Ўзбекистон Республикаси Вазирлар Маҳкамасининг 29.12.2000 й. 516-сон "2000 йилда қишлоқ хўжалиги корхоналарини санация қилиш якунлари ва 2001 йилда уни ташкил этиш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

29.12.2000 й.

N 516

2000 ЙИЛДА ҚИШЛОҚ ХЎЖАЛИГИ

КОРХОНАЛАРИНИ САНАЦИЯ ҚИЛИШ

ЯКУНЛАРИ ВА 2001 ЙИЛДА УНИ ТАШКИЛ

ЭТИШ ЧОРА-ТАДБИРЛАРИ ТЎҒРИСИДА

Вазирлар Маҳкамаси қайд этадики, 2000 йилда санация қилинган 231 та қишлоқ хўжалиги корхоналаридан 122 таси сув танқислигига қарамай молиявий аҳволини яхшилашга эришдилар, иқтисодий ночорликдан чиқиш учун зарур база яратдилар. Шу билан бирга, 50 та хўжалик ташқи бошқарувчилар томонидан ишлаб чиқаришни ташкил этишда йўл қўйилган камчиликлар, жойлардаги масъул раҳбар кадрларнинг санация қилинаётган хўжаликлар муаммоларига бефарқ муносабатда бўлишгани, сув танқислиги оқибатларини бартараф этишга доир кўрилган чора-тадбирларнинг самарасизлиги туфайли кутилган натижаларга эриша олмадилар. Сув танқислиги оқибатида 59 та хўжалик ўз фаолиятини зарар кўрган ҳолда якунладилар.

Қишлоқ хўжалиги корхоналарининг молиявий барқарорлигини таъминлаш, 2001 йилда уларнинг фаолияти учун қулай иқтисодий шароитлар яратиш мақсадида Вазирлар Маҳкамаси ҚАРОР ҚИЛАДИ:

1. Қишлоқ хўжалиги корхоналарини санация қилиш масалалари бўйича Ҳукумат комиссиясининг:

2001 йил мобайнида 1999 йилдан буён санация қилинаётган 1-иловага мувофиқ қишлоқ хўжалиги корхоналарини қишлоқ хўжалиги кооперативлари (ширкатлари)га айлантириш тўғрисидаги;

1999 йилдан буён санация қилинаётган ва сув танқислиги ҳамда ноқулай об-ҳаво шароитлари натижасида 2000 йилни зарар кўрган ҳолда якунлаган 2-иловага мувофиқ хўжаликларни санация қилиш муддатини, истисно тариқасида, яна бир йилга узайтириш тўғрисидаги;

зарар билан ишлаётган (3-иловага мувофиқ) қишлоқ хўжалиги корхоналарини иқтисодий жиҳатдан соғломлаштириш ва уларнинг молиявий барқарорлигини таъминлаш мақсадида 2001 йилдан бошлаб санацияга тортиш тўғрисидаги;

1999-2000 йилларда санация қилинган ва 2000 йил якунлари бўйича ижобий натижаларга эришмаган қишлоқ хўжалиги корхоналарини, шунингдек айрим хўжаликларни санация жараёнига тортмасдан фермер хўжаликларига айлантириш тўғрисидаги 4-иловага мувофиқ таклифларига розилик берилсин.

2. Ўзбекистон Республикаси Қишлоқ ва сув хўжалиги вазирлиги, Деҳқон ва фермер хўжаликлари уюшмаси, Қорақалпоғистон Республикаси Вазирлар Кенгаши ва вилоятлар ҳокимликлари тегишли вазирликлар ва идоралар билан биргаликда 1 ва 4-иловаларда кўрсатилган қишлоқ хўжалиги корхоналарининг мулкчилик шаклларини ҳамда ташкилий тузилмасини ўзгартириш тадбирларини бир ой мобайнида ишлаб чиқсинлар ва амалга оширсинлар.

3. Қорақалпоғистон Республикаси Вазирлар Кенгаши, вилоятлар ва туманлар ҳокимликлари Қишлоқ хўжалиги корхоналарини санация қилиш масалалари бўйича Ҳукумат комиссияси билан келишган ҳолда 3-иловада кўрсатилган санация қилинаётган қишлоқ хўжалиги корхоналарининг ташқи бошқарувчиларини белгиланган тартибда бир ой муддатда тайинласинлар.

Қишлоқ хўжалиги корхоналарини санация қилиш масалалари бўйича Ҳукумат комиссияси Қишлоқ ва сув хўжалиги вазирлиги билан биргаликда санация қилинган хўжаликларнинг ташқи бошқарувчилари ва мутахассисларини 2001 йил 1 мартгача махсус дастурлар асосида ўқитишни ташкил этсин.

4. Қишлоқ хўжалиги корхоналарини санация қилиш масалалари бўйича ҳудудий комиссиялар 1999 ва 2000 йилларда санация қилинган хўжаликларнинг 2000 йил якунлари ҳисобга олинган ҳолда қайта кўриб чиқилган санация режаларини, шунингдек 2001 йилдан бошлаб санация қилинадиган хўжаликларнинг ишлаб чиқилган санация режалари 2001 йил 1 февралгача Ҳукумат комиссиясига тасдиқлаш учун тақдим этилишини таъминласинлар, уларда қуйидагиларни назарда тутсинлар:

экин майдонларини, тузилган шартномаларни, товар-моддий бойликлар қолдиқларини, мол-мулкни, тугалланмаган ишлаб чиқаришларни хатловдан ўтказиш;

ортиқча асосий фондлар ва моддий бойликларни сотиш, ижтимоий инфратузилма объектларини маҳаллий бошқарув органлари балансига бериш, дебиторлик қарзларни ундириш бўйича тадбирлар ишлаб чиқиш;

хўжаликларга малакали мутахассисларни жалб этиш;

рақобатга бардошли ва юқори даромадли экинлар майдонларини кенгайтириш, янги техника ва технологияларни ишлаб чиқаришга кенг жорий қилиш, хўжалик оладиган фойда миқдорини оширишга кўмаклашувчи барча маҳаллий ва хўжалик ички заҳираларини ишга солиш.

Қишлоқ хўжалиги корхоналарини санация қилиш масалалари бўйича ҳудудий комиссиялар зиммасига маҳаллий меҳнат органлари билан биргаликда маҳсулот бирлигини етиштириш харажатлари меъёрларидан келиб чиққан ҳолда, ходимларнинг чекланган сонини аниқлаш ҳамда икки ой муддатда меъёрдан ортиқча ходимлар сонини қисқартириш юзасидан жавобгарлик юклансин.

Ўзбекистон Республикаси Меҳнат вазирлиги, Қорақалпоғистон Республикаси Вазирлар Кенгаши, вилоятлар ҳокимликлари манфаатдор вазирликлар ва идоралар билан биргаликда 2001 йилдан бошлаб санацияга тортилган қишлоқ хўжалиги корхоналарининг бўшаб қоладиган ходимларини ишга жойлаштириш дастурини ишлаб чиқсин, ушбу мақсадлар учун Иш билан таъминлашга кўмаклашиш жамғармаси, "Бизнес-фонд", корхоналарнинг молиявий ресурсларини ва аҳоли маблағларини жалб этсинлар.

5. Қишлоқ хўжалиги корхоналарини санация қилиш масалалари бўйича Ҳукумат комиссияси (Р.С.Азимов) зарар кўриб ишлаётган қишлоқ хўжалиги корхоналарини фермер хўжаликларига айлантириш тартиби тўғрисидаги Намунавий низомни бир ой муддатда ишлаб чиқсин ва тасдиқласин, унда мазкур жараённинг умумий муҳим қоидалари аниқ баён қилинишини назарда тутсин.

6. Санация қилинаётган қишлоқ хўжалиги корхоналарига хизмат кўрсатувчи тижорат банкларига:

санация жараёнини амалга ошириш учун махсус ҳисоб рақамлари очиш ҳамда санация қилинаётган қишлоқ хўжалиги корхоналарининг бюджет ва бюджетдан ташқари фондлар билан, товар-моддий бойликлар, бажарилган ишлар ва кўрсатилган хизматлар учун ҳисоб-китобларини фақат махсус ҳисоб рақамидан тўлов топшириқномалари бўйича, маҳсулот етиштириш юзасидан меъёрий харажатлар доирасида амалга оширишни таъминлаш;

дебиторлик қарзларни ундиришда санация қилинаётган қишлоқ хўжалиги корхоналарига кўмаклашиш тавсия этилсин.

7. Ўзбекистон Республикаси Қишлоқ ва сув хўжалиги вазирлиги санация қилинаётган хўжаликлар ҳудудидан ўтадиган хўжаликлараро коллектор-дренаж тизимлари ҳолатини бир ой муддатда текшириб чиқсин ҳамда 2001 ва 2002 йилларга ажратилган маблағлар ҳажми доирасида уларни тозалашни назарда тутсин.

8. Ўзбекистон Республикаси Энергетика ва электрлаштириш вазирлиги, Қишлоқ ва сув хўжалиги вазирлиги, "Ўзкоммунхизмат" агентлиги, Қорақалпоғистон Республикаси Вазирлар Кенгаши ва вилоятлар ҳокимликлари 2001 йил 1 январдан бошлаб санациядаги хўжаликлар ҳудудида фойдаланиладиган электр энергияси, газ ва ичимлик сув учун ҳисоб-китобларнинг бевосита аҳоли билан ўтказилишини таъминласинлар.

9. Қорақалпоғистон Республикаси Вазирлар Кенгаши ва вилоятлар ҳокимликлари хусусийлаштирилган чорвачилик фермаларининг, ижарага берилган боғлар, узумзорлар, иссиқхоналар ва бошқа объектларнинг аҳволини икки ой муддатда ўрганиб чиқсинлар ҳамда санация қилинаётган қишлоқ хўжалиги корхоналарининг иқтисодий манфаатларига зарар етказилган ҳолларда шартномаларни қайта кўриб чиқиш юзасидан белгиланган тартибда зарур чора-тадбирлар кўрсинлар.

10. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов ва Ўзбекистон Республикаси Президентининг Давлат маслаҳатчиси Т.А. Алимов зиммасига юклансин.

Вазирлар Маҳкамасининг Раиси                                             И. Каримов

Вазирлар Маҳкамасининг

2000 йил 29 декабрдаги

516-сон қарорига

1-ИЛОВА

1999 йилдан буён санация қилинаётган

ва қишлоқ хўжалиги кооперативлари (ширкатлари)га

айлантириладиган қишлоқ хўжалиги корхоналари

РЎЙХАТИ

Вазирлар Маҳкамасининг

2000 йил 29 декабрдаги

516-сон қарорига

2-ИЛОВА

1999 йилдан буён санация қилинаётган ва санация

муддати бир йилга узайтириладиган

қишлоқ хўжалиги корхоналари

РЎЙХАТИ

Вазирлар Маҳкамасининг

2000 йил 29 декабрдаги

516-сон қарорига

3-ИЛОВА

2001 йилдан бошлаб санацияга

тортиладиган хўжаликлар

РЎЙХАТИ

Вазирлар Маҳкамасининг

2000 йил 29 декабрдаги

516-сон қарорига

4-ИЛОВА

Фермер хўжаликларига айлантириладиган

қишлоқ хўжалиги корхоналари

РЎЙХАТИ

*) 1999 йилдан санация қилинган

**) 2000 йилдан санация қилинган