ВСЕ ЗАКОНОДАТЕЛЬСТВО УЗБЕКИСТАНА

ЎзР Конунчилиги / Соғлиқни сақлаш. Жисмоний тарбия ва спорт. Туризм / Жисмоний тарбия ва спорт / Болалар спортини ривожлантириш /

Ўзбекистон Республикаси Президентининг 05.05.2010 й. ПҚ-1332-сон "Болалар спорти объектларидан фойдаланиш самарадорлигини ошириш борасидаги қўшимча чора-тадбирлар тўғрисида"ги Қарори

Функция недоступна

Данная функция доступно только для клиентов (пользователей)

Полный текст документа доступен в платной версии. По вопросам звоните на короткий номер 1172

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

05.05.2010 й.

N ПҚ-1332



БОЛАЛАР СПОРТИ ОБЪЕКТЛАРИДАН

ФОЙДАЛАНИШ САМАРАДОРЛИГИНИ

ОШИРИШ БОРАСИДАГИ ҚЎШИМЧА

ЧОРА-ТАДБИРЛАР ТЎҒРИСИДА


Қайд этиб ўтилсинки, Ўзбекистон Болалар спортини ривожлантириш жамғармаси Ҳомийлик кенгашининг 2010 йил 11 мартдаги қарорига мувофиқ, республиканинг барча ҳудудларида Болалар спортини ривожлантириш жамғармасининг маблағлари ҳисобидан фойдаланишга топширилган болалар спорти объектларининг жорий ҳолати ва улардан фойдаланиш самарадорлиги кенг миқёсда текширувдан ўтказилди.

2003-2009 йиллар мобайнида Жамғарма маблағлари ҳисобидан республикада намунавий лойиҳалар бўйича 1117 та болалар спорти объектлари барпо этилди ва фойдаланишга топширилди, шулардан 917 та спорт иншооти (82%) қишлоқ жойлардадир. Фойдаланишга топширилган барча спорт иншоотлари тасдиқланган нормативлар бўйича спорт анжомлари билан тўлиқ таъминланган.

Ҳозирги вақтда спорт секциялари ва гуруҳларида мактаблар, академик лицейлар ва касб-ҳунар коллежларининг 2,1 миллионга яқин ўқувчиси мунтазам шуғулланиб келмоқда, шуларнинг 35 фоизини қизлар ташкил этади. Натижада мактаб ёшидаги болалар ўртасида касалликка чалиниш анча камайди, уларнинг фаоллиги ва жисмоний маданияти ошди.

Шу билан бирга, текшириш якунларига кўра, бир қанча жиддий нуқсон ва камчиликлар аниқланди.

Фойдаланишга топширилган болалар спорти объектлари, айниқса, алоҳида жойлашган объектлардан ҳали етарлича самарали фойдаланилмаяпти, мавжуд имкониятлар тўлиқ ишга солинмаяпти. Эскирган спорт анжомлари ва ускуналарини янгилаш ҳамда алмаштириш ўз вақтида таъминланмаяпти. Барпо этилган сузиш ҳавзалари имкониятларидан паст даражада фойдаланилмоқда.

Болалар спорти объектларини тренерлар, айниқса, хотин-қиз тренерлар билан таъминлаш ишлари етарлича олиб борилмаяпти. Қашқадарё, Сирдарё, Сурхондарё, Хоразм вилоятлари ва Тошкент шаҳрида шундай ҳоллар мавжуд.

Ўқувчи-ёшларни спорт билан мунтазам шуғулланишга, аввало, Андижон, Навоий, Сурхондарё ва Қашқадарё вилоятларида кенг жалб этиш бўйича тушунтириш ишлари суст олиб борилмоқда. Қизларни, айниқса, қишлоқ жойларда спорт билан шуғулланишга жалб этиш борасидаги ишлар ҳали-ҳамон қониқарсиз аҳволда.

Болалар спорти объектларидан фойдаланиш самарадорлигини янада ошириш, уларнинг моддий-техник базасини мустаҳкамлаш, болаларни жисмоний тарбия ва спорт билан шуғулланишга жалб этишни кенгайтириш, соғлом ва баркамол авлодни вояга етказиш мақсадида:


1. Ўзбекистон Республикаси Халқ таълими вазирлиги ҳузуридаги Болалар спортини ривожлантириш жамғармаси маблағлари ҳисобидан фойдаланишга топширилган болалар спорти объектларининг жорий ҳолати ва улардан фойдаланиш самарадорлигини кенг миқёсда текширувдан ўтказган махсус комиссиянинг хулосалари маълумот учун қабул қилинсин.

Ўн кун муддатда республиканинг барча ҳудудларида Болалар спортини ривожлантириш жамғармасининг Қорақалпоғистон Республикаси Жўқорғи Кенгеси раиси, вилоятлар ва Тошкент шаҳар ҳокимлари раҳбарлик қилаётган минтақавий филиаллари Ҳомийлик кенгашларининг мажлисларида текшириш натижалари танқидий муҳокама қилинсин.


2. Қорақалпоғистон Республикаси Вазирлар Кенгашининг раиси, вилоятлар ва Тошкент шаҳар ҳокимлари, Ўзбекистон Республикаси Халқ таълими вазирлиги, Олий ва ўрта махсус таълим вазирлиги, Ўрта махсус, касб-ҳунар таълими маркази, Маданият ва спорт ишлари вазирлиги раҳбарлари текшириш натижасида аниқланган камчиликларни бартараф этиш юзасидан кечиктириб бўлмайдиган чораларни кўрсинлар, бунда мазкур ишлар тизимли, мунтазам асосда ўтказилиши лозимлиги назарда тутилсин.

Аниқланган камчиликларни бартараф этиш бўйича амалга оширилган ишларнинг натижалари тўғрисида 2010 йилнинг 1 июлигача бўлган муддатда Вазирлар Маҳкамасига маълумот берилсин.


3. Ишга туширилган болалар спорти объектларидан самарали фойдаланиш биринчи даражали вазифа деб ҳисоблансин, болалар ва ўқувчи-ёшларни жисмоний тарбия ва спорт билан шуғулланишга оммавий равишда жалб этиш борасида қилинаётган барча ишларнинг натижалари, Болалар спортини ривожлантириш жамғармаси олдига қўйилган мақсадларга эришиш тўлиқ даражада мазкур вазифани амалга оширишга боғлиқдир.

Вилоят, шаҳар ва туман ҳокимликларининг, таълим органларининг, республика ва вилоят спорт федерацияларининг, Ўзбекистон Хотин-қизлар қўмитаси, Ўзбекистон ёшлар иттифоқи ҳамда мазкур иш учун жавобгар бўлган бошқа жамоат тузилмаларининг фаолиятига болалар спорти объектларидан фойдаланишнинг ҳолатига қараб баҳо берилсин.

4. Болалар спорти объектларидан фойдаланиш самарадорлигини баҳолашнинг энг муҳим мезонлари этиб қуйидагилар белгилансин:

биринчидан, спорт билан шуғулланишнинг оммавийлиги - умумтаълим мактаблари, касб-ҳунар коллежлари ва академик лицейлар ўқувчиларининг спорт билан мунтазам шуғулланишга қамраб олиниши даражасининг ўзгариши;

иккинчидан, ўрнатилган нормативлардан келиб чиққан ҳолда, болалар спорти объектларининг спорт ускуналари ва анжомлари билан жиҳозланиш даражаси;

учинчидан, болалар спорти объектларининг, тасдиқланган нормативларга мувофиқ, таълим муассасаларида юқори малакали, профессионал тайёрланган тренер кадрлар ва жисмоний тарбия ўқитувчилари, шу жумладан, хотин-қиз тренерлар билан таъминланганлиги;

тўртинчидан, спорт объектларидан фойдаланиш даражаси - сутка ва ҳафта мобайнида ҳар хил спорт турлари бўйича ўтказиладиган мунтазам машғулотлар соати миқдори, ўтказилган спорт тадбирлари сони ва бошқалар;

бешинчидан, спорт билан шуғулланиш самарадорлиги - 19 ёшгача бўлган спортчи болалар ва ёшлар орасидан етишиб чиққан республика ва халқаро мусобақалар совриндорлари сони.


5. Ўзбекистон Республикаси Халқ таълими вазирлиги, Молия вазирлиги, Маданият ва спорт ишлари вазирлигининг, манфаатдор вазирликлар, идоралар, хўжалик субъектлари ҳамда фуқароларнинг ўзини ўзи бошқариш органларининг иловага* мувофиқ алоҳида жойлашган болалар спорт объектларини Халқ таълими вазирлиги органлари балансига топшириш, уларнинг зиммасига мазкур объектларни бундан кейин тегишли даражада сақлаш ва улардан самарали фойдаланиш учун жавобгарлик юклаш тўғрисидаги таклифи қабул қилинсин.

Қорақалпоғистон Республикаси Вазирлар Кенгашининг раиси, вилоятлар, шаҳарлар ва туманларнинг ҳокимлари, Халқ таълими вазирлиги, Олий ва ўрта махсус таълим вазирлиги, Ўрта махсус, касб-ҳунар таълими маркази, Маданият ва спорт ишлари вазирлиги, таълим муассасалари ҳамда спорт иншоотларининг раҳбарлари зиммасига болалар спорти объектларининг тегишли даражада сақланиши ва самарали фойдаланилиши, уларнинг замонавий спорт ускуналари ва анжомлари билан жиҳозланиши, малакали тренер кадрлар билан таъминланиши юзасидан шахсий жавобгарлик юклатилсин.

Вазирлар Маҳкамаси ҳар бир алоҳида жойлашган болалар спорти объектининг тегишли даражада сақланиши ва самарали фойдаланилиши устидан назоратни кучайтирсин.


6. Ўзбекистон Республикаси Халқ таълими вазирлиги, Маданият ва спорт ишлари вазирлиги Қорақалпоғистон Республикаси вазирлар Кенгаши, вилоятлар ва Тошкент шаҳар ҳокимликлари билан ҳамкорликда бир ой муддатда спорт секциялари ва тўгаракларидаги машғулотлар жадвалларини мақбуллаштириш, ҳар хил спорт турлари, энг аввало, бадиий ва спорт гимнастикаси, спортнинг ўйин турлари бўйича янги қўшимча секция ва гуруҳлар ташкил этиш ҳисобига болалар спорти объектларидан фойдаланиш даражасини ошириш чора-тадбирларини кўрсинлар.


7. Ўзбекистон Республикаси Халқ таълими вазирлиги, Олий ва ўрта махсус таълим вазирлиги, Маданият ва спорт ишлари вазирлиги:

болалар спорти иншоотларининг тренерлар билан таъминланганлигини танқидий таҳлил қилиш натижалари бўйича уч ой муддатда болалар спорти объектларини тасдиқланган штат жадвалига мувофиқ, малакали тренер кадрлар билан тўлиқ таъминлаш бўйича аниқ чора-тадбирларни амалга оширсин, қишлоқ болалар спорти объектларини хотин-қиз тренерлар билан таъминлашга алоҳида эътибор қаратсин;

Ўзбекистон давлат жисмоний тарбия институтининг ҳамда базавий олий ўқув юртларининг жисмоний тарбия факультетлари негизида тренерлар малакасини ошириш тизимини ташкил қилсин, ҳар бир тренер камида 2 йилда бир марта шу тизимдан ўтадиган бўлсин;

Ўзбекистон Республикаси Молия вазирлиги билан ҳамкорликда бир ой муддатда мутахассис тренерларнинг тарбияланувчилари спорт маҳоратига эришганлиги, республика ва халқаро мусобақалардаги чиқишларининг самарадорлиги учун улар меҳнатини рағбатлантиришни кучайтириш бўйича Вазирлар Маҳкамасига таклифлар киритсин.


8. Ўзбекистон Республикаси Молия вазирлиги, Иқтисодиёт вазирлиги, Халқ таълими вазирлиги, Олий ва ўрта махсус таълим вазирлиги Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимлари билан ҳамкорликда болалар спорти объектларининг спорт анжомлари ва ускуналари билан жиҳозланишининг батафсил инвентаризацияси асосида ишлаб чиқилган нормативларга мувофиқ, уларни янада тўлиқ жиҳозлаш, эскирган ашёларни ўз вақтида янгилаш ва алмаштириш бўйича аниқ таклифларни бир ой муддатда Вазирлар Маҳкамасига киритсин.


9. Ўзбекистон Республикаси Ёшлар сиёсати ва спорт вазирлиги, Спорт турлари бўйича республика федерациялари Мактабгача ва мактаб таълими вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда республика ҳудудларида, айниқса, қишлоқ жойларда, тизимли асосда болалар спорти иншоотлари негизида республиканинг етакчи спортчилари, Олимпиада ва Осиё ўйинлари, жаҳон чемпионатлари ва бошқа халқаро мусобақалар чемпионлари ҳамда совриндорлари иштирокида кўргазмали маҳорат сабоқлари ўтказилишини ташкил этсин.

10. Ўзбекистон Республикаси Иқтисодиёт вазирлиги, Молия вазирлиги, Халқ таълими вазирлиги, Ташқи иқтисодий алоқалар, инвестициялар ва савдо вазирлиги манфаатдор вазирликлар, хўжалик бирлашмалари ва корхоналари билан ҳамкорликда 2010 йилнинг 1 сентябригача болалар спорти объектларининг футбол, волейбол, баскетбол, гандбол ва теннис коптоклари, бадиий ҳамда спорт гимнастикаси учун спорт ашёларига бўлган эҳтиёжларини янада тўлиқроқ таъминлаш учун республикада уларни ишлаб чиқаришни йўлга қўйиш бўйича аниқ чора-тадбирларни қабул қилсин.

Ўзбекистон Республикаси Соғлиқни сақлаш вазирлиги, "Ўзстандарт" агентлиги ишлаб чиқарилаётган спорт товарларининг, шу жумладан, ишлаб чиқаришда фойдаланилаётган материаллар ва бутловчи буюмларнинг сифати, уларнинг санитария нормалари ва халқаро стандартларга мувофиқлиги устидан қатъий назорат ўрнатсин.


11. Ўзбекистон Республикаси Молия вазирлиги жойлардаги болалар спорти объектларини сақлаб туриш, анжомларни янгилаш, штат жадвалига риоя қилиш, тренер-мутахассисларнинг меҳнатига ҳақ тўлаш учун маблағларнинг ўз вақтида ажратилиши ва улардан мақсадли фойдаланилиши устидан тизимли ҳамда қатъий назорат ўрнатилишини таъминласин. Айбдор шахсларга нисбатан қонунчиликка биноан қатъий жазо чоралари қўлланилсин.


12. Мазкур қарорнинг ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.



Ўзбекистон Республикаси Президенти                                    И. Каримов



*) Илова рус тилидаги матнда берилган



"Ўзбекистон Республикаси қонун ҳужжатлари тўплами", 2010 йил, 18-19-сон, 138-модда.

























































Время: 0.1657
по регистрации МЮ строгое соответствие
  • Все
  • действующие
  • утратившие силу
  • Русский
  • Ўзбекча
  • Оба языка
  • любая дата
  • точная дата
  • период
  • -

Свернуть поиск