Ўзбекистон Республикаси Президентининг 16.03.2004 й. ПФ-3407-сон "Кинематография соҳасида бошқаришни такомиллаштириш тўғрисида"ги Фармони

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОНИ

16.03.2004 й.

N ПФ-3407

КИНЕМАТОГРАФИЯ СОҲАСИДА БОШҚАРИШНИ

ТАКОМИЛЛАШТИРИШ ТЎҒРИСИДА

Мамлакатимизда эркин демократик жамият барпо этиш йўлида амалга оширилаётган ўзгариш ва ютуқларни, миллий истиқлол ғоясининг мазмун-моҳиятини кино санъати воситасида бадиий акс эттириш, кинематография соҳасининг халқимиз ҳаётидаги, айниқса, ёшлар тарбиясидаги ўрни ва таъсирини кучайтириш, ғоявий-бадиий савиясини ошириш, уни ҳозирги замон талаблари асосида янада такомиллаштириш мақсадида:

1. "Ўзбеккино" давлат-акциядорлик компанияси, Ўзбекистон киноарбоблари бирлашмаси, Республика "Маънавият ва маърифат" Кенгашининг "Ўзбеккино" давлат-акциядорлик компаниясини "Ўзбеккино" Миллий агентлиги этиб қайта ташкил қилиш тўғрисидаги таклифлари маъқуллансин.

2. Қуйидагилар "Ўзбеккино" Миллий агентлигининг асосий вазифалари этиб белгилансин:

кино санъатининг миллий маданиятни ривожлантириш, жамият маънавий ҳаётини юксалтиришдаги ўрни ва аҳамиятини ҳисобга олган ҳолда, бу соҳани умумбашарий ва миллий қадриятлар уйғунлиги асосида тараққий эттиришнинг устувор йўналишларини ишлаб чиқиш;

кино санъатида, кино-видеофаолият соҳасида давлат сиёсатини амалга ошириш;

кинематография соҳасида фаолият кўрсатаётган, мулкчилик шаклидан қатьи назар, корхона ва киностудияларни, ижодий жамоаларни қўллаб-қувватлаш, уларнинг манфаатларини ҳимоя қилиш, тадбиркорлик ва рақобат муҳитини ривожлантириш учун қулай шарт-шароитлар яратиш;

миллий кино санъатининг энг яхши анъаналарини изчил давом эттириш ва бойитиш мақсадида иқтидорли ёш кинематографчиларни тарбиялаш, уларнинг ижодий имкониятларини рўёбга чиқаришга кўмаклашиш;

Ўзбекистон Республикаси Давлат фильмлар фонди фаолиятини бугунги кун талаблари негизида ташкил этиш;

кинофильмлар яратиш ва уларни намойиш этиш тизимини танловлар ташкил этиш орқали такомиллаштириш ва қайта техник жиҳозлаш, аҳолига кино-видеохизмат кўрсатиш даражасини ошириш;

муаллифлик ҳуқуқлари ҳимояланган кино ва видео маҳсулотларини ноқонуний равишда республика ҳудудига олиб киришга, улардан фойдаланиш, ижарага бериш вя тарқатишга қарши зарур чоралар кўриш;

импорт ва экспорт қилинадиган кино ва видео маҳсулотларига эксперт баҳоси берилишини амалга ошириш, республика ҳудудида кино ва видеофильмлар кўрсатиш ва улардан техник жиҳатдан фойдаланишнинг қоидаларини белгилаш;

кинематография соҳасида халқаро ҳамкорликни ривожлантириш, миллий кино маҳсулотларини жаҳон бозорига олиб чиқиш, хорижий кино ишлаб чиқарувчи ташкилот ва киноижодкорлар билан алоқаларни кенгайтириш, миллий кино санъатини халқаро кинофестивалларда намойиш этиш.

3. "Қорақалпоқкино" давлат-акциядорлик компанияси "Қорақалпоқкино" агентлиги этиб ҳамда "Кино-видео" ҳудудий акциядорлик бирлашмалари "Ўзбеккино" Миллий агентлигининг тегишли ҳудудий бўлимлари этиб қайта ташкил қилинсин.

4. Белгилаб қўйилсинки:

кино ва видеомаҳсулотларини ишлаб чиқариш, кўпайтириш, дубляж қилиш, сотиш ва прокат бўйича фаолият турларига лицензиялар бериш, уларнинг амал қилишини тугатиш ва бекор қилиш тўғрисидаги қарорлар Республика "Маънавият ва маърифат" Кенгашининг хулосасига биноан Вазирлар Маҳкамаси томонидан қабул қилинади;

"Ўзбеккино" Миллий агентлиги Вазирлар Маҳкамасининг лицензиялаш соҳасидаги ишчи органи вазифасини бажаради.

5. Ўзбекистон Республикаси Президентининг 1996 йил 29 апрелдаги "Ўзбеккино" давлат-акциядорлик компаниясини ташкил этиш тўғрисида"ги ПФ-1427 Фармони ўз кучини йўқотган деб ҳисоблансин.

6. Ўзбекистон Республикаси Вазирлар Маҳкамаси бир ҳафта муддат ичида мазкур Фармонни бажариш юзасидан тегишли қарор қабул қилсин.

Ўзбекистон Республикаси Президенти                     И. Каримов

"Ўзбекистон Республикаси қонун ҳужжатлари тўплами", 2004 йил, 11-сон, 126-модда

"Ўзбекистон Республикаси Олий Мажлисининг Ахборотномаси", 2004 йил, 3-4-сон, 58-модда