Ўзбекистон Республикаси Вазирлар Маҳкамасининг 02.08.1994 й. 394-сон "Мингбулоқ нефть конини саноат йўли билан ўзлаштириш учун жой тайёрлаш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

02.08.1994 й.

N 394

МИНГБУЛОҚ НЕФТЬ КОНИНИ САНОАТ

ЙЎЛИ БИЛАН ЎЗЛАШТИРИШ УЧУН

ЖОЙ ТАЙЁРЛАШ ТЎҒРИСИДА

Мингбулоқ нефть кони ўзлаштирилиши ва бурғулаш ишлари юқори аномал қатламли босим шароитларида олиб борилиши муносабати билан ҳамда атрофдаги аҳоли яшайдиган жойларнинг экологик хавфсизлигини таъминлаш мақсадида Вазирлар Маҳкамаси ҚАРОР ҚИЛАДИ:

1. Вазирлар Маҳкамаси Мингбулоқ нефть кони ўзлаштирилишининг атроф муҳитга таъсирини ўрганиш ва шаҳарчалар аҳолисини бу зонадан кўчириш мақсадга мувофиқлигини аниқлаш бўйича ташкил этган комиссиянинг қудуқларнинг атроф муҳитга таъсири эҳтимол тутилаётган зоналар, жойнинг санитария ҳолати ва нефть конида фавқулодда ҳодисалар юз берганда аҳолини ҳимоя қилиш нормалари тўғрисидаги хулосасига розилик билдирилсин.

2. Наманган вилояти ҳокимлигининг кўчирилаётган аҳоли учун янги шаҳарча қурилиши жойини Задарё туманининг маркази Жомашўйнинг жанубий томонида Мингбулоқ конининг эҳтимол тутилаётган чегарасидан 8 км масофада белгилаш тўғрисидаги таклифи қабул қилинсин.

3. Давлат архитектура ва қурилиш қўмитаси Наманган вилояти ҳокимлигининг буюртмаси бўйича уч ой муддатда туман маркази Жомашўйни ривожлантиришнинг бош режасини ҳамда "Мингбулоқ нефть" корхонаси нефтчилари шаҳарчаси жойлаштирилишини ҳисобга олган ҳолда зарур ижтимоий инфраструктурага эга бўлган янги турар жой даҳаси қурилиши лойиҳасини ишлаб чиқсин.

4. Наманган вилояти ҳокимлиги:

Вазирлар Маҳкамасининг 1994 йил 27 июндаги 240-ф-сон фармойиши билан ташкил этилган комиссия билан келишган ҳолда нефть кони таъсири зонасида яшовчи аҳолини босқичма-босқич кўчириш тартибини белгиласин ва бундан кейин нефть конига туташ жойларда уй-жой ва объектлар қурилишини тўхтатсин;

1994 йил 1 декабргача тегишли вазирликлар ва идоралар билан биргаликда белгиланган тартибда биринчи навбатда кўчирилаётган аҳолининг якка тартибда қурилган иморати ва қишлоқ хўжалиги экинлари қийматини аниқласин ҳамда материалларни "Ўзистиқболстат" давлат қўмитаси ва Ўзбекистон Республикаси Молия вазирлигига тақдим этсин.

5. "Ўзистиқболстат" давлат қўмитаси ва Ўзбекистон Республикаси Молия вазирлиги "Ўзбекнефтгаз" корпорацияси билан биргаликда кўчирилаётган аҳолига мўлжалланган янги турар жой даҳаси қуриш лойиҳаси ишлаб чиқилгандан сўнг бир ой муддатда Вазирлар Маҳкамасига уй-жой ва ижтимоий инфраструктура объектлари қурилишини маблағ билан таъминлаш тўғрисида таклиф киритсин.

6. "Ўзсаноатхўжаликқурилиш" давлат корпорацияси, "Ўздеҳқончиликқурилиш" ва "Ўзжамоахўжаликқурилиш" бирлашмалари, "Ўзсувқурилиш" давлат концерни ҳамда Мелиорация ва сув хўжалиги вазирлигига 1995-1997 йилларда янги даҳага кўчиб келувчиларнинг биринчи босқичи учун уй-жой ва ижтимоий инфраструктура объектлари қурилишини Наманган вилояти ҳокимлиги буюртмаси бўйича бажариш топширилсин.

7. Коммунал хизмат кўрсатиш вазирлиги, Алоқа вазирлиги, Энергетика ва электрлаштириш вазирлиги, "Ўзавтойўл" давлат концерни Наманган вилояти ҳокимлиги билан биргаликда янги турар жой даҳасида ички ва тортиб келтириладиган муҳандислик коммуникацияларини қуриш бўйича таклифлар киритсинлар, ўз кучлари билан лойиҳа-смета ҳужжатларини тайёрлашни ва уларнинг қурилишини 1995 йил охиригача тугаллашни таъминласинлар.

8. Мелиорация ва сув хўжалиги вазирлиги, "Ўзсувқурилиш" давлат концерни ва Давлат табиатни муҳофаза қилиш қўмитаси "Ўзбекнефтгаз" корпорацияси буюртмаси бўйича Сирдарёнинг "Мингбулоқ" конига туташ жойларидаги қирғоқларини ҳимоя қилиш ва мустаҳкамлаш бўйича чора-тадбирларни ишлаб чиқсинлар ҳамда 1996 йил охиригача уларни амалга оширсинлар.

9. "Ўзбекнефтгаз" миллий корпорацияси Давлат табиатни муҳофаза қилиш қўмитаси билан биргаликда Норин ер ости чучук сув манбаини ва Сирдарё сувини нефть маҳсулотлари билан ифлосланишдан муҳофаза қилишни таъминлаш чора-тадбирларини ишлаб чиқсин ва амалга оширсин.

10. Вазирлар Маҳкамасининг "Наманган вилоятининг Мингбулоқ конида отилиб чиққан нефтни жиловлаш, аҳолини ижтимоий ҳимоя қилиш ва бу минтақада табиий ресурслардан самарали фойдаланиш бўйича кечиктириб бўлмайдиган чора-тадбирлар тўғрисида 1992 йил 18 мартдаги 135-сон қарори ўз кучини йўқотган деб ҳисоблансин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Қ.Ж. Ҳаққулов зиммасига юклансин.

Вазирлар Маҳкамасининг Раиси                                                         И. Каримов