Ўзбекистон ССЖ Президенти ҳузуридаги Вазирлар Маҳкамасининг 03.06.1991 й. 154-сон "Тошкент молия институтини ташкил этиш тўғрисида"ги Қарори

Функция недоступна

ЎЗБЕКИСТОН ССЖ

ПРЕЗИДЕНТИ ҲУЗУРИДАГИ

ВАЗИРЛАР МАҲКАМАСИНИНГ

ҚАРОРИ

03.06.1991 й.

N 154

ТОШКЕНТ МОЛИЯ ИНСТИТУТИНИ

ТАШКИЛ ЭТИШ ТЎҒРИСИДА

Ўзбекистон ССЖ Президентининг “Тошкент молия институтини ташкил этиш тўғрисида” 1991 йил 13 майдаги Фармонига мувофиқ Вазирлар Маҳкамаси ҚАРОР ҚИЛАДИ:

1. Тошкент халқ хўжалиги институтининг молия факультети талабалари ҳозирги вақтда ўқиётган Тошкент шаҳар, Урицкий кўчасидаги бино молия институтига биркитилсин;

ЎзССЖ Иқтисодиёт қўмитаси Тошкент халқ хўжалиги институтининг режа-иқтисодиёт факультети фойдаланаётган бинони вақтинчалик фойдаланиш учун олиб берсин.

2. Ўзбекистон давлат банки ССЖИ давлат банки билан ССЖИ давлат банкининг Тошкент ҳисоб-кредит техникумини ЎзССЖ Олий ва ўрта махсус таълим вазирлигига бериш масаласини ҳал қилсин.

ССЖИ давлат банкининг Тошкент ҳисоб-кредит техникумининг 1991 йилги қабул режаси ва сиртқи бўлимида ўқиётганлар белгиланган тартибда ССЖИ давлат банкининг Марғилон ҳисоб-кредит техникумига ўтказилсин. 1991 йилнинг 1 августигача техникум биноси янги ташкил этилган институт учун тўлиқ бўшатиб берилсин.

3. Ўзбекистон ССЖ Молия вазирлиги Бутуниттифоқ молия ва банк ходимлари малакасини ошириш тармоқлараро институтининг Ўрта Осиё бўлимини Тошкент молия институтига бериш масаласини белгиланган тартибда ҳал қилсин.

Шу бўлимнинг негизида Тошкент ҳисоб-кредит техникуми 2-курси ўқувчиларига (185 киши) таҳсил олишни тугаллашга, тугатилган техникумнинг зарур миқдордаги ўқитувчиларини шу мақсадда жалб этишга рухсат берилсин.

4. ЎзССЖ Олий ва ўрта махсус таълим вазирлиги бир ой муддат ичида Тошкент молия институтининг тузилишини, Уставини ишлаб чиқсин ва тасдиқласин, уни керакли профессор-ўқитувчи кадрлар билан тўлдирсин, йиллик режаларда унинг ўқув-моддий негизини ривожлантиришни назарда тутсин.

5. ЎзССЖ Молия вазирлиги 1991 йилда Тошкент молия институтини таъминлаш учун ЎзССЖ Олий ва ўрта махсус таълим вазирлигига қўшимча маблағлар ажратсин.

6. Молия институти учун янги ўқув комплексини қуриш мақсадида:

- Тошкент шаҳар ижроия қўмитаси шу йилнинг 1 июлигача ер участкаси ажратсин;

- ЎзССЖ Иқтисодиёт қўмитаси, ЎзССЖ Олий ва ўрта махсус таълим вазирлиги, “Тошкентбошқурилиш” ишларни 1991 йилда бошлаб, комплексни лойиҳалаштириш ва қуришни амалга оширсинлар.

Вазирлар Маҳкамасининг Раиси                                        И. Каримов