Ўзбекистон Республикаси Вазирлар Маҳкамасининг 16.06.2011 й. 178-сон "Сувни тежайдиган технологияларни жорий этиш ва 2011 йил июнь-сентябрь ойларида суғорма сувни тежашга доир қўшимча чора-тадбирлар тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

16.06.2011 й.

N 178

СУВНИ ТЕЖАЙДИГАН ТЕХНОЛОГИЯЛАРНИ

ЖОРИЙ ЭТИШ ВА 2011 ЙИЛ ИЮНЬ-СЕНТЯБРЬ

ОЙЛАРИДА СУҒОРМА СУВНИ ТЕЖАШГА ДОИР

ҚЎШИМЧА ЧОРА-ТАДБИРЛАР ТЎҒРИСИДА

Мавжуд сув ресурсларидан самарали ва оқилона фойдаланиш, сув тақчиллигининг салбий оқибатларини юмшатиш ва 2011 йил июнь-сентябрь ойларида қишлоқ хўжалигини суғорма сув билан барқарор таъминлаш учун шарт-шароитлар яратиш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Қишлоқ ва сув хўжалиги вазирлиги томонидан Иқтисодиёт вазирлиги, Молия вазирлиги, "Ўзгидромет" маркази, Қорақалпоғистон Республикаси Вазирлар Кенгаши, вилоятлар ҳокимликлари билан биргаликда ишлаб чиқилган қуйидагиларни:

1-иловага* мувофиқ 2011 йил июнь-сентябрь ойлари даврида қишлоқ хўжалиги учун сув олиш лимитларини;

2-иловага* мувофиқ 2011 йилда қишлоқ хўжалик экинларини суғоришнинг сувни тежайдиган технологияларини жорий этиш параметрларини;

3-иловага* мувофиқ 2011 йил июнь-сентябрь ойлари даврида сув хўжалиги ташкилотларининг эксплуатация харажатлари ҳисобига бажариладиган таъмирлаш-тиклаш ишлари параметрларини;

4-иловага* мувофиқ 2011 йил июнь-сентябрь ойлари даврида сув истеъмолчилари уюшмалари ва фермер хўжаликлари маблағлари ҳисобига бажариладиган таъмирлаш-тиклаш ишлари параметрларини;

5-иловага* мувофиқ 2011 йил июнь-сентябрь ойлари даврида Ўзбекистон Республикаси Давлат бюджети маблағлари ҳисобига харид қилинадиган асбоб-ускуналар ва эҳтиёт қисмлар рўйхатини ўз ичига оладиган сувни тежайдиган технологияларни жорий этиш ва суғорма сувни тежаш бўйича комплекс тадбирлар маъқуллансин.

2. Ўзбекистон Республикаси Қишлоқ ва сув хўжалиги вазирлиги, Қорақалпоғистон Республикаси Вазирлар Кенгаши, вилоятлар ва туманлар ҳокимликлари:

бир ҳафта муддатда сув олиш лимитларини ҳар бир сувдан фойдаланувчи ва сув истеъмолчисига етказсинлар ҳамда сув ресурсларидан мақсадли ва оқилона фойдлаланиш учун уларнинг масъулиятини ошириш бўйича тизимли чора-тадбирлар кўрсинлар;

суғоришнинг сувни тежайдиган технологияларини жорий этиш параметрлари ва таъмирлаш-тиклаш ишлари бажарилиши устидан объектма-объект мониторинг олиб борсинлар, ушбу ишлар белгиланган муддатларда ўз вақтида ва сифатли туталланишига доир тезкор чора-тадбирлар кўрсинлар.

Сув олиш лимитларига риоя қилиш ва сув ресурсларидан оқилона фойдаланишни таъминлаш, шунингдек суғоришнинг сувни тежайдиган технологияларини жорий этиш параметрлари ва таъмирлаш-тиклаш ишлари ўз вақтида бажарилиши учун шахсий жавобгарлик Ўзбекистон Республикаси Қишлоқ ва сув хўжалиги вазирига, Қорақалпоғистон Республикаси Вазирлар Кенгаши Раисига, вилоятлар ва туманлар ҳокимларига юклансин.

3. Ўзбекистон Республикаси Қишлоқ ва сув хўжалиги вазирлиги уч кун муддатда манбалар бўйича ҳудудларнинг сув олиши ўн кунлик лимитларини ҳамда сув омборларини тўлдириш ва улардан сув чиқариш режимини тасдиқласин.

4. "Ўзбекэнерго" давлат-акциядорлик компанияси Ўзбекистон Республикаси Қишлоқ ва сув хўжалиги вазирлиги, Қорақалпоғистон Республикаси Вазирлар Кенгаши, вилоятлар ва туманлар ҳокимликлари билан биргаликда бир ҳафта муддатда сув олиш лимитларига мувофиқ суғорма сув бериш учун насос станциялари ва қудуқларни электр энергияси билан узлуксиз таъминлаш жадвалларини тасдиқласин ҳамда уларнинг бажарилиши устидан қатъий назорат ўрнатсин.

5. "Ўзбекэнерго" давлат-акциядорлик компаниясига насос станцияларининг ташқи электр таъминоти объектларини лойиҳалаштириш ва қуриш бўйича буюртмачи функцияси юклансин. Кўрсатиб ўтилган объектларни молиялаштириш 6-иловага* мувофиқ параметрларга биноан компаниянинг ўз маблағлари ҳисобига амалга оширилиши назарда тутилсин.

Истисно тариқасида Ўзбекистон Республикаси Қишлоқ ва сув хўжалиги вазирлигига ва "Ўзбекэнерго" давлат-акциядорлик компаниясига 2011 йил 1 сентябргача насос станцияларининг ташқи электр таъминоти объектларини қуришни лойиҳалаштириш билан бир пайтда амалга оширишга рухсат берилсин.

6. Ўзбекистон Республикаси Молия вазирлиги:

сув хўжалиги ташкилотлари томонидан истеъмол қилинадиган электр энергиясига ҳақ тўлаш учун назарда тутилган маблағлардан 6,11 млрд. сўмни 6-иловага мувофиқ асбоб-ускуналар ва эҳтиёт қисмлар сотиб олишга, шунингдек сув хўжалиги объектларида авария-тиклаш ишларини бажариш учун моддий-техника ресурслари захирасини яратишга ажратсин;

2011 йилнинг тўққиз ойи якунлари бўйича Ўзбекистон Республикаси Давлат бюджетига тўловлар бўйича моддий-техника ресурслари етказиб берувчилар ва сув хўжалиги ташкилотларининг қарздорлигини қайта кўриб чиқиш йўли билан фойдаланувчи сув хўжалиги ташкилотларининг қишлоқ хўжалигини суғорма сув билан барқарор таъминлаш тадбирларини амалга ошириш натижасида ҳосил бўлган кредиторлик қарзларини узсин.

7. "Ўзбекнефтгаз" миллий холдинг компанияси:

Ўзбекистон Республикаси Иқтисодиёт вазирлиги билан биргаликда сув тақчиллигини юмшатиш бўйича суғоришнинг сувни тежайдиган технологияларини жорий этиш учун Ўзбекистон Республикаси Қишлоқ ва сув хўжалиги вазирлигининг асосланган ҳисоб-китобларига мувофиқ биржа котировкаларининг ўртача нархлари бўйича "Жиззахпластмасса" очиқ акциядорлик жамиятининг тўғридан-тўғри шартномалари бўйича полиэтилен гранулалар етказиб берилишини таъминласин;

"Ўздавнефтгазинспекция" хулосасига мувофиқ таъмирлаш-тиклаш ишларини бажариш учун биржа котировкаларининг ўртача нархлари бўйича тўғридан-тўғри шартномаларга кўра ёқилғи-мойлаш материаллари етказиб берилишини таъминласин.

8. Сув ресурсларидан самарали ва оқилона фойдаланиш, сув тақчиллигининг салбий оқибатларини юмшатиш ва 2011 йил июнь-сентябрь ойларида қишлоқ хўжалигини суғорма сув билан барқарор таъминлаш учун шарт-шароитлар яратиш ишларини мувофиқлаштириш учун 7-иловага мувофиқ таркибда ишчи гуруҳ ташкил этилсин.

Ишчи гуруҳ (Ш.М. Мирзиёев):

сув олиш лимитларига ва сув омборларидан суғорма сув чиқаришга риоя этилиши устидан қаттиқ назоратни ташкил этсин;

суғоришнинг сувни тежайдиган технологияларини жорий этиш параметрлари ва таъмирлаш-тиклаш ишлари бажарилишини мунтазам ўргансин ва ҳар ўн кунда Қорақалпоғистон Республикаси Вазирлар Кенгаши Раиси, вилоятлар ва туманлар ҳокимларининг сув тақчиллигининг салбий оқибатларини юмшатиш ва 2011 йил июнь-сентябрь ойларида қишлоқ хўжалигини суғорма сув билан барқарор таъминлаш учун шарт-шароитлар яратиш бўйича ҳисоботларини эшитсин;

ҳар ойда, манбалардаги сувдан келиб чиқиб, зарурият бўлганда, сув олиш лимитларига тузатишлар киритсин.

9. Мазкур қарорнинг бажарилишини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.

Ўзбекистон Республикаси Президенти                                   И. Каримов

*) Иловалар рус тилидаги матнда берилган