Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси ҳузуридаги Хусусийлаштирилган корхоналарга кўмаклашиш жамғармаси маблағларини шакллантириш, тақсимлаш ва улардан фойдаланиш тартиби тўғрисида Низом (ЎзР ВМ 19.06.2017 й. 391-сон қарорига 1-илова)

Функция недоступна

Вазирлар Маҳкамасининг

2017 йил 19 июндаги

391-сон қарорига

1-ИЛОВА

Ўзбекистон Республикаси Хусусийлаштирилган

корхоналарга кўмаклашиш ва рақобатни ривожлантириш

давлат қўмитаси ҳузуридаги Хусусийлаштирилган корхоналарга

кўмаклашиш жамғармаси маблағларини шакллантириш,

тақсимлаш ва улардан фойдаланиш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Ушбу Низом Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси ҳузуридаги Хусусийлаштирилган корхоналарга кўмаклашиш жамғармаси (кейинги ўринларда Жамғарма деб аталади) маблағларини шакллантириш, тақсимлаш ва улардан фойдаланиш тартибини белгилайди.

2. Жамғарма юридик шахс мақомисиз ташкил этиладиган давлат мақсадли жамғармаси ҳисобланади.

3. Маблағларни хусусийлаштирилган корхоналарни амалий равишда қўллаб-қувватлашга, инвестиция лойиҳаларини амалга оширишга ва тадбиркорларнинг бизнес юритиш асосларига ўқишини ташкил этишга йўналтириш Жамғарманинг асосий вазифаси ҳисобланади.

2-БОБ. ЖАМҒАРМА МАБЛАҒЛАРИНИ ШАКЛЛАНТИРИШ

4. Жамғарма маблағлари қуйидаги манбалар ҳисобига шакллантирилади:

б) ушбу Низомнинг 2-иловасига мувофиқ схема бўйича Жамғармага йўналтириладиган давлат мулки ижарасидан тушадиган маблағлар, ижара тўловини тўлаш кечиктирилганлиги учун пеня ва шартнома мажбуриятлари бузилганлиги учун жарималар суммаси;

в) ушбу Низомнинг 3-иловасига мувофиқ схема бўйича жамланадиган бошқа манбалар, шу жумладан:

корхоналарни, хўжалик жамиятларининг устав фондларидаги акциялар (улушлар)ни, ер участкаларини (шу жумладан, якка тартибда уй-жой қуриш (деҳқон хўжалигини юритиш) учун ер участкаларига мерос қилиб қолдириладиган умрбод эгалик қилиш ҳуқуқи) ва давлат мулки ҳисобланадиган бошқа мулкларни (кейинги ўринларда давлат активлари деб аталади) сотишдан тушган маблағлар;

Жамғарма маблағлари ҳисобидан илгари берилган қарзлар бўйича қарз олувчилар томонидан олинган қарзларнинг асосий суммаси ва улар бўйича ҳисобланган фоизлар тарзида қайтарилган тушумлар;

Жамғарманинг вақтинча бўш маблағларини жойлаштиришдан олинадиган даромадлар;

тузилган ва бекор қилинган давлат активлари олди-сотди шартномалари (битимлари), берилган қарзлар бўйича тушган пенялар ва жарималар;

хўжалик жамиятлари қонун ҳужжатларида белгиланган тартибда тугатилганда давлат улуши бўйича тушумлар;

протоколни ёки олди-сотди шартномасини имзолашдан бош тортган ёки уни рад этган аукционлар, танловлар (тендерлар) ёки оммавий оферта ғолибларидан ушлаб қолинган закалат суммалари;

давлат активларини сотишда ихтисослаштирилган ташкилотлар томонидан шартнома мажбуриятлари бузилганлиги учун неустойка суммалари;

Жамғарманинг маблағлари ҳисобидан илгари ўтказилган маблағлар қайтарилишидан тушумлар;

суд қарорлари бўйича тушумлар;

қонун ҳужжатларида тақиқланмаган бошқа манбалар.

5. Ушбу Низомнинг 4-бандида кўрсатилган маблағлар Жамғарманинг Ўзбекистон Республикаси Молия вазирлиги ўазначилиги ва унинг ҳудудий бўлинмаларида очилган шахсий ҳисоб рақамларида жамланади.

6. Жамғармага барча турдаги манбалар бўйича тушган маблағлар солиққа тортилмайди.

3-БОБ. ЖАМҒАРМА МАБЛАҒЛАРИНИ ТАҚСИМЛАШ

ВА УЛАРДАН ФОЙДАЛАНИШ

7. Жамғарма маблағларини тақсимлаш, ушбу Низомнинг 8 ва 10-бандларига мувофиқ тақсимланадиган маблағлардан ташқари, қуйидаги нисбатларда амалга оширилади:

а) 96,5 фоизи - кичик тадбиркорлик субъектларининг хусусийлаштирилган объектлар ва корхоналар негизида амалга ошириладиган инвестиция лойиҳаларини молиялаштиришга мақсадли йўналтириш учун тижорат банкларига;

б) 1,5 фоизи - маблағларни мақсадли равишда бозор инфратузилмасини ривожлантиришга ва тадбиркорларни ҳуқуқий жиҳатдан қўллаб-қувватлашга, шу жумладан, тадбиркорлар учун ташкил этилган ўқув курсларини молиялаштиришга йўналтириш учун Ўзбекистон Республикаси Савдо-саноат палатасига;

в) 2 фоизи - тасарруф этиш ва бошқариш функцияларини амалга ошириш, шу жумладан, давлат мулки ва хусусийлаштирилган объектлар электрон базаси ва реестрини шакллантириш, хусусийлаштирилган корхоналарни ривожлантириш бўйича "йўл хариталари"ни ишлаб чиқиш ва амалга ошириш билан боғлиқ харажатларни қоплаш учун Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси (кейинги ўринларда Давлат рақобат қўмитаси деб аталади)нинг бюджетдан ташқари жамғармасига.

Ушбу банднинг "б" ва "в" кичик хатбошиларда кўзда тутилган маблағлар ҳар ойда ҳисобот ойидан кейинги ойнинг 15-санасидан кечиктирмасдан тегишли маблағ олувчиларнинг ҳисоб рақамларига йўналтирилади.

Жамғарма маблағларини тақсимлаш ва улардан фойдаланиш, жумладан маблағлардан фойдаланиш бўйича ҳисоботлар ва назоратни амалга ошириш ушбу Низомнинг 4-иловасига мувофиқ схема бўйича амалга оширилади.

8. Ўзбекистон Республикаси Президентининг "Тадбиркорлик мақсадларида фойдаланиш учун давлат мулки объектларини сотишни жадаллаштириш ва унинг тартиб-таомилларини янада соддалаштириш чора-тадбирлари тўғрисида" 2017 йил 17 январдаги ПФ-4933-сон Фармонига мувофиқ, Қорақалпоғистон Республикаси Вазирлар Кенгашининг Раиси, вилоятлар ва Тошкент шаҳри ҳокимларининг қарорлари асосида сотиладиган давлат мулки объектларини сотишдан тушадиган маблағлар, шунингдек давлат активларини сотишдан тушадиган маблағларнинг 25 фоиз миқдоридаги қисми Давлат рақобат қўмитаси ҳудудий органлари томонидан тегишли равишда Қорақалпоғистон Республикаси республика бюджетига, вилоятлар ва Тошкент шаҳрининг маҳаллий бюджетларига йўналтирилади, ушбу Низомнинг 7-бандига мувофиқ Давлат рақобат қўмитаси ҳамда Ўзбекистон Республикаси Савдо-саноат палатаси тасарруфида қолдириладиган, шунингдек, Ўзбекистон фермер, деҳқон хўжаликлари ва томорқа ер эгалари кенгаши ҳузуридаги Фермер, деҳқон хўжаликлари ва томорқа ер эгаларини қўллаб-қувватлаш жамғармасига йўналтириладиган аукцион савдоларида фуқароларга ер участкаларига мерос қилиб қолдириладиган умрбод эгалик қилиш ҳуқуқини сотишдан тушадиган тушумнинг 10 фоизи маблағлар бундан мустасно.

Бунда:

тушган маблағлардан давлат активини сотиш билан боғлиқ харажатлар (баҳоловчи ташкилотлар, савдолар ташкилотчилари, воситачилар ва депозитарийлар хизматларини тўлаш харажатлари) чегирилади. Давлат активлари олди-сотди шартномалари (битимлари) бекор қилинган тақдирда тегишли бюджетларга, Давлат рақобат қўмитасига ва Ўзбекистон Республикаси Савдо-саноат палатасига, Фермер, деҳқон хўжаликлари ва томорқа ер эгаларини қўллаб-қувватлаш жамғармасига аввал йўналтирилган маблағлар қайтарилмайди;

Қорақалпоғистон Республикаси республика бюджетига, вилоятлар ва Тошкент шаҳрининг маҳаллий бюджетларига, Фермер, деҳқон хўжаликлари ва томорқа ер эгаларини қўллаб-қувватлаш жамғармасига маблағлар уларнинг тушишига кўра ҳар ҳафтада йўналтирилади;

давлат активларини сотишдан тушадиган маблағларнинг 25 фоизи миқдоридаги қисми Қорақалпоғистон Республикаси республика бюджетига, вилоятлар ва Тошкент шаҳар маҳаллий бюджетларига йўналтирилган ҳолларда маблағларнинг (Давлат рақобат қўмитаси ҳамда Ўзбекистон Республикаси Савдо-саноат палатаси тасарруфида қолдириладиган маблағлардан ташқари) қолган қисми ушбу Низомнинг 4-бобида назарда тутилган мақсадларга йўналтирилади.

9. Ўзбекистон Республикаси Президенти ёки Ўзбекистон Республикаси Вазирлар Маҳкамасининг қарорларида аниқ давлат активини сотишдан тушган маблағлар бошқа мақсадларга тўлиқ ёки қисман йўналтирилган тақдирда, мазкур Низомнинг 7-банди маблағларнинг қолган қисмига татбиқ этилади.

Бунда тушган маблағлар назарда тутилган мақсадларга:

сотиб олиш тўловлари (шу жумладан, ҳисобланган тақдирда - пенялар) тўлиқ тўлангандан кейин йўналтирилади, Ўзбекистон Республикаси Давлат бюджетига, давлат мақсадли жамғармалари ва давлат бошқарув органлари ва/ёки бюджет ташкилотлари ҳисоб рақамларига йўналтириладиган маблағлар бундан мустасно;

давлат активларининг тузилган ва бекор қилинган олди-сотди шартномалари (битимлари) бўйича пеня ва жарималар суммаси, шунингдек ушбу давлат активини сотиш билан боғлиқ харажатлар (баҳоловчи ташкилотлар, савдолар ташкилотчилари, воситачилар ва депозитарийлар хизматларини тўлаш харажатлари) чегирилган ҳолда йўналтирилади.

10. Давлат активлари олди-сотдиси бўйича тузилган ва бекор қилинган шартномалар, берилган қарзлар бўйича тушган пеня ва жарималар суммалари қуйидаги тартибда тақсимланади:

50 фоизи - Давлат рақобат қўмитасининг бюджетдан ташқари жамғармасига ўтказилади;

қолган қисми - мазкур Низомнинг 7-бандига мувофиқ тақсимланади.

11. Жамғарма маблағлари ҳисобидан берилган қарзларнинг асосий суммаси ва улар бўйича ҳисобланган фоизлар тарзида қайтарилган тушумлар суммаси тўлиқ миқдорда Жамғарма ҳисобига ўтказилади.

12. Давлат активлари олди-сотди шартномаси (битими) бекор қилинганда:

маблағларни сотиб олувчига қайтариш, агар суднинг қарорида ёки шартнома томонларининг алоҳида келишуви билан бошқача ҳол назарда тутилмаган бўлса, тўланган маблағлардан пенялар ёки жарималар суммасини ушлаб қолган ҳолда давлат активлари олди-сотди шартномаси (битими) шартларига мувофиқ амалга оширилади;

пенялар ва жарималар суммасини тақсимлаш мазкур шартнома (битим) бўйича илгари тўланган ва тақсимланмаган маблағлар Жамғарма ҳисоб рақамларида мавжуд бўлганда, шунингдек Ўзбекистон Республикаси Президентининг ёки Ўзбекистон Республикаси Вазирлар Маҳкамасининг алоҳида қарорларида назарда тутилган мақсадлар учун ўтказилган маблағлар Жамғармага қайтарилганда (ундирилганда) мазкур Низомнинг 10-бандига мувофиқ амалга оширилади.

Ўзбекистон Республикаси Президентининг ёки Ўзбекистон Республикаси Вазирлар Маҳкамасининг алоҳида қарорларида назарда тутилган мақсадлар учун илгари ўтказилган маблағлар маблағ олувчилар томонидан Жамғармага қайтарилиши лозим, Ўзбекистон Республикаси Давлат бюджетига, давлат мақсадли жамғармалари ва давлат бошқарув органлари ва/ёки бюджет ташкилотлари ҳисоб рақамларига йўналтирилган маблағлар бундан мустасно.

13. Маблағларни мазкур Низомнинг 7-бандига мувофиқ тақсимлаш қуйидагиларни чегирган ҳолда амалга оширилади:

Ўзбекистон Республикаси Президентининг ёки Ўзбекистон Республикаси Вазирлар Маҳкамасининг қарорларига асосан Жамғарманинг умумий маблағлари ҳисобидан бир йўла тўловлар;

хусусийлаштирилган қурилиши тугалланмаган объектлар ва фойдаланилмаётган ишлаб чиқариш майдонлари негизида ташкил этилган хусусийлаштирилган корхоналар ва тадбиркорлик субъектларига кўмаклашиш тадбирларини (симпозиумлар, конференциялар, форумлар, семинарлар, тренинг ва ўқув курслари, ташрифлар, акциялар, кўргазма ва танловлар, оммавий ахборот воситаларида чиқиш ва ёритишлар ва бошқалар) ўтказиш харажатлари;

белгиланган тартибда бекор қилинган давлат активлари олди-сотди шартномалари (битимлари) бўйича Давлат рақобат қўмитаси ва унинг ҳудудий органлари томонидан харидорларга қайтарилган маблағлар;

талабгорлар томонидан давлат активлари олди-сотди шартномалари (битимлари) тузиш учун депонентланган, лекин улар бўйича шартномалар (битимлар) тузилмаган ва уларнинг эгаларига қайтарилиши керак бўлган маблағлар;

Жамғармага нотўғри тушган ва ортиқча ўтказилган, шунингдек аниқлаштирилгунгача суммалар;

давлат активларини сотиш, шу жумладан акцияларни иккиламчи оммавий таклиф қилиш, давлатга тегишли акцияларга бўлган ҳуқуқ ҳисобини юритиш бўйича депозитарий хизматларини тўлаш билан боғлиқ харажатлар;

Давлат рақобат қўмитаси ёки унинг ҳудудий органлари буюртмаларига асосан давлат активларини хусусийлаштириш, давлат корхоналарини қайта ташкил этиш, давлат активларини хўжалик жамиятларига оператив бошқариш ҳуқуқи билан ва устав фондига бериш мақсадида ҳамда давлат манфаатларини кўзлаб бошқа ҳолларда баҳолашда баҳоловчи ташкилотлар хизматларини тўлаш билан боғлиқ харажатлар;

Давлат мулкини хорижий инвесторларга сотишда тендер савдоларини ўтказиш бўйича Давлат комиссияси томонидан белгиланган шартлар ва мезонларга асосан жалб қилинганда, амалий тадқиқотларни бажариш, норматив-ҳуқуқий ҳужжатлар, методик ҳужжатларни экспертизадан ўтказиш, ишлаб чиқиш, давлат активларини сотишдан олдинги тайёрлаш бўйича илмий-тадқиқот, аудиторлик, молия, консалтинг, бошқа хорижий ва маҳаллий ва хорижий ташкилотлар, мустақил экспертлар хизматларини тўлаш билан боғлиқ харажатлар;

юридик шахсларнинг акциялари (улушлари, пайлари)ни, шунингдек бошқа активларни давлат манфаатларини кўзлаб сотиб олиш билан боғлиқ харажатлар;

давлат активларини бошқариш бўйича хизматлар ҳақини тўлаш билан боғлиқ харажатлар;

суд қарорлари асосида амалга оширилган харажатлар.

14. Давлат рақобат қўмитаси ва унинг ҳудудий органлари томонидан харажатларни амалга оширишда товар етказиб берувчилар билан шартномалар қуйидаги ҳолатларда танлов (танлаб олиш)ни ўтказмасдан тузилиши мумкин:

давлат активлари тўғрисидаги рекламаларни ва ахборот тусидаги эълонларни оммавий ахборот воситаларида жойлаштириш, шунингдек реклама ва эълонларни ташқи реклама воситаларида (билбордлар, баннерлар ва бошқаларда) жойлаштириш;

давлат активларини сотишда, шунингдек юридик шахсларнинг акциялари (улушлари, пайлари)ни ва бошқа активларни давлат манфаатларини кўзлаб сотиб олишда биржа ва биржадан ташқари савдоларга хизмат кўрсатувчи ихтисослаштирилган ташкилотлар томонидан хизматлар кўрсатиш;

Давлат рақобат қўмитаси ҳузуридаги Хусусийлаштириш, рақобатни ривожлантириш ва корпоратив бошқарув муаммолари тадқиқотлари маркази томонидан норматив-ҳуқуқий ҳужжатлар, методик ҳужжатлар лойиҳаларини ишлаб чиқиш, илмий-тадқиқот ва бошқа ишларни амалга ошириш;

Корпоратив бошқарув илмий-таълим маркази ва Давлат рақобат қўмитаси ҳузуридаги Тадбиркорлик фаолияти асосларини ўқитиш республика марказида Давлат рақобат қўмитаси ва унинг таркибий бўлинмалари ходимларини, шунингдек давлат ишончли вакиллари ва хусусийлаштирилган корхоналар негизида лойиҳаларни амалга оширувчи тадбиркорларни қайта тайёрлаш, малакасини ошириш ва ўқитиш;

Давлат рақобат қўмитаси ҳузуридаги "Приватинформсистем" ахборот технологиялари маркази" ДУК томонидан замонавий ахборот-технологик компьютер дастурларини, электрон маълумотлар базаси ва реестрларини, локал компьютер тармоғини ишлаб чиқиш, жорий этиш ва улар бўйича хизмат кўрсатиш;

Давлат мулкини хорижий инвесторларга сотишда тендер савдолари ўтказиш бўйича Давлат тендер комиссияси қарорлари асосида маҳаллий ихтисослаштирилган ташкилотлар томонидан давлат активларини сотиш бўйича маслаҳат хизматлари кўрсатиш;

баҳоловчи ташкилотлар томонидан хизматлар кўрсатиш. Баҳоловчи ташкилотлар хизматларини тўлаш билан боғлиқ харажатлар Давлат рақобат қўмитаси томонидан тасдиқланган ва Ўзбекистон Республикаси Молия вазирлиги билан келишилган Низомга мувофиқ қопланади.

15. Жамғарманинг жорий молия йили якуни бўйича қолдиқ маблағлари олиб қўйилмайди ва кейинги йилга ўтади.

4-БОБ. КИЧИК ТАДБИРКОРЛИК СУБЪЕКТЛАРИНИНГ

ИНВЕСТИЦИЯ ЛОЙИҲАЛАРИНИ АМАЛГА ОШИРИШ

УЧУН ТИЖОРАТ БАНКЛАРИГА МАБЛАҒЛАР АЖРАТИШ

16. Кичик тадбиркорлик субъектларининг хусусийлаштирилган объектлар ва корхоналар негизида амалга ошириладиган инвестиция лойиҳаларини молиялаштириш Жамғармадан тижорат банкларига (кейинги ўринларда банклар деб аталади) маблағлар ажратиш йўли билан амалга оширилади:

а) кичик тадбиркорлик субъектларининг хусусийлаштирилган объектлар ва корхоналар негизида амалга ошириладиган инвестиция лойиҳалари учун улар томонидан кредитлар берилганда Ўзбекистон Республикаси Марказий банкининг қайта молиялаштириш ставкасидан кўпи билан 4 фоизга ошадиган фоизли харажатларни қоплашга субсидиялар (кейинги ўринларда субсидиялар деб аталади);

б) кичик тадбиркорлик субъектларининг хусусийлаштирилган объектлар ва корхоналар негизида амалга ошириладиган инвестиция лойиҳаларига кредитлар бериш учун муддатлилик, тўловлилик ва қайтаришлик асосида кредит ресурслари (кейинги ўринларда ресурслар деб аталади).

17. Субсидия ва ресурслар мақсадли ҳисобланади ва кичик тадбиркорлик субъектларининг хусусийлаштирилган объектлар ва корхоналар негизида амалга ошириладиган инвестиция лойиҳаларини молиялаштириш учун банклар томонидан миллий валютада кредитлар беришда қуйидаги йўналишлар бўйича ажратилади:

тайёр маҳсулот, ярим тайёр маҳсулотлар ва бутловчи буюмлар ишлаб чиқаришнинг, шунингдек хизмат (иш) турларининг янги қувватларини ташкил қилишга;

мавжуд ишлаб чиқаришни модернизация қилиш ва технологик янгилашга, шу асосда ишлаб чиқаришни диверсификация қилиш, рақобатбардош, экспортга мўлжалланган маҳсулотлар чиқарилишини кенгайтириш, маҳсулот ҳажмини ошириш ва турларини кенгайтиришни таъминлашга;

маҳсулот ишлаб чиқариш ва хизматлар кўрсатишни йўлга қўйиш учун зарур шароитлар яратиш мақсадида муҳандислик-коммуникация, йўл-транспорт ва ижтимоий инфратузилма объектларини, бошқа асосий фондларни қуриш, реконструкция қилиш ва мукаммал таъмирлашга.

18. Субсидия ва ресурслар устав капиталида давлат улуши 50 фоиздан кам бўлмаган банкларга мақсадли субсидиялар бериш (кредит линиялари очиш) тўғрисида Давлат рақобат қўмитаси ва бош банк ўртасида тузиладиган Бош келишувга асосан ажратилади.

19. Бош келишув тузиш учун банклар Давлат рақобат қўмитасига:

банкнинг тегишли бошқарув органи (кузатув кенгаши ёки акциядорлар умумий йиғилиши) томонидан тасдиқланган Бош келишув тузиш тўғрисидаги қарорнинг бир нусхасини;

ҳудудлар бўйича жорий календарь йили учун ресурслар (субсидиялар ҳажми)га бўлган эҳтиёж ҳисоб-китобини тақдим этади.

20. Давлат рақобат қўмитаси ҳар ойда, ҳисобот ойидан кейинги ойнинг 10-санасидан кечиктирмасдан Давлат рақобат қўмитаси билан Бош келишув тузган банкларга Ўзбекистон Республикаси Президентининг "Тадбиркорларнинг ишлаб чиқариш майдонларидан фойдаланишларини янада рағбатлантириш чора-тадбирлари тўғрисида" 2017 йил 23 февралдаги ПҚ-2796-сон қарорига мувофиқ ташкил этилган қурилиши тугалланмаган объектлар ва фойдаланилмаётган ишлаб чиқариш майдонларини хатловдан ўтказиш ҳамда аниқлаш бўйича Идоралараро комиссиялар (кейинги ўринларда Ҳудудий идоралараро комиссиялар деб аталади) томонидан тасдиқланган илгари хусусийлаштирилган қурилиши тугалланмаган объектлар ва фойдаланилмаётган ишлаб чиқариш майдонлари негизида инвестиция лойиҳалари рўйхатини тақдим этади.

21. Банклар танланган лойиҳаларнинг мазкур Низомнинг 17-бандида кўрсатилган йўналишларга мувофиқлиги ва ажратиладиган субсидиялар суммаси ҳисоб-китобининг ишончлилиги, шунингдек ресурслар ва улар бўйича фоизларнинг Жамғармага ўз вақтида қайтарилиши учун жавоб берадилар.

5-БОБ. БАНКЛАРГА СУБСИДИЯЛАР АЖРАТИШ ТАРТИБИ

22. Банкларнинг жойлардаги филиаллари кичик тадбиркорлик субъектлари (кейинги ўринларда лойиҳа ташаббускори деб аталади) томонидан тақдим этилган инвестиция лойиҳаларини мазкур Низомнинг 17-бандида кўрсатилган йўналишлар бўйича банкларнинг кредит сиёсатида белгиланган мезонлар доирасида кўриб чиқадилар.

Илгари хусусийлаштирилган қурилиши тугалланмаган объектлар ва фойдаланилмаётган ишлаб чиқариш майдонлари негизидаги инвестиция лойиҳаларини банк филиаллари томонидан кўриб чиқиш ва танлаш Ҳудудий идоралараро комиссиялар тасдиқлаган лойиҳалар жумласидан амалга оширилади.

23. Кредит бериш тўғрисидаги қарор банкларнинг тегишли кредит қўмиталари томонидан қабул қилинади. Бунда кредит шартномасида фоиз тўловларининг бир қисми Жамғармадан ажратиладиган субсидиялар ҳисобидан қопланиши кўрсатилиши лозим.

Кредит беришни маъқуллаш тўғрисидаги банкнинг тегишли кредит қўмитаси қарори нусхаси Давлат рақобат қўмитаси ҳудудий органига тақдим этилади.

24. Субсидиялар ажратиш учун банклар ҳар ойда, ойнинг 25-санасидан кечикмасдан ҳудудлар бўйича фоиз тўловлари юзасидан субсидия тақдим этиладиган кредитлар рўйхатини ҳамда аниқ кредит бўйича субсидия суммасини илова қилган ҳолда Давлат рақобат қўмитасига субсидияларга бўлган эҳтиёж тўғрисидаги маълумотни тақдим этадилар.

Тақдим этилган материаллар Давлат рақобат қўмитаси томонидан улар тушган кундан бошлаб 10 иш кунидан кўп бўлмаган муддатда кўриб чиқилади.

Субсидиялар ажратиш учун асослар етарли эмас деб эътироф этилган тақдирда, Давлат рақобат қўмитаси сабаблари изоҳланган ҳолда рад этиш тўғрисида ёзма хабарнома юборади.

25. Субсидиялар қарз олувчилар - лойиҳа ташаббускорлари томонидан фоиз тўловлари тўланганда ажратилади. Бунда қарз олувчи - лойиҳа ташаббускори кредит шартномасида кўзда тутилган фоиз тўловларини Жамғарма томонидан қопланадиган субсидия бўйича тўлов қисмини чегирган ҳолда тўлайди.

26. Жамғармадан субсидиялар ҳар ойда Бош келишувда кўзда тутилган миқдор ва Жамғарма маблағлари қолдиғи доирасида ажратилади.

Субсидия ажратиш учун буюртманомалар субсидия чегирилиб, лойиҳалар ташаббускорлари томонидан кредитнинг ҳақиқатда қопланган фоизли харажатлари суммасини кўрсатган ҳолда, бош банк томонидан ҳар ойда ҳисобот ойидан кейинги ойнинг 15-санасидан кечикмай Давлат рақобат қўмитасига тақдим этилади.

Жамғарма томонидан субсидиялар мазкур банднинг иккинчи хатбошида кўрсатилган буюртманомалар тақдим этиш ойидан кейинги ойнинг 15-санасидан кечикмай бош банк ҳисоб рақамига маблағларни ўтказиш йўли билан ажратилади.

Қарз олувчи - лойиҳа ташаббускори томонидан кредит кечикиб тўланган тақдирда, ажратиладиган субсидиялар суммаси тасдиқланган тўлов жадвалида қайд этилган суммадан ортиқ бўлмаслиги керак.

Фоизли харажатларни ҳисоблаш ва субсидиялар ажратиш бўйича шартли мисоллар мазкур Низомнинг 5-иловасида келтирилган.

27. Субсидиялар ажратиш қуйидаги ҳолатларда тўхтатилади:

қопланган кредитлар бўйича;

кредит шартномаси бекор қилинганда ёки ҳақиқий эмас деб топилганда;

банк кредит шартномасини бекор қилиш ёки ҳақиқий эмас деб топиш тўғрисида даъво билан судга мурожаат қилганда ва ундирувни мулкка (гаровга) қаратганда;

ушбу кредитга "фоиз ўстирмаслик" мақоми қўлланилганда.

28. Агар:

Ўзбекистон Республикаси Марказий банкининг қайта молиялаштириш ставкаси ўзгарганда, ажратилаётган субсидиялар суммаси кредит расмийлаштирилган кунда қайд этилган даражада ўзгаришсиз қолади;

кредит шартномаси бекор қилинган ёки ҳақиқий эмас деб топилган тақдирда, ушбу шартнома бўйича ажратилган субсидиялар кредит шартномасини бекор қилиш ёки ҳақиқий эмас деб топиш тўғрисидаги суд қарори кучга кирган кундан бошлаб 30 кун ичида бош банк томонидан Жамғармага қайтарилади.

29. Бош банк томонидан фойдаланилмаган ва Жамғармага қайтарилган субсидиялар мазкур Низомнинг 7-бандига мувофиқ тақсимланмайди ва 4-бобда кўзда тутилган мақсадларга йўналтирилади.

6-БОБ. БАНКЛАРГА РЕСУРСЛАР АЖРАТИШ ТАРТИБИ

30. Ресурслар тузилган Бош келишув ва Жамғарма қолдиқ маблағлари доирасида Ўзбекистон Республикаси Марказий банкининг қайта молиялаштириш ставкасини йиллик икки фоизга камайтирилганига тенг фоиз ставкасида бош банкка ажратилади.

Ресурслар ва улар бўйича фоизлар қарз олувчилар - лойиҳа ташаббускорларига кредитлар ажратилишидан ва улар томонидан қайтарилишидан қатъи назар, Бош келишув шартларига мувофиқ бош банк томонидан қайтарилади.

31. Бош келишувни тузган банклар маблағлар олиш учун ҳар ойда Давлат рақобат қўмитасига ҳудудлар ва қарз олувчилар - лойиҳа ташаббускорлари бўйича кредит ажратиш тўғрисида кредит қўмитасининг қарори, кредитнинг умумий суммаси, кредит бўйича Жамғармадан илгари олинган маблағлар суммаси ва олинадиган маблағлар бўйича буюртманома суммаси тўғрисида маълумотлар кўрсатилган буюртманома тақдим этадилар.

32. Банклар ажратилган ресурслар ҳисобидан лойиҳа ташаббускорига Ўзбекистон Республикаси Марказий банкининг қайта молиялаштириш ставкасидан ошмаган ставкада уч йилгача муддатга кредитлар беради.

Банклар илгари хусусийлаштирилган қурилиши тугалланмаган объектлар ва фойдаланилмаётган ишлаб чиқариш майдонлари негизидаги инвестиция лойиҳаларини Ҳудудий идоралараро комиссиялар тасдиқланган лойиҳалар таркибидан кўриб чиқилади ва танланади.

33. Қабул қилинган буюртманомаларга асосан Давлат рақобат қўмитаси банкларга маблағларни ўтказади. Давлат рақобат қўмитаси билан Бош келишувлар тузган банклар маблағ олиш учун киритилган буюртманомаларнинг тўғрилиги ва кредитларнинг мақсадли ишлатилиши бўйича мониторинг юритишга жавобгардирлар.

34. Банклар ҳар ойда ҳисобот ойидан кейинги ойнинг 15-санасидан кечиктирмасдан ажратилган ресурслари ҳисобидан кичик тадбиркорлик субъектларининг хусусийлаштирилган объектлар ва корхоналар негизида инвестиция лойиҳаларини амалга ошириш учун берилган кредитлар тўғрисида қарз олувчилар - лойиҳа ташаббускорлари бўйича маълумотларни Давлат рақобат қўмитасига тақдим этадилар.

35. Олинган ресурслар ва улар бўйича фоизлар маблағларини қоплаш Бош келишувлар шартларига мувофиқ банклар томонидан ҳар ойда амалга оширилади.

36. Бош банк томонидан Жамғармага қайтарилган ресурслар (улар бўйича фоизлар билан биргаликда) мазкур Низомнинг 7-бандига мувофиқ тақсимланмайди ва 4-бобда кўзда тутилган мақсадларга йўналтирилади.

7-БОБ. ЖАМҒАРМА МАБЛАҒЛАРИНИ БОШҚАРИШ

37. Жамғармани бошқариш Давлат рақобат қўмитасининг Молия ва бухгалтерия ҳисоби бошқармаси томонидан амалга оширилади, бошқарма:

Жамғарманинг даромадлари ва харажатлари прогнозини манбалар, ҳудудлар ва чораклар бўйича тайёрлайди, унинг бажарилишини таҳлил қилади ва мониторингини юритади;

Жамғарма маблағларининг тушиши ва тақсимланиши ҳисобини юритади, мазкур Низом ва қонунчиликда кўзда тутилган харажатларни амалга оширади, Жамғарма бюджетининг ижроси тўғрисидаги ҳисоботни тузади;

қонунчиликда белгиланган тартибда Жамғарма бюджетининг ижроси тўғрисидаги ҳисоботни Ўзбекистон Республикаси Молия вазирлигига ҳамда Ўзбекистон Республикаси Вазирлар Маҳкамасига тақдим этади.

38. Давлат рақобат қўмитасининг Хусусийлаштирилган корхоналарга кўмаклашиш бош бошқармаси, Хусусийлаштирилган корхоналар фаолиятини мониторинг ва таҳлил қилиш ҳудудий бўлимлари ва Хусусийлаштирилган корхоналарга кўмаклашиш ҳудудий бўлимлари:

Ҳудудий идоралараро комиссиялар тасдиғига киритиш учун илгари хусусийлаштирилган қурилиши тугалланмаган объектлар ва фойдаланилмаётган ишлаб чиқариш майдонлари негизидаги инвестиция лойиҳаларини кўриб чиқиш ва танлашда иштирок этади;

Жамғарма маблағлари ҳисобидан субсидиялар ва ресурслар олиш тўғрисидаги банкларнинг буюртманомаларини ва Жамғармадан олинган ресурслар ҳисобидан кичик тадбиркорлик субъектларига ажратилган кредитлар тўғрисидаги банклар томонидан тақдим этилган маълумотларни кўриб чиқишда иштирок этади;

кичик тадбиркорлик субъектларининг инвестиция лойиҳалари амалга оширилиши бўйича таҳлил ва мониторинг олиб боради ва уларнинг амалга оширилиши бўйича маълумотлар тайёрлайди.

8-БОБ. ЖАМҒАРМА МАБЛАҒЛАРИНИНГ ТУШИШИ

ВА УЛАРДАН ФОЙДАЛАНИЛИШИ БЎЙИЧА

ҲИСОБ, ҲИСОБОТ ВА НАЗОРАТ

39. Жамғарма маблағларининг тушиши ва тақсимланиши тўғрисидаги маълумотлар ҳудудий органлар томонидан ҳар ойда ҳисобот ойидан кейинги ойнинг биринчи санасидаги ҳолатига кўра, ҳисобот ойининг 5-санасидан кечикмай Давлат рақобат қўмитасига тақдим этилади.

40. Жамғарма ҳисоботининг даромад ва харажат қисмидан қуйидагилар чегириб қолинади:

хато ва ортиқча кирим қилинган суммалар, шунингдек талабгорлар томонидан шартномалар (битимлар) тузиш учун депонентланган, лекин улар бўйича шартномалар (битимлар) тузилмаган маблағлар - улар қайтарилган даврда;

Жамғарма маблағлари ҳисобидан хато ва ортиқча ўтказилган суммалар - улар ўтказилган даврда.

Жамғарма маблағлари ҳисобидан хато ва ортиқча ўтказилган суммалар Жамғармага қайтарилиши ва мазкур Низомга мувофиқ тақсимланиши лозим.

41. Давлат рақобат қўмитаси ҳар ойда ҳисобот ойидан кейинги ойнинг 15-санасидан кечикмай Ўзбекистон Республикаси Молия вазирлигига Жамғарма бюджетининг ижроси тўғрисида ҳисобот тақдим этади.

43. Жамғармага тушадиган маблағлар ҳисоб-китобининг ўз вақтида олиб борилишини қуйидагилар таъминлайди:

савдо ташкилотчилари - ҳисоб-клиринг хизматлари кўрсатиш тўғрисида тузилган шартномаларга мувофиқ биржа савдоларида сотилган давлат активлари бўйича;

Давлат рақобат қўмитаси ва унинг ҳудудий органлари - қонунчиликка мувофиқ биржадан ташқари савдоларда сотилган давлат активлари бўйича;

Давлат мулкини ижарага бериш марказлари - давлат мулки ижарасидан тушадиган маблағлар, ижара тўловини тўлаш кечиктирилганлиги учун пенялар ва шартнома мажбуриятлари бузилганлиги учун жарималар суммаси бўйича;

маблағлар ўтказишга жавобгар ташкилотлар - бошқа манбалар бўйича.

9-БОБ. ЯКУНЛОВЧИ ҚОИДАЛАР

44. Давлат рақобат қўмитаси ва унинг ҳудудий органлари Жамғарма маблағларини тўғри тақсимлаш, шунингдек қонунчиликка мувофиқ Жамғарма бюджетининг ижроси тўғрисидаги ҳисоботни тузиш ва тақдим этиш юзасидан жавоб берадилар.

45. Жамғармадан маблағ олувчилар маблағлардан қонунчиликка мувофиқ мақсадли ва тўғри фойдаланилиши юзасидан жавоб берадилар.

46. Жамғарма маблағларидан мақсадли ва самарали фойдаланилишини назорат қилиш белгиланган тартибда Ўзбекистон Республикаси Молия вазирлигининг Назорат-тафтиш бош бошқармаси томонидан амалга оширилади.