Ўзбекистон Республикаси Президентининг 11.02.1992 й. ПФ-339-сон "Ўзбекистон Республикасида молия органларини бошқариш ташкилий тузилмасини ва нарх белгилаш тизимини такомиллаштириш тўғрисида"ги Фармони

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОНИ

11.02.1992 й.

N ПФ-339

ЎЗБЕКИСТОН РЕСПУБЛИКАСИДА МОЛИЯ

ОРГАНЛАРИНИ БОШҚАРИШ ТАШКИЛИЙ

ТУЗИЛМАСИНИ ВА НАРХ БЕЛГИЛАШ

ТИЗИМИНИ ТАКОМИЛЛАШТИРИШ

ТЎҒРИСИДА

Келишилган ягона молия, солиқ ва нарх сиёсатини амалга ошириш, республика иқтисодиётининг молиявий соғломлашувини таъминлаш, бозор муносабатлари шаклланиши шароитида нарх-навони тартибга солишнинг иқтисодий усуллари аҳамиятини кучайтириш мақсадида:

1. Республика ҳудудида нархларга доир давлат сиёсатини ўтказиш вазифалари Ўзбекистон Республикасининг Молия вазирлигига топширилиб, унинг аппарати Ўзбекистон Республикаси Давлат нархлар комитетининг аппарати билан бирлаштирилсин.

2. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимлари Ўзбекистон Республикасининг Молия вазирлиги билан биргаликда бир ой муддат ичида мазкур Фармоннинг 1-банди талабларига мувофиқ ҳудудий бўлинмалар ва нарх бўлимлари марказий аппаратини молия органлари билан бирлаштириш юзасидан ташкилий чора-тадбирларни амалга оширишлари зарур.

3. Ўзбекистон Республикаси Молия вазирлигининг зиммасига:

республика ҳудудида ягона молия, солиқ ва нарх сиёсатини шакллантириш ҳамда ўтказиш, бозор иқтисодиётига ўтиш шароитида ижтимоий-иқтисодий ривожланиш ва аҳолини ижтимоий муҳофаза қилишнинг барқарор молиявий негизини вужудга келтириш борасидаги ишларни мувофиқлаштириш;

молияни ва нарх белгилашни бошқариш тизимини такомиллаштиришга, қимматбаҳо қоғозлар бозорини вужудга келтиришга, давлат тасарруфидан чиқариш ва хусусийлаштириш дастурларини амалга оширишнинг молиявий жиҳатларига оид таклифларни ишлаб чиқиш;

валюта-молия сиёсатининг асосий қоидаларини, республиканинг валюта бойликларини кўпайтириш ва улардан самарали фойдаланишга доир таклифни ишлаб чиқиш;

узоқ муддатли молиявий меъёрлар ва нормативлар асосида республика бюджетини тузиш ва ижро этиш, йиғма молиявий балансни ишлаб чиқиш;

нархлар ва тарифларни иқтисодий жиҳатдан тартибга солиш чораларини амалга ошириш, уларни эркинлаштириш йўлини изчиллик билан ўтказиш вазифаси юклансин.

4. СССР Давлат нархлар комитетига қарашли нарх белгилаш илмий-тадқиқот институтининг Ўрта Осиё бўлими Ўзбекистон Республикасининг Молия вазирлигига бўйсундирилиб, у Ўзбекистон Республикаси Молия вазирлиги ҳузуридаги Молия ва нарх илмий-тадқиқот институтига айлантирилсин.

5. Ўзбекистон Республикаси Президенти ҳузуридаги Вазирлар Маҳкамаси 10 кун муддат ичида Ўзбекистон Республикаси Молия вазирлигининг тузилмаси тўғрисида қарор қабул қилиши ва вазирлик ҳақидаги Низомни тасдиқлаши зарур.

Ўзбекистон Республикаси Президенти                             И. Каримов