Ўзбекистон Республикаси Вазирлар Маҳкамасининг 03.06.1995 й. 211-сон "Ўзбекистон Республикаси олий ўқув юртлари тизимини такомиллаштириш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

03.06.1995 й.

N 211

ЎЗБЕКИСТОН РЕСПУБЛИКАСИ

ОЛИЙ ЎҚУВ ЮРТЛАРИ ТИЗИМИНИ

ТАКОМИЛЛАШТИРИШ ТЎҒРИСИДА

Олий ҳунар таълими сифатини ошириш, олий ўқув юртларининг интеллектуал потенциалидан ва моддий-техника базасидан самарали фойдаланиш мақсадида Вазирлар Маҳкамаси ҚАРОР ҚИЛАДИ:

1. Олий ва ўрта махсус таълим вазирлигининг олий ўқув юртларининг вилоятлардаги филиалларини қайта ташкил этиш ҳақида ҳамда 1995 йилнинг 1 июлидан бошлаб мазкур вазирлик тизимида қуйидаги йириклаштирилган ўқув юртларини ташкил этиш тўғрисидаги таклифлари қабул қилинсин;

Андижон вилояти

Андижон иқтисодиёт ва бошқарув институти ҳамда Андижон тажриба ўқув-ишлаб чиқариш маркази негизида - Андижон муҳандислик-иқтисодиёт институти ташкил этилсин;

Бухоро вилоятида

Тошкент давлат техника университетининг Бухоро филиали Бухоро озиқ-овқат ва енгил саноат технологияси институти таркибига киритилсин;

Қашқадарё вилоятида

Қарши аграр-иқтисодиёт институти ҳамда Тошкент давлат техника университетининг Қарши филиали негизида - Қарши муҳандислик-иқтисодиёт институти ташкил этилсин;

Бухоро озиқ-овқат ва енгил саноат технологияси институтининг Шаҳрисабз умумтехника факультети негизида - Шаҳрисабз технология коллежи ташкил этилсин;

Навоий вилоятида

Тошкент давлат техника университетининг Навоий филиали негизида - Навоий техника коллежи ташкил этилсин;

Сурхондарё вилоятида

Тошкент автомобиль-йўллар институтининг Термиз филиали негизида - Термиз давлат университетининг муҳандислик-техника факультети ташкил этилсин;

Тошкент алоқа электртехника институтининг Термиз филиали тугатилсин;

Фарғона вилоятида

Тошкент давлат техника университетининг Фарғона филиали негизида - Фарғона политехника институтининг приборсозлик маркази ташкил этилсин;

Фарғона политехника институтининг Қўқон филиали негизида - Қўқон техника коллежи ташкил этилсин;

Тошкент тўқимачилик ва енгил саноат институтининг Марғилон кечки умумтехника факультети ҳамда Марғилон кечки тўқимачилик техникуми негизида- Марғилон тўқимачилик коллежи ташкил этилсин;

Хоразм вилоятида

Тошкент давлат иқтисодиёт университетининг Урганч филиали, 1-Тошкент давлат тиббиёт институтининг Урганч филиали негизида - Урганч давлат университетининг иқтисодиёт ва тиббиёт факультетлари ташкил этилсин;

Тошкент вилоятида

Тошкент давлат техника университетининг Олмалиқ факультети, Ангрен ва Чирчиқ муҳандислик-техника марказлари негизида - тегишли равишда Олмалиқ, Ангрен ва Чирчиқ техника коллежлари ташкил этилсин;

Тошкент архитектура-қурилиш институтининг Ангрен факультети Ангрен техника коллежи таркибига киритилсин.

2. Олий ва ўрта махсус таълим вазирлиги, тасарруфида юқорида қайд этилган олий ўқув юртлари ва бўлинмалар бўлган вазирликлар Қорақалпоғистон Республикаси Вазирлар Кенгаши, вилоятлар ҳокимликлари билан биргаликда ушбу қарорни бажаришга доир зарур ташкилий чора-тадбирларни амалга оширсинлар.

3. Вазирликлар ва идоралар тегишли ихтисосликлар бўйича юқори малакали кадрлар тайёрлашда Олий ва ўрта махсус таълим вазирлигига моддий-техникавий ҳамда бошқа зарур ёрдам кўрсатсинлар.

4. Олий ва ўрта махсус таълим вазирлиги:

бир ой муддатда Вазирлар Маҳкамасига олий ўқув юртлари, шу жумладан, давлат коллежлари тўғрисидаги Низомни тасдиқлаш учун киритсин, шунингдек, йириклаштирилган олий ўқув юртларига раҳбарликни кучайтириш ҳақида таклифлар тақдим этсин;

ҳозирги вақтда ўқишаётган талабаларнинг ушбу қарор билан ташкил этилаётган коллежларда тегишли олий маълумот олишларига доир амалий чора-тадбирлар кўрсин;

белгилаб қўйилсинки, кўрсатиб ўтилган коллежларда профессор-ўқитувчилар таркибига иш ҳақи тўлаш илгариги даражада сақланиб қолади.

5. Мазкур қарорнинг бажарилишини назорат қилиш Вазирлар Маҳкамасининг Таълим ва фан бўлимига юклансин.

Вазирлар Маҳкамасининг Раиси                                                И. Каримов