСОСИДА ҚАБУЛ ҚИЛИШ, ЎҚИШ УЧУН

ТЎЛОВ ТАРТИБИ ВА МИҚДОРИ

15. Абитуриентларни тўлов-контракт асосида қабул қилиш Вазирлар Маҳкамаси белгилаган қабул квоталари доирасида ягона қабул қоидалари асосида тест синовларипинг баллар рейтинги бўйича Давлат комиссияси томонидан амалга оширилади.

Давлат комиссияси томонидан абитуриентларни тўлов-контракт асосида талабаликка тавсия этиш тўғрисидаги қарор қабул қилингандан кейин уларни ўқишга қабул қиладиган олий таълим муассасаси билан юридик ёки жисмоний шахслар ўртасида улар ўқитишнинг тўлиқ қийматини тўлашлари тўғрисида контрактлар расмийлаштирилади.

Белгиланган намунадаги контракт бланклари олий таълим муассасаси қабул комиссияси томонидан тест натижалари эълон қилинган кундан бошлаб берилади ва юридик шахслар учун раҳбар ва бош бухгалтер томонидан имзоланган ҳолда, 3 нусхада, жисмоний шахслар учун 2 нусхада расмийлаштирилади.

Тўлов-контракт асосида Давлат комиссияси томонидан ўқишга тавсия этилган абитуриентлар тўловни контрактда кўрсатилган ўқишга сарфланадиган харажатлар қийматини ҳар йили тўла қоплаган ҳолда амалга оширадилар.

Ўқиш учун тўлов-контракт асосида грантлар ажратиш тартиби, контракт шартлари ва томонларнинг мажбуриятлари Олий ва ўрта махсус таълим вазирлиги, Молия вазирлиги, ва Адлия вазириги томонидан ишлаб чиқилган ва Давлат комиссиясида тасдиқланган тегишли Низом билан тартибга солинади.

ХАЛҚАРО ВА РЕСПУБЛИКА ОЛИМПИАДАЛАРИ,

ТАНЛОВЛАРИ ВА МУСОБАҚАЛАРИ

ҒОЛИБЛАРИНИ ҚАБУЛ ҚИЛИШ

16. Ўзбекистон Республикаси Президентининг "Ўзбекистон ўқувчи ёшларини рағбатлантириш чоралари тўғрисида" 1993 йил 5 февралдаги Фармонига мувофиқ ҳамда Ўзбекистон Республикаси Вазирлар Маҳкамасининг 1993 йил 25 мартдаги 157-сон қарори билан тасдиқланган Халқаро ва республика олимпиадалари, танловлари ва мусобақалари ғолиблари бўлган мактаб ва билим юртлари ўқувчиларини рағбатлантириш тартиби асосида Халқ таълими вазирлиги, Маданият ишлари вазирлиги, Давлат спорт қўмитаси томонидан ўтказилган халқаро ва республика олимпиадалари, танловлари ва мусобақалари ғолиблари ҳамда Халқ таълими вазирлигининг гувоҳномасини олганлар Давлат комиссиясининг қарори билан тегишли олий таълим муассасаларига танловдан ташқари тест синовларисиз ва профиль (ижодий) имтиҳонларсиз қабул қилинадилар.

Республика мактаб олимпиадаси фани билан олий таълимнинг йўналиши ўртасидаги профил мувофиқлик Олий таълим вазирлиги ва Халқ таълими вазирлигининг тақдимномаларига кўра Давлат комиссияси томонидан белгиланади (7-илова).

Олий ўқув юртлари қабул комиссиялари олимпиадалар, танловлар ва мусобақалар ғолибларининг аризалари ҳақидаги маълумотларни, таълим йўналиши, ўқув шакли ва тили кўрсатилган ҳолда, Давлат комиссияси ва Давлат тест марказига 22 июлгача бўлган муддатда тақдим этадилар.

МУДДАТЛИ ҲАРБИЙ ХИЗМАТНИ

ЎТАГАН АБИТУРИЕНТЛАРНИ

ҚАБУЛ ҚИЛИШ

17. Ўзбекистон Республикаси Вазирлар Маҳкамасининг "Муддатли хизмат ҳарбий хизматчиларига ва уларнинг оила аъзоларига қўшимча имтиёзлар тўғрисида" 1994 йил 3 октябрдаги 496-сон қарорига асосан муддатли ҳарбий хизматни ўтаган ва ҳарбий қисмлар тавсияномасига эга бўлган абитуриентларни олий таълим муассасаларига қабул қилишда, тест синовларида улар тўплаган балларга энг кўп тўпланиши мумкин бўлган балллар миқдорининг 10 фоизини қўшган ҳолда имтиёзли шароитлар берилади.

Ҳарбий қисм тавсияномасини олиш тартиби ва унинг шакли Мудофаа вазирлиги ва Олий таълим вазирлигининг йўриқ хати билан белгиланади.

Олий таълим муассасаларининг қабул комиссиялари ушбу тоифага кирувчи абитуриентлар ҳақидаги маълумотларни таълим йўналиши, ўқув шакли ва тили кўрсатилган ҳолда белгиланган шакллар бўйича Давлат комиссиясига ва Давлат тест марказига тақдим этадилар:

кундузга бўлимлар учун - 1 августда;

сиртқи бўлимлар учун - 11 августда.

ҚАБУЛ ҚИЛИШ ТАРТИБИ

18. Давлат комиссиясининг абитуриентларни олий таълим муассасаларига қабул қилиш тўғрисидаги қарори 15 августдан кечикмай қабул қилинади ва у олий таълим муассасаларида 20 августга қадар абитуриентларни давлат грантлари бўйича талабалар сафига қабул қилиш ҳақидаги буйруқларни расмийлаштириши учун асос бўлади.

Тўлов-контракт асосида ўқишга кирувчи абитуриентларни қабул қилиш юридик ёки жисмоний шахслар томонидан ўқиш учун белгиланган маблағ миқдори, белгиланган тартибда ўтказилгандан сўнг, 10 сентябрдан кечиктирилмай, олий таълим муассасасининг буйруғи билан расмийлаштирилади.

1-ИЛОВА

Ўзбекистон Республикаси олий таълим муассасаларига

кирувчилар учун таълим йўналишлари рўйхати ва тест

бўйича уларга мувофиқ келувчи фанлар

МАЖМУАСИ

Изоҳлар:

Инглиз, немис, француз - чет тилларидан тест синови топширилади (*) - мутахассислик кодидаги "X" белгиси ўрнига ўқиш олиб бориладиган тегишли тилнинг рақами кўрсатилади:

умумий талаблар асосида ўқишга кирувчи абитуриентлар учун

1 - ўзбек тили

2 - рус тили

3 -  қорақалпоқ тили

муддатли ҳарбий хизматни ўтаган ва ҳарбий қисмлар тавсияномасига эга бўлган абитуриентлар учун

4 - ўзбек тили

5 - рус тили

6  қорақалпоқ тили

(**) агар мактабда инглиз, немис ёки француз тилларидан бўлак чет тиллари ўқилган бўлса, чет тилидан кўп балли тизим бўйича имтиҳон топширилади. Турдош мутахассислик бўйича танлов (чизиқ билан ажратилмаган юқорида турувчи мутахассислик) умумий ўтказилади.

2-ИЛОВА

Тест синовлари билан бир қаторда профиль (ижодий)

имтиҳонлар (36*3.1=111,6 га тенг, энг кўп баллнинг

0 дан 100% гача баҳоланувчи) ўтказиладиган таълим

йўналишлари (мутахассисликлар)

РЎЙХАТИ

Изоҳ:

(*) - мутахассислик кодидаги "X" белгиси ўрнига ўқиш олиб бориладиган тегишли тилнинг рақами кўрсатилади:

умумий талаблар асосида ўқишга кирувчи абитуриентлар учун

1 - ўзбек тили

2 - рус тили

3 - қорақалпоқ тили

муддатли ҳарбий хизматни ўтаган ва ҳарбий қисмлар тавсияномасига эта бўлган абитуриентлар учун

4 - ўзбек тили

5 - рус тили

6 - қорақалпоқ тили

3-ИЛОВА

Кўп балли тизим бўйича профиль имтиҳонлар ҳамда

тест синовлари асосида амалга ошириладиган қабул ва

ўқитиш қозоқ, тожик ва туркман тилларида олиб

бориладиган таълим йуналишлари (мутахассисликлар)

РЎЙХАТИ

Изоҳ:

(*) - муддатли ҳарбий хизматни ўтаган ва ҳарбий қисмлар тавсияномасига эга бўлган абитуриентлар учун, мутахассисликлар кодидаги бошланғич рақам 0 ўрнига ўқиш олиб бориладиган тегишли тилнинг рақами кўрсатилади:

7 - тожик тили

8 - қозоқ тили

9 - туркман тили

4-ИЛОВА

Ўзбекистон Республикаси олий таълим муассасаларида

ягона кўп балли баҳолаш тизими бўйича профиль

(ижодий) имтиҳонларни ўтказиш

ТАРТИБИ

1. Республика олий таълим муассасаларида ягона кўп балли баҳолаш тизими бўйича профиль (ижодий) имтиҳонлар (кейинги ўшнларда - имтиҳонлар деб аталади) тест синовлари бошлангунга қадар Ўзбекистон Республикаси таълим муассасаларига қабул қилиш бўйича Давлат комиссияси белгилаган муддатларда ўтказилади.

2. Тест синовларига қўшимча тарзда назарда тутилган ижодий ёки профиль имтиҳонлар Давлат комиссияси тасдиқлаган таълим йўналишлари (мутахассисликлар) рўйхати бўйича ўтказилади.

3. Профиль (ижодий) имтиҳонларнинг бош мақсади абитуриентларнинг танланган мутахассислик бўйича ўқиш ва кейинчалик ишлаб кетиш имкониятларини аниқлаш, уларнинг танланган фанлар бўйича билимлари ва малакалари даражаларини, ижодий ва жисмоний қобилиятларини баҳолашдир.

4. Имтиҳонлар саволлари ва топшириқларининг мазмуни умумий ўрта ва ўрта махсус, касб-ҳунар таълим муассасалари дастурларига қатъий мувофиқлаштирилган бўлиши лозим. Спорт фанлари бўйича имтиҳонлар топшириқлари абитуриентларнинг алоҳида тоифалари учун (жинси ва ёши бўйича) белгиланган меъёрий талабларга мувофиқ тузилади.

5. Абитуриентлардан профиль (ижодий) имтиҳонлар қабул қилиш учун олий таълим муассасасида фан бўйича имтиҳон комиссияси ташкил этилади.

Олий таълим муассасасида имтиҳонларни ташкил этиш ва ўтказиш қуйидаги тартибда амалга оширилади:

имтиҳонлар бошланишидан бир ой олдин ректорнинг буйруғи билан олий таълим муассасасида тегишли фанлар бўйича имтиҳонларни ташкил этиш ва қабул қилиш масалалари бўйича тажрибали, малакали ва масъулиятли ўқитувчилар таркибидан фан имтиҳон комиссияси ташкил этилади;

айрим ҳолларда олий таълим муассасаси фан имтиҳон комиссияси таркибига бошқа таълим муассасалари ўқитувчилари ва илмий-тадқиқот муассасалари ходимларининг асосий иш жойи маъмуриятининг тавсияларига биноан киритилишига йўл қўйилади;

олий таълим муассасаси идоравий бўйсунишига қараб вазирлик (идора) билан келишилган ҳолда фан бўйича имтиҳон комиссиясининг раислигига номзодни ўз вақтида тасдиқлаш учун Ўзбекистон Республикаси Олий ва ўрта махсус таълим вазирлигига тақдим этади;

имтиҳонлар тасдиқланган жадвалга қатъий риоя этилган ҳолда ўтказилади;

имтиҳонларга ажратиладиган вақт олий таълим муассасаси қабул комиссиясининг қарори билан белгиланади;

абитуриентларнинг ёзма шаклда бажарган имтиҳон ишларини текшириш ва баҳолаш кириш ёзма имтиҳонларини текшириш ва баҳолаш учун белгиланган тартибда амалга оширилади.

6. Имтиҳонлар тест синовлари мажмуаларидаги фаннинг эгаллаган ўрнига қараб (мувофиқ равишда 111,6 балл; 75,6 балл ёки 39,6 балл) белгиланган энг кўп баллнинг 0 дан 100 фоизгача бўлган оралиғида, ягона кўп балли тизим бўйича баҳоланади.

Имтиҳонларни баҳолаш мезонлари ҳар бир фанга ажратилган умумий баллар доирасида, абитуриентларга қўйилган талабларнинг хусусиятлари ҳисобга олинган ҳолда, олий таълим муассасаси фан имтиҳон комиссияси томонидан белгиланади.

Агар имтиҳон таълим йўналиши (мутахассислик) доирасидаги қатор мустақил фанлар бўйича ўтказиладиган бўлса, унда уни баҳолаш учун белгиланган балларнинг умумий миқдори, ҳар бир фаннинг хусусиятлари ҳисобга олинган ҳолда, дифференциал тартибда, унинг таркибидаги фанларга бўлинади.

Қабул комиссияси имтиҳонлар бошланишидан бир ой олдин ўқишга кирувчиларга Олий таълим вазирлиги томонидан тасдиқланган имтиҳон олинадиган фанлар дастурини, уларни баҳолаш мезонларини, консультациялар ва имтиҳонлар жадвалини маълум қилади.

7. Имтиҳонлар якунлари баллар миқдори сифатида, танлов тартибида имтиҳон варақасига ва имтиҳон рўйхатига киритилади. Бу ҳужжатларнинг ҳар бири фан бўйича имтиҳон комиссияси раиси ва олий таълим муассасаси қабул комиссиясининг масъул котиби томонидан имзоланади.

Имтиҳон ведомостлари олий таълим муассасаси қабул комиссияси томонидан ўз вақтида Давлат тест марказига тақдим этилади.

8. Жадвал бўйича профиль (ижодий) имтиҳонларга келмаган абитуриентлар тест синовларига қўйилмайди.

9. Олий таълим муассасасида профиль (ижодий) имтиҳонлар ўтказилиши даврида белгиланган тартибда норозилик (аппеляция) комиссиясининг иши ташкил этилади.

5-ИЛОВА

Ўқитиш тожик, қозоқ ва туркман тилларида олиб

бориладиган айрим таълим йўналишлари (мутахассисликлар)

бўйича кириш имтиҳонларин6и қабул қилиш

ТАРТИБИ

1. Айрим таълим йўналишлари (мутахассисликлар) бўйича ўқитиш тожик, қозоқ ва туркман тилларида олиб бориладиган олий таълим муассасаларида, Давлат комиссияси билан келишган ҳолда, қабул кўп балли тизим бўйича профиль имтиҳонлар ва тест синовлари асосида амалга оширилади.

Бу таълим йўналишлари (мутахассисликлар)га аризалар фақат ўрта мактабни кўрсатилган тилларда битирган абитуриентлардан қабул қилинади.

2. Кўп балли тизим бўйича профиль имтиҳонлар ва тест синовлари асосида қабулни амалга оширувчи олий таълим муассасалари кўрсатилган ҳолда ўқитиш тожик, қозоқ ва туркман тилларида олиб бориладиган таълим йўналишлари (мутахассисликлар)нинг рўйхатини ва профиль имтиҳонлар ва тест синовлари фанларини Ўзбекистон Республикаси таълим муассасаларига қабул қилиш бўйича Давлат комиссияси (Давлат комиссияси) белгилайди.

3. Саволлар мазмуни ва имтиҳонлар топшириқлари умумий ўрта таълим дастурларига қатъий мувофиқ бўлиши лозим.

4. Абитуриентлардан профиль имтиҳонларни қабул қилиш учун олий таълим муассасасида белгиланган тартибда фанлар бўйича имтиҳон комиссиялари ташкил этилади.

Олий таълим муассасаси идоравий бўйсунишига қараб вазирлик (идора) билан келишилган ҳолда фанлар бўйича имтиҳон комиссияларининг раислигига номзодларни ўз вақтида тасдиқдаш учун Ўзбекистон Республикаси Олий ва ўрта махсус таълим вазирлигига тақдим этади.

Имтиҳонлар тасдиқланган жадвалга қатъий риоя этилган ҳолда ўтказилади.

Имтиҳонларга ажратиладиган вақт олий таълим муассасаси қабул комиссиясининг қарори билан белгиланади.

5. Имтиҳонлар тест синовлари мажмуаларидаги фаннинг эгаллаган ўрнига қараб (мувофиқ равишда 111,6 балл; 75,6 балл ёки 39,6 балл) белгиланган энг кўп баллнинг 0 дан 100 фоизгача бўлган оралиғида, ягона кўп балли тизим бўйича баҳоланади.

Имтиҳонларни баҳолаш меъзонлари, ҳар бир фанга ажратилган умумий баллар доирасида, олий таълим муассасасининг имтиҳон комиссияси томонидан белгиланади.

Қабул комиссияси имтиҳонлар бошланишидан бир ой олдин, ўқишга кирувчиларга Олий таълим вазирлиги томонидан тасдиқланган имтиҳон олинадиган фанлар дастури, уларни баҳолаш меъзонлари, консультациялар ва имтиҳонлар жадвалини маълум қилади.

6. Имтиҳонлар якунлари баллар миқдори сифатида, танлов тартибида имтиҳон варақасига ва имтиҳон рўйхатига киритилади. Бу ҳужжатларнинг ҳар бири фан бўйича имтиҳон комиссияси раиси ва олий таълим муассасаси қабул комиссиясининг масъул котиби томонидан имзоланади.

Имтиҳонлар натижаларига кўра, олий таълим муассасаси қабул комиссияси муайян таълим йўналишлари (мутахассисликлар) бўйича Давлат комиссияси ажратган мувофиқ ўринларга танлов ўтказади.

7. Жадвал бўйича имтиҳонга келмаган абитуриентлар навбатдаги имтиҳонни топширишга киритилмайди.

8. Олий таълим муассасасида профиль имтиҳонлар ўтказилиши даврида белгиланган тартибда норозилик (аппеляция) комиссиясининг иши ташкил этилади.

6-ИЛОВА

Ўзбекистон Республикаси олий таълим муассасаларига

кўзи ожиз абитуриентларни қабул қилиш

ТАРТИБИ

1. Кўзи ожизлар тоифасига махсус мактаб-интернатлар томонидан кўзи ожизлар учун берилган етуклик аттестатига эга бўлган абтуриентлар киради.

2. Кўзи ожиз абитуриентлар республика олий таълим муассасаларига кириш чоғларида кириш имтиҳонларини таълим йўналишлари (мутахассисликлар) бўйича Ўзбекистон Республикаси таълим муассасаларига қабул қилиш Давлат комиссияси (Давлат комиссияси) томонидан тест синовлари учун белгиланган фанлар мажмуаси бўйича, беш балли баҳолаш тизими бўйича, анъанавий услубда топширадилар.

3. Фанлар бўйича кириш имтиҳонларини ўтказиш шакли - ёзма ёки оғзаки - Ўзбекистон Республикаси Олий ва ўрта махсус таълим вазирлиги билан келишилган ҳолда олий таълим муассасаси қабул комиссияси томонидан белгиланади.

4. Кўзи ожиз абитуриентлар билан тушунтириш ишларини олиб бориш учун олий таълим муассасаси қабул комиссияси томонидан махсус масъул ходим ажратилади.

5. Олий таълим муассасаси қабул комиссияси кириш имтиҳонларини ўтказиш учун фанлар комиссияларини ташкил этади.

6. Фан бўйича кириш имтиҳонларининг саволлари фан комиссияси томонидан умумий ўрта таълим дастурларига тўла мувофиқ ҳолда тузилади, ҳамда у белгиланган тартибда муҳокамадан ўтказилади ва тасдиқланади.

7. Кириш имтиҳонларини ўтказувчи комиссия таркибига кўзи ожизлар ёки ногиронлар жамиятининг вакили киради.

8. Олий таълим муассасалари қабул комиссиялари кўзи ожиз абитуриентлар учун кириш имтиҳонлари фанлари бўйича махсус тузилган жадвалга биноан консультациялар ташкил этадилар.

9. Кўрсатилган абитуриентлар тоифаси учун кириш имтиҳонлари қабул комиссиялари томонидан 26 июлга қадар ўтказилади.

10. Мазкур тоифа абитуриентлари ва кириш имтиҳонлари натижалари ҳақидаги маълумотлар 27 июлга қадар Давлат комиссиясига ва Давлат тест марказига топширилади.

11. Кириш имтиҳонларидан муваффақиятли ўтган абитуриентлар, Давлат комиссияси билан келишилган ҳолда, қабул комиссияси мажлисининг баённомасига асосан, олий таълим муассасаси ректорининг буйруғи билан, танловсиз таълим муассасасига қабул қилинадилар.

7-ИЛОВА

Республика мактаб олимпиадалари фани билан

олий таълим йўналиши ўртасидаги профиль

МУВОФИҚЛИК