Ўзбекистон Республикаси Президентининг 07.05.2008 й. ПҚ-862-сон "2008 йил бошоқли дон экинлари ҳосилини уюшқоқлик билан йиғиштириб олиш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

07.05.2008 й.

N ПҚ-862

2008 ЙИЛ БОШОҚЛИ ДОН ЭКИНЛАРИ

ҲОСИЛИНИ УЮШҚОҚЛИК БИЛАН

ЙИҒИШТИРИБ ОЛИШ ЧОРА-

ТАДБИРЛАРИ ТЎҒРИСИДА

Бошоқли дон экинлари ҳосилини ўз вақтида ва сифатли йиғиштириб олишни таъминлаш ҳамда давлат ресурсларига ғалла сотиш бўйича контрактация шартномаларини бажариш мақсадида:

1. Дон ҳосили ўрим-йиғимини ўз вақтида ва сифатли ташкил этиш ҳамда ўтказиш учун шахсий жавобгарлик Қорақалпоғистон Республикаси Вазирлар Кенгашининг Раиси, вилоятлар ҳокимлари, Ўзбекистон Республикаси Қишлоқ ва сув хўжалиги вазирлиги, "Ўзагромашсервис" уюшмаси ва унинг машина-трактор парклари ҳудудий бирлашмалари раҳбарлари зиммасига юклансин.

2. Қорақалпоғистон Республикаси Вазирлар Кенгаши, вилоятлар ҳокимликлари, Ўзбекистон Республикаси Қишлоқ ва сув хўжалиги вазирлиги, "Ўзагромашсервис" уюшмаси ва унинг машина-трактор парклари ҳудудий бирлашмалари, "Ўздонмаҳсулот" акциядорлик компанияси:

ғалла ўриш комбайнларини, дон ташиш учун жалб этиладиган барча турдаги транспорт воситаларини, шунингдек дон йиғиладиган хирмон ва майдонларни, дон тозалаш машиналари ҳамда ғаллани дастлабки қайта ишлаш учун зарур бўлган бошқа моддий-техника базасини тайёрлаб қўйиш бўйича ташкилий-иқтисодий комплекс чора-тадбирларни жорий йилнинг 20 майигача тугаллашни амалга оширилишини;

тайёрлов корхоналари ва пунктларида хўжаликлардан ғаллани фақат дастлабки тозалангандан кейин, ифлослиги ва намлиги бўйича амалдаги стандарт ва нормативларга қатъий риоя этган ҳолда қабул қилинишини;

идоравий мансублигидан қатъи назар, корхоналар ва ташкилотларнинг дон қабул қилиш пунктларига ғалла ташиш учун яроқли бўлган транспорт воситалари шартнома асосида жалб этилишини;

Ўзбекистон Республикаси Молия вазирлиги ҳузуридаги Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси билан биргаликда хўжаликлар билан - давлат эҳтиёжлари учун харид қилинаётган ғалла учун, машина-трактор парклари билан - кўрсатилган механизация хизматлари, шунингдек, ғалла ўриш комбайнлари операторларига иш ҳақи тўлаш учун ўз вақтида ҳисоб-китоб қилинишини таъминласин.

Белгилансинки, ғаллани дон қабул қилиш корхоналарига етказиш бўйича транспорт харажатлари автокорхоналар, қишлоқ хўжалик корхоналари ва нон маҳсулотлари корхоналари ўртасида тузилган шартномага мувофиқ "Ўздонмаҳсулот" акциядорлик компанияси томонидан тўланади.

3. Ғалла етиштирувчи қишлоқ хўжалик ишлаб чиқарувчилар (фермерлар) биринчи навбатда давлат эҳтиёжлари учун етказиб бериладиган ғаллани харид қилишга тузилган контрактация бўйича ўз мажбуриятларини бажаришлари ва шундан кейин ғалланинг янги ҳосилини бошқа мақсадларга йўналтирилишини амалга оширишлари тўғрисида қатъий тартиб ўрнатилсин.

4. Ўзбекистон Республикаси Ички ишлар вазирлиги жорий йилнинг 1 июнидан бошлаб Ички ишлар вазирлиги таълим муассасаларининг тингловчилари ва курсантлари контингентини иловага мувофиқ уларни тақсимлаган ҳолда вилоятлар ички ишлар бошқармалари ихтиёрига юборсин.

"Ўзбекистон темир йўллари" давлат-акциядорлик компанияси, "Тошшаҳартрансхизмат" уюшмаси Ўзбекистон Республикаси Ички ишлар вазирлиги буюртманомалари бўйича, тингловчилар ва курсантларни вақтинчалик ўрнашиш жойига ташиш ва дон йиғиштириш тугаллангандан сўнг уларни қайтариб олиб келиш учун транспорт воситалари зарур миқдорда ажратилишини таъминласинлар.

Жиззах, Қашқадарё, Сирдарё ва Тошкент вилоятлари ҳокимликлари:

фермер хўжаликлари томонидан "Ўзбекистон темир йўллари" давлат-акциядорлик компанияси, "Тошшаҳартрансхизмат" уюшмаси билан Ўзбекистон Республикаси Ички ишлар вазирлиги тингловчилари ва курсантларини вақтинчалик ўрнашиш жойига ташиш ва дон йиғиштириш тугаллангандан сўнг уларни қайтариб олиб келиш бўйича хизматлар кўрсатиш тўғрисида тегишли шартномалар тузилишини;

тингловчилар ҳамда курсантларни вақтинчалик яшаш жойлари, шунингдек озиқ-овқатлар, уларни ташиш учун транспорт ва ёнилғи-мойлаш материаллари билан - фермер хўжаликлари маблағлари ҳисобига таъминласинлар.

5. Қорақалпоғистон Республикаси Вазирлар Кенгаши ва вилоятлар ҳокимликлари Ўзбекистон Республикаси Ички ишлар вазирлиги билан биргаликда йўлларда ҳаракатланиш хавфсизлигини таъминлаш, ёнғинлар келиб чиқишининг олдини олиш, шунингдек 2008 йилги бошоқли дон экинлари ҳосилининг талон-торож қилинишига ва нобуд бўлишига йўл қўймаслик юзасидан зарур чора-тадбирларни кўрсинлар.

Ерларни шудгорлашдан олдин тозалаш мақсадида далалардаги экин поялари ва қолдиқлари ёқиб юборилиши тақиқлансин.

6. "Ўзбекнефтгаз" миллий холдинг компанияси ва "Ўзнефтмаҳсулот" акциядорлик компанияси ёнилғи-мойлаш материалларининг зарур захирасини яратсин ҳамда ҳосилни йиғиштириб олиш, ташиш ва тайёрлаш билан банд бўлган қишлоқ хўжалиги корхоналари, машина-трактор парклари ва бошқа ташкилотларга белгиланган тартибда узлуксиз етказиб берилишини ташкил этсин.

7. Ўзбекистон Республикаси Қишлоқ ва сув хўжалиги вазирлиги, "Ўзстандарт" агентлиги ва "Ўздавдонинспекция" давлат эҳтиёжлари учун етказиб бериладиган ғалла ва уруғлик материали сифати устидан тегишли назорат ўрнатсинлар.

Уруғлик ғаллани давлат ресурслари учун харид қилинадиган товар ғалланинг умумий ҳажми ҳисобига топшириш, шунингдек озиқ-овқат ғалласини уруғлик мақсадида фойдаланиш тақиқлансин. Белгилаб қўйилсинки, Қорақалпоғистон Республикаси Вазирлар Кенгашининг Раиси, вилоятлар ва туманлар ҳокимлари, "Ўздонмаҳсулот" акциядорлик компанияси ва унинг жойлардаги бўлинмалари раҳбарлари 2009 йил ҳосили учун бошоқли дон экинлари уруғлигининг ўз вақтида ва сифатли ғамланиши, бунда алоҳида эътиборни Ўзбекистон Республикаси Президентининг 2007 йил 13 сентябрдаги ПҚ-693-сонли Қарорига мувофиқ уруғчилик фермер хўжаликларида ишлаб чиқарилган суперэлита ва элита уруғини тўлиқ ҳажмда харид қилиши учун шахсан жавобгардирлар.

8. Ўзбекистон Республикаси Давлат статистика қўмитаси хўжаликлар томонидан дон сотиш тўғрисидаги статистика ҳисоботларининг ишончлилигини дон қабул қилиб олиш корхоналари бўйича мунтазам равишда текшириб борилишини таъминласин ва тезкорлик билан Вазирлар Маҳкамасига ахборот берсин.

9. Мазкур Қарорнинг ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.

Ўзбекистон Республикасининг Президенти                           И. Каримов