Ўзбекистон Республикаси Вазирлар Маҳкамаси ҳузуридаги "Сифат" Ўзбекистон пахта толасини сертификатлаш маркази тўғрисида Низом (ЎзР ВМ 10.05.2005 й. 117-сон Қарорига илова)

Функция недоступна

Вазирлар Маҳкамасининг

2005 йил 10 майдаги

117-сон қарорига

ИЛОВА

Ўзбекистон Республикаси Вазирлар Маҳкамаси

ҳузуридаги "Сифат" Ўзбекистон пахта толасини

сертификатлаш маркази тўғрисида

НИЗОМ

I. УМУМИЙ ҚОИДАЛАР

1. Ўзбекистон Республикаси Вазирлар Маҳкамаси ҳузуридаги "Сифат" Ўзбекистон пахта толасини сертификатлаш маркази (кейинги ўринларда Марказ деб аталади) Ўзбекистон Республикасида пахта толаси ва чигитини сертификатлаш ва уларнинг сифатини назорат қилиш органи ҳисобланади.

Марказ ўз фаолияти тўғрисида Ўзбекистон Республикаси Вазирлар Маҳкамасига ҳисоб беради.

2. Марказ тизимига Пахта чигитидан фойдаланишни назорат қилиш инспекцияси, Пахта чигити сифатини назорат қилиш марказий лабораторияси, Текшириш ва назорат қилиш марказий лабораторияси, минтақавий синов лабораториялари ҳамда пахта тозалаш корхоналари ҳузуридаги юридик шахс мақомига эга бўлмаган уруғчилик лабораториялари киради.

3. Марказ ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлисининг қарорлари ва бошқа ҳужжатларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек мазкур Низомга амал қилади.

4. Марказ ўз фаолиятини давлат бошқарувининг бошқа органлари, маҳаллий давлат ҳокимияти органлари, жамоат бирлашмалари ва бошқа ташкилотлар билан ўзаро ҳамкорликда амалга оширади.

5. Марказни ва унинг минтақавий бўлинмаларини моддий-техник таъминлаш, Марказ тизими ходимлари меҳнатига ҳақ тўлаш пахта толаси ва чигитини сертификатлаш ишларини бажаришдан тушадиган маблағлар, шунингдек амалдаги қонун ҳужжатларига зид бўлмаган бошқа манбалар ҳисобига, Ўзбекистон Республикаси Молия вазирлиги билан келишилган харажатлар сметасига мувофиқ амалга оширилади.

6. Марказ юридик шахс ҳисобланади, Ўзбекистон Республикаси Давлат герби тасвири туширилган ва ўз номи ёзилган муҳрга эга бўлади.

II. МАРКАЗНИНГ ВАЗИФАЛАРИ ВА ФУНКЦИЯЛАРИ

7. Қуйидагилар марказнинг асосий вазифалари ҳисобланади:

а) белгиланган стандартлар, методикалар, қоидалар, контрактлар, шартномаларга ҳамда республика ҳудудида ва унинг ташқарисида пахта толасини ишлаб чиқариш ва сақлаш жойларида унинг сифатига қўйиладиган талабларни назарда тутувчи бошқа битимларга мувофиқ пахта толасини сертификатлаш ва унинг сифатини назорат қилиш;

б) республика пахта тозалаш заводларида пахта толаси туркумлари массасини назорат қилиш;

в) жаҳон бозори ва ички бозор талабларига мувофиқ пахта толасини сертификатлаш ва унинг сифатини назорат қилиш тизимини ривожлантириш ва таъминлаш бўйича амалий ва илмий фаолиятни амалга ошириш;

г) пахта тозалаш саноати корхоналарини, пахта толаси, момиғи ва чигити харидорларини ва бошқа ташкилотларни сертификатланадиган маҳсулотнинг стандарт намуналари билан таъминлаш;

д) манфаатдор ташкилотлар ва идоралар билан биргаликда ғўзаларни толанинг ёпишқоқлиги жиҳатидан апробация қилишда, шунингдек юқори ташкилотлар томонидан рухсат берилган пахта тозалаш заводлари тайёрлов пунктларида қабул қилиб олишда пахта хом ашёси сифатини назорат текширувидан ўтказишда қатнашиш;

е) Ўзбекистон Республикасининг халқаро молия ташкилотлари билан тузилган битимларига мувофиқ лойиҳаларни амалга оширишда қатнашиш;

ж) пахта маҳсулотини сертификатлаш, таснифлаш, синаш усуллари бўйича мутахассислар тайёрлаш;

з) пахта чигити ишлаб чиқаришни, унинг миқдорини, сифатини, ундан мақсадли фойдаланишни, мулкчилик шаклларидан қатъи назар, пахта тозалаш, ёғ-мой корхоналарида пахта чигитини ҳамда уни қайта ишлашдан олинадиган маҳсулотларни , сифатли сақлашнинг таъминланишини, ташиш вақтида нобуд бўлишини қисқартиришни, шунингдек қишлоқ хўжалиги корхоналарида уруғлик чигитдан фойдаланишни назорат қилиш;

и) пахта чигитига ва уни қайта ишлашдан олинадиган маҳсулотларга норматив-техник ҳужжатлар талабларига, шунингдек қабул қилиб олиш, юклаб жўнатиш, сақлаш, қайта ишлаш ва экспорт-импорт операцияларида уларнинг сифатини синаш методларига риоя этилишини мунтазам равишда назорат қилиш;

к) пахта тозалаш корхоналарида ишлаб чиқарилаётган техник чигитнинг ҳар қайси туркумини мувофиқлик сертификати берган ҳолда синашни амалга ошириш;

л) пахта тозалаш ва ёғ-мой саноати корхоналарига пахта чигитини сақлаш, тозалаш, қуритиш, унга ишлов бериш бўйича, шунингдек пахта тозалаш корхоналарида норматив-техник ҳужжатларни ва илғор технологияларни белгиланган тартибда жорий этиш, техник чигитни топшириш - қабул қилиб олиш механизмини такомиллаштириш масалаларида методик ёрдам кўрсатиш.

8. Марказ ўзига юкланган вазифаларни бажариш учун қуйидаги функцияларни амалга оширади:

а) пахта толаси, чигитига ва уни қайта ишлашдан олинадиган бошқа маҳсулотларга давлат стандартларини ишлаб чиқишда қатнашади;

б) сертификатлаш тартибини белгиловчи норматив-техник, ташкилий-методик ҳужжатларни ишлаб чиқади ва янгилаб боради;

в) сертификатлаш учун буюртмалар қабул қилади ва пахта толаси ва чигити сифатини назорат қилади;

г) пахта толаси ва чигити ташқи кўринишининг стандарт намуналарини тайёрлайди;

д) пахта толаси ва чигити сифатини аниқлаш методларини ишлаб чиқади ва тасдиқлайди ҳамда зарурат бўлганда манфаатдор ташкилотлар ва идоралар билан биргаликда уларни такомиллаштириш юзасидан тегишли илмий-тадқиқот ишларини амалга оширади;

е) пахта маҳсулотларини сертификатлаш, таснифлаш ва синаш усуллари бўйича мутахассислар тайёрлайди, ўқитишнинг шакл ва усулларини такомиллаштириш тадбирларини ишлаб чиқади;

ж) пахта маҳсулотини сертификатлаш соҳасида республикада ва унинг ташқарисида пахта толаси ва чигитини ишлаб чиқарувчилар, ташқи савдо ташкилотлари ва пахта маҳсулотлари истеъмолчилари билан ўзаро ҳамкорлик қилади;

з) пахта чигити ва уни қайта ишлашдан олинган маҳсулотларнинг сифати, сақланиши, улардан оқилона фойдаланилиши устидан давлат назоратини амалга оширади;

и) республика ҳудудида хўжалик юритувчи субъектлар ўртасида пайдо бўладиган низоли ҳолатларда, шунингдек экспорт-импорт операцияларида ўз ваколатлари доирасида пахта чигитининг сифати бўйича синовлар ўтказади ҳамда жисмоний ва юридик шахслар учун хулосалар беради;

к) пахта чигити ва уни қайта ишлашдан олинган маҳсулотларнинг балансларини тузишда қатнашади, харид қилиш, шу жумладан импорт бўйича харид қилиш мўлжалланаётган хом ашёнинг сифати бўйича, шунингдек уни экспорт қилишда таклифлар киритади;

л) технологик жараёнлар билан тартибга солинган пахта чигити ва уни қайта ишлашдан олинган маҳсулотлардан фойдаланиш билан боғлиқ сифат, сақлаш, оқилона фойдаланиш, ҳисобини юритиш масалалари бўйича норматив-техник ҳужжатларни белгиланган тартибда ишлаб чиқиш, тасдиқлаш ва манфаатдор идоралар билан келишишда, шу жумладан ишлаб чиқариш, транспортда ташиш ва сақлашда уларнинг чиқишини, табиий камайиш нормаларини аниқлашда қатнашади;

м) пахта чигити ва уни қайта ишлашдан олинган маҳсулотларнинг сифатини ошириш ва улардан оқилона фойдаланиш давлат дастурларини тайёрлашда иштирок этади;

н) пахта чигити сифатининг ёмонлашиши, камомади ҳолатлари ва сабабларини аниқлайди, зарурат бўлганда уларни бартараф этишга доир кўрсатмалар беради ҳамда пахта чигити ва уни қайта ишлашдан олинган маҳсулотлар ресурсларининг сақланиши ва улардан фойдаланиш ишларининг аҳволи тўғрисида Ўзбекистон Республикаси Вазирлар Маҳкамасига ва маҳаллий давлат ҳокимияти органларига ахборот беради;

о) ташқи иқтисодий фаолиятни амалга оширади.

9. Марказ ўзига юкланган вазифаларни бевосита ва минтақавий синов бўлинмалари орқали ҳал қилади.

III. МАРКАЗНИНГ ҲУҚУҚЛАРИ ВА ЖАВОБГАРЛИГИ

10. Марказ ўзига юкланган вазифалар ва функцияларни бажариш учун қуйидаги ҳуқуқларга эга:

а) республикадаги ишлаб чиқарувчилар ва истеъмолчилар учун мажбурий бўлган пахта толаси ва чигитининг миллий стандартларга мувофиқлик сертификатини белгиланган тартибда бериш;

б) пахта толаси ва чигитини экспортга етказиб бериш жараёнида унинг сифатига баҳо берилаётганда, сифат масалалари кўриб чиқилаётганда хорижий ва халқаро ташкилотларда республика манфаатларини ифодалаш;

в) пахта чигити ва уни қайта ишлашдан олинган маҳсулотлар ресурсларини ишлаб чиқариш, сақлаш, қайта ишлаш ва сотиш корхоналари ва ташкилотларини белгиланган тартибда текшириш;

г) корхоналар ва ташкилотларнинг текшириш билан боғлиқ масалалар бўйича ҳужжатлари билан танишиш;

д) корхоналарда пахта чигити ва уни қайта ишлашдан олинган маҳсулотларнинг намуналарини белгиланган тартибда олиш, текшириб кўриш учун уларнинг лабораторияларидан фойдаланиш ва зарурат бўлганда текшириш билан боғлиқ ишларни бажариш учун корхоналар мутахассисларини жалб этиш, зарурат бўлганда пахта чигити ва уни қайта ишлашдан олинган маҳсулотлар намуналарини қўшимча равишда текшириш учун тегишли лабораторияларга жўнатиш;

е) зарурат бўлганда автомобиль ва темир йўл транспортидан туширилаётган ва уларга юкланаётган пахта чигити ва уни қайта ишлашдан олинган маҳсулотлар туркумларини пахта тозалаш ва ёғ-мой корхоналари билан биргаликда назорат қилиш тартибида оғирлигини тортиб кўриш;

ж) пахта чигити ва маҳсулотлар қолдиғи тўғрисидаги маълумотларнинг ишончлилиги асосли равишда шубҳа туғдирган тақдирда пахта чигити ва уни қайта ишлашдан олинган маҳсулотлар ресурслари қолдиқларини қайта тортиб кўрган ёки стандарт массага ўралган маҳсулотни қайта санаб чиққан ҳолда навбатдан ташқари хатлов ўтказилишини тайинлаш;

з) пахта чигити ва уни қайта ишлашдан олинган маҳсулотларнинг сақлаш учун яроқсиз идишларда сақланишини тақиқлаш, технология ва санитария режимлари қўпол равишда бузилганлиги аниқланган тақдирда айрим ишлаб чиқаришлар, цехлар ва корхоналар ишини ушбу қоида бузишлар бартараф этилгунга қадар тўхтатиб қўйиш, шунингдек норматив ва техник ҳужжатлар талабларига жавоб бермайдиган пахта чигити ва уни қайта ишлашдан олинган маҳсулотларни муайян мақсадда сотишни тақиқлаш;

и) хўжалик юритувчи субъектларга, бирлашмаларга ва бошқа товар ишлаб чиқарувчиларга пахта чигити ва уни қайта ишлашдан олинган маҳсулотларнинг сифатини баҳолаш бўйича шартнома асосида хизматлар кўрсатиш, шунингдек ўз ваколатлари доирасида бошқа хизмат турларини кўрсатиш;

к) меҳнатга ҳақ тўлаш, уни ташкил этиш ва нормалаш шакллари ва тизимини белгилаш;

л) банк ва тижорат кредитларидан фойдаланиш;

м) республикада ва чет элларда ўз фаолиятини амалга ошириш учун зарур бўлган, амалдаги қонун ҳужжатларига зид бўлмаган битишувларни ва бошқа юридик ҳужжатларни тузиш ва ишларни рўёбга чиқариш;

н) ўз фаолиятини амалга ошириш учун зарур бўлган бинолар қуриш, сотиб олиш, ўзгага бериш, ижарага олиш, кирага олиш ва бериш;

о) республикада ва чет элларда мустақил равишда ёки мамлакатимиздаги ёки хорижий шериклар билан пай асосида филиаллар, бўлимлар, ваколатхоналар ва шу кабиларни таъсис этиш;

п) корхона ва ташкилотларга, уларнинг ишлаб чиқариш биноларига, омборларига кириш ҳамда синаш, сертификатлаш ёки сифатнинг стандартларга ва бошқа норматив-техник ҳужжатлар талабларига мувофиқлигини назорат (инспекция) қилиш учун тегишли пахта маҳсулоти намуналарини танлаб олиш;

р) корхоналар ва ташкилотлардан хом ашё, пахта толаси ва чигити сифати масалалари бўйича маълумотларни белгиланган тартибда олиш;

с) пахта маҳсулотини стандартлаш ва сертификатлаш масалаларини ҳал этиш учун мутахассисларни жалб қилиш;

т) пахта толаси ва чигити сифатини текшириш натижалари бўйича ҳужжатлар тузиш ҳамда тегишли корхоналар ва ташкилотлар раҳбарларига амалдаги стандартлар бузилишининг аниқланган ҳолларини бартараф этиш юзасидан таклифлар бериш;

у) республикада ва чет элда "ноу-хау" ҳамда пахта маҳсулотини стандартлаш, сертификатлаш ва сифатини назорат қилиш бўйича бошқа илмий ютуқларни белгиланган тартибда сотиб олиш ва сотиш.

11. Марказ ўзига юкланган вазифаларнинг самарали бажарилиши учун жавоб беради.

IV. МАРКАЗ ФАОЛИЯТИНИ ТАШКИЛ ЭТИШ

12. Марказга белгиланган тартибда Ўзбекистон Республикаси Вазирлар Маҳкамаси томонидан лавозимга тайинланадиган ва лавозимдан озод қилинадиган бош директор бошчилик қилади.

Бош директор мақомига кўра вазирнинг биринчи ўринбосарига тенглаштирилади, унинг белгиланган тартибда Ўзбекистон Республикаси Вазирлар Маҳкамаси томонидан лавозимга тайинланадиган ва лавозимдан озод қилинадиган, мақоми бўйича вазир ўринбосарларига тенглаштириладиган икки нафар ўринбосарлари, шу жумладан, бир нафар биринчи ўринбосари бўлади.

Инспекция бошлиғи айни вақтда "Сифат" Ўзбекистон пахта толасини сертификатлаш маркази бош директорининг ўринбосари ҳисобланади.

13. Бош директор:

Марказ фаолиятига якка бошчилик асосида умумий раҳбарлик қилади;

Марказ ваколатига кирувчи масалалар бўйича қарорлар қабул қилади ҳамда Марказга юкланган вазифалар ва функцияларнинг бажарилиши учун шахсан жавоб беради;

ўз ўринбосарлари ваколатларини белгилайди, улар ўртасида вазифаларни тақсимлайди, Марказ тизимининг бошқа мансабдор шахслари ваколатларини, Марказ фаолиятининг алоҳида участкаларига раҳбарлик қилиш юзасидан ўз ўринбосарлари ва бошқа мансабдор шахсларнинг жавобгарлиги даражасини белгилайди;

Марказ тизими ходимлари бажариши мажбурий бўлган буйруқлар чиқаради ва кўрсатмалар беради;

зарурат бўлганда ходимларнинг белгиланган умумий сони доирасида Марказ марказий аппарати тузилмасига ўзгартиришлар киритади, унинг штат жадвалини, шунингдек Марказнинг марказий аппарати ва унинг минтақавий синов лабораторияларининг харажатлар сметасини тасдиқлайди;

Марказнинг марказий аппарати ва унинг бўлинмалари ходимларини белгиланган тартибда лавозимга тайинлайди ва лавозимдан озод қилади.

Бош директор қонун ҳужжатларига мувофиқ бошқа ваколатларни амалга оширади.

14. Марказда бош директор (ҳайъат раиси), унинг ўринбосарлари (лавозимига кўра), шунингдек Марказ фаолиятининг асосий йўналишларини мувофиқлаштирувчи таркибий бўлинмалари раҳбарларидан иборат таркибда ҳайъат ташкил этилади.

Ҳайъатнинг аъзолари сони ва шахсий таркиби бош директорнинг тақдимномасига биноан Ўзбекистон Республикаси Вазирлар Маҳкамаси томонидан тасдиқланади.

Ҳайъат қуйидагилар билан боғлиқ масалаларни кўриб чиқади:

Марказ фаолиятининг белгиланган стандартлар, методикалар, қоидалар, контрактлар, шартномаларга ҳамда республика ҳудудида ва унинг ташқарисида пахта толасини ишлаб чиқариш ва сақлаш жойларида унинг сифатига қўйиладиган талабларни назарда тутувчи бошқа битимларга мувофиқ пахта толасини бундан буён сертификатлаш ва унинг сифатини назорат қилиш, республика пахта тозалаш заводларида пахта толаси туркумлари массасини назорат қилишни таъминлаш, шунингдек жаҳон бозори ва ички бозор талабларига мувофиқ пахта толасини сертификатлаш ва унинг сифатини назорат қилиш тизимини ривожлантириш ва таъминлаш бўйича амалий ва илмий фаолиятни амалга ошириш бўйича ушбу Низомда белгиланган асосий йўналишларини тайёрлаш ва амалга ошириш;

Ўзбекистон Республикаси Вазирлар Маҳкамаси ҳузуридаги "Сифат" Ўзбекистон пахта толасини сертификатлаш маркази номенклатурасига кирадиган лавозимларга кадрларни танлаш, жой-жойига қўйиш, тайёрлаш ва қайта тайёрлаш;

Ўзбекистон Республикаси Президентининг фармонлари, қарорлари ва фармойишларида, Ўзбекистон Республикаси Вазирлар Маҳкамаси қарорлари ва фармойишларида белгиланган вазифаларни амалга ошириш бўйича ижро интизомини мустаҳкамлаш, уларнинг ўз вақтида ва сифатли амалга оширилишини таъминлаш учун Марказ раҳбарлари ва ходимларининг шахсий жавобгарлигини ошириш.

Ҳайъат Марказнинг ваколатига тааллуқли бошқа масалаларни ҳам кўриб чиқиш ҳуқуқига эга.

Ҳайъат мажлисига Марказ ваколатига кирадиган масалалар бўйича бошқа вазирликлар, давлат қўмиталари, идоралар, маҳаллий давлат ҳокимияти органлари, корхоналар, муассасалар, ташкилотлар раҳбарлари таклиф этилиши мумкин.

Ҳайъат унинг мажлисида таркибининг ярмидан кўпи қатнашган тақдирда ваколатли бўлади. Кўриб чиқилаётган масалалар бўйича қарорлар оддий кўпчилик овоз билан қабул қилинади.

Ҳайъат қарорлари бош директорнинг буйруқлари билан амалга оширилади. Бош директор ва ҳайъат аъзолари ўртасида келишмовчиликлар мавжуд бўлган тақдирда бош директор пайдо бўлган келишмовчиликлар тўғрисида Ўзбекистон Республикаси Вазирлар Маҳкамасига ахборот берган ҳолда мустақил равишда қарор қабул қилади. Ҳайъат аъзолари ҳам ўз фикр-мулоҳазаларини Ўзбекистон Республикаси Вазирлар Маҳкамасига хабар қилишлари мумкин.

Ҳайъат фаолияти тартиби унинг ҳайъат тасдиқлайдиган регламентида белгиланади.

15. Марказни тугатиш ёки қайта ташкил этиш Ўзбекистон Республикасининг қонун ҳужжатларига мувофиқ амалга оширилади.

"Ўзбекистон Республикаси қонун ҳужжатлари тўплами", 2005 йил, 19-20-сон, 140-модда.