Ўзбекистон Республикаси Вазирлар Маҳкамасининг 12.12.2017 й. 981-сон "Тошкент вилоятининг айрим аҳоли пунктларида шаҳарсозлик фаолиятини амалга оширишни тартибга солишнинг қўшимча чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

12.12.2017 й.

N 981

ТОШКЕНТ ВИЛОЯТИНИНГ АЙРИМ

АҲОЛИ ПУНКТЛАРИДА ШАҲАРСОЗЛИК

ФАОЛИЯТИНИ АМАЛГА ОШИРИШНИ

ТАРТИБГА СОЛИШНИНГ ҚЎШИМЧА

ЧОРА-ТАДБИРЛАРИ ТЎҒРИСИДА

Тошкент вилоятининг айрим аҳоли пунктларида шаҳарсозлик фаолиятини амалга оширишни тартибга солиш мақсадида, шунингдек, Ўзбекистон Республикаси Шаҳарсозлик кодексининг 18-моддасига мувофиқ Вазирлар Маҳкамаси ҚАРОР ҚИЛАДИ:

1. Тошкент вилоятининг иловада кўрсатилган аҳоли пунктлари (кейинги ўринларда аҳоли пунктлари деб аталади) бўйича бош режа лойиҳаси ишлаб чиқилаётганлиги маълумот учун қабул қилинсин.

2. Аҳоли пунктлари бўйича бош режа лойиҳасини ишлаб чиқишда ушбу аҳоли пунктлари ҳудудлари учун қуйидаги вақтинчалик тақиқлар жорий этилсин:

жисмоний ва юридик шахсларга қурилиш учун ер ажратиш;

бинолар, иншоотлар ва бошқа объектлар, шу жумладан муҳандислик-коммуникация объектларини қуриш, реконструкция қилиш ва қайта ихтисослаштириш, шунингдек, уларга рухсатномалар бериш;

ўзбошимчалик билан қурилган бинолар, иншоотлар ва бошқа объектларга нисбатан эгалик ҳуқуқини белгилаш, бундан суд қарори асосида ҳамда Вазирлар Маҳкамасининг 2016 йил 3 августдаги 251-сон қарори билан тасдиқланган 2016-2017 йиллар даврида жисмоний ва юридик шахсларга тегишли бўлган кўчмас мулк объектларини ялпи хатловдан ўтказиш тартиби тўғрисидаги низомда назарда тутилган ҳолларда эгалик ҳуқуқи берилиши ҳоллари мустасно.

3. Белгилаб қўйилсинки:

мазкур қарорнинг 2-бандида назарда тутилган тақиқлар Ўзбекистон Республикаси Президентининг ва Вазирлар Маҳкамасининг тегишли қарорлари асосида қишлоқ жойларда намунавий лойиҳалар асосида якка тартибдаги уй-жойлар қуриш билан боғлиқ муносабатларга нисбатан татбиқ этилмайди;

аҳоли пунктларида жойлашган кўчмас мулк объектларига бўлган мулк ҳуқуқини бошқа шахсга ўтказиш билан боғлиқ битимларни нотариал тасдиқлаш ва давлат рўйхатидан ўтказишда тарафлар жорий этилган тақиқлар ҳақида ёзма равишда огоҳлантирилади;

аҳоли пунктлари бўйича бош режани тасдиқлаш тўғрисида белгиланган тартибда қарор қабул қилинган кундан бошлаб ушбу қарорнинг 2-бандида назарда тутилган ҳаракатлар тасдиқланган бош режа асосида амалга оширилади.

4. Тошкент вилояти ҳокимлиги фуқароларнинг ўзини ўзи бошқариш органлари билан биргаликда ушбу қарорнинг мазмуни, моҳияти ва аҳамияти тўғрисида мазкур аҳоли пунктларида истиқомат қилувчи аҳоли, шунингдек, юридик ва жисмоний шахслар ўртасида ва оммавий ахборот воситалари орқали кенг тушунтириш ишларини олиб борсин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари - "Ўзбекистон темир йўллари" АЖ бошқаруви раиси А.Ж. Раматов, адлия вазири Р.К. Давлетов, Ер ресурслари, геодезия, картография ва давлат кадастри давлат қўмитаси раиси А.Х. Абдуллаев ҳамда Тошкент вилояти ҳокими вазифасини бажарувчи Ғ.И. Ибрагимов зиммасига юклансин.

Ўзбекистон Республикасининг Бош вазири                    А. Арипов

Вазирлар Маҳкамасининг

2017 йил 12 декабрдаги

981-сон қарорига

ИЛОВА

Бош режа лойиҳаси ишлаб чиқилаётган

Тошкент вилоятининг аҳоли пунктлари

РЎЙХАТИ

Қонун ҳужжатлари маълумотлари миллий базаси (www.lex.uz),

2017 йил 15 декабрь

"Ўзбекистон Республикаси қонун ҳужжатлари тўплами",

2017 йил 18 декабрь, 50-сон, 1230-модда