Ўзбекистон Республикаси Вазирлар Маҳкамасининг 19.11.1993 й. 562-сон "Сўм-Купонлар"ни чет эл валютасига алмаштириш тартиби тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

19.11.1993 й.

N 562

"СЎМ-КУПОНЛАР"НИ ЧЕТ ЭЛ ВАЛЮТАСИГА

АЛМАШТИРИШ ТАРТИБИ ТЎҒРИСИДА

Нақд чет эл валютасининг ва Россия Банкининг 1993 йил нусхасидаги қоғоз пулларининг келиб тушишини кўпайтириш ҳамда "Сўм-Купонлар"нинг харид қувватини ошириш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Марказий банки томонидан мавжуд пул алмаштириш стационар пунктлари тармоғини кенгайтириш, вақтинчалик ва кўчма пул алмаштириш пунктларини очиш ва эркин алмаштириладиган валютани сотиб олиш ҳамда 1993 йилнинг ноябрь-декабрь ойлари мобайнида "Сўм-Купонлар"ни Россиянинг 1993 йил нусхасидаги рублларига алмаштириш миқдори бўйича банк муассасалари томонидан топшириқлар белгилаш тўғрисида киритилган таклифлар маъқуллансин.

2. Ўзбекистон Республикаси Марказий банки томонидан Ўзбекистон Республикаси Молия вазирлиги билан келишган ҳолда "Сўм-Купонлар"ни эркин алмаштириладиган валютага ва Россиянинг 1993 йил нусхасидаги рублларига алмаштириш бўйича ишларни ташкил этиш тўғрисида вақтинчалик низом" ва "Нақд "Сўм-Купонлар"ни эркин алмаштириладиган валютага алмаштириш курсини белгилаш тўғрисида вақтинчалик низом" тасдиқланганлиги маълумот учун қабул қилинсин.

3. Ўзбекистон Республикаси Ички ишлар вазирлиги янги ташкил этилаётган стационар, вақтинчалик ва кўчма пул алмаштириш пунктларининг зарур даражада қўриқланишини таъминласин.

4. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари пул алмаштириш пунктларининг ишлаши учун зарур шарт-шароитлар яратишни таъминласинлар.

Вазирлар Маҳкамасининг Раиси                                                 И. Каримов