ВСЕ ЗАКОНОДАТЕЛЬСТВО УЗБЕКИСТАНА
ЎзР Конунчилиги / Меҳнат ва аҳолининг бандлиги / Аҳоли бандлиги / Аҳоли бандлиги соҳасидаги бошқарув ва назорат /Ўзбекистон Республикаси Вазирлар Маҳкамасининг 11.06.2018 й. 437-сон "Фарғона вилояти Қува тумани аҳолисининг бандлигини таъминлашга доир қўшимча чора-тадбирлар тўғрисида"ги Қарори
Полный текст документа доступен в платной версии. По вопросам звоните на короткий номер 1172
ЎЗБЕКИСТОН РЕСПУБЛИКАСИ
ВАЗИРЛАР МАҲКАМАСИНИНГ
ҚАРОРИ
11.06.2018 й.
N 437
ФАРҒОНА ВИЛОЯТИ ҚУВА ТУМАНИ
АҲОЛИСИНИНГ БАНДЛИГИНИ
ТАЪМИНЛАШГА ДОИР ҚЎШИМЧА
ЧОРА-ТАДБИРЛАР ТЎҒРИСИДА
Ҳудуддаги мавжуд табиий ва меҳнат ресурсларидан тўлиқ ва самарали фойдаланиш, тадбиркорлик фаолиятини жадал ривожлантириш асосида Фарғона вилояти Қува тумани аҳолисининг бандлигини таъминлаш, аҳоли ҳаёти даражаси ва сифатини янада ошириш мақсадида Вазирлар Маҳкамаси ҚАРОР ҚИЛАДИ:
1. Қуйидагилар:
республика ишчи гуруҳи томонидан маҳаллаларни уйма-уй айланиб чиқиш, ижтимоий соҳа объектларига ва ишлаб чиқариш объектларига ташриф буюриш орқали Фарғона вилоятининг Қува туманида амалга оширилаётган ижтимоий-иқтисодий ислоҳотлар комплекс ўрганиб чиқилгани;
Фарғона вилоятининг Қува туманида амалга оширилаётган ижтимоий-иқтисодий ислоҳотларни ўрганиш якунлари бўйича маҳалла, туман ва вилоят даражаларида ҳал этилиши талаб қилинадиган тизимли муаммолар ва камчиликларни бартараф этишга йўналтирилган "йўл хариталари" ишлаб чиқилгани ва тасдиқлангани маълумот учун қабул қилинсин.
2. 2018 йилда Фарғона вилоятининг Қува туманида кафолатли иш ўринлари ташкил этиш ҳамда саноат, хизматлар соҳаси ва қишлоқ хўжалигини ривожлантириш лойиҳаларининг манзилли рўйхати иловага мувофиқ тасдиқлансин.
3. Фарғона вилояти ҳокимлиги:
Ўзбекистон Республикаси Инвестициялар бўйича давлат қўмитаси, манфаатдор вазирликлар, идоралар ва хўжалик бошқаруви органлари, тижорат банклари, лойиҳаларнинг ташаббускорлари билан биргаликда тасдиқланган манзилли рўйхат параметрлари сўзсиз бажарилишини таъминласин ва бу борада инвестиция лойиҳаларининг ўз вақтида ва сифатли амалга оширилишини, ишлаб чиқаришнинг мўлжалланган ҳажмларига эришиш ва янги иш ўринлари ташкил этилишини назарда тутсин;
муаммоли масалаларни мунтазам равишда кўриб чиқиб, уларни ҳал этиш юзасидан тезкор ва амалий зарур чора-тадбирларни амалга оширган ҳолда, лойиҳалар бажарилиши юзасидан тизимли мониторинг олиб борсин.
4. Ўзбекистон Республикаси Инвестициялар бўйича давлат қўмитасига Фарғона вилояти ҳокимлиги ва хизмат кўрсатувчи банклари билан келишган ҳолда, лойиҳанинг қийматини ва иш ўринлари сонини сақлаб қолиш шарти билан лойиҳаларнинг тасдиқланган манзилли рўйхатига, заруратга кўра, қўшимча ва ўзгартиришлар киритиш ҳуқуқи берилсин.
5. Ўзбекистон Республикаси Бандлик ва меҳнат муносабатлари вазирлиги Фарғона вилояти ҳокимлиги билан биргаликда Қува тумани секторлари ва маҳаллалари бўйича 2018-2019 йилларда ҳақ тўланадиган жамоат ишларини, банд бўлмаган аҳолини касбга қайта тайёрлашни ташкил этиш бўйича манзилли дастурни бир ой муддатда тасдиқласин.
6. Фарғона вилояти ҳокимлиги, Ўзбекистон Республикаси Иқтисодиёт вазирлиги, Молия вазирлиги, Хусусийлаштирилган корхоналарга кўмаклашиш ва рақобатни ривожлантириш давлат қўмитасининг Фарғона вилояти Қува туманидаги Сирдарё-Сўх ирригация тизимлари ҳавза бошқармасининг жами ҳудуди 5,05 гектар бўлган "Исфайрам-Шоҳимардон" ирригация тизими бошқармасининг бинолари ва иншоотлари негизида кичик саноат зонаси ташкил этиш тўғрисидаги таклифига розилик берилсин.
7. Белгилансинки:
кичик саноат зонаси ҳудудидаги кўчмас давлат мулки, кейинчалик бизнес-режаларни бажариш, иш ўринлари яратиш ва сақлаб қолиш, барча солиқлар ва бошқа мажбурий тўловлар ўз вақтида тўланиши шарти билан, мулкчилик ҳуқуқи берилган ҳолда тадбиркорлик субъектларига узоқ муддатли 10 йилга ижарага берилади;
кичик саноат зонаси ҳудудидаги кўчмас давлат мулкидан ижара даврида фойдаланиш учун ижарага олинган майдонда амалга ошириладиган фаолият туридан келиб чиққан ҳолда ортиб борадиган коэффициентни қўлламасдан ижара тўловининг энг кам ставкаси белгиланади;
кичик саноат зонаси иштирокчиларига инвестиция лойиҳаларини амалга ошириш учун ер участкалари бериш тўғрисидаги қарорлар Ўзбекистон Республикаси Президентининг "Эркин иқтисодий зоналар ва кичик саноат зоналари фаолияти самарадорлигини ошириш борасидаги қўшимча чора-тадбирлар тўғрисида" 2017 йил 25 октябрдаги ПҚ-3356-сон қарорига мувофиқ ташкил этилган Фарғона вилояти Эркин иқтисодий зоналар ва кичик саноат зоналари маъмурий кенгаши томонидан қабул қилинади.
8. Фарғона вилояти Эркин иқтисодий зоналар ва кичик саноат зоналари маъмурий кенгаши бир ой муддатда кичик саноат зонаси дирекциясини ташкил этиш чораларини кўрсин.
9. Фарғона вилояти ҳокимлиги, Ўзбекистон Республикаси Ер ресурслари, геодезия, картография ва давлат кадастри давлат қўмитаси замонавий ишлаб чиқаришлар ва янги иш ўринлари ташкил этиш мақсадида Фарғона вилоятининг Қува туманидаги фойдаланилмаётган ер участкаларини кейинчалик тадбиркорлик субъектларига ва салоҳиятли инвесторларга бериш учун уч ой муддатда хатловдан ўтказсин ва белгиланган тартибда ажратсин.
10. Фарғона вилояти ҳокимлиги, тегишли секторлар раҳбарлари Фарғона вилоятининг Қува туманида амалга оширилаётган ижтимоий-иқтисодий ислоҳотларни комплекс ўрганиш якунлари бўйича тасдиқланган "йўл хариталарининг" сўзсиз бажарилиши юзасидан амалий назоратни таъминласинлар.
11. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари - "Ўзбекистон темир йўллари" АЖ бошқаруви раиси А.Ж. Раматов, Ўзбекистон Республикаси Бош вазирининг ўринбосари - молия вазири Ж.А. Қўчқоров ва Фарғона вилояти ҳокими Ш.М. Ғаниев зиммасига юклансин.
Ўзбекистон Республикасининг Бош вазири А. Арипов
2018 йил 11 июндаги
437-сон қарорига
ИЛОВА
2018 йилда Фарғона вилоятининг Қува туманида
кафолатли иш ўринлари ташкил этиш ҳамда саноат,
хизматлар соҳаси ва қишлоқ хўжалигини
ривожлантириш лойиҳаларининг
МАНЗИЛЛИ РЎЙХАТИ
Қонун ҳужжатлари маълумотлари миллий базаси (www.lex.uz),
2018 йил 12 июнь