ВСЕ ЗАКОНОДАТЕЛЬСТВО УЗБЕКИСТАНА

ЎзР Конунчилиги / Иқтисодиётнинг айрим соҳалари / Қурилиш ва архитектура / Уй-жой қурилиши /

Ўзбекистон Республикаси Президентининг 29.01.2009 й. ПҚ-1051-сон "Уй-жой фондини фойдаланишга тайёр ҳолда топшириш шартларида реконструкция қилиш ва таъмирлаш бўйича пудрат ишларини кенгайтиришни рағбатлантиришга доир қўшимча чора-тадбирлар тўғрисида"ги Қарори

Функция недоступна

Данная функция доступно только для клиентов (пользователей)

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

29.01.2009 й.

N ПҚ-1051


УЙ-ЖОЙ ФОНДИНИ ФОЙДАЛАНИШГА

ТАЙЁР ҲОЛДА ТОПШИРИШ ШАРТЛАРИДА

РЕКОНСТРУКЦИЯ ҚИЛИШ ВА ТАЪМИРЛАШ

БЎЙИЧА ПУДРАТ ИШЛАРИНИ КЕНГАЙТИРИШНИ

РАҒБАТЛАНТИРИШГА ДОИР ҚЎШИМЧА

ЧОРА-ТАДБИРЛАР ТЎҒРИСИДА


Мамлакатимиз шаҳарлари ва аҳоли пунктлари қиёфасини тубдан ўзгартириш, архитектуравий режалаштирган ҳолда қуришни ташкил этишни такомиллаштириш бўйича кенг чора-тадбирлар комплексини амалга ошириш ҳисобига уй-жой фондининг ҳолатини қатъиян яхшилаш, уй-жойларни фойдаланишга тайёр ҳолда топшириш шартларида мукаммал таъмирлаш, реконструкция қилиш ва қуриш бўйича пудрат ишларини янада кенгайтиришни рағбатлантириш мақсадида:


1. Ўзбекистон Республикаси Иқтисодиёт вазирлиги, "Давархитектқурилиш" қўмитаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг шаҳарлар ва туманларда уй-жой фонди объектларини фойдаланишга тайёр ҳолда топшириш шартларида режалаштириш, безаш, қуриш, реконструкция қилиш ва таъмирлаш бўйича ишларни амалга оширувчи ихтисослаштирилган таъмирлаш-қурилиш ташкилотларини ташкил этиш тўғрисидаги таклифи қабул қилинсин.

Қуйидагилар янгидан ташкил этилаётган ихтисослаштирилган таъмирлаш-қуриш ташкилотларининг асосий вазифалари этиб белгилансин:

аҳоли, юридик шахслар ва ягона буюртмачи хизматлари билан шартнома асосида, фойдаланишга тайёр ҳолда топшириш шартларида уй-жойларни қайта режалаштириш, безаш, реконструкция қилиш, таъмирлаш ва қуриш, шу жумладан, келгусида янги мулкдорларга, биринчи навбатда ёш оилаларга бериш ва кимошди савдоларига қўйиш учун эскирган ва эгасиз уй-жойларни тиклаш бўйича ишларнинг бутун комплексини амалга ошириш;

уй-жойларни фойдаланишга тайёр ҳолда топшириш шартларида мукаммал ва жорий таъмирлашни, шу жумладан, томларни таъмирлаш, уйлар ичидаги муҳандислик коммуникацияларини алмаштириш ва кўп квартирали уй-жойларнинг умумий фойдаланиладиган жойларини мукаммал таъмирлаш ишларини сифатли бажариш;

юқори даражада эскирган кўп қаватли уй-жойларни реконструкция қилиш ва мукаммал таъмирлашда унинг хавфсизлигини, қурилиш қиймати арзонлаштирилишини ва қуриш циклининг давом этиш муддатини қисқартиришни таъминлайдиган янги илғор технологияларни замонавий режалаштириш ечимларидан, қурилиш материаллари ва конструкцияларидан фойдаланган ҳолда қўллаш;

даҳа ичидаги эскирган уй-жой муҳандислик тармоқларини алмаштириш ва турар жойларга қайта қуриш, шу жумладан, турар жой фондининг уйлари олдидаги ҳудудда ландшафт лойиҳа ечимларидан фойдаланган ҳолда ободонлаштириш ишларини амалга ошириш;

аҳолини, биринчи навбатда ёшларни қурилиш мутахассисликлари бўйича янги иш ўринлари ташкил этиш асосида турар жой шароитларини яхшилаш ва уй хўжалигини юритиш жараёнларига фаол жалб этиш.


2. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Ўзбекистон Республикаси Давлат мулки қўмитаси, "Давархитектқурилиш" қўмитаси, Меҳнат ва аҳолини ижтимоий муҳофаза қилиш вазирлиги билан биргаликда уч ой муддатда:

ҳар бир шаҳар ва қишлоқ туманида хусусий мулк шаклидаги юридик шахс ҳуқуқига эга бўлган ихтисослаштирилган таъмирлаш-қурилиш ташкилотларини ташкил этиш учун зарур шарт-шароитлар яратилишини;

мавжуд фойдаланилмаётган турар жой бинолари, шу жумладан, фойдаланилмаётган ишлаб чиқариш базаси инвестиция мажбуриятларини қабул қилиш шарти билан ихтисослаштирилган таъмирлаш-қурилиш ташкилотларига белгиланган тартибда текинга ёки имтиёзли асосда узоқ муддатли ижарага берилишини таъминласинлар;

зарур инвентарь, қурилиш техникаси ва кичик механизациялаш воситалари билан таъминлашда, шунингдек қурилиш касбларини эгаллаган ва ишга жойлашишга муҳтож бўлган малакали ишчилар ва муҳандис-техник кадрлар билан таъминлашда ёрдам берсинлар.


3. Янгидан ташкил этилаётган ихтисослаштирилган таъмирлаш-қурилиш ташкилотлари ва "Қишлоқ қурилиш инвест" инжиниринг компанияси билан тузилган шартномалар бўйича фойдаланишга тайёр ҳолда топшириш шартлари билан якка тартибда уй-жой қуриш доирасида улар томонидан амалга ошириладиган ишлар ҳажмлари бўйича пудрат ташкилотлари 2017 йилнинг 1 январигача:

солиқларнинг барча турларини ва давлат мақсадли фондларига мажбурий ажратмаларни тўлашдан озод қилинсин, бюджетдан ташқари Пенсия жамғармаси бундан мустасно;

Вазирлар Маҳкамаси томонидан тасдиқланадиган рўйхатлар бўйича Ўзбекистон Республикаси ҳудудига олиб кириладиган қурилиш техникаси ва кичик механизациялаш воситалари учун божхона тўловлари тўлашдан (божхона расмийлаштируви йиғимлари бундан мустасно) озод қилинсин.

5. Ўзбекистон Республикаси Иқтисодиёт вазирлиги, Ўзбекистон республика товар-хом ашё биржаси уй-жой фондини реконструкция қилиш, қуриш ва таъмирлаш учун, ихтисослаштирилган таъмирлаш-қурилиш ташкилотларига биржа котировкаларининг ўртача нархлари бўйича тўғридан-тўғри шартномалар асосида етказиб бериш учун зарур ҳажмда цемент, металл прокати, асбоцемент плиталар (шифер) ва бошқа қурилиш материаллари ажратишни назарда тутсинлар.


6. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:

икки ой муддатда уй-жой фондини, уларнинг идоравий бўйсунувидан қатъи назар, фойдаланилмаётган авария ҳолатидаги ва эскириб кетган уй-жойларни, кўп квартирали уйлардаги бўш турган хоналарни, шу жумладан, ётоқхоналар ва қурилиши тугалланмаган объектларни аниқлаш мақсадида ялпи хатловдан ўтказсинлар ҳамда улар бўйича қонун ҳужжатларига мувофиқ, уларни маҳаллий давлат ҳокимияти органларига беришни назарда тутган ҳолда зарур қарорлар қабул қилсинлар;

хатлов якунлари бўйича бир ой муддатда эскириб кетган, авария ҳолатидаги ва бўш турган уй-жойларни, шунингдек бўш турган ётоқхоналар ва қурилиши тугалланмаган объектларни, молиялаштиришнинг аниқ манбаларини белгилаган ҳолда, яшаш учун санитария нормаларига ва фойдаланиш қоидаларига жавоб берадиган замонавий уй-жойларга (хонадонларга) қайта режалаштиришни ҳисобга олиб, Уй-жой фондини капитал реконструкция қилиш ва таъмирлаш дастурини ишлаб чиқсин ва тасдиқлаш учун Вазирлар Маҳкамасига киритсин.


7. "Ўзқурилишматериаллари" акциядорлик компанияси Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда 2009 йил 1 июлгача республиканинг ҳар бир тумани ва шаҳрида аҳолининг эҳтиёжига ва уй-жой фонди объектлари бўйича таъмирлаш-қурилиш ҳажмларига қараб қурилиш материалларининг жорий биржа котировкаларидан ошмайдиган нархлар бўйича аҳолига қурилиш ва пардозлаш материалларини сотиш юзасидан ана шу маҳсулотларни ишлаб чиқарувчи корхоналарнинг ихтисослаштирилган фирма дўконлари ташкил этилишини таъминласин.


8. Ўзбекистон Республикаси Вазирлар Маҳкамаси бир ой муддатда амалдаги қонун ҳужжатларига ушбу қарордан келиб чиқадиган зарур ўзгартиш ва қўшимчалар киритсин.


9. Мазкур қарорнинг бажарилишини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.



Ўзбекистон Республикаси Президенти                                         И. Каримов



"Ўзбекистон Республикаси қонун ҳужжатлари тўплами", 2009 йил, 5-сон, 38-модда.


Ўзбекистон Республикаси Олий Мажлиси палаталарининг Ахборотномаси, 2009 йил., 1-сон, 26-модда
















































Время: 0.1391
по регистрации МЮ строгое соответствие
  • Все
  • действующие
  • утратившие силу
  • Русский
  • Ўзбекча
  • Оба языка
  • любая дата
  • точная дата
  • период
  • -

Свернуть поиск