Ўзбекистон Республикаси Вазирлар Маҳкамасининг 27.09.1996 й. 337-сон "Попфен" Ўзбекистон-Туркия қўшма корхонасини ташкил этиш ва унинг фаолияти масалалари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

27.09.1996 й.

N 337

"ПОПФЕН" ЎЗБЕКИСТОН-ТУРКИЯ

ҚЎШМА КОРХОНАСИНИ ТАШКИЛ

ЭТИШ ВА УНИНГ ФАОЛИЯТИ

МАСАЛАЛАРИ ТЎFРИСИДА

Пахта толасини қайта ишлашни кўпайтириш, рақобатбардош маҳсулотлар ишлаб чиқариш ва республиканинг экспорт имкониятларини кенгайтириш мақсадида Вазирлар Маҳкамаси ҚАРОР ҚИЛАДИ:

1. "Ўзбекенгилсаноат" уюшмасининг "Енгилсаноатинвест" акционерлик компанияси ва "Поп нотўқима материаллар фабрикаси" акционерлик жамияти томонидан Туркиянинг "Текфен Холдинг" компанияси билан биргаликда Наманган вилоятининг Исқовот шаҳарчасида "Поп нотўқима материаллар фабрикаси" акционерлик жамиятининг янгидан қурилган ишлаб чиқариш майдонлари базасида, Ўзбекистон ва Туркия томонларининг устав фондидаги улуши тегишлича 40 ва 60 фоиз ҳамда иловага мувофиқ асосий параметрларга эга бўлган ёпиқ турдаги акционерлик жамияти шаклидаги тароқланган калава ип ишлаб чиқарадиган "Попфен" қўшма корхонасини ташкил этиш тўғрисидаги таклифига розилик берилсин.

2. Қуйидагилар маълумот учун қабул қилинсин:

а) контракт қийматининг 85 фоизини маблағ билан таъминлаш "Гермес" жамиятининг суғуртаси ва Ўзбекистон Республикаси Ҳукуматининг кафолати остида "Чейз Манхеттен АГ банки" (Германия) томонидан берилаётган кредитни қайта молиялаштириш йўли билан Ўзбекистон Республикаси Ташқи иқтисодий фаолият миллий банкининг "Попфен" қўшма корхонасига бериладиган кредити ҳисобига амалга оширилади;

б) "Текфен Холдинг" компанияси:

устав фондидаги ўз улуши ҳисобидан контракт қийматининг 15 фоизини пул маблағлари билан олдиндан тўлайди;

маркетингни ва ишлаб чиқарилган маҳсулотнинг камида 80 фоизи ташқи бозорда сотилишини таъминлайди;

в) "Попфен" қўшма корхонаси Ўзбекистон Республикаси Ташқи иқтисодий фаолият миллий банкига асосий қарзнинг, кредит учун фоизларнинг, воситачилик ҳақининг ва харажатларнинг кредит битими шартлари билан белгиланган тартибда тўланишини таъминлайди.

3. Ўзбекистон Республикаси Ташқи иқтисодий фаолият миллий банки икки ой муддатда "Чейз Манхеттен АГ банки" билан якка тартибдаги кредит битими тузилишини таъминласин ва "Попфен" қўшма корхонасига белгиланган тартибда қайта молиялаштирсин.

4. Ўзбекистон Республикаси Молия вазирига ушбу лойиҳа учун олинадиган кредитга Ўзбекистон Республикаси Ҳукумати кафолатини имзолаш ваколати берилсин.

5. Ўзбекистон Ресдубликаси Адлия вазирлиги "Гермес" суғурта компанияси (Германия) талабларига мувофиқ Ўзбекистон Республикаси Ҳукумати кафолати бўйича юридик хулосани белгиланган тартибда расмийлаштирсин.

6. "Ўзистиқболстат" давлат қўмитаси пахта толасидан фойдаланиш балансларини ишлаб чиқишда, 1997 йилдан бошлаб, "Попфен" қўшма корхонасининг буюртманомасига мувофиқ, эркин нархлар бўйича ҳақ тўланган ҳолда, "Попфен" қўшма корхонасининг пахта толасига бўлган эҳтиёжини ҳисобга олсин.

7. "Ўзбекенгилсаноат" уюшмаси 1997 йилда қўшма корхонанинг калава ишлаб чиқарадиган қувватлари ишга туширилишини таъминласин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари М.З. Усмонов зиммасига юклансин.

Вазирлар Маҳкамасининг Раиси                                           И. Каримов

Вазирлар Маҳкамасининг

1996 йил 27 сеитябрдаги

337-сон қарорига

ИЛОВА

"Попфен" қўшма корхонасининг асосий

ПАРАМЕТРЛАРИ