Адлия вазирининг 06.10.2009 й. 221-мх-сон "Адвокатларнинг касбий малакасини оширишни ташкил қилиш чора-тадбирлари тўғрисида"ги Буйруғи (АВ томонидан 06.10.2009 й. 2012-сон билан рўйхатга олинган)

Функция недоступна

ЎЗБЕКИСТОН РЕСПУБЛИКАСИ

АДЛИЯ ВАЗИРЛИГИ ТОМОНИДАН

РЎЙХАТГА ОЛИНГАН

06.10.2009 й.

N 2012

ЎЗБЕКИСТОН РЕСПУБЛИКАСИ

АДЛИЯ ВАЗИРИНИНГ

06.10.2009 й.

N 221-мҳ

БУЙРУҒИ

Адвокатларнинг касбий малакасини оширишни

ташкил қилиш чора-тадбирлари тўғрисида

(2009 йил 16 октябрдан кучга киради)

Ўзбекистон Республикаси Президентининг 2018 йил 13 апрелдаги ПҚ-3666-сон қарори билан тасдиқланган Ўзбекистон Республикаси Адлия вазирлиги тўғрисидаги низомга мувофиқ БУЮРАМАН:

1. Ўзбекистон Республикаси "Адвокатура тўғрисида"ги Қонунининг (Ўзбекистон Республикаси Олий Мажлисининг Ахборотномаси, 1997 й., 2-сон, 48-модда) 7-моддасига мувофиқ адвокат ҳар уч йилда камида бир марта касбий малакасини ошириши шартлиги маълумот учун қабул қилинсин.

2. Белгилансинки:

адвокатларнинг касбий малакасини ошириш Ўзбекистон Республикаси Адлия вазирлиги қошидаги Юристлар малакасини ошириш марказида ишлаб чиқаришдан ажралган ҳолда фақат кундузги шаклда амалга оширилади;

адвокатларнинг малака ошириш муддатининг давомийлиги икки ҳафтадан кам бўлиши мумкин эмас;

синовларни муваффақиятли топширган адвокатга белгиланган намунадаги сертификат берилади;

адвокат томонидан охирги уч йил ичида ўзининг касбий малакасини оширмаслик тарзида адвокатура тўғрисидаги қонун ҳужжатлари талабларининг бузилиши унинг адвокатлик фаолияти билан шуғулланиш ҳуқуқини берувчи лицензиясининг амал қилишини қонунчиликда ўрнатилган тартибда тугатишга асос бўлади.

3. Ўзбекистон Республикаси Адвокатлар палатасига Ўзбекистон Республикаси Адлия вазирлиги қошидаги Юристлар малакасини ошириш маркази билан келишган ҳолда Адвокатларнинг касбий малакасини ошириш тартиби тўғрисидаги низомни тасдиқлаш тавсия этилсин.

4. Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари адвокатлар томонидан касбий малакасини оширишга доир қисми бўйича лицензия талаблари ва шартларига риоя этилиши устидан доимий назорат олиб борсинлар.

5. Мазкур буйруқ давлат рўйхатига олинсин ва бу ҳақда Ўзбекистон Республикаси вазирликлари, давлат қўмиталари ва идоралари норматив-ҳуқуқий ҳужжатларининг Давлат реестрига тегишли ёзув киритилсин.

6. Қонун ҳужжатларини туркумлаш ва ҳуқуқий ахборот бошқармаси (Д. Саъдуллаев) ҳамда Нотариат, ФҲДЁ ва адвокатура бошқармаси (Д. Якубова) ушбу норматив-ҳуқуқий ҳужжатни ўн кун муддат ичида барча манфаатдор шахслар эътиборига етказилиши ва "Ўзбекистон Республикаси қонун ҳужжатлари тўплами" - "Собрание законодательства Республики Узбекистан"да нашр этилишини таъминласин.

7. Мазкур буйруқ давлат рўйхатидан ўтказилган кундан бошлаб ўн кун ўтгандан кейин кучга киради.

8. Мазкур буйруқнинг ижросини назорат қилиш вазир ўринбосари Е. Каньязов зиммасига юклансин.

Вазир                                                             Р. Муҳитдинов

"Ўзбекистон Республикаси қонун ҳужжатлари тўплами", 2009 йил, 41-сон, 444-модда.