Ўзбекистон Республикасининг 14.01.1992 й. 515-XII-сон "Ўзбекистон Республикасидан ташқарига товар-моддий бойликларни олиб чиқиб кетишнинг белгиланган тартибни бузганлик учун жавобгарлик тўғрисида"ги Қонуни

Функция недоступна

ЎЗБЕКИCТОН РЕСПУБЛИКАСИНИНГ

ҚОНУНИ

14.01.1992 й.

N 515-ХII

ЎЗБЕКИСТОН РЕСПУБЛИКАСИДАН ТАШҚАРИГА

ТОВАР-МОДДИЙ БОЙЛИКЛАРНИ ОЛИБ ЧИҚИБ

КЕТИШНИНГ БЕЛГИЛАНГАН ТАРТИБИНИ

БУЗГАНЛИК УЧУН ЖАВОБГАРЛИК

ТЎҒРИСИДА

Бозорга ўтиш даврида кенг авж олган ва республика иқтисодиётига хавф туғдирган товар-моддий бойликларни Ўзбекистон Республикасидан ташқарига ғайриқонуний равишда олиб чиқиб кетишнинг олдини олиш мақсадида Ўзбекистон Республикаси Олий Кенгаши ҚАРОР ҚИЛАДИ:

1) 1985 йил 13 декабрдаги Ўзбекистон Республикаси Қонуни билан тасдиқланган Ўзбекистон Республикасининг Маъмурий ҳуқуқбузарлик тўғрисидаги кодекси (Ўзбекистон Республикаси Олий Советининг Ведомостлари, 1985 йил, N 35, 412-модда) қуйидаги мазмунли 166-2 ва 233-1-моддалар билан тўлдирилсин:

166-2-модда. Товар-моддий бойликларни олиб чиқиб

кетишнинг белгиланган тартибини бузганлик

Ўзбекистон Республикасидан ташқарига товарлар, материаллар, хом ашё, қишлоқ хўжалик маҳсулотлари, озиқ-овқат маҳсулотлари ва бошқа моддий бойликларни олиб чиқиб кетишнинг белгиланган тартибини бузганлик -

фуқароларга - икки юз сўмдан беш юз сўмгача миқдорда, мансабдор шахсларга - беш юз сўмдан бир минг сўмгача миқдорда жарима солиниб, олиб чиқиб кетилаётган товар-моддий бойликларнинг мусодара қилинишига сабаб бўлади.

233-1-модда. Ўзбекистон Республикаси Ички ишлар вазирлиги

ҳузуридаги товар-моддий бойликларни олиб чиқиб кетишни

назорат қилувчи давлат инспекцияси идоралари

Ўзбекистон Республикаси Ички ишлар вазирлиги ҳузуридаги Товар-моддий бойликларни олиб чиқиб кетишни назорат қилувчи давлат инспекцияси идоралари ушбу Кодекснинг 166-2-моддасида кўзда тутилган маъмурий ҳуқуқбузарликлар тўғрисидаги ишларни кўриб чиқадилар.

Ушбу модданинг биринчи қисмида кўрсатилган идоралар номидан маъмурий ҳуқуқбузарликлар тўғрисидаги ишларни кўриб чиқишга ва маъмурий жазо беришга Ўзбекистон Республикаси Ички ишлар вазирлиги хузуридаги Товар-моддий бойликларни олиб чиқиб кетишни назорат қилувчи давлат инспекцияси Бош бошқармасининг бошлиғи ва унинг ўринбосарлари, шунингдек Ўзбекистон Республикаси Ички ишлар вазирлиги ҳузуридаги Товар-моддий бойликларни олиб чиқиб кетишни назорат қилувчи давлат инспекциясининг Қорақалпоғистон Республикасидаги, вилоятлар ва Тошкент шаҳридаги бўлинмаларининг бошлиқлари ва бошлиқ ўринбосарлари ҳам ҳақлидирлар";

2) 1959 йил 21 майдаги Ўзбекистон Республикаси Қонуни билан тасдиқланган Ўзбекистон Республикаси Жиноят кодекси (Ўзбекистон Республикаси Олий Советининг Ведомостлари, 1959 йил, N 6, 2-модда) қуйидаги мазмунли 179-2-модда билан тўлдирилсин:

"179-2-модда. Товар-моддий бойликларни олиб чиқиб

кетишнинг белгиланган тартибини бузганлик

Ўзбекистон Республикасидан ташқарига товарлар, материаллар, хом ашё қишлоқ хўжалик маҳсулотлари, озиқ-овқат маҳсулотлари ва бошқа моддий бойликларни олиб чиқиб кетишнинг белгиланган тартибини бузиш худди шундай хатти-ҳаракат учун маъмурий жазо чораси кўрилганидан кейин содир этилса, -

уч йилгача озодликдан маҳрум қилиб, олиб чиқиб кетилаётган товар-моддий бойликларни мусодара этиш билан ёки ўн минг сўмдам йигирма беш минг сўмгача миқдорда жарима солиш билан жазоланади";

3) 1959 йил 21 майдаги Ўзбекистон Республикаси Қонуни билан тасдиқлаган Ўзбекистон Республикаси Жиноят-процессуал кодекси (Ўзбекистон Республикаси Олий Советининг Ведомостлари, 1959 йил, N 6, 3-модда) 108-моддасининг тўртинчи қисми "179-модданинг иккинчи қисми" деган сўзлардан кейин "179-2-моддаси" деган сўзлар билан тўлдирилсин.

Ўзбекистон Республикасининг Президенти                                      И. Каримов

Ўзбекистон Республикаси Олий Кенгашининг Ахборотномаси, 1992 й., 3-сон, 162-модда