Техник жиҳатдан тартибга солиш соҳасидаги эксперт кенгашлари тўғрисида Низом (АВ томонидан 07.01.2010 й. 2060-сон билан рўйхатга олинган Ўзбекистон стандартлаштириш, метрология ва сертификатлаштириш агентлиги бош директорининг 11.12.2009 й. 534-сонли буйруғи билан тасдиқланган)

Функция недоступна

Ўзбекистон Республикаси

Адлия вазирлигида

2010 йил 7 январда 2060-сон

билан рўйхатга олинган

Ўзбекистон стандартлаштириш,

метрология ва сертификатлаштириш

агентлиги бош директорининг

2009 йил 11 декабрдаги

534-сонли буйруғига

ИЛОВА

Техник жиҳатдан тартибга солиш соҳасидаги

эксперт кенгашлари тўғрисида

НИЗОМ

Ушбу Низом Ўзбекистон Республикасининг "Техник жиҳатдан тартибга солиш тўғрисида"ги Қонунига (Ўзбекистон Республикаси Олий Мажлиси палаталарининг Ахборотномаси, 2009 й., 4-сон, 140-модда) мувофиқ давлат ва хўжалик бошқаруви органлари ҳузурида тузиладиган техник жиҳатдан тартибга солиш соҳасидаги эксперт кенгашларининг фаолиятларини тартибга солади.

I. УМУМИЙ ҚОИДАЛАР

1. Техник жиҳатдан тартибга солиш соҳасидаги эксперт кенгашлари (бундан кейинги ўринларда кенгаш деб юритилади) умумий ва махсус техник регламентларни, техник регламентларга ўзгартиш ва қўшимчаларни ишлаб чиқиш, шунингдек мазкур регламентларни бекор қилиш бўйича таклифларни ишлаб чиқиш учун ташкил этилади.

2. Кенгашнинг асосий вазифалари қуйидагилардир:

умумий ва махсус техник регламентлар лойиҳаларини ишлаб чиқиш;

умумий ва махсус техник регламентларга ўзгартиш ва қўшимчалар киритиш, шунингдек уларни бекор қилиш тўғрисида таклифлар тайёрлаш.

3. Кенгаш ўзига юклатилган асосий вазифалардан ташқари қуйидагиларни амалга оширади:

давлат ва хўжалик бошқаруви органларининг ваколатлари доирасида техник жиҳатдан тартибга солиш давлат тизимининг асосий йўналишларини ривожлантириш бўйича иш режаларини ишлаб чиқиш;

стандартлаштириш бўйича тармоқ ва тармоқлараро техника қўмиталарига белгиланган тартибда техник жиҳатдан тартибга солиш соҳасидаги режа ва тадбирлар ишлаб чиқишда услубий ёрдам кўрсатиш.

4. Кенгаш қуйидаги ҳуқуқларга эга:

техник регламентлар ишлаб чиқишда давлат ва хўжалик бошқаруви органлари, шунингдек бошқа ташкилотларнинг мутахассисларини белгиланган тартибда жалб этиш;

техник регламентларни ишлаб чиқишда давлат ва хўжалик бошқаруви органларидан белгиланган тартибда тегишли маълумотлар олиш;

техник регламентлар лойиҳаларини ишлаб чиқиш, шунингдек амалдаги техник регламентларга ўзгартиш ва қўшимчалар киритиш ёки уларни бекор қилиш бўйича техник жиҳатдан тартибга солиш соҳасидаги ваколатли давлат органларига таклифлар киритиш;

техник жиҳатдан тартибга солиш соҳасидаги ваколатли давлат органларига техник регламентлар лойиҳаларини экспертизадан ўтказиш учун юбориш.

5. Кенгаш ўз фаолияти давомида техник тартибга солиш тўғрисидаги қонунчилик ҳужжатлари талабларига амал қилади.

Кенгаш техник регламент лойиҳаларининг тегишли давлат ва хўжалик бошқаруви органлари билан келишилишини таъминлайди.

II. КЕНГАШНИ ШАКЛЛАНТИРИШ

6. Кенгаш таркиби раис, раис ўринбосари ва аъзолардан иборат бўлади. Иш юритишни ташкиллаштириш учун котиб тайинланади.

7. Давлат ва хўжалик бошқаруви органи раҳбарининг ўринбосари - кенгаш раиси, давлат ва хўжалик бошқаруви органи таркибий тузилмасининг раҳбари - кенгаш раисининг ўринбосари, давлат ва хўжалик бошқаруви органи таркибий тузилмасининг масъул ходими - кенгаш котиби этиб тайинланади.

8. Кенгаш аъзолигига техник регламентларни жорий этувчи ташкилотлар, давлат ва хўжалик бошқаруви органлари, шунингдек техник регламентлар қабул қилиниши муносабати билан қайта кўриб чиқилиши, ўзгартириш киритилиши ёки бекор қилиниши лозим бўлган маҳсулотлар, ишлар ва хизматлар бўйича ўзаро боғлиқ норматив ҳужжатларни тасдиқлаган ташкилотлар, стандартлаштириш бўйича базавий ҳамда тармоққа оид ташкилотлар вакиллари тайинланади.

9. Кенгаш аъзолари ушбу Низомнинг 8-бандида кўрсатилган ташкилотларнинг тақдимоти бўйича давлат ва хўжалик бошқаруви органи раҳбарининг буйруғи (фармойиши) билан тайинланади.

10. Кенгаш аъзолари кенгаш ишида иштирок этади, кенгаш томонидан қарор қабул қилишда овоз беради, техник регламентларнинг лойиҳалари бўйича тегишли таклифларни беради.

Кенгаш аъзолари бошқа давлат ва хўжалик бошқаруви органларида тузиладиган кенгаш ишида қатнашиши мумкин.

III. КЕНГАШ ФАОЛИЯТИНИ ТАШКИЛ ЭТИШ

11. Кенгаш ўз фаолиятини ушбу Низомга мувофиқ амалга оширади.

12. Кенгаш раиси:

кенгаш ишини ташкиллаштиради;

кенгаш мажлиси бўладиган сана ва жойни белгилайди;

кенгаш мажлисларида раислик қилади.

Кенгаш раиси бўлмаган ҳолларда унинг вазифаларини кенгаш раисининг ўринбосари бажаради.

13. Кенгаш котиби ўтказилиши режалаштирилаётган мажлислар тўғрисида кенгашнинг барча аъзоларини хабардор қилади.

14. Техник регламент лойиҳалари техник регламентларни ишлаб чиқиш дастурларига мувофиқ кенгаш томонидан ишлаб чиқилади.

15. Кенгаш тузиладиган давлат ва хўжалик бошқаруви органи техник регламентлар ишлаб чиқилиши тўғрисидаги хабарларни белгиланган тартибда нашр қилади.

16. Кенгаш техник регламентнинг талаблари татбиқ этиладиган маҳсулотлар, ишлар ва хизматларнинг гуруҳи ва турларини аниқлайди. Маҳсулотлар, ишлар ва хизматларнинг техник регламентларда белгиланган талабларга мувофиқлигини баҳолаш усуллари белгиланади.

17. Техник регламентнинг лойиҳаси келишилиши лозим бўлган тегишли ташкилотларнинг рўйхати кенгаш томонидан белгиланади ва уларга юборилади.

18. Техник регламент лойиҳалари 30 кун мобайнида келишилиши лозим.

19. Техник регламент лойиҳаси бўйича келишилиши лозим бўлган тегишли ташкилотларда таклиф ва эътирозлар мавжуд бўлмаса, бу ҳақда кенгашга хабар берилиши лозим.

20. Кенгаш томонидан ишлаб чиқилган техник регламент лойиҳаси бўйича келиб тушган барча тақризлар котиб томонидан умумлаштирилади ва бу ҳақда 5 кун мобайнида маълумот тайёрланади.

21. Келиб тушган тақризлар кенгаш мажлисида кўриб чиқилади.

22. Тақризларни кўриб чиқиш натижаларига кўра техник регламентнинг якуний лойиҳаси тайёрланади.

23. Техник регламентлар лойиҳалари аниқ ифодаланиши, қонунчилик ҳужжатларига мувофиқ келиши, кўриб чиқилаётган масаланинг пухта таҳлилини ва холис баҳосини ўз ичига олган бўлиши, техник регламентдан фойдаланувчилар олдига аниқ мақсад ва вазифаларни қўйиши, шунингдек уларнинг талабларини бажаришнинг аниқ муддатларини белгилаши лозим.

24. Техник регламент лойиҳасига кенгаш раиси, унинг ўринбосари ва барча аъзолари томонидан розилик имзоси қўйилади. Розилик имзоси қўйилган лойиҳа белгиланган тартибда экспертизадан ўтиш учун тайёр деб ҳисобланади.

25. Техник регламентларнинг якуний лойиҳаси 3 иш куни мобайнида белгиланган тартибда экспертизадан ўтказиш учун техник жиҳатдан тартибга солиш соҳасидаги тегишли ваколатли давлат органига юборилади.

26. Техник регламентлар лойиҳаларининг экспертизаси фаолиятларининг йўналишлари бўйича техник жиҳатдан тартибга солиш соҳасидаги ваколатли давлат органлари ҳузурида тузиладиган техник жиҳатдан тартибга солиш соҳасидаги эксперт комиссиялари томонидан амалга оширилади.

27. Техник жиҳатдан тартибга солиш соҳасидаги эксперт комиссияси томонидан техник регламент лойиҳаси белгиланган талабларга номувофиқлиги ҳақида хулоса қабул қилинган тақдирда, ушбу хулоса келиб тушган кундан бошлаб 15 кун мобайнида техник регламент лойиҳаси кенгаш томонидан қайта кўриб чиқилади.

28. Техник регламентнинг охирига етказиб ишлаб чиқилган лойиҳаси ушбу Низомнинг 25 ва 26-бандларига асосан қайта экспертизадан ўтказиш учун топширилади.

29. Техник регламент лойиҳаси Ўзбекистон Республикаси Вазирлар Маҳкамаси томонидан тасдиқланган техник регламентларни ишлаб чиқиш дастурида ўрнатилган муддатларда кенгаш томонидан ишлаб чиқилиши керак.

IV. ЯКУНИЙ ҚОИДА

30. Мазкур Низом Ўзбекистон Республикаси соғлиқни сақлаш вазирлиги, Ўзбекистон Республикаси Давлат архитектура ва қурилиш қўмитаси, Ўзбекистон Республикаси Давлат табиатни муҳофаза қилиш қўмитаси билан келишилган.

"Ўзбекистон Республикаси қонун ҳужжатлари тўплами", 2010 йил, 1-2-сон, 9-модда.