Ўзбекистон Республикаси Олий хўжалик суди кассация инстанциясининг 05.07.2011 й. 10-1119/2339-сон Қарори

Функция недоступна

ЎЗБЕКИСТОН РЕСПУБЛИКАСИ

ОЛИЙ ХЎЖАЛИК СУДИНИНГ

КАССАЦИЯ ИНСТАНЦИЯСИ

ҚАРОРИ

05.07.2011 й.

N 10-1119/2339

(КЎЧИРМА)

Лицензиат лицензия шартномасида назарда тутилган лицензия талаблари ва шартларини бузган тақдирда, лицензиянинг амал қилиши тўхтатиб турилиши мумкин

Ўзбекистон Республикаси Соғлиқни сақлаш вазирлиги хўжалик судига мурожаат қилиб, "Наsanov Abdurahmon" хусусий фирмасига 2009 йил 5 декабрда берилган ПЮ-3987-сонли лицензиянинг амал қилишини олти ой муддатга тўхтатиб туришни сўраган.

Биринчи инстанция судининг ҳал қилув қарори билан даъво рад этилган.

Иш апелляция инстанцияси судида кўрилмаган.

Кассация шикоятида ҳал қилув қарорини бекор қилиб, иш юзасидан қонуний қарор қабул қилиш сўралган.

Судлов ҳайъати шикоят важларини муҳокама қилиб, ишдаги ҳужжатларни ўрганиб чиқиб, қуйидагиларга кўра ҳал қилув қарорини бекор қилиб, даъвони қаноатлантиришни лозим топади.

Иш ҳужжатларидан кўринишича, Назорат қилувчи органлар фаолиятини мувофиқлаштирувчи Республика Кенгашининг 2010 йил 7 декабрдаги 06-17424-сонли рухсатномаси, Ўзбекистон Республикаси Соғлиқни сақлаш вазирлигининг 2010 йил 10 декабрдаги 337-сонли буйруғи ва текшириш дастурига асосан "Наsanov Abdurahmon" хусусий фирмасида қисқа муддатли текшириш ўтказилган.

Текширишда фирмага қарашли стационар врачлари малака тоифасига эга эмаслиги, бирламчи тиббий ҳужжатлар тўлиқ юритилмаганлиги, ЛОР хонаси деворлари мойли бўёқ билан тўлиқ қопланмаганлиги, лаборатория хонаси Ўзбекистон Республикаси Бош давлат санитар шифокори томонидан 2008 йил 1 июлда тасдиқланган 0253-08-сонли "Санитария қоидалари ва меъёрлари" талабларига мос эмаслиги, тиббий асбоб-ускуналар метрология кўригидан ўтказилмаганлиги, зарарлантириш воситалари ва дори-дармонларнинг мувофиқлик сертификати мавжуд эмаслиги аниқланган.

Шу сабабли, даъвогар "Наsanov Abdurahmon" хусусий фирмасига берилган лицензиянинг амал қилишини олти ой муддатга тўхтатиб туришни сўраган.

"Фаолиятнинг айрим турларини лицензиялаш тўғрисида"ги Ўзбекистон Республикаси Қонуни 22-моддаси биринчи қисмининг иккинчи хатбошисига биноан лицензиат лицензия шартномасида назарда тутилган лицензия талаблари ва шартларини бузганлиги аниқланганда лицензиянинг амал қилиши тўхтатиб турилиши мумкин. Ушбу модданинг иккинчи қисмига мувофиқ лицензиянинг амал қилишини тўхтатиб туриш лицензияловчи орган ёки суд томонидан амалга оширилади. Лицензиянинг амал қилиши лицензияловчи орган томонидан ўн иш кунидан кўп бўлмаган муддатга, суд томонидан эса ўн иш кунидан кўп бўлган муддатга тўхтатиб турилиши мумкин.

Текширишда аниқланган камчиликлар "Наsanov Abdurahmon" хусусий фирмаси томонидан лицензия шартномасида назарда тутилган лицензия талаблари ва шартларини бузиш ҳисобланади.

Юқорида қайд этилган Қонун 22-моддасининг бешинчи қисмига асосан лицензиат лицензиянинг амал қилишини тўхтатиб туришга олиб келган ҳолатларни бартараф этган тақдирда, лицензиянинг амал қилишини тўхтатиб туриш тўғрисида қарор қабул қилган лицензияловчи орган ёки суд кўрсатилган ҳолатлар бартараф этилганлиги тўғрисидаги тасдиқномани олган кундан эътиборан лицензиянинг амал қилишини тиклаш тўғрисида ўн кун муддат ичида қарор қабул қилиши шарт.

"Наsanov Abdurahmon" хусусий фирмаси иш судда кўрилган кунга қадар лицензиянинг амал қилишини тўхтатиб туришга олиб келган ҳолатларнинг бир қисмини бартараф этган бўлса-да, фирманинг лаборатория хонасини Ўзбекистон Республикаси Бош давлат санитар шифокори томонидан 2008 йил 1 июлда тасдиқланган 0253-08-сонли "Санитария қоидалари ва меъёрлари" талаби даражасига етказмаган.

"Наsanov Abdurahmon" хусусий фирмасига берилган лицензияда фирмага стационар шароитда диагностика, маслаҳат, консерватив ва оператив даволашга рухсат этилган.

Ўзбекистон Республикаси Бош давлат санитар шифокори томонидан 2008 йил 1 июлда тасдиқланган 0253-08-сонли "Санитария қоидалари ва меъёрлари"нинг 5-бандида стационар шароитидаги нодавлат даволаш-профилактика муассасалари алоҳида клиник-биохимик лаборатория хонасига эга бўлиши шартлиги белгиланган.

Шу сабабли, судлов ҳайъати ҳал қилув қарорини бекор қилиб, даъвони қаноатлантириш ҳақида янги қарор қабул қилишни лозим топган.

“Ўзбекистон Республикаси Олий хўжалик суди Ахборотномаси”,

2012 й., 9-сон