Ўзбекистон Республикаси Вазирлар Маҳкамасининг 06.11.1997 й. 505-сон "Шўртан газ-кимё комплекси қурилишини жадаллаштириш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

06.11.1997 й.

N 505

ШЎРТАН ГАЗ-КИМЁ КОМПЛЕКСИ

ҚУРИЛИШИНИ ЖАДАЛЛАШТИРИШ

ТЎҒРИСИДА

Ўзбекистон Республикасини импортнинг ўрнини босадиган ва экспортга йўналтирилган маҳсулотлар билан таъминлаш учун полиэтилен ва суюлтирилган газ ишлаб чиқариш бўйича Шўртан газ-кимё комплекси қурилишини жадаллаштириш мақсадида Вазирлар Маҳкамаси ҚАРОР ҚИЛАДИ:

1. "Ўзбекнефтгаз" корпорацияси жорий йилда Қашқадарё вилоятининг Ғузор туманида 2000 йил охирида фойдаланишга топшириладиган Шўртан газ-кимё комплекси қурилишига тайёргарлик ишларини, 1998 йил январь ойидан бошлаб эса қурилиш ишларини бошласин.

2. Маълумот учун қабул қилинсинки:

комплекснинг техник-иқтисодий асосланиши Ташқи иқтисодий алоқалар вазирлиги, Молия вазирлиги, Макроиқтисодиёт ва статистика вазирлиги, Ташқи иқтисодий фаолият миллий банки томонидан кўриб чиқилган ва республика Давлат архитектура ва қурилиш қўмитаси ҳамда "Стоун ва Вебстер" (АҚШ-Англия) мустақил инжиниринг фирмаси томонидан экспертиза қилинган;

"АББ Луммус Глобал" (АҚШ), "Нишо Иваи" ва "Мицуи" (Япония)дан иборат таркибдаги консорциум томонидан комплекснинг базавий лойиҳасини ишлаб чиқиш тугалланган ва "Ўзбекнефтгаз" корпорациясига ташқи муҳандислик коммуникацияларини лойиҳалаш ва қуриш учун асос бўлувчи маълумотлар берилган;

"Ўзбекнефтгаз" корпорацияси томонидан асосий технологик жараёнларга лицензиялар сотиб олинган;

лойиҳалаштириш, асбоб-ускуналар етказиб бериш, қурилиш монтаж ва ишга тушириш-созлаш ишлари, комплекснинг технологик қисми бўйича уларни лойиҳа қувватларига чиқариш шарти билан қурилмаларни ишга тушириш консорциум томонидан фойдаланишга тайёр ҳолда топшириш шартларида бажарилади;

АҚШ ва Япониянинг экспорт-импорт банклари, Германиянинг экспорт-кредит агентлиги (Hermes) томонидан лойиҳани маблағ билан таъминлаш бўйича узил-кесил мажбуриятлар 1997 йил охиригача берилади;

республиканинг лойиҳалаш ташкилотлари томонидан ташқи муҳандислик коммуникацияларини лойиҳалаштириш бошланган;

"Ўзбекнефтгаз" корпорацияси томонидан комплекснинг технологик қисми қурилиши муддатларини қисқартириш мақсадида лойиҳани маблағ билан таъминлаш бўйича асосий контракт ва кредит битимлари расман кучга киргунга қадар лойиҳалаштиришни давом эттириш ва узоқ муддатда тайёрланадиган асбоб-ускуналарга буюртмаларни жойлаштириш тўғрисида консорциум билан аҳдлашувга эришилган.

3. Қуйидагилар:

"Ўзбекнефтгаз" корпорациясининг "Ўзбекнефтгазқазиболиш" давлат-акциядорлик бирлашмаси Шўртан газ-кимё комгтлекси қурилишининг бош буюртмачиси;

республика қурилиш ташкилотлари субпудратчилар сифатида жалб қилинган ҳолда "Ўзбекнефтгаз" корпорациясининг "Ўзбекнефтгазқурилиш" бирлашмаси ва "Ўзсувқурилиш" концерни комплекс қурилиши бўйича бош пудратчилар, технология қисмидан, шунингдек ташқи энергия таъминоти ва темир йўл транспорти объектларидан ташқари;

Ўзбекистон Республикаси Энергетика ва электрлаштириш вазирлиги ташқи энергия таъминоти объектлари қурилиши бўйича буюртмачи ва бош пудратчи (бош буюртмачи маблағлари ҳисобига);

"Ўзбекистон темир йўллари" давлат-акциядорлик компанияси иншоотлар билан биргаликда темирйўл транспорти объектлари қурилиши бўйича буюртмачи (бош буюртмачи маблағлари ҳисобига), "Ўзбектрансқурилиш" уюшмаси бош пудратчи;

республика ва МДҲ мамлакатларининг лойиҳа институтларини субпудрат шартларида жалб қилган ҳолда "Ўзбекнефтгаз" корпорациясининг Ўзбекистон нефть ва газ илмий-тадқиқот лойиҳалаштириш институти комплекс бўйича, технологик қисм бундан мустасно, "Тошбошрежалар" илмий-тадқиқот лойиҳалаштириш институти тураржой шаҳарчаси бўйича бош лойиҳалаштирувчилар этиб белгилансин.

4. "Ўзбекнефтгаз" корпорацияси республиканинг тегишли вазирликлари ва идораларини ҳамда хорижий консалтинг компанияларини жалб қилган ҳолда "АББ Луммус Глобал", "Нишо Иваи" ва "Мицуи"дан иборат таркибдаги консорциумнинг лойиҳалаштириш, асбоб-ускуналар етказиб бериш, қуриш, ишга тушириш-созлаш ва комплекснинг технологик қисмини фойдаланишга тайёр ҳолда топшириш шартларида ишга тушириш контракти бўйича таклифларини бир ой муддатда кўриб чиқсин.

6. "Ўзбекнефтгаз" корпорацияси "АББ Луммус Глобал", "Нишо Иваи" ва "Мицуи"дан иборат таркибдаги консорциум томонидан контракт шартлари бажарилиши бўйича юридик, молиявий-иқтисодий ва муҳандислик-техника назорати хизматлари кўрсатиш юзасидан хорижий фирмалар билан белгиланган тартибда контрактлар тузсин.

8. "Ўзсаноатқурилишбанк"ка ва бошқа тижорат банкларига 1997 йилда ва 1998 йилнинг I ярим йиллигида Шўртан газ-кимё комплекси қурилишини ишчи чизмаларга асосан амалда бажарилган ишлар ҳажми бўйича маблағ билан таъминлаш тавсия қилинсин.

9. Ўзбекистон Республикаси Макроиқтисодиёт ва статистика вазирлиги лойиҳанинг техник-иқтисодий асосланиши тасдиқлангандан кейин комплекс қурилишини 1998 йилнинг ва кейинги йилларнинг инвестиция дастурига киритсин.

10. "Ўзбекнефтгаз" корпорациясига комплекс қурилиши муддатларини қисқартириш мақсадида "АББ Луммус Глобал", "Нишо Иваи" ва "Мицуи"дан иборат таркибдаги консорциум билан лойиҳани маблағ билан таъминлаш бўйича асосий контракт ва кредит битимлари кучга киргунга қадар лойиҳалаштиришни давом эттириш ва узоқ муддатда тайёрланадиган асбоб-ускуналарга буюртмаларни жойлаштириш тўғрисидаги битимни имзолашга рухсат берилсин.

11. Комплекс қурилишида бевосита банд бўлган ходимларнинг барча тоифалари учун чўл шароитида ва сувсизликда ишлаганлик учун иш ҳақига 1,7 коэффициент ҳамда лавозим маошлари ва тариф ставкаларига 30 фоиз миқдорида устама белгилансин.

12. Қашқадарё вилояти ҳокимлиги "Ўзбексавдо" уюшмаси ва "Ўзбекнефтгаз" корпорациясининг "Нефтгазтаъминот" бирлашмаси билан биргаликда комплекс қурилишига жалб қилинган ходимларнинг жойлаштирилишини ва уларнинг овқатлантирилишини таъминласин, улар учун ижтимоий-маиший шароитлар яратсин.

13-16. Маҳфий.

17. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И.Ҳ.Жўрабеков зиммасига юклансин.

Вазирлар Маҳкамасининг Раиси                                         И. Каримов