Ўзбекистон Республикаси Олий хўжалик суди кассация инстанциясининг 18.04.2011 й. 12-1102/85(4)-сон Қарори

Функция недоступна

ЎЗБЕКИСТОН РЕСПУБЛИКАСИ

ОЛИЙ ХЎЖАЛИК СУДИНИНГ

КАССАЦИЯ ИНСТАНЦИЯСИ

ҚАРОРИ

18.04.2011 й.

N 12-1102/85(4)

(КЎЧИРМА)

Суд алоҳида ҳолларда қарздор ва кредиторнинг манфаатларини ҳисобга олиб, кредиторга тўланиши лозим бўлган неустойкани камайтириш ҳуқуқига эга

Даъвогар - Сирдарё вилоят адлия бошқармаси "Green Line Mirzachul" хусусий корхонаси манфаатида хўжалик судига даъво аризаси билан мурожаат этиб, жавобгар - "Denta Spektrum MG" хусусий фирмасидан 4464807 сўм асосий қарз ва 26585464 сўм пеня ундиришни сўраган.

Биринчи инстанция судининг 2011 йил 1 февралдаги ҳал қилув қарори билан Сирдарё вилоят адлия бошқармасининг даъво аризаси қисман қаноатлантирилиб, "Green Line Mirzachul" хусусий корхонаси фойдасига "Denta Spektrum MG" хусусий фирмаси ҳисобидан 20000000 сўм пеня ундирилган.

Иш апелляция инстанцияси судида кўрилмаган.

Кассация шикоятида ҳал қилув қарорини ўзгартириб, пеня миқдорини камайтириш сўралган.

Судлов ҳайъати иш ҳужжатларини ва кассация шикоятида келтирилган важларни муҳокама қилиб, қуйидаги асосларга қўра ҳал қилув қарорини ўзгартириб, пеня миқдорини камайтиришни лозим топади.

Ишдаги ҳужжатлардан кўринишича, "Green Line Mirzachul" хусусий корхонаси (сотувчи) ва "Denta Spektrum MG" хусусий фирмаси (сотиб олувчи) ўртасида 2010 йил 4 январда 1-сонли шартнома имзоланган бўлиб, унга кўра "Green Line Mirzachul" хусусий корхонаси томонидан "Denta Spektrum MG" хусусий фирмасига 2010 йил давомида 53170927 сўмлик маҳсулот етказиб берилган.

Шартноманинг 2.2-бандида сотиб олувчи ушбу шартноманинг ажралмас қисми бўлган 1-иловада кўрсатилган маҳсулотларнинг турлари бўйича бир ҳафталик сони ва жами қиймати аниқланган ҳолда, сотувчининг йўналишлар жадвали бўйича етказиб берилиши лозим бўлган кундан 3 кун олдин сотувчининг ҳисоб рақамига бир ҳафталик буюртма бўйича олдиндан 100 фоиз тўловларни амалга оширади, 2.3-бандида сотиб олувчи томонидан ушбу шартноманинг 2.2-бандида кўрсатилган тўловлар ўз муддатида амалга оширилмаса, жами тўланмаган суммадан ҳар бир кечиктирилган кун учун 0,5 фоиз миқдорида пеня тўлайди, тўланадиган пенянинг умумий миқдори тўланмаган сумманинг 50 фоизидан ошмаслиги лозим, деб белгиланган.

Жавобгар томонидан 2010 йил давомида олинган 53170927 сўмлик маҳсулот учун даъво тақдим этилган кунга қадар 48706120 сўм пул маблағи ҳар хил муддатларга кечиктирилган ҳолда тўлаб берилган. Кечиктирилган кунлар учун даъвогар томонидан ҳар бир кечиктирилган кунга кечиктирилган сумманинг 0,4 фоизидан пеня ҳисобланиб, ҳисоб-китоб тақдим этилган. Пеня миқдори 31503863 сўмни ташкил қилган, бироқ мазкур сумма кечиктирилган сумманинг 50 фоизидан ошиб кетганлиги сабабли кечиктирилган сумманинг 50 фоизи - 26585464 сўм пеня ундирилиши талаб қилинган.

Иш кўрилаётган вақтда жавобгар томонидан тақдим этилган тўлов ҳужжатлари ўрганилганда асосий қарз тўлиқ тўланганлиги аниқланган.

Ўзбекистон Республикаси Фуқаролик кодексининг 326-моддасига кўра, суд алоҳида ҳолларда қарздор ва кредиторнинг манфаатларини ҳисобга олиб, кредиторга тўланиши лозим бўлган неустойкани камайтириш ҳуқуқига эга.

Судлов ҳайъати жавобгар томонидан асосий қарз тўлиқ тўлаб берилганлигини инобатга олиб, ҳал қилув қарорини ўзгартиришни, жавобгардан даъвогар фойдасига ундирилиши лозим бўлган пеня миқдорининг қолган қисмини рад қилишни, уни 4000000 сўмга қисқартиришни, ҳал қилув қарорининг қолган қисмини ўзгаришсиз қолдиришни, суд харажатларини жавобгар зиммасига юклашни лозим топади.

“Ўзбекистон Республикаси Олий хўжалик суди Ахборотномаси”,

2012 й., 5-сон