Ўзбекистон Республикаси Олий хўжалик суди кассация инстанциясининг 05.02.2013 й. 19-1206/11762-сон Қарори

Функция недоступна

ЎЗБЕКИСТОН РЕСПУБЛИКАСИ

ОЛИЙ ХЎЖАЛИК СУДИНИНГ

КАССАЦИЯ ИНСТАНЦИЯСИ

ҚАРОРИ

05.02.2013 й.

N 19-1206/11762

(КЎЧИРМА)

Ёқилғи-энергетика ресурсларидан фойдаланиш қоидаларини бузганлик учун, идоравий бўйсуниши ва мулкчилик шаклидан қатъи назар, юридик шахсларга нисбатан иқтисодий жазолар қўлланилади

"Ўздавнефтгазинспекция" (бундан буён матнда Инспекция деб юритилади) даъво аризаси билан хўжалик судига мурожаат қилиб, ОАТБ "Агробанк" ва унинг Термиз филиалига (бундан буён матнда Банк деб юритилади) нисбатан 121132298 сўм молиявий жарима қўллаш ва ундиришни сўраган.

Биринчи инстанция судининг ҳал қилув қарори билан арз қилинган талаб қаноатлантирилган.

Иш апелляция инстанцияси судида кўрилмаган.

Кассация шикоятида ҳал қилув қарорини бекор қилиб, аризани қаноатлантиришни рад этиш ҳақида янги қарор қабул қилиш, эътирозномада эса, ҳал қилув қарорини ўзгаришсиз қолдириш сўралган.

Судлов ҳайъати кассация шикоятида келтирилган важларни иш ҳужжатлари билан биргаликда муҳокама қилиб, қуйидаги асосларга кўра ҳал қилув қарорини ўзгаришсиз, кассация шикоятини эса қаноатлантирмасдан қолдиришни лозим топади.

Иш ҳужжатларидан кўринишича, Ўзбекистон Республикаси Миллий хавфсизлик хизмати Сурхондарё вилоят бошқармасининг 2012 йил 3 июлдаги "Комплекс тафтиш тайинлаш тўғрисида"ги қарорига асосан Банкда текшириш ўтказилган ва бу ҳақда 2012 йил 24 августда далолатнома расмийлаштирилган.

Текшириш натижалари юзасидан ҳисобланган 121132298 сўм молиявий жаримани ихтиёрий тўлаш ҳақида 2012 йил 27 августда 32-сонли қарор қабул қилган. Ҳисобланган молиявий жарима миқдори Банк томонидан ихтиёрий тўланмагач, Инспекция Банкка нисбатан молиявий жарима қўллашни сўраган.

Ўзбекистон Республикаси Вазирлар Маҳкамасининг 1994 йил 9 мартдаги 124-сонли қарори билан тасдиқланган "Ёқилғи-энергетика ресурсларидан фойдаланиш қоидаларини бузганлик учун иқтисодий жарималарни қўллаш тўғрисида"ги Низом талабларига асосан ёқилғи-энергетика ресурсларидан фойдаланиш қоидаларини бузганлик учун, идоравий бўйсуниши ва мулкчилик шаклидан қатъи назар, юридик шахсларга нисбатан иқтисодий жазолар қўлланиши назарда тутилган.

Биринчи инстанция суди моддий ва процессуал ҳуқуқ нормаларини тўғри қўллаб, арз қилинган талабни қаноатлантириш ҳақида қонуний тўхтамга келган.

Қайд этилганларга кўра, судлов ҳайъати ҳал қилув қарорини ўзгаришсиз, ишни кассация инстанцияси судида кўриш учун тўланган 361775,50 сўм давлат божи ва 5000 сўм почта харажатларини Банк зиммасида қолдиришни ва ундан қўшимча равишда 2000 сўм почта харажатлари ундиришни лозим топади.

“Ўзбекистон Республикаси Олий хўжалик суди Ахборотномаси”,

2015 й., 4-сон