Ўзбекистон Республикаси Вазирлар Маҳкамасининг 07.01.1999 й. 7-сон "Солиқ тўловчиларнинг идентификация рақамларини қўллаш соҳасини кенгайтириш тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

07.01.1999 й.

N 7

СОЛИҚ ТЎЛОВЧИЛАРНИНГ

ИДЕНТИФИКАЦИЯ РАҚАМЛАРИНИ

ҚЎЛЛАШ СОҲАСИНИ КЕНГАЙТИРИШ

ТЎҒРИСИДА

Солиқ қонунчилигига риоя қилиниши устидан назорат механизмини такомиллаштириш, солиқ органлари иши самарадорлигини ошириш, уларнинг янги ахборот технологияларини қўллашлари учун шарт-шароитлар яратиш мақсадида Вазирлар Маҳкамаси ҚАРОР ҚИЛАДИ:

1. Солиқ тўловчининг идентификация рақамини берилмаган барча хўжалик юритувчи субъектлар, шу жумладан солиқлар ва давлат бюджетига бошқа мажбурий тўловлардан озод этилган хўжалик юритувчи субъектлар 1999 йил 1 апрелгача белгиланган тартибда солиқ тўловчиларнинг идентификация рақамини олсинлар ва уни хизмат кўрсатувчи банкка етказсинлар.

2. Белгилансинки, 1999 йил 1 апрелдан бошлаб солиқ тўловчиларнинг идентификация рақамига эга бўлмаган хўжалик юритувчи субъектларнинг банк счётларидан маблағ кўчириш операциялари амалга оширилмайди.

3. Ўзбекистон Республикаси Марказий банкига тижорат банклари билан биргаликда 1999 йил 1 апрелгача электрон тўловлар тизимининг дастурий комплексига ва пул-ҳисоб-китоб ҳужжатларининг стандарт шаклларига, уларда солиқ тўловчиларнинг идентификация рақамларини кўрсатиш тўловчининг алоҳида мажбурий реквизити бўлишини назарда тутган ҳолда, ўзгартиришлар киритиш тавсия этилсин.

4. Вазирлар Маҳкамасининг 1997 йил 11 мартдаги 130-сон қарори билан тасдиқланган Ўзбекистон Республикасида солиқ тўловчиларнинг идентификация рақамларини бериш ва қўллаш тизими тўғрисидаги низомга иловага мувофиқ ўзгартиришлар ва қўшимчалар киритилсин.

5. Давлат солиқ қўмитаси Ўзбекистон Республикаси Марказий банки, Молия вазирлиги ва Адлия вазирлиги билан биргаликда қонун ҳужжатларига мазкур қарордан келиб чиқувчи ўзгартиришлар ва қўшимчалар киритиш бўйича бир ой муддатда таклифлар тайёрласин ва тақдим этсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.С.Ҳамидов зиммасига юклансин.

Вазирлар Маҳкамасининг Раиси                                             И. Каримов

Вазирлар Маҳкамасининг

1999 йил 7 январдаги

7-сон қарорига

ИЛОВА

Вазирлар Маҳкамасининг

1997 йил 11 мартдаги 130-сон қарори билан

тасдиқланган Ўзбекистон Республикасида солиқ

тўловчиларнинг идентификация рақамларини

бериш ва қўллаш тизими тўғрисидаги низомга

киритилаётган ўзгартиришлар ва қўшимчалар

1. 6-банд қуйидаги мазмундаги хатбошилари билан тўлдирилсин:

"хўжалик юритувчи субъектлар томонидан тузилаётган хўжалик, фуқаролик-ҳуқуқий ва меҳнат шартнома (контракт)ларида, уларга иловаларда;

хўжалик юритувчи субъектлар томонидан битишувлар содир этилганлигини белгиловчи ёки тасдиқловчи ҳужжатларда, шу жумладан счёт-фактураларда ва транспорт ҳужжатларида;

хўжалик юритувчи субъектларда молиявий, мулкий ва қиймат ифодасига эга бўлган бошқа мажбуриятларнинг юзага келишини, шунингдек уларнинг бажарилганлигини белгиловчи ёки тасдиқловчи ҳужжатларда;

хўжалик юритувчи субъектлар томонидан қиймат ифодасига эга бўлган активларга мулк эгаси ҳуқуқи сотиб олинганлигини ва берилганлигини белгиловчи ва тасдиқловчи, шунингдек бундай ҳуқуқни тасдиқловчи ҳужжатларда".

2. 7-банднинг "а" кичик бандидаги "солиқ мажбуриятлари Ўзбекистон Республикаси ҳудудида пайдо бўлган барча" сўзлари олиб ташлансин.

3. 7-банд "б" кичик бандининг иккинчи хатбошидаги "барча" сўзи олиб ташлансин.

"Ўзбекистон Республикаси Ҳукумати қарорлари тўплами", 1999 й., N 1, 3-модда.