Ўзбекистон Республикаси Президентининг 12.08.2010 й. ПҚ-1388-сон "Андижон шаҳрида футбол бўйича ихтисослаштирилган мактаб-интернат ташкил этиш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

12.08.2010 й.

N ПҚ-1388

АНДИЖОН ШАҲРИДА ФУТБОЛ

БЎЙИЧА ИХТИСОСЛАШТИРИЛГАН

МАКТАБ-ИНТЕРНАТ ТАШКИЛ ЭТИШ

ТЎҒРИСИДА

Баркамол авлодни тарбиялаш, қобилиятли ёшларни спортга фаол жалб этиш, миллий футболимизни янада қўллаб-қувватлаш ва ривожлантириш учун зарур шарт-шароитлар яратиш, ёш футболчиларни танлаб олиш ва уларда профессионал иштиёқ, маҳорат ҳамда кўникмаларни чуқур ривожлантиришни таъминлаш, шунингдек улардан футбол бўйича мамлакат клублари ва терма жамоаларига ишончли захирани шакллантириш мақсадида:

1. Ўзбекистон Республикаси Халқ таълими вазирлиги, "Ўзавтосаноат" акциядорлик компанияси, Маданият ва спорт ишлари вазирлиги ҳамда Ўзбекистон Футбол федерациясининг Андижон шаҳрида "Шўрбулоқ спорт соғломлаштириш" масъулияти чекланган жамияти спорт мажмуаси негизида Халқ таълими вазирлиги ҳузуридаги футбол бўйича Ихтисослаштирилган мактаб-интернатни ташкил этиш тўғрисидаги таклифига розилик берилсин.

2. Белгилаб қўйилсинки:

Андижон шаҳридаги футбол бўйича Ихтисослаштирилган мактаб-интернат қобилиятли ёш футболчиларни танлаб олувчи ва тайёрловчи, мактабдан ташқари спорт-таълим муассасаси ҳисобланади;

футбол бўйича Ихтисослаштирилган мактаб-интернат ўқувчиларининг таълим олиши яқин атрофдаги умумтаълим мактабида умумтаълим дастури бўйича амалга оширилади;

футбол бўйича Ихтисослаштирилган мактаб-интернатнинг умумий контингенти 120 нафар ўқувчини ташкил этади, улар томонидан тўрт йиллик бошланғич таълим якунлангач ҳар йили танлов асосида 24 нафар қобилиятли ўқувчилар қабул қилинади;

футбол бўйича Ихтисослаштирилган мактаб-интернатда ўқиш муддати 5 йилни ташкил этади, ўқиш якунланганидан сўнг уларга тегишли сертификат берилади ва авваламбор олимпия захираси коллежларида кейинги махсус, касб-ҳунар таълими берилиши таъминланади.

3. Қуйидагилар Андижон шаҳридаги футбол бўйича Ихтисослаштирилган мактаб-интернатнинг асосий вазифалари этиб белгилансин:

зарур ҳолларда футбол бўйича хорижий мураббийлар ва мутахассисларни таклиф қилган ҳолда футбол соҳасида энг янги илмий-методик тавсиялар асосида ёш футболчиларни тайёрлаш борасида ўқув-машқ жараёнларини юқори даражада ташкил этиш;

ўқувчиларнинг назарий тайёргарлиги ва техник-тактик кўникмаларини такомиллаштириш, профессионал фазилатларини ривожлантириш, шунингдек замонавий футболни ривожлантириш халқаро талабларига мувофиқ ҳолда Ўзбекистон ёшлар (ўсмирлар) терма жамоаларини тайёрлаш даражасини ошириш;

Халқаро футбол федерацияси тренерларини ўқитиш дастурларидан фойдаланган ҳолда футбол бўйича Ихтисослаштирилган мактаб-интернат тренерлари малакасини тизимли асосда оширишни таъминлаш;

ўқувчи-футболчилар ва тренерлар таркибининг профессионал маҳоратини ошириш учун хорижий футбол мактаблари, академиялари ва клублари билан тажриба алмашиш бўйича ҳамкорликни кенгайтириш.

4. Белгилансинки, Андижон шаҳридаги футбол бўйича Ихтисослаштирилган мактаб-интернатини молиялаш қуйидагилар ҳисобидан амалга оширилади:

Давлат бюджети маблағлари;

Ўзбекистон Футбол федерацияси маблағлари;

қонун ҳужжатларида тақиқланмаган бошқа манбалар.

5. Андижон вилояти ҳокимлиги, "Ўзавтосаноат" акциядорлик компанияси ва Ўзбекистон Республикаси Давлат мулки қўмитаси бир ой муддатда "Шўрбулоқ спорт соғломлаштириш" масъулияти чекланган жамияти спорт мажмуасининг ер майдони, бино ва иншоотлари, бошқа мол-мулки белгиланган тартибда футбол бўйича Ихтисослаштирилган мактаб-интернат балансига бепул берилишини таъминласинлар.

6. Ўзбекистон Республикаси Вазирлар Маҳкамаси бир ҳафта муддатда:

футбол бўйича Ихтисослаштирилган мактаб-интернат ўқувчиларини яшаш учун анжомлар, озиқ-овқат, шунингдек спорт экипировкаси ва формаси билан таъминлаш нормативларини;

зарур бўлган ўқув-машқ, спорт ва хўжалик ускуналари, анжомлар, замонавий компьютер техникаси, техника ва транспорт воситалари, шунингдек футбол бўйича Ихтисослаштирилган мактаб-интернат учун бошқа мол-мулклар рўйхатини тасдиқласин.

7. Ўзбекистон Республикаси Халқ таълими вазирлиги Ўзбекистон Футбол федерацияси ҳамда Маданият ва спорт ишлари вазирлиги билан биргаликда:

футбол бўйича Ихтисослаштирилган мактаб-интернатнинг устави, мактабнинг тузилмаси, ўқувчиларни танлаб олиш тартиби белгиланган тартибда тасдиқланишини, шунингдек унинг давлат рўйхатидан ўтказилишини;

2010 - 2011 ўқув йили бошлангунга қадар - ёш футболчиларни тайёрлашнинг илғор халқаро тажрибасини ҳисобга оладиган ўқувчилар тайёрлаш дастури тасдиқланишини;

футбол бўйича Ихтисослаштирилган мактаб-интернатнинг юқори малакали мутахассислар билан бутланишини, зарур ўқув-методик адабиётлар танлаб олинган ҳолда ўқув хоналари жиҳозланишини;

футбол бўйича Ихтисослаштирилган мактаб-интернат ўқувчиларини тайёрлаш сифати устидан мунтазам мониторинг олиб борилишини, зарурат бўлганда уларни тайёрлаш жараёнига тегишли тузатишлар киритилишини таъминласин.

8. Ўзбекистон Футбол федерацияси:

футбол бўйича Ихтисослаштирилган мактаб-интернатга тизимли асосда ташкилий ва ўқув-методик ёрдам, шунингдек унинг моддий-техник базасини мустаҳкамлашда кўмак берсин;

2010-2011 ўқув йили бошлангунга қадар ўз маблағлари ҳамда ҳомийларнинг жалб этиладиган маблағлари ҳисобидан футбол бўйича Ихтисослаштирилган мактаб-интернатни белгиланган тартибда зарур ўқув-машқ ва спорт ускуналари, мебель ва анжомлар, замонавий компьютер техникаси, техника ва транспорт воситалари, шунингдек бошқа мол-мулк билан жиҳозланишини таъминласин;

Ўзбекистон Республикаси Халқ таълими вазирлиги, манфаатдор вазирликлар ва идоралар билан биргаликда 2010 йилнинг IV чорагида Халқаро футбол федерацияси тренерларини ўқитиш дастурларидан фойдаланган ҳолда футбол бўйича Ихтисослаштирилган мактаб-интернат тренерларининг малакасини ошириш курслари ташкил этилишини, шунингдек Федерациянинг кадр ва илмий-методик салоҳияти футбол бўйича Ихтисослаштирилган мактаб-интернатнинг ўқув-машқ жараёнига жалб этилишини таъминласин.

9. Ўзбекистон Республикаси Молия вазирлиги 2010 йилги Давлат бюджети параметрларига тегишли ўзгартиришлар киритсин, 2011 йилдан бошлаб эса Давлат бюджети параметрларида ушбу қарорни амалга ошириш билан боғлиқ сарф-харажатларга таълим учун ажратиладиган маблағлар доирасида зарур бюджет маблағлари ажратилишини назарда тутсин.

10. Ўзбекистон Республикаси Президентининг "2010-2015 йилларда Андижон вилояти тураржой массивлари учун коммунал инфратузилмани илдам ривожлантириш чора-тадбирлари тўғрисида"ги 2010 йил 18 июндаги ПҚ-1355-сон қарорининг 9-банди, шунингдек қарорга 1-илованинг I бўлими 15-банди ўз кучини йўқотган, деб ҳисоблансин.

11. Мазкур қарорнинг ижросини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.

Ўзбекистон Республикаси Президенти                                         И. Каримов

"Ўзбекистон Республикаси қонун ҳужжатлари тўплами", 2010 йил, 32-сон, 269-модда