Ўзбекистон Республикаси Олий хўжалик суди кассация инстанциясининг 11.11.2005 й. 11-0521/5932-сонли Қарори

Функция недоступна

ЎЗБЕКИСТОН РЕСПУБЛИКАСИ

ОЛИЙ ХЎЖАЛИК СУДИНИНГ

КАССАЦИЯ ИНСТАНЦИЯСИ

ҚАРОРИ

11.11.2005 й.

N 11-0521/5932

(КЎЧИРМА)

Шартнома қандай шаклда тузилган бўлса, уни ўзгартириш ёки бекор қилиш ҳам шундай тартибда амалга оширилиши лозим.

Ўзбекистон Республикаси Савдо-саноат палатаси номидан "LAW SHIELD" унитар корхонаси "Қурилиш индустрия ҳажмли уй-жой" МЧЖ манфаатини кўзлаган ҳолда хўжалик судига даъво аризаси билан мурожаат этиб, Ўзбекистон Республикаси Қишлоқ ва сув хўжалиги вазирлиги билан 2003 йил 17 апрелда тузилган шартномага ўзгартириш киритиш ва шу асосда 72576215 сўм ундиришни сўраган.

Хўжалик судининг ҳал қилув қарори билан даъво тўлиқ қаноатлантирилган.

Ўзбекистон Республикаси Қишлоқ ва сув хўжалиги вазирлиги Олий хўжалик судига кассация шикояти бериб, ҳал қилув қарорини бекор қилиб, даъвони рад этишни, прокуратура эса кассация протести келтириб, ҳал қилув қарорини бекор қилиб, ишни янгидан кўришга юборишни сўраган.

Судлов ҳайъати кассация шикояти ва протест важларини муҳокама қилиб, иш ҳужжатларини ўрганиб чиқиб, қуйидагиларга биноан ҳал қилув қарорини бекор қилиб, даъвони рад этиш тўғрисида янги қарор қабул қилишни лозим деб ҳисоблайди.

Тарафлар ўртасида 2003 йил 17 апрелда шартнома тузилган бўлиб, унга кўра иккита 4 қаватли уй-жой биноларини қуриш учун Ўзбекистон Республикаси Қишлоқ ва сув хўжалиги вазирлигига ажратилган 0,27 га ер майдони "Қурилиш индустрия ҳажмли уй-жой" МЧЖ ихтиёрига 5 қаватли уй-жой биносини қуриш учун олиб берилган. Бунда "Қурилиш индустрия ҳажмли уй-жой" МЧЖ вазирлик томонидан ажратилган ер майдонида қилинган харажатларни қоплашни ўз зиммасига олган.

Даъво аризасида кўрсатиб ўтилган шартномага ўзгартириш киритиш талаби қўйилган. Аммо даъвогар шартнома шартларини ўзгартириш тартибига риоя қилмаган, яъни шартноманинг қайси бандига айнан қандай ўзгартириш киритилиши лозимлиги даъво аризасида умуман кўрсатилмаган.

Ўзбекистон Республикаси Фуқаролик кодексининг 384-моддасида шартномани ўзгартириш ва бекор қилиш тартиби кўрсатилган бўлиб, унга кўра, шартнома қандай шаклда тузилган бўлса, уни ўзгартириш ёки бекор қилиш ҳам шундай тартибда амалга оширилиши лозим. Ўзбекистон Республикаси Фуқаролик кодексининг 366-моддасига кўра, тарафлар ўртасида 2003 йил 17 апрелда шартнома ёзма шаклда тузилганлиги сабабли, унга ўзгартириш киритиш ҳам тарафларнинг келишувига биноан ёзма шаклда бўлиши, унда шартноманинг қайси бандига қандай ўзгартириш киритилиши ва унинг сабаблари баён этилиши ва бу ўзгартиришлар тарафлар томонидан муҳокама қилинган бўлиши лозим эди. Биринчи инстанция суди эса бу ҳолатга аҳамият бермаган. Ҳал қилув қарорида шартномага ўзгартириш киритилсин, дейилган бўлса-да, айнан қандай ўзгартириш киритилиши аниқ кўрсатилмаган.

Ўзбекистон Республикаси Хўжалик процессуал кодексининг 55-моддасига кўра, ишда иштирок этувчи ҳар бир шахс ўз талаб ва эътирозларига асос қилиб келтираётган ҳолатларни исботлаши керак.

Даъвонинг 72576215 сўмни ундириш қисми шартномага ўзгартириш киритиш талаби билан боғлиқ бўлганлиги сабабли, уни ҳам қаноатлантириб бўлмайди.

Судлов ҳайъати, "Қурилиш индустрия ҳажмли уй-жой" МЧЖнинг кассация шикояти ваколати бўлмаган шахс томонидан имзоланганлиги сабабли, уни кўрмасдан қолдириш тўғрисидаги илтимосномасини қаноатлантириш учун асос йўқ деб ҳисоблайди. Чунки, жавобгар томонидан судга тақдим этилган 2005 йил 10 ноябрдаги хатдан кўринишича, кассация шикояти Ўзбекистон Республикаси Қишлоқ ва сув хўжалиги вазирининг биринчи ўринбосари томонидан Ўзбекистон Республикаси Қишлоқ ва сув хўжалиги вазирлигининг 2004 йил 23 августдаги 192-сон буйруғига биноан ўзига берилган ваколатга асосан имзоланганлиги вазир томонидан тасдиқланган.

Қайд этилганларга кўра, судлов ҳайъати Ўзбекистон Республикаси Хўжалик процессуал кодексининг 169-моддасини қўллаган ҳолда ҳал қилув қарорини бекор қилиб, даъвони рад этиш тўғрисида янги қарор қабул қилишни лозим топган.

“Ўзбекистон Республикаси Олий хўжалик суди Ахборотномаси”,

2006 йил, 2-сон