язык интерфейса

ЎзР Конунчилиги

ЎзР Конунчилиги/ Ер ва бошқа табиий ресурслар. Атроф-муҳит муҳофазаси/ Ўсимлик дунёси тўғрисидаги қонунчилик/ Ўрмон хўжалигини ташкиллаштириш/ Ўзбекистон Республикаси Ўрмон хўжалиги давлат қўмитаси Миллий табиат боғлари ва овчилик хўжаликлари бошқармаси тўғрисида Низом (ЎзР ВМ 19.07.2017 й. 530-сон қарорига 3-илова)

Вы можете получить доступ на один день к продукту Законодательство Руз.

Вазирлар Маҳкамасининг

2017 йил 19 июлдаги

530-сон қарорига

3-ИЛОВА



Ўзбекистон Республикаси Ўрмон хўжалиги

давлат қўмитаси Миллий табиат боғлари ва

овчилик хўжаликлари бошқармаси тўғрисида

НИЗОМ


1-БОБ. УМУМИЙ ҚОИДАЛАР


1. Ушбу Низом Ўзбекистон Республикаси Ўрмон ҳўжалиги давлат қўмитаси (кейинги ўринларда Қўмита деб аталади), Миллий табиат боғлари ва овчилик хўжаликлари бошқармаси (кейинги ўринларда Бошқарма деб аталади)нинг мақоми, асосий вазифалари ва функциялари, ҳуқуқлари ва жавобгарлиги, шунингдек фаолиятини ташкил этиш тартибини белгилайди.

2. Бошқарма Қўмита, миллий табиат боғлари ва бошқа муҳофаза этиладиган табиий ҳудудлар ҳамда овчилик хўжаликларини ташкил этиш ва мувофиқлаштириш соҳасида бошқарувни амалга оширади.

3. Бошқарма Қўмитага бўйсунади ва ҳисобот беради.


4. Бошқарма ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Низомга, шунингдек бошқа қонун ҳужжатларига амал қилади.


5. Бошқарма ўз фаолиятини давлат ва хўжалик бошқаруви органлари, ҳуқуқни муҳофаза қилувчи органлари, маҳаллий давлат ҳокимияти органлари, нодавлат нотижорат ташкилотлар, хорижий ва халқаро ҳамда бошқа ташкилотлар билан ҳамкорликда амалга оширади.


6. Бошқарма юридик шахс ҳисобланади, Ўзбекистон Республикасининг Давлат герби тасвири ва ўз номи туширилган муҳр ва бланкаларга, мустақил балансига, Ўзбекистон Республикаси Молия вазирлигининг Ғазначилигида ҳисоб рақамларига, банк, шу жумладан чет эл валютасидаги ҳисоб рақамларига эга бўлади.


7. Бошқарманинг жойлашган ери (почта манзили): Тошкент шаҳри, Мирзо Улуғбек тумани, Дўрмон йўли кўчаси, 2-а уй, 100041.



2-БОБ. БОШҚАРМАНИНГ АСОСИЙ

ВАЗИФАЛАРИ ВА ФУНКЦИЯЛАРИ


8. Қуйидагилар Бошқарманинг асосий вазифалари ҳисобланади:

миллий табиат боғлари ва овчилик хўжаликлари фаолиятини ташкил этиш ҳамда мувофиқлаштириш;

муҳофаза этиладиган табиий ҳудудларни ва биологик хилма-хилликни муҳофаза қилиш ҳамда улардан оқилона фойдаланишга қаратилган давлат, халқаро ва минтақавий дастурларнинг ишлаб чиқилишида иштирок этиш ҳамда таклифлар киритиш;

давлат ўрмон фондида муҳофаза этиладиган табиий ҳудудларни кенгайтириш ва овчилик хўжаликлари фаолиятини ривожлантириш чораларини кўриш;

соҳага оид илмий фаолиятни замонавий талаблар асосида такомиллаштириш, маҳаллий ва халқаро ташкилотлар билан ўзаро маълумот алмашинувини йўлга қўйиш;

тизимдаги муҳофаза этиладиган табиий ҳудудларда жорий этилган режимга риоя этилишини таъминлаш ва соҳага оид қонун ҳужжатларини такомиллаштириш юзасидан Қўмитага таклифлар киритиш;

давлат ўрмон фонди ерларида ов масканларини ташкил этиш, ов қилиш муддатлари, ёввойи ҳайвонларни тутиш ва муҳофаза этиладиган ҳудудлардан маданий-маърифий, тарбиявий, соғломлаштириш, рекреация ва эстетик мақсадларда фойдаланиш тартиби ҳамда ўрмон фонди ерларида экологик туризмни ривожлантириш юзасидан Қўмитага таклиф киритиш;

давлат ўрмон фонди ерларида ҳайвонот дунёси объектлари мониторинги ва ҳисобини юритиш ҳамда ҳайвонот дунёси ва муҳофаза этиладиган табиий ҳудудлар давлат кадастри бўйича маълумотларни тўплаш;

миллий табиат боғлари ва овчилик хўжаликлари учун мутахассисларни қайта тайёрлаш ва уларнинг малакасини оширишда фаол иштирок этиш;

давлат ўрмон фонди ерларида белгиланган тартибда ажратилган квоталар асосида ёввойи ҳайвонларни овлаш, ов маҳсулотларини тайёрлаш, қайта ишлаш ва сотиш;

муҳофаза этиладиган табиий ҳудудларда, овчилик хўжаликларида ўрмон, ўсимлик ва ҳайвонот дунёсини муҳофаза қилиш ва улардан фойдаланиш тўғрисидаги қонун ҳужжатларига риоя этилиш юзасидан назоратни амалга ошириш


9. Бошқарма ўзига юкланган асосий вазифаларга мувофиқ қуйидаги функцияларни амалга оширади:


а) миллий табиат боғлари ҳамда овчилик хўжаликлари фаолиятини ташкил этиш ва мувофиқлаштириш соҳасида:

ўрмон хўжалиги, ўрмон барпо этиш, уларни касаллик ва зараркунандалардан ҳимоя қилиш, ёнғинга қарши ва бошқа турдаги тадбирларнинг миллий табиат боғлари ҳамда овчилик хўжаликларида амалга оширилишини ташкил этиш;

ёввойи ҳайвонларни ярим тутқун шароитларда ушлаш ва кўпайтириш (вольер, питомник, серпентарий ва бошқалар) ҳамда биотехник тадбирларни амалга ошириш;

Қўмита билан келишган ҳолда маҳаллий ва халқаро доирадаги ҳамкорликни амалга ошириш, маркетинг хизматларини кўрсатиш, олиб борилган ишлар тўғрисида ҳар чорак якуни бўйича Қўмитага ҳисобот тақдим этиш;


б) муҳофаза этиладиган табиий ҳудудларни ва биологик хилма-хилликни муҳофаза қилиш ҳамда улардан оқилона фойдаланишга қаратилган давлат, халқаро ва минтақавий дастурларни ишлаб чиқилишида иштирок этиш ҳамда таклифлар киритиш соҳасида:

муҳофаза этиладиган табиий ҳудудларнинг бошқарилиши, ташкилий функциялари масалалари бўйича халқаро илмий конференция ва семинарлар ташкил этиш ва ўтказиш;

Ўзбекистон Республикаси Фанлар академияси, илмий-тадқиқот муассасалари ва бошқа илмий ташкилотлар билан бирга ўсимлик ва ҳайвонот дунёсини, ноёб ва йўқолиб бораётган ўсимлик ва ёввойи ҳайвонлар ҳисобини юритиш, овлаш миқдорини аниқлаш, шунингдек техник, доривор ва озуқабоп ўсимликлар хом ашёсини тайёрлаш ҳажмлари аниқланишини ташкил этиш;


в) давлат ўрмон фондида муҳофаза этиладиган табиий ҳудудларни кенгайтириш ва овчилик хўжаликлари фаолиятини ривожлантириш чораларини кўриш соҳасида:

давлат ўрмон фондида муҳофаза этиладиган табиий ҳудудларни кенгайтириш юзасидан ҳар томонлама асосланган таклифларни ишлаб чиқиш ва Қўмитага тақдим этиш;

ривожланган давлатлар тажрибасини қўллаган ҳолда овчилик хўжаликлари фаолиятини ривожлантириш юзасидан чора-тадбирлар ишлаб чиқиш ва Қўмитага киритиш;


г) соҳага оид илмий фаолиятни замонавий талаблар асосида такомиллаштириш, маҳаллий ва халқаро ташкилотлар билан ўзаро маълумот алмашинувини йўлга қўйиш соҳасида:

табиий жараёнлар илмий-тадқиқотларини ва мониторингини ташкил этиш ва олиб бориш;

ваколатли органлар билан келишган ҳолда тизимига кирувчи муҳофаза этиладиган табиий ҳудудларда тажриба-синов ишларини ўтказиш ва тугалланган илмий натижаларни қўллаш учун тажриба-хўжалик ҳудудларини белгилаш;

д) тизимдаги муҳофаза этиладиган табиий ҳудудларда жорий этилган режимга риоя этилишини таъминлаш ва соҳага оид қонун ҳужжатларини такомиллаштириш юзасидан Қўмитага таклифлар киритиш соҳасида:

ўрмон, ўсимлик ва ҳайвонот дунёсини муҳофаза қилиш ва улардан фойдаланиш ҳамда муҳофаза этиладиган табиий ҳудудлар тўғрисидаги қонун ҳужжатларини такомиллаштириш юзасидан асосланган таклифлар ишлаб чиқиш;

муҳофаза этиладиган табиий ҳудудлар бошқарилиши ва ҳайвонот дунёси муҳофазаси, ҳайвонот дунёси объектларини қайта тиклаш ва ундан фойдаланиш бўйича норматив-ҳуқуқий ҳужжатлар лойиҳаларини ишлаб чиқишда иштирок этиш;


е) давлат ўрмон фонди ерларида ҳайвонот дунёси объектлари мониторинги ва ҳисобини юритиш ҳамда ҳайвонот дунёси ва муҳофаза этиладиган табиий ҳудудлар кадастри бўйича маълумотларни тўплаш соҳасида:

давлат ўрмон фонди ерларида ҳайвонот дунёси объектлари мониторинги ва ҳисоби юритилишини ташкил этиш;

ҳайвонот дунёси ва муҳофаза этиладиган ҳудудлар давлат кадастри бўйича маълумотларни тўплаш, умумлаштириш ва Қўмитага ҳамда тегишли органларга тақдим этиш;


ж) миллий табиат боғлари ва овчилик хўжаликлари учун мутахассисларни қайта тайёрлаш ва уларнинг малакасини оширишда фаол иштирок этиш соҳасида:

миллий табиат боғлари ва овчилик хўжаликлари учун мутахассисларни қайта тайёрлаш, уларнинг малакасини ошириш бўйича ўқув режалари ҳамда машғулотларни ўтказиш тартиби ишлаб чиқилишида иштирок этиш;

тизимда фаолият юритаётган ходимларнинг хорижий давлатларда малакасини ошириш бўйича Қўмитага таклиф киритиш;


з) давлат ўрмон фонди ерларида ов масканларини ташкил этиш, ов қилиш муддатлари, ёввойи ҳайвонларни тутиш ва муҳофаза этиладиган ҳудудлардан маданий-маърифий, тарбиявий, соғломлаштириш, рекреация ва эстетик мақсадларда фойдаланиш тартиби ҳамда давлат ўрмон фонди ерларида экологик туризмни ривожлантириш юзасидан Қўмитага таклиф киритиш соҳасида:

давлат ўрмон фонди ерларида овчилик хўжалигини юритишни ташкил этиш, ов ресурсларини муҳофаза қилиш, қайта тиклаш ва улардан самарали фойдаланиш чора-тадбирларини ишлаб чиқиш;

муҳофаза этиладиган ҳудудлардан маданий-маърифий, тарбиявий, соғломлаштириш, рекреация ва эстетик мақсадларда фойдаланиш тартиби ҳамда фойдаланганлик учун тўловлар миқдорини ишлаб чиқиш;

давлат ўрмон фонди ерларида экологик туризмни ривожлантириш мақсадида туристик маршрутларни ишлаб чиқиш, сервис хизматларини такомиллаштириш, туристларни жалб этиш чора-тадбирларини ишлаб чиқиш;

халқаро туризм, шу жумладан махсус туризм турлари (ов, балиқ ушлаш, тоққа чиқиш, экологик туризм ва бошқалар)ни ташкил этиш ва амалга ошириш;


и) давлат ўрмон фонди ерларида белгиланган тартибда ажратилган квоталар асосида ёввойи ҳайвонларни овлаш, ов маҳсулотларини тайёрлаш, қайта ишлаш ва сотиш соҳасида:

давлат ўрмон фонди ерларида маҳаллий, чет эл жисмоний ва юридик шахслари учун ов қилишини ташкил этиш, мазкур соҳага оид чора-тадбирлар ишлаб чиқиш, амалга ошириш ва унинг назоратини олиб бориш;


к) тизимдаги муҳофаза этиладиган табиий ҳудудларида, овчилик хўжаликларида ўрмон, ўсимлик ва ҳайвонот дунёсини муҳофаза қилиш ва улардан фойдаланиш тўғрисидаги қонун ҳужжатларига риоя этилиши юзасидан назоратни амалга ошириш, аниқланган ҳуқуқбузарликлар бўйича тегишли чораларни кўриш соҳасида:

Республика Овчилар ва балиқчилар жамиятига қарашли вилоятлар бўлинмаларига ўрмон фонди ерларидаги шартнома асосида бириктирилган ов масканларида шартнома шартларининг бажарилишини назорат қилиш.



3-БОБ. БОШҚАРМАНИНГ ҲУҚУҚЛАРИ

ВА ЖАВОБГАРЛИГИ


10. Бошқарма ўзига юкланган асосий вазифалар ва функцияларни амалга ошириш учун қуйидаги ҳуқуқларга эга:

Бошқармага қарашли муҳофаза этиладиган табиий ҳудудлар ва овчилик хўжаликларини бошқариш;

Бошқарма тизимига кирувчи ташкилотларни ташкил этиш, қайта ташкил этиш ва тугатиш тўғрисида Қўмитага белгиланган тартибда таклифлар киритиш;

Ўзбекистон Республикаси, шунингдек халқаро ва хорижий ташкилотлар билан ўсимлик ва ҳайвонот дунёси соҳасида илмий-тадқиқот ишларини олиб бориш бўйича ҳамкорлик қилиш;

қонун ҳужжатларида белгиланган тартибда ички ишлар органлари билан келишган ҳолда хизмат ўқ отар қуроллари ва ўқ дориларни сотиб олиш ва улардан хизмат мақсадларида фойдаланиш;

ўрмон фондидаги ов-ўлжа ҳайвонлари турларининг давлат кадастрини юритиш;

ҳайвонот дунёсидан фойдаланувчиларга ов хўжалигини юритиш ва ҳайвонот дунёсидан фойдаланиш масалаларида ўз ваколати доирасида кўрсатмалар бериш;

давлат ўрмон фонди ерларида корхона ва ташкилотлар билан ов масканлари, овчилик-балиқчилик хўжаликларини ташкил этиш ҳамда юритилиши бўйича шартномалар тузиш;

ўрмон фонди ерларида ҳайвонот дунёсидан фойдаланувчиларга ов хўжалигини юритиш ва ҳайвонот дунёсидан фойдаланиш борасида ўз ваколати доирасида услубий ёрдам кўрсатиш ва назоратни амалга ошириш;

давлат ўрмон фонди ерларида чорвачилик ва ов хўжаликлари учун хавфли ёввойи йиртқич ҳайвонларни бартараф қилиш тадбирларини ташкил этиш ва ўтказиш;

Бошқармага қарашли овчилик ва ўрмон ов хўжаликлари тўғрисидаги низомларни, харажатлар сметасини ва штат жадвалини тасдиқлаш, уларнинг бухгалтерия ҳисоботлари ва балансларини қабул қилиш ҳамда Қўмитага ва тегишли органларга тақдим этиш;

жисмоний шахсларга табиатни муҳофаза қилиш органлари томонидан бериладиган ёввойи ҳайвонларни тутиш рухсатномаси доирасида ҳайвонот дунёси объектларидан фойдаланишга рухсатнома (йўлланма, ҳайвонларни тутиш варақаси) бериш;

тизим миллий табиат боғлари ҳудудига кириш ва илмий-тадқиқотлар олиб бориш ҳуқуқини берувчи рухсатномалар бериш;

соҳага халқаро ва бошқа молия институтлари, донор ташкилотларнинг грант маблағларини ҳамда инвестицияларни жалб этиш;

ходимларни қайта тайёрлаш ва уларнинг малакасини ошириш бўйича Қўмитага таклиф киритиш;

белгиланган намунадаги ва белгиланган тартибда тасдиқланган фарқловчи белгили кийим-бош кийиб юриш;

Бошқармага қарашли хўжалик ва ташкилотларда ўрмон, ўсимлик ва ҳайвонот дунёсига етказилган зарарни жисмоний ва юридик шахслардан белгиланган тартибда ундириш чораларини кўриш;

ҳайвонларнинг ноёб ва қимматли турларини боқиш ва кўпайтириш бўйича серпентарий ва питомниклар ташкил этиш;

соҳага оид савдо-воситачилик фаолияти билан шуғулланиш;

ўрмон ва ёрдамчи қишлоқ хўжалиги маҳсулотларини ишлаб чиқариш, қайта ишлаш ва сотиш;

ёввойи ҳайвонлар хом ашёларини, овчилик ва балиқчилик маҳсулотларини қайта ишлаш цехларини ташкил этиш.

Бошқарма қонун ҳужжатларига мувофиқ бошқа ҳуқуқлардан ҳам фойдаланиши мумкин.


11. Бошқарма ўзига юкланган вазифалар ва функцияларнинг самарали бажарилиши учун жавоб беради.



4-БОБ. БОШҚАРМА ФАОЛИЯТИНИ ТАШКИЛ ЭТИШ


12. Бошқармага Қўмита раиси томонидан лавозимга тайинланадиган ва лавозимдан озод этиладиган бошлиқ (кейинги ўринларда бошлиқ деб аталади) раҳбарлик қилади.

Бошлиқ ўринбосари ва бош ҳисобчи Бошлиқ тавсиясига асосан Қўмита раиси томонидан лавозимга тайинланади ва лавозимдан озод қилинади.


13. Бошлиқ:

Бошқарма аппарати, шунингдек Бошқарма таркибига кирувчи ташкилотлар фаолиятига умумий раҳбарлик қилади ҳамда Бошқармага юкланган вазифалар ва функцияларнинг бажарилиши учун шахсан жавоб беради;

Бошқарма аппарати таркибий бўлинмалари ўртасида вазифаларни тақсимлайди ҳамда уларнинг жавобгарлик даражасини белгилайди;

Қўмита билан келишган ҳолда Бошқарма аппаратининг штат жадвалини, таркибий бўлинмалар низомларини тасдиқлайди ҳамда ойлик, чораклик ва йиллик ҳисоботларнинг белгиланган тартибда Қўмитага тақдим этилишини таъминлайди;

Бошқарма номидан ўз ваколати доирасида шартнома ва битимлар тузади;

тизим миллий табиат боғлари ва овчилик хўжалиги директорларининг илмий ишлар бўйича ўринбосарлари, ўринбосарлар - бош нозирлар, бош ўрмонбегилар, бош ҳисобчиларни хўжалик раҳбарларининг тавсиясига биноан Қўмита билан келишган ҳолда лавозимга тайинлайди ва лавозимидан озод қилади.


5-БОБ. БОШҚАРМАНИ МОЛИЯЛАШТИРИШ


14. Бошқарма қуйидагилар ҳисобидан молиялаштирилади:

Ўзбекистон Республикасининг Давлат бюджети маблағлари;

мусодара этилган овчилик қуроллари ва балиқ овлаш воситалари, қонунга хилоф равишда қўлга киритилган ўлжа маҳсулотларини сотишдан тушган маблағлар;

Бошқармага қарашли хўжалик ва ташкилотларнинг ажратмалари;

ов ва балиқчилик хўжаликларининг маҳсулотларини тайёрлаш, қайта ишлаш ва сотишдан тушган маблағлар;

савдо-воситачилик фаолиятидан тушган маблағлар;

ўрмон ва ёрдамчи қишлоқ хўжалиги маҳсулотларини ишлаб чиқариш, қайта ишлаш ва сотишдан тушган маблағлар;

халқаро туризм, шу жумладан махсус туризм турлари (ов, балиқ ушлаш, тоққа чиқиш, экологик туризм ва бошқалар)ни ташкил этишдан тушган маблағлар;

жисмоний ва юридик шахсларнинг ҳомийлик хайриялари, шу жумладан Ўзбекистон Республикаси норезидентларининг маблағлари;

бюджетдан ташқари ва қонун ҳужжатларида тақиқланмаган бошқа маблағлар.



6-БОБ. ЯКУНЛОВЧИ ҚОИДА


15. Бошқармани қайта ташкил этиш ва тугатиш қонун ҳужжатларида белгиланган тартибда амалга оширилади.



"Ўзбекистон Республикаси қонун ҳужжатлари тўплами",

2017 йил 31 июль, 30-сон, 734-модда