Ўзбекистон Республикаси Вазирлар Маҳкамасининг 14.05.2001 й. 212-сон "2001 йил бошоқли дон экинлари ҳосилини йиғиштириб олишга доир ташкилий чора-тадбирлар тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

14.05.2001 й.

N 212

2001 ЙИЛ БОШОҚЛИ ДОН ЭКИНЛАРИ

ҲОСИЛИНИ ЙИҒИШТИРИБ ОЛИШГА

ДОИР ТАШКИЛИЙ ЧОРА-ТАДБИРЛАР

ТЎҒРИСИДА

Бошоқли дон экинлари ҳосили ўз вақтида ва сифатли йиғиштириб олинишини ҳамда давлат эҳтиёжлари учун дон сотиш бўйича контрактация шартномалари бажарилишини таъминлаш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Қишлоқ ва сув хўжалиги вазирлиги, "Ўзагромашсервис" уюшмаси, "Ўзмевасабзавотузумсаноат-холдинг" компанияси, Қорақалпоғистон Республикаси Вазирлар Кенгаши ва вилоятлар ҳокимликлари:

- жорий йилнинг 17 майигача дон ўриш комбайнлари тайёрланиши, шунингдек дон тозалаш техникаси ҳамда дон ташувчи транспорт воситалари таъмирланиши тугалланишини таъминласинлар, 20 майгача эса комбайнлар, автомашиналар ва тиркамалар "Ўздавтехназорат" ва Давлат автомобиль назорати инспекторларининг далолатномалари бўйича комиссия орқали қабул қилиб олинишини тугалласинлар;

- Қорақалпоғистон Республикаси ва вилоятлар бўйича комбайнларнинг, шу жумладан "Кейс" ва "Клаас" комбайнлари ҳосил ўрим-йиғимида 1-иловага мувофиқ миқдорда қатнашишини таъминласинлар;

- техниканинг ўрим-йиғим ишлари даврида ишга яроқли ҳолда бўлишини таъминлаш учун эҳтиёт қисмлар ва тузатиш материалларининг зарур захирасини яратсинлар;

- хўжаликлар ва машина-трактор паркларининг устахоналари ва техник хизмат кўрсатиш пунктлари ҳамда кўчма сервис хизмати кўрсатиш ва ёнилғи-мойлаш материаллари қуйиш воситалари уйғун ишлашини ташкил этсинлар.

Дон ҳосили ўз вақтида ва сифатли йиғиштириб олинишини ташкил этиш ва уни амалга ошириш учун масъулият шахсан Қорақалпоғистон Республикаси Вазирлар Кенгаши Раисига, вилоятлар ҳокимларига, Ўзбекистон Республикаси Қишлоқ ва сув хўжалиги вазирлиги, "Ўзагромашсервис" уюшмасининг ва унинг машина-трактор парклари ҳудудий бирлашмалари раҳбарлари зиммасига юклансин.

2. Ўзбекистон Республикаси Қишлоқ ва сув хўжалиги вазирлиги, Қорақалпоғистон Республикаси Вазирлар Кенгаши, вилоятлар ҳокимликлари, "Ўздонмаҳсулот" корпорацияси, "Ўзагромашсервис" уюшмаси, "Ўзмевасабзавотузумсаноат-холдинг" компанияси:

- дон янчиб олиниши ва унинг кирим қилиниши устидан назоратни таъминлаш учун ҳосил эксперт баҳоланишини ҳамда ҳар бир дала бўйича тегишли далолатномалар тузилишини бошоқли дон экинларини йиғиштириб олиш бошлангунгача тугалласинлар. Дон ҳосилдорлигининг прогноз ва амалдаги кўрсаткичлари ўртасида асосланмаган фарқ пайдо бўлган тақдирда айбдор шахсларни жавобгарликка тортиш чора-тадбирлари кўрилсин;

- ҳамма жойда комбайнларнинг гуруҳ бўлиб ишлашини ташкил этсинлар, ҳар бир гуруҳга транспорт воситалари, техник хизмат кўрсатиш ва ёнилғи қуйиш шохобчаларини бириктирсинлар. Дон етилиши муддатлари ҳисобга олинган ҳолда гуруҳларнинг ҳаракат қилиш йўналишлари ишлаб чиқилсин;

- жорий йилнинг 17 майигача хўжаликларда хирмонлар тайёрлаб қўйилишини тугалласинлар, дон қабул қилиш майдончаларини, дон тозалаш қурилмалари ва бошқа донни дастлабки қайта ишлаш воситаларини тузатсинлар;

дон хўжаликлар томонидан албатта дастлаб тозаланган, ифлослиги ва намлиги стандарт нормативлардан ортиқ бўлмаган ҳолда тайёрлов пунктларига етказиб берилишини таъминласинлар;

- чорва озуқаси етиштиришни кўпайтириш ва суғориладиган ерлардан фойдаланиш самарадорлигини ошириш мақсадида сув билан таъминланган участкаларда 2-иловага мувофиқ майдонларда қишлоқ хўжалиги экинлари такрор экилишини ташкил этсинлар;

- Ўзбекистон Республикаси Молия вазирлиги билан келишган ҳолда бир ҳафта муддатда комбайнчилар, транспорт воситалари ҳайдовчилари ва ўрим-йиғимда, донни тозалаш ва ташишда, техникага хизмат кўрсатишда банд бўлган бошқа ходимлар меҳнатига иш унумига ва ҳосил ўрим-йиғими сифатига қараб ҳақ тўлаш ва моддий рағбатлантиришга доир тавсияларни ишлаб чиқсинлар ва хўжаликларга етказсинлар. Меҳнатга маҳсулот билан ҳақ тўлаш ҳисобига дон беришни фақат "Ўздонмаҳсулот" корпорацияси дон қабул қилиш корхоналарига дон сотиш бўйича шартнома мажбуриятлари бажарилгандан, уруғлик фонди ғамлангандан ва маҳсулот кирим қилингандан кейин амалга оширсинлар.

3. "Ўзқишлоқхўжаликмаш-холдинг" холдинг компанияси ва "Ўзагромашсервис" уюшмаси донни йиғиштириб олиш даврида комбайнларга ва бошқа техникаларга хизмат кўрсатишда амалий ёрдам бериш учун корхоналарни шартномалар асосида 3-иловага мувофиқ йирик ғаллачилик туманларига бириктириб қўйсинлар.

4. Қорақалпоғистон Республикаси Вазирлар Кенгаши, вилоятлар ҳокимликлари, Ўзбекистон Республикаси Қишлоқ ва сув хўжалиги вазирлиги, "Ўзавтотранс" корпорацияси:

- 2001 йил бошоқли дон экинлари ҳосилини ташиш учун юк автомобиллари, тиркамали транспорт тракторлари доннинг комбайнлардан хирмонгача ва дон қабул қилиш пунктларигача ташишнинг топшириқда белгиланган ҳажмлари бажарилишини таъминлайдиган миқдорда 4-иловага мувофиқ қўйилишини таъминласинлар;

- зарурат бўлганда дон ташишга Ўзбекистон Республикаси Мудофаа вазирлиги ҳамда бошқа вазирликлар, идоралар ва ташкилотларнинг автотранспортини шартнома асосида жалб этсинлар.

Белгилаб қўйилсинки, донни дон қабул қилиш пунктларига ташиш бўйича транспорт харажатлари қишлоқ хўжалиги корхоналари, дон маҳсулотлари корхоналари ва "Ўзавтотранс" корпорацияси автокорхоналари ўртасида тузилган шартномаларга мувофиқ "Ўздонмаҳсулот" корпорацияси томонидан тўланади.

5. Ўзбекистон Республикаси Қишлоқ ва сув хўжалиги вазирлиги "Ўздавдонинспекция", "Ўздонмаҳсулот" корпорацияси, "Ўздавназоратуруғ-марказ", Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда:

- хўжаликларнинг 2001 йилда ўзлари етиштирган ҳосилдан Вазирлар Маҳкамасининг 2000 йил 2 октябрдаги 379-сон қарорида белгиланган миқдорларда уруғлик ғамлашини ташкил этсин;

- тайёрланаётган дон ва бошоқли дон экинлари уруғи сифати устидан кундалик назорат ўрнатсин, дон маҳсулотлари корхоналарида дон ва уруғларни қабул қилиб олиш, жойлаштириш, тайёрлаш ва сақлашга доир белгиланган норма ва қоидалар қатъий бажарилишини таъминласин.

6. "Ўздонмаҳсулот" корпорацияси томонидан уруғчилик хўжаликларидан навли уруғларнинг сифатига кўра харид қилинишига доир Вазирлар Маҳкамасининг 2000 йил 19 майдаги 194-сон қарори шартлари сақлаб қолинсин, суперэлита уруғлар товар дон учун белгиланган нархлардан 300 фоиз, элита уруғлар - 200 фоиз, биринчи репродукцияли уруғлар - 150 фоиз, иккинчи ва учинчи репродукцияли уруғлар 100 фоиз юқори нарх бўйича харид қилинади ҳамда давлат ресурсларига дон харид қилишнинг умумий ҳажмига киритилмайди.

Белгилаб қўйилсинки, навли уруғлар учун кондицион оғирлиги бўйича ҳақ тўланади.

7. Ўзбекистон Республикаси Молия вазирлиги ҳузуридаги Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси:

- 2001 йил дон ҳосили учун ҳисоб-китоб қилиш бўйича ажратилган траншларда дон ташиш бўйича автотранспорт хизматлари, шунингдек "Ўзқишлоқхўжаликмаш-холдинг" холдинг компаниясининг, "Ўзагромашсервис" уюшмасининг саноат корхоналари ва бошқа ташкилотларнинг хизматлари учун ҳақ тўлаш харажатларини назарда тутсин;

- "Ўздонмаҳсулот" корпорацияси ва Жамғарманинг молия агентлари билан биргаликда Топширилган қишлоқ хўжалиги маҳсулотлари учун якуний ҳисоб-китоб қилиш тартибига мувофиқ топширилган дон учун хўжаликлар билан Жамғарма маблағлари ҳисобига ўз вақтида ҳисоб-китоб қилинишини таъминласин.

8. "Пахта-банк", "Ғалла-банк" ва бошқа хизмат кўрсатувчи тижорат банкларига хўжаликлар ва машина-трактор парклари, автохўжаликларнинг дон ўриш-йиғиш мавсуми қатнашчиларига ҳар 5 кунда иш ҳақи тўлаш учун нақд пулга бўлган эҳтиёжини Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси маблағлари ҳисобига тўлиқ ҳажмда таъминлаш тавсия қилинсин.

9. Дон ташишни амалга оширувчи темир йўл ва автомобиль транспорти хизматлари учун ўз вақтида ҳисоб-китоб қилишни таъминлаш мақсадида 2001 йил дон ҳосилини ташиш даври учун жорий йилнинг 1 ноябригача "Ўздонмаҳсулот" корпорацияси тизими корхоналари учун, транспорт харажатларини ҳисобга олган ҳолда бевосита ишлаб чиқариш фаолияти билан боғлиқ долзарб эҳтиёжларга пул тушумидан ажратмалар ставкаси, истисно тариқасида, 15 фоизгача миқдорда белгилансин.

10. "Ўздонмаҳсулот" корпорацияси давлат захирасига озиқ-овқатбоп донни 2001 йилга тасдиқланган дон балансига қатъий мувофиқ миқдорда ғамлаб қўйсин, унинг дон маҳсулотлари корхоналарида Ўзбекистон Республикаси Вазирлар Маҳкамасининг 2000 йил 20 майдаги 209-33-сон қарорида белгиланганидек алоҳида сақланишини таъминласин.

11. "Ўзнефтмаҳсулот" акциядорлик компанияси бошоқли дон ҳосилини ўриб-йиғиб олишнинг бутун даврида хўжаликларга, машина-трактор паркларига ҳамда ҳосилни ўриб-йиғиб олишда ва ташишда қатнашадиган бошқа ташкилотларга ёнилғи-мойлаш материалларининг узлуксиз, белгиланган лимитлар бўйича берилишини таъминласин, "Кейс" ва "Клаас" компаниялари ишлаб чиқарган комбайнлар ва тракторлар учун мой етказиб беришга алоҳида эътиборни қаратсин.

12. "Ўзқишлоқхўжаликкимё" компанияси бошоқли дон уруғларини дорилаш воситаларининг ҳамда элеваторлар ва омборларни, шунингдек дон маҳсулотларини зарарсизлантириш учун фумигантларнинг "Ўздонмаҳсулот" корпорацияси буюртманомаларига биноан ўз вақтида ташиб келтирилишини таъминласин.

13. Ўзбекистон Республикаси Ички ишлар вазирлиги, Қорақалпоғистон Республикаси Вазирлар Кенгаши ва вилоятлар ҳокимликлари доннинг нобуд бўлиши ва ўғирланиши ҳолларининг олдини олиш мақсадида донни ўриб-йиғиб олиш жойларида, дон хирмонларида ва донни қабул қилиб олиш пунктларида кеча-кундуз ишлайдиган назорат постлари ташкил қилсинлар, ёнғиндан сақлаш бўйича зарур тадбирларнинг бажарилишини таъминласинлар.

14. Ўзбекистон Республикаси Макроиқтисодиёт ва статистика вазирлиги дон қабул қилиб олиш корхоналари даражасида хўжаликлар томонидан дон етиштириш ва уни сотиш тўғрисидаги статистика ҳисоботларининг тўғрилигини мунтазам равишда текшириб борсин, аниқланган бузилишлар тўғрисида Вазирлар Маҳкамасига дарҳол ахборот берсин.

15. Мазкур қарорнинг бажарилишини назорат қилиш Ўзбекистон Республикаси Президентининг Давлат маслаҳатчиси И.Ҳ. Жўрабеков ва Ўзбекистон Республикаси Бош вазирининг ўринбосари Т. Холтоев зиммасига юклансин.

Вазирлар Маҳкамасининг Раиси                                             И. Каримов

Вазирлар Маҳкамасининг

2001 йил 14 майдаги

212-сон қарорига

1-ИЛОВА

2001 йилда бошоқли дон экинлари

ўрим-йиғимида ғалла комбайнларининг

ҚАТНАШИШИ

Вазирлар Маҳкамасининг

2001 йил 14 майдаги

212-сон қарорига

2-ИЛОВА

2001 йилда бошоқли дон экинлари йиғиштириб

олингандан кейин суғориладиган ерларда

такрорий қишлоқ хўжалиги экинлари экиш

МАЙДОНЛАРИ

(минг гектарда)

Вазирлар Маҳкамасининг

2001 йил 14 майдаги

212-сон қарорига

3-ИЛОВА

2001 йил дон ҳосилини ўриб-йиғиб олиш даврида

"Ўзқишлоқхўжаликмаш-холдинг" компанияси ва

"Ўзагромашсервис" уюшмаси заводларини дон

экувчи йирик туманларга бириктириб қўйиш

Вазирлар Маҳкамасининг

2001 йил 14 майдаги

212-сон қарорига

4-ИЛОВА

2001 йилги бошоқли дон экинлари

ҳосилини ташиш учун жалб қилинадиган

ТРАНСПОРТ ВОСИТАЛАРИ СОНИ