Ўзбекистон Республикаси ҳудудида қўлланиши рухсат этилган фискал хотирага эга бўлган назорат-касса машиналарининг Давлат реестрини юритиш тартиби тўғрисида Низом (ЎзР ВМ 17.11.2011 й. 306-сон қарорига 2-илова)

Функция недоступна

Вазирлар Маҳкамасининг

2011 йил 17 ноябрдаги

306-сон қарорига

2-ИЛОВА

Ўзбекистон Республикаси ҳудудида қўлланиши

рухсат этилган фискал хотирага эга бўлган

назорат-касса машиналарининг Давлат

реестрини юритиш тартиби тўғрисида

НИЗОМ

I. УМУМИЙ ҚОИДАЛАР

1. Ўзбекистон Республикаси ҳудудида қўлланиши рухсат этилган фискал хотирага эга бўлган назорат-касса машиналарининг Давлат реестри (кейинги ўринларда Давлат реестри деб аталади) Молия вазирлиги ва Ўзбекистон техник жиҳатдан тартибга солиш агентлиги билан келишган ҳолда Ўзбекистон Республикаси Давлат солиқ қўмитаси (кейинги ўринларда ваколатли орган деб аталади) томонидан шакллантирилади ва юритилади.

2. Давлат реестри ушбу Низомга иловага мувофиқ шакл бўйича юритилади ва Ўзбекистон Республикаси ҳудудида қўлланиши рухсат этилган дастурий маҳсулотларнинг бир ёки бир нечта версияларига эга бўлган фискал хотирага эга бўлган назорат-касса машиналари моделлари тўғрисидаги тўлиқ маълумотлардан иборат бўлади.

3. Давлат реестри:

а) ариза берувчи томонидан тақдим этилган маълумотлар;

б) назорат-касса машинасига сертификатлаш органлари томонидан берилган мувофиқлик сертификатлари;

в) ваколатли орган қарорига кўра назорат-касса машиналари моделларининг техник ва функционал тавсифларини уларга қўйиладиган техник талабларга мувофиқ экспертизадан ўтказаётган ташкилотларнинг хулосалари;

г) ваколатли орган мажлисларида назорат-касса машиналари моделларини Давлат реестрига киритиш тўғрисидаги масалани кўриб чиқиш баённомалари асосида шакллантирилади.

4. Давлат реестри назорат-касса машиналари моделлари тўғрисидаги маълумотларни уларнинг версияларини кўрсатган ҳолда ушбу реестрга киритиш ёки ундан чиқариш ёхуд кўрсатиб ўтилган маълумотларга ўзгартиришлар киритиш мақсадида юритилади.

5. Ваколатли орган қарорига кўра Давлат реестрига назорат-касса машиналари янги моделларининг номлари, дастурий маҳсулот (версиялари) тўғрисидаги ҳамда ушбу Низомда назарда тутилган бошқа маълумотлар киритилади.

6. "Ўзэлтехсаноат" уюшмаси ваколатли органнинг ишчи органи ҳисобланади (кейинги ўринларда ишчи орган деб аталади).

II. НАЗОРАТ-КАССА МАШИНАЛАРИНИ

ДАВЛАТ РЕЕСТРИГА КИРИТИШ ШАРТЛАРИ

7. Ваколатли орган назорат-касса машиналари моделларини Давлат реестрига киритиш тўғрисидаги масалани кўриб чиқишда:

а) тақдим этилган назорат-касса машинаси модели ва унинг дастурларининг назорат-касса машинаси техник ҳужжатларига мувофиқлигини;

б) ваколатли орган қарорига кўра назорат-касса машиналари моделларининг техник ва функционал тавсифларини экспертизадан ўтказаётган ташкилотларнинг хулосаларидаги тавсияларни;

в) савдо (ишлар ва хизматлар) соҳаси хўжалик юритувчи субъектларининг назорат-касса машиналари моделларининг ушбу типдаги моделлари билан жиҳозланганлик даражасини;

г) назорат-касса машиналарини етказиб бериш комплектига кирувчи давлат тилидаги ва бошқа тиллардаги техник ҳужжатлар мавжудлигини;

д) фискал хотирага эга бўлган назорат-касса машинаси ва унинг дастурий маҳсулотлари функционал тавсифларининг ягона техник талабларда келтирилган малака гуруҳларидан бирига мувофиқлигини;

е) назорат-касса машиналари моделларининг аниқ типига Ўзбекистон Республикаси ҳудудида техник хизмат кўрсатиш имкониятлари мавжудлигини ҳисобга олади.

III. НАЗОРАТ-КАССА МАШИНАЛАРИНИ

ДАВЛАТ РЕЕСТРИГА КИРИТИШ ТАРТИБИ

8. Маҳаллий ва хорижий назорат-касса машиналари моделларини ишлаб чиқарувчи ташкилотлар, шунингдек назорат-касса машиналарини импорт қилиш ва сотиш билан шуғулланувчи юридик шахслар назорат-касса машинаси моделини Давлат реестрига киритиш ташаббускори (ариза берувчи) бўлишлари мумкин.

9. Назорат-касса машинаси моделини (версиясини) Давлат реестрига киритиш учун ариза берувчи ваколатли органга хат билан мурожаат қилади, унда қуйидаги маълумотлар кўрсатилиши керак:

а) ариза берувчининг номи, унинг почта манзили ва телефони;

б) моделнинг унинг версиялари кўрсатилган ҳолдаги номи ва назорат-касса машинасини қўллаш соҳаси;

в) ариза берувчи кўрсатилиши лозим деб ҳисоблаган бошқа маълумотлар.

10. Аризага қуйидагилар илова қилинади:

а) шакллантириладиган чеклар намуналари;

б) назорат-касса машинасининг эталон намунаси;

в) назорат-касса машинаси моделининг техник ва функционал тавсифлари батафсил кўрсатилган техник паспорт (бошқа ҳужжат) ҳамда кафолат мажбуриятлари;

г) фойдаланиш ҳужжатлари (фойдаланувчи учун қўлланма, солиқ инспектори йўриқномаси);

д) ариза берувчининг назорат-касса машинасини ишлаб чиқариш ёки етказиб бериш мажбуриятини тасдиқловчи ҳужжатлар (ишлаб чиқариш базаси, етказиб бериш шартномаси ва бошқалар);

е) ариза берувчининг эҳтиёт қисмлар билан таъминлаш, ходимларни ўқитиш, сервис хизмати кўрсатиш бўйича мажбуриятини тасдиқловчи ҳужжатлар, шунингдек назорат-касса машинаси модели версияларининг ведомости;

ж) назорат-касса машинасини унинг асосий функционал тавсифларининг норматив ҳужжатлар талабларига мувофиқлиги юзасидан текшириш методикаси;

з) назорат-касса машинасининг асосий функционал тавсифлари норматив ҳужжатлар талабларига мувофиқлиги ведомости;

и) Давлат реестрига киритиш учун тақдим этилаётган назорат-касса машинасининг белгиланган тартибда аккредитация қилинган сертификатлаштириш органи томонидан берилган мувофиқлик сертификати.

11. Ишчи органнинг масъул ходими ҳужжатларни рўйхат бўйича қабул қилиб олади, рўйхатнинг нусхаси ариза қабул қилинган кунда ариза берувчига юборилади (топширилади).

Ишчи орган тақдим этилган ҳужжатларни уч кун муддатда назорат-касса машинасининг техник ва функционал тавсифларини ариза берувчи билан шартнома асосида экспертизадан ўтказиш учун эксперт ташкилотига беради.

Улар бўйича ушбу Низомда назарда тутилган барча ҳужжатлар тақдим этилмаган назорат-касса машинаси моделлари экспертизадан ўтказишга қўйилмайди.

Назорат-касса машинасининг техник ва функционал тавсифларини экспертизадан ўтказувчи эксперт ташкилоти ваколатли орган қарорига кўра белгиланади.

12. Эксперт ташкилоти бир ҳафта муддатда назорат-касса машинасининг техник ва функционал тавсифларини экспертизадан ўтказади, ваколатли орган томонидан белгиланадиган шакл бўйича хулосани расмийлаштиради ва уни ишчи органга тақдим этади.

Ишчи орган эксперт ташкилотининг ижобий хулосасини олгандан кейин бир кун муддатда ҳужжатларни кўриб чиқиш учун ваколатли органга тақдим этади.

Эксперт ташкилоти томонидан салбий хулоса берилган тақдирда ишчи орган тақдим этилган ҳужжатларни ариза берувчига хулосада кўрсатилган камчиликларни бартараф этиш учун бир кун муддатда қайтаради.

13. Ваколатли орган назорат-касса машинаси моделини (модел версиясини) Давлат реестрига киритиш масаласини икки ҳафта муддатда кўриб чиқади ва қуйидаги қарорлардан бирини қабул қилади:

а) назорат-касса машинаси моделини (модель версиясини) Давлат реестрига киритиш тўғрисида;

б) назорат-касса машинаси моделини (модель версиясини) Давлат реестрига киритишни рад этиш тўғрисида.

Назорат-касса машинаси моделини (модель версиясини) Давлат реестрига киритиш тўғрисидаги масалани кўриб чиқишнинг умумий муддати ариза тушган кундан бошлаб бир ойдан ошмаслиги керак.

15. Ваколатли органнинг қабул қилинган қарори тўғрисида уч кун муддатда баённомадан кўчирма илова қилинган ҳолда ариза берувчига хабар қилинади.

Ваколатли орган томонидан назорат-касса машинаси моделини (модель версиясини) Давлат реестрига киритишни рад этиш тўғрисида қарор қабул қилинган тақдирда қарорда рад этишнинг сабаблари кўрсатилади.

Ариза берувчи рад этиш учун асос бўлган сабаблар бартараф этилгандан кейин назорат-касса машинаси моделини (модель версиясини) Давлат реестрига киритиш тўғрисида янги ариза беришга ҳақлидир.

16. Илгари кўриб чиқилган ва Давлат реестрига киритилмаган назорат-касса машинаси моделлари, уларда ушбу қарорда қайд этилган камчиликлар бартараф этилмаган бўлса, қайта кўриб чиқилмайди ва илгари қабул қилинган қарор асосида рад этилади.

17. Ариза берувчи ваколатли органга мажбурий тартибда техник ва функционал тавсифлари бўйича экспертизадан ўтган ва Давлат реестрига киритилган назорат-касса машинасининг эталон намунасини (моделнинг версиясини) тақдим этади.

Назорат-касса машинасини Давлат реестрига киритиш тўғрисидаги ариза кўриб чиқилганлиги учун тўлов ундирилмайди.

IV. НАЗОРАТ-КАССА МАШИНАЛАРИНИ

ДАВЛАТ РЕЕСТРИДАН ЧИҚАРИШ ТАРТИБИ

18. Назорат-касса машинаси модели (модели версияси) қуйидаги ҳолларда Давлат реестридан чиқарилади:

назорат-касса машинасига нисбатан қонун ҳужжатлари талаблари ўзгарганда;

назорат-касса машинаси модели (модели версияси) хўжалик юритувчи субъектлар томонидан маънавий эскирганлиги туфайли амалда фойдаланилмаганда;

назорат-касса машинаси модели (модели версияси)ни ишлаб чиқариш тўхтатилганда ва бозорда узоқ вақт (1-2 йил) мобайнида эҳтиёт қисмлар мавжуд бўлмаганда;

ариза берувчининг аризаси асосида назорат-касса машинаси модели (модели версияси) Давлат реестрига киритилган ариза берувчининг ёзма илтимосномасига биноан.

Қонун ҳужжатларида назорат-касса машиналари моделини (модели версиясини) Давлат реестридан чиқариш учун бошқача асослар назарда тутилиши мумкин.

19. Назорат-касса машинаси модели (модели версияси)ни 18-банднинг иккинчи - тўртинчи хатбошилардаги асослар бўйича Давлат реестридан чиқариш тегишли равишда Молия вазирлиги ва Ўзбекистон техник жиҳатдан тартибга солиш агентлиги билан келишган ҳолда ваколатли орган томонидан амалга оширилади.

20. Назорат-касса машинаси модели (модели версияси)ни Давлат реестридан чиқаришда қуйидаги ҳолатлар ҳисобга олинади:

назорат-касса машинаси модели (модели версияси)нинг давлат солиқ хизмати органларида рўйхатдан ўтказилган ва хўжалик юритувчи субъектлар томонидан фойдаланилаётган аппаратлари сони;

хўжалик юритувчи субъектларнинг назорат-касса машинаси модели (модели версияси)ни алмаштиришга потенциал харажатлари;

бозордаги таклифни ҳисобга олган ҳолда назорат-касса машинасининг янги модели (модели версияси)ни харид қилиш имконияти;

назорат-касса машинаси модели (модели версияси)ни алмаштириш учун зарур бўлган вақт;

аниқ вазиятлардан келиб чиққан ҳолда бошқа ҳолатлар.

21. Назорат-касса машинаси модели (модели версияси)ни Давлат реестридан чиқаришда хўжалик юритувчи субъектларга назорат-касса машинаси модели (модели версияси)ни алмаштириш учун камида уч ой муддат берилиши керак.

V. ЯКУНЛОВЧИ ҚОИДАЛАР

22. Мазкур Низом талаблари бузилишида айбдор бўлган шахслар қонун ҳужжатларида белгиланган тартибда жавоб берадилар.

Низомга

ИЛОВА

Ўзбекистон Республикаси ҳудудида қўлланиши

рухсат этилган фискал хотирага эга бўлган

назорат-касса машиналарининг

ДАВЛАТ РЕЕСТРИ

"Ўзбекистон Республикаси қонун ҳужжатлари тўплами", 2011 йил, 47-сон, 488-модда

"Ўзбекистон Республикаси Ҳукуматининг қарорлари тўплами", 2011 йил, 11-сон, 89-модда