Ўзбекистон Республикаси Президентининг 24.01.2008 й. ПҚ-785-сон "2008 йилда пахта етиштиришнинг прогноз ҳажмлари ва ғўзани навлар бўйича жойлаштириш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

24.01.2008 й.

N ПҚ-785

2008 ЙИЛДА ПАХТА ЕТИШТИРИШНИНГ

ПРОГНОЗ ҲАЖМЛАРИ ВА ҒЎЗАНИ НАВЛАР

БЎЙИЧА ЖОЙЛАШТИРИШ ТЎҒРИСИДА

Республика минтақаларининг тупроқ-иқлим шароитларини ҳисобга олган ҳолда, пахта толасининг сифати бўйича жаҳон стандартлари ва талабларига жавоб берадиган ғўзанинг тезпишар ва серҳосил селекция навларини оқилона жойлаштириш, шунингдек, 2008 йил ҳосили учун пахта етиштирувчи хўжаликларни маромига етказилган уруғлик чигит билан таъминлаш мақсадида:

1. Қорақалпоғистон Республикаси Вазирлар Кенгаши, вилоятлар ҳокимликларининг Ўзбекистон Республикаси Қишлоқ ва сув хўжалиги вазирлиги, Ташқи иқтисодий алоқалар, инвестициялар ва савдо вазирлиги, "Ўзпахтасаноат" уюшмаси билан келишилган қуйидаги:

2008 йилда 1-иловага* мувофиқ пахта етиштиришнинг прогноз ҳажмлари;

ғўзанинг районлаштирилган ва истиқболли навларини 2-иловага* мувофиқ жойлаштириш;

2008 йил учун ғўзанинг асосий селекция навларини истиқболлилиги ва иқтисодий рағбатлантирилиши бўйича 3-иловага* мувофиқ гуруҳларга ажратиш;

чигитни 4-иловага* мувофиқ плёнка остига экиш ва хўжаликларни полиэтилен плёнкалар билан таъминлаш тўғрисидаги таклифларига розилик берилсин.

2. 2008 йилда давлат эҳтиёжлари учун харид қилинадиган пахта толаси ҳажми унинг амалда етиштириладиган ҳажмининг 50 фоизи миқдорида сақлаб қолинсин.

Пахта етиштиришнинг 1-иловада кўрсатилган ҳажмлари 2008 йил ҳосили учун пахта етиштирувчи хўжаликлар ва тайёрлов ташкилотлари ўртасида контрактация шартномалари тузишда назорат кўрсаткичлари сифатида қаралсин.

3. Белгилансинки, қишлоқ ва сув хўжалиги вазири, "Ўзпахтасаноат" уюшмаси раиси, Қорақалпоғистон Республикаси Вазирлар Кенгаши раиси, вилоятлар ва туманларнинг ҳокимлари:

туманда иккитадан ортиқ бўлмаган, хўжаликларда эса битта тавсия этилган ғўза нави экилишини ҳисобга олган ҳолда ғўза навларини жойлаштиришнинг тасдиқланган тартибига риоя қилиниши;

республика илмий-тадқиқот институтлари томонидан ишлаб чиқилган тавсияномалар бўйича ҳар бир селекция навлари учун ғўзани парвариш қилиш агротехникасига қатьий амал қилиниши учун шахсан жавобгар бўладилар.

4. "Ўзпахтасаноат" уюшмаси, Ўзбекистон Республикаси Қишлоқ ва сув хўжалиги вазирлиги:

2008 йил 20 февралгача уруғлик пахтани тозалашни, 27 февралгача эса - эҳтиёт захирасини ҳисобга олган ҳолда, уруғлик чигит тайёрлашни тугалласин, шунингдек уруғчилик корпорациялари ва компанияларини туксизлантирилган чигитлар билан 5-иловага* мувофиқ ҳажмларда таъминласин;

хўжаликларга юқори сифатли уруғлик чигитнинг фақат дориланган ва сертификатлар мавжуд бўлган ҳолда, селекция навларини 50 фоиздан кам бўлмаган миқдордаги ҳақини олдиндан тўлаш шарти билан жойлаштиришнинг тасдиқланган тартибига қатъий мувофиқ равишда берилишини таъминласин.

5. Ўзбекистон Республикаси Қишлоқ ва сув хўжалиги вазирлиги, Қорақалпоғистон Республикаси Вазирлар Кенгаши ва вилоятлар ҳокимликлари:

уруғлик чигит экиш учун пахта экадиган хўжаликлар рўйхатини бир ой муддатда танлов асосида белгиланган тартибда қайта кўриб чиқсинлар;

ғўзанинг янги навларини синашни фақат илмий-тадқиқот институтларининг экспериментал базаларида, базавий хўжаликларда, янги навларни олдиндан кўпайтириш хўжаликлари ва давлат нав синаш участкаларида амалга оширсинлар.

6. Ўзбекистон Республикаси Бош вазири Ш.М. Мирзиёев:

пахта етиштирувчи хўжаликлар билан пахтани қайта ишлаш корхоналари ўртасида контрактация шартномаларининг ўз вақтида тузилиши устидан назоратни;

тузилган шартномаларга мувофиқ минерал ўғитлар, ёқилғи-мойлаш материаллари, полиэтилен плёнкалар ва бошқа моддий-техника ресурсларини пахта етиштирувчи хўжаликларга ҳақини белгиланган тартибда тўлаш шарти билан ўз вақтида етказиб бериш ишларининг мувофиқлаштирилишини;

ғўзани парвариш қилишда агротехника тадбирларининг сифатли ўтказилишини, моддий ресурсларни етказиб беришда шартнома мажбуриятларига амал қилинишини таъминламаётган давлат ва хўжалик бошқаруви органларининг мансабдор шахсларига нисбатан қаттиқ интизомий жавобгарлик чоралари кўрилишини таъминласин.

7. Қуйидагилар, истисно тариқасида:

Шўртан газ-кимё комплекси 2008 йилда чигит экиш учун полиэтилен плёнка ишлаб чиқарувчи заводларга хом ашё (гранулалар)нинг жами ҳажмини сотишда;

"Жиззах пластмасса" акциядорлик жамияти ва "Андижонполиэтилени" қўшма корхонаси - тайёр полиэтилен плёнкаларни пахта етиштирувчи хўжаликларга сотишда;

экиш учун мўлжалланган уруғлик чигити - тизим ичида ҳаракатланганда ҳам, шунингдек 2008 йил ҳосили учун "Ўзпахтасаноат" уюшмасининг ҳудудий бўлинмалари томонидан сотилганда ҳам қўшилган қиймат солиғи тўлашдан озод қилинсин.

8. Мазкур Қарорнинг ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.

Ўзбекистон Республикасининг Президенти                            И. Каримов

*) Иловалар рус тилидаги матнда берилган.

"Ўзбекистон Республикаси Олий Мажлиси палаталарининг Ахборотномаси", 2008 йил, 1-сон, 55-модда.