Ўзбекистон Республикасининг 13.01.1992 й. 504-XII-сон "Ўзбекистон Республикаси Президенти ҳузуридаги Ўзбекистон Республикасининг Давлат назорати комитетини таъсис этиш тўғрисида"ги Қонуни

Функция недоступна

ЎЗБЕКИСТОН РЕСПУБЛИКАСИНИНГ

ҚОНУНИ

13.01.1992 й.

N 504-ХII

ЎЗБЕКИСТОН РЕСПУБЛИКАСИ ПРЕЗИДЕНТИ

ҲУЗУРИДА ЎЗБЕКИСТОН РЕСПУБЛИКАСИНИНГ

ДАВЛАТ НАЗОРАТИ КОМИТЕТИНИ ТАЪСИС

ЭТИШ ТЎҒРИСИДА

Ўзбекистон Республикаси Олий Кенгаши ҚАРОР ҚИЛАДИ:

1. Ўзбекистон Республикаси Президенти ҳузурида Ўзбекистон Республикасининг Давлат назорати комитети таъсис этилсин.

2. Ўзбекистон Республикаси Президенти ҳузуридаги Ўзбекистон Республикасининг Давлат назорати комитети республика бошқарув - ижроия ҳокимиятининг олий назорат идораси бўлиб, Ўзбекистон Республикасининг Президенти раҳбарлигида иш олиб боради ва Ўзбекистон Республикаси Олий Кенгашига ҳисоб беради.

3. Ўзбекистон Республикаси Президенти ҳузуридаги Ўзбекистон Республикаси Давлат назорати комитетининг Раиси Ўзбекистон Республикаси Президенти томонидан беш йил муддатга тайинланади ва Ўзбекистон Республикасининг Олий Кенгаши томонидан тасдиқланади. Айни бир шахснинг ўзи ушбу лавозимга қаторасига икки муддатдан кўпга тайинланиши мумкин эмас.

4. Ўзбекистон Республикаси Президенти ҳузуридаги Ўзбекистон Республикаси Давлат назорати идоралари Ўзбекистон Республикаси Олий Кенгаши қабул қилган қонунлар ва қарорларнинг, Президентнинг фармонлари ва фармойишларининг, хўжалик қонунларининг, ижтимоий ва иқтисодий дастурларнинг бажарилиши, давлат ва ижроия интизомига риоя этилиши юзасидан мансабдор шахсларнинг масъулиятини текширадилар.

Давлат назорати идораларининг фаолиятини ташкил этиш ва бу фаолиятни амалга ошириш тартиби Ўзбекистон Республикаси Президенти тасдиқлайдиган Низомда белгилаб берилади.

5. Ўзбекистон Республикаси Халқ назорати комитети тугатилсин.

6. Ўзбекистон Республикаси Олий Кенгаши 1991 йил 18 ноябрда қабул қилган "Ўзбекистон Республикасининг Назорат палатасини ташкил этиш тўғрисида"ги қарори ўз кучини йўқотган деб ҳисоблансин.

Ўзбекистон Республикасининг Президенти                                   И. Каримов

Ўзбекистон Республикаси Олий Кенгашининг Ахборотномаси, 1992 й., 3-сон, 151-модда