Ўзбекистон Республикаси Президентининг 24.05.2010 й. ПҚ-1343-сон "2010 йилги бошоқли дон экинлари ҳосилидан бўшайдиган ерларни шудгорлашни ташкил қилиш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

24.05.2010 й.

N ПҚ-1343

2010 ЙИЛГИ БОШОҚЛИ ДОН ЭКИНЛАРИ

ҲОСИЛИДАН БЎШАЙДИГАН ЕРЛАРНИ

ШУДГОРЛАШНИ ТАШКИЛ ҚИЛИШ

ЧОРА-ТАДБИРЛАРИ ТЎҒРИСИДА

2010 йилги бошоқли дон экинлари ҳосилидан бўшайдиган ерлар ўз вақтида ва сифатли шудгор қилинишини таъминлаш, келгуси йил ҳосили учун қулай шарт-шароитлар яратиш мақсадида:

1. Ўзбекистон Республикаси Қишлоқ ва сув хўжалиги вазирлигининг 2010 йилги бошоқли дон экинлари ҳосили ўриб-йиғиб олингандан кейин ўтказиладиган шудгорлаш ишларининг иловага* мувофиқ ҳажмлари ва муддатлари бўйича Қорақалпоғистон Республикаси Вазирлар Кенгаши ҳамда вилоят ҳокимликлари билан келишилган таклифи қабул қилинсин.

Белгилансинки, Қорақалпоғистон Республикаси Вазирлар Кенгашининг Раиси, вилоятлар ва туманлар ҳокимлари, Ўзбекистон Республикаси Қишлоқ ва сув хўжалиги вазирлиги, "Ергеодезкадастр" давлат қўмитаси, "Ўзагромашсервис" уюшмаси раҳбарлари шудгорлаш ишларининг ўз вақтида ташкил этилиши ва сифатли ўтказилиши, ҳисоботнинг бузиб кўрсатилишига йўл қўйилмаслиги учун шахсан жавобгардирлар.

Ўзбекистон Республикаси Бош прокуратураси бошоқли дон экинлари ўриб-йиғиб олингандан кейин шудгорлаш ишлари мазкур Қарорнинг иловасига* қатъий мувофиқ белгиланган ҳажмлар ва муддатларда ўтказилиши устидан назоратни таъминласин. Айбдор шахсларга нисбатан қонун ҳужжатларида кўзда тутилган қаттиқ жавобгарлик чоралари кўрилсин.

2. "Ўзагромашсервис" уюшмаси Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда икки ҳафта муддатда 2010 йилги бошоқли дон экинлари ҳосили йиғиштириб олингандан кейин шудгорлаш ишларини ўтказиш тўғрисида машина-трактор парклари, фермер хўжаликлари, шунингдек мулкчилик шакли ва идоравий бўйсунувидан қатъи назар, бошқа ташкилотлар ҳамда идоралар ўртасида шартномалар тузилишини таъминласин.

3. Қорақалпоғистон Республикаси Вазирлар Кенгаши ва вилоятлар ҳокимликлари Ўзбекистон Республикаси Қишлоқ ва сув хўжалиги вазирлиги, "Ўзагромашсервис" уюшмаси билан биргаликда:

бир ҳафта муддатда зарур ресурслар билан таъминланганликни ҳамда ер фондидан янада самарали фойдаланишни ҳисобга олган ҳолда туманлар ва хўжаликлар бўйича шудгорлаш ишларини ўтказиш жадвалларини тузсин ва тасдиқласин;

шудгорлаш ишларини ўтказиш учун мўлжалланган майдонларда шудгорлашдан олдин похол йиғиштириб олинишини ташкил қилсин;

мулкчилик шакли ва идоравий бўйсунувидан қатъи назар, шартнома асосида бошқа корхоналар ҳамда ташкилотларнинг ҳайдов агрегатларини жалб этсин;

ҳайдов тракторларининг икки сменада ишлашини ва улардан отрядлар ташкил этиш усули билан самарали фойдаланишни ташкил этсин;

хўжаликлар ва машина-трактор паркларининг буюртманомалари асосида эҳтиёт қисмлар етказиб беришни, шунингдек кўчма таъмирлаш устахоналарининг узлуксиз ишлашини таъминласин.

Ерни шудгорлашнинг сифат кўрсаткичларига эришишни рағбатлантиришга алоҳида эътибор берилсин.

4. Ўзбекистон Миллий телерадиокомпанияси, Ўзбекистон Миллий ахборот агентлиги Ўзбекистон Республикаси Давлат табиатни муҳофаза қилиш қўмитаси билан биргаликда похолни ёқишдан келиб чиқадиган зарар ва нохуш оқибатларни кенг тушунтириш бўйича комплекс чора-тадбирлар амалга оширилишини таъминласин.

5. "Ўзнефтмаҳсулот" акциядорлик компанияси ёнилғи-мойлаш материалларининг зарур захирасини яратсин ҳамда шудгорлаш ишларида қатнашувчи машина-трактор паркларига, қишлоқ хўжалик корхоналарига дизель ёнилғиси қийматининг 60 фоизи олдиндан тўлангандан кейин уларга ёнилғи-мойлаш материаллари узлуксиз етказиб берилишини таъминласин.

6. Ушбу Қарорнинг ижросини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.

Ўзбекистон Республикасининг Президенти                       И. Каримов

*) Илова рус тилидаги матнда берилган.

Ўзбекистон Республикаси Олий Мажлиси палаталарининг Ахборотномаси, 2010 йил, 5-сон, 222-модда