Ўзбекистон Республикаси Вазирлар Маҳкамасининг 30.08.2009 й. 252-сон "БМТнинг тараққиёт дастури иштирокидаги "Зарафшон дарёси ҳавзасида сув ресурсларини интеграцияли бошқариш ва сувни тежаш режаси" лойиҳасини амалга ошириш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

30.08.2009 й.

N 252

БМТНИНГ ТАРАҚҚИЁТ ДАСТУРИ

ИШТИРОКИДАГИ   "ЗАРАФШОН   ДАРЁСИ

ҲАВЗАСИДА СУВ РЕСУРСЛАРИНИ ИНТЕГРАЦИЯЛИ

БОШҚАРИШ ВА СУВНИ ТЕЖАШ РЕЖАСИ"

ЛОЙИҲАСИНИ АМАЛГА ОШИРИШ

ЧОРА-ТАДБИРЛАРИ ТЎҒРИСИДА

Сув ресурсларидан оқилона фойдаланишга йўналтирилган сув ресурсларини интеграцияли бошқариш принципларини босқичма-босқич жорий этиш, уларнинг исроф бўлишини қисқартириш, сувни тежашни рағбатлантириш, иқтисодиёт секторларини сув билан барқарор ва балансли таъминлаш тизимини яратиш, шунингдек БМТнинг Тараққиёт дастурида берилаётган грант маблағларидан мақсадли фойдаланиш мақсадида Вазирлар Маҳкамаси ҚАРОР ҚИЛАДИ:

1. "Зарафшон дарёси ҳавзасида сув ресурсларини интеграцияли бошқариш ва сувни тежаш режаси" лойиҳасини (кейинги ўринларда лойиҳа деб аталади) амалга ошириш учун Ўзбекистон Республикасига БМТнинг Тараққиёт дастурида 1259245 АҚШ доллари миқдорида грант маблағлари ажратилганлиги маълумот учун қабул қилинсин.

2. Белгилансинки:

лойиҳа компонентларини молиялаштириш 1-иловага мувофиқ амалга оширилади;

грант маблағларини ва лойиҳа ходимларини бошқариш БМТ Тараққиёт дастури тартиботларига мувофиқ амалга оширилади.

3. Лойиҳани амалга ошириш бўйича Мувофиқлаштирувчи кенгаш таркиби 2-иловага мувофиқ тасдиқлансин.

Лойиҳани амалга ошириш бўйича Мувофиқлаштирувчи кенгаш:

лойиҳа ечимларини жорий этишни жадаллаштириш бўйича тавсиялар ва тадбирлар ишлаб чиққан ҳолда, ажратилаётган маблағларнинг самарали ўзлаштирилиши юзасидан назоратни таъминласин;

лойиҳанинг тегишли компонентларини ишлаб чиқиш бўйича ишчи гуруҳлар таркибини икки ой муддатда, белгиланган тартибда тасдиқласин;

лойиҳанинг амалга оширилишини мунтазам равишда кўриб борсин ҳамда зарурат бўлганда, унинг самарали ва ўз вақтида амалга оширилишини таъминлаш бўйича Вазирлар Маҳкамасига таклифлар киритсин.

4. Ўзбекистон Республикаси Қишлоқ ва сув хўжалиги вазирлигига БМТ Тараққиёт дастури тартиботларига мувофиқ грант маблағларидан ўз вақтида ва мақсадли фойдаланилишини таъминлаш, шунингдек лойиҳани самарали амалга ошириш юзасидан жавобгарлик юклансин.

Ўзбекистон Республикаси Қишлоқ ва сув хўжалиги вазирлиги лойиҳани амалга ошириш гуруҳини (лойиҳа ходимларини) Ўзбекистон Республикаси Ҳукуматининг улуши сифатида офис биноси ва зарур телекоммуникация воситалари билан таъминласин.

5. Ўзбекистон Республикаси Молия вазирлиги лойиҳани амалга ошириш даврида, лойиҳа ходимларини офис биноси билан таъминлаш ва телекоммуникация хизматларидан фойдаланиш билан боғлиқ харажатларни Ўзбекистон Республикаси Қишлоқ ва сув хўжалиги вазирлиги учун тасдиқланган бюджет маблағлари доирасида Ўзбекистон Республикаси Ҳукуматининг улуши сифатида молиялаштиришни назарда тутсин.

6. Ўзбекистон Республикаси Ташқи ишлар вазирлиги Қишлоқ ва сув хўжалиги вазирлиги буюртманомаларига биноан, лойиҳани амалга оширишда қатнашувчи хорижий мутахассислар учун кириш визаларининг белгиланган тартибда расмийлаштирилишини таъминласин.

7. Ўзбекистон Республикаси Ички ишлар вазирлиги Қишлоқ ва сув хўжалиги вазирлиги буюртманомаларига биноан, лойиҳанинг хорижий мутахассислари учун кўп марталик кириш визалари расмийлаштирилишини ва уларнинг муддати узайтирилишини, шунингдек уларнинг яшаш жойида вақтинчалик рўйхатдан ўтказилишини ва унинг муддати узайтирилишини белгиланган тартибда таъминласин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С.Азимов зиммасига юклансин.

Ўзбекистон Республикасининг Бош вазири                             Ш. Мирзиёев

Вазирлар Маҳкамасининг

2009 йил 30 августдаги

252-сон қарорига

1-ИЛОВА

БМТнинг Тараққиёт дастури иштирокидаги

"Зарафшон дарёси ҳавзасида сув ресурсларини

интеграцияли бошқариш ва сувни тежаш режаси"

лойиҳаси компонентларини молиялаштириш

(АҚШ долларида)

Лойиҳани амалга ошириш давомида унинг бюджети бўйича харажатлар БМТнинг Тараққиёт дастури билан келишган ҳолда қайта тақсимланиши мумкин.

Вазирлар Маҳкамасининг

2009 йил 30 августдаги

252-сон қарорига

2-ИЛОВА

БМТнинг Тараққиёт дастури иштирокидаги "Зарафшон

дарёси ҳавзасида сув ресурсларини интеграцияли бошқариш

ва сувни тежаш режаси" лойиҳасини амалга ошириш

бўйича Мувофиқлаштирувчи кенгаш

ТАРКИБИ

Изоҳ. Мувофиқлаштирувчи кенгаш аъзолари бошқа ишга ўтган тақдирда унинг таркибига ушбу лавозимга янгидан тайинланган ёки тегишли функцияларни бажариш зиммасига юкланган шахслар киритилади.