Ўзбекистон Республикаси Вазирлар Маҳкамасининг 12.03.2010 й. 42-сон "Тугатилган "Ўзбектўқимачимаш" ишлаб чиқариш бирлашмасининг ишлаб чиқариш майдонларининг бир қисмида замонавий тўқимачилик ишлаб чиқаришини ташкил этиш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

12.03.2010 й.

N 42

ТУГАТИЛГАН "ЎЗБЕКТЎҚИМАЧИМАШ"

ИШЛАБ ЧИҚАРИШ БИРЛАШМАСИНИНГ

ИШЛАБ ЧИҚАРИШ МАЙДОНЛАРИНИНГ БИР

ҚИСМИДА ЗАМОНАВИЙ ТЎҚИМАЧИЛИК

ИШЛАБ ЧИҚАРИШИНИ ТАШКИЛ ЭТИШ

ТЎҒРИСИДА

Тўқимачилик саноатига инвестицияларни жалб этиш ва тугатилган "Ўзбектўқимачимаш" ишлаб чиқариш бирлашмасининг ишлаб чиқариш майдонларининг бир қисмида замонавий тўқимачилик ишлаб чиқаришини ташкил этиш учун зарур шарт-шароитлар яратиш мақсадида Вазирлар Маҳкамаси ҚАРОР ҚИЛАДИ:

1. "Ўзбекенгилсаноат" давлат-акциядорлик компанияси, Ўзбекистон Республикаси Молия вазирлиги, Иқтисодиёт вазирлиги ва Давлат мулки қўмитасининг тўқимачилик саноатига инвестицияларни жалб этиш ва тугатилган "Ўзбектўқимачимаш" ишлаб чиқариш бирлашмасининг Тошкент шаҳар, Яккасарой тумани, У.Носир кўчаси, 53б-уйда жойлашган 3 (темирчилик- пресслаш цехи) ва 8 (асбобсозлик-механика цехи)-ишлаб чиқариш корпусларини (кейинги ўринларда 3 ва 8-ишлаб чиқариш корпуслари деб юритилади) уларнинг базасида замонавий тўқимачилик ишлаб чиқаришини ташкил этиш шарти билан "BF Textile Produktion" масъулияти чекланган жамият хорижий корхонага сотиш тўғрисидаги таклифига розилик берилсин.

2. "BF Textile Produktion" масъулияти чекланган жамият хорижий корхона ўз зиммасига:

3 ва 8-ишлаб чиқариш корпусларини мустақил баҳолаш ташкилоти томонидан аниқланган 5,443 млрд сўм миқдоридаги баҳолаш қиймати бўйича, тўловларни 7 йил мобайнида ярим йиллик тенг улушлар билан тўлаган ҳолда, сотиб олиш;

2011 йил 1 сентябргача сотиб олинаётган 3 ва 8-ишлаб чиқариш корпуслари базасида бир йилда камида 5 минг тонна пахта толасини қайта ишлаш қувватига эга бўлган замонавий технологик асбоб-ускуналар билан жиҳозланган йигирув-тўқув корхонасини ташкил этиш шаклидаги 7,0 млн АҚШ долларига тенг суммалик инвестиция мажбуриятларини бажариш;

камида 300 та янги иш ўрни яратиш мажбуриятларини қабул қилиши маълумот учун қабул қилинсин.

3. Ўзбекистон Республикаси Давлат мулки қўмитаси "Ўзбекенгилсаноат" давлат-акциядорлик компанияси билан биргаликда:

ўн кун муддатда "BF Textile Produktion" масъулияти чекланган жамият хорижий корхона билан, ушбу қарорнинг 2-бандида кўрсатилган шартларда инвестициялар киритиш жадвалини тасдиқланган ҳолда, 3 ва 8-ишлаб чиқариш корпусларининг олди-сотди шартномасини тузсин;

"BF Textile Produktion" масъулияти чекланган жамият хорижий корхона қабул қилинган инвестиция мажбуриятларини зарур тарзда бажариши устидан қатъий назоратни таъминласин;

"Енгилсаноатсервис" унитар корхонасининг икки қаватли маъмурий биноси туташиб кетган ҳудудлар билан бирга инвестиция мажбуриятлари бажарилгандан сўнг кейинчалик сотиб олиш шарти билан "BF Textile Produktion" масъулияти чекланган жамият хорижий корхонага белгиланган тартибда ижарага берилишини таъминласин.

4. Тошкент шаҳар ҳокимлиги Тошкент шаҳар Архитектура ва қурилиш бош бошқармаси билан биргаликда тугатилган "Ўзбектўқимачимаш" ишлаб чиқариш бирлашмаси ҳудудининг тасдиқланган бош режасига бир ой муддатда тегишли ўзгартиришлар киритилишини таъминласин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С.Азимов зиммасига юклансин.

Ўзбекистон Республикасининг Бош вазири                              Ш. Мирзиёев