Ўзбекистон Республикаси Вазирлар Маҳкамасининг 02.08.2018 й. 613-сон "Ғўза парваришида юзага келган мураккаб вазиятнинг салбий оқибатларини бартараф этиш ҳамда ҳосилга ҳосил қўшишга доир қўшимча чора-тадбирлар тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

02.08.2018 й.

N 613

ҒЎЗА ПАРВАРИШИДА ЮЗАГА

КЕЛГАН МУРАККАБ ВАЗИЯТНИНГ

САЛБИЙ ОҚИБАТЛАРИНИ БАРТАРАФ

ЭТИШ ҲАМДА ҲОСИЛГА ҲОСИЛ ҚЎШИШГА

ДОИР ҚЎШИМЧА ЧОРА-ТАДБИРЛАР ТЎҒРИСИДА

Жорий йилда ғўза вегетациясининг бошланғич даврида об-ҳавонинг қуруқ ва салқин келиши ғўза парваришида ўта мураккаб вазиятни юзага келтирди ва республикада ғўзанинг ривожи 10-12 кунга, баъзи жойларда 12-14 кунга кечикди.

Жумладан, Қорақалпоғистон Республикаси ва Хоразм вилоятида ғўзанинг ривожи ўртача 8-10 кунга, Сурхондарё, Қашқадарё ва Бухоро вилоятларида 10-12 кунга, Андижон, Фарғона, Наманган, Тошкент, Жиззах, Сирдарё, Самарқанд ва Навоий вилоятларида 10-14 кунга орқада қолмоқда.

Қашқадарё, Сурхондарё, Самарқанд ва Бухоро вилоятларида баҳор ойларида тупроқдаги табиий намнинг етарли бўлмаганлиги сабабли 89 минг гектар пахта майдонида чигит суви берилиб, ушбу майдонларда гектарига ўртача 50-60 минг туп кўчат олинган.

Шу билан бирга, агротехник тадбирларни муддатида амалга оширилмаганлиги оқибатида қуйидаги ҳолатлар кузатилмоқда:

биринчидан, ривождан орқада қолган майдонларга қўшимча агротехник тадбирлар культивация, чуқур юмшатиш ишлари ўтказилмаганлиги оқибатида қолоқ майдонлар Қорақалпоғистон Республикасида 39 минг гектарни, Қашқадарё вилоятида 24 минг гектарни, Жиззах вилоятида 23 минг гектарни, Самарқанд вилоятида 22 минг гектарни, Тошкент вилоятида 13 минг гектарни, Бухоро ва Сирдарё вилоятларида 12 минг гектарни ташкил этмоқда;

иккинчидан, Қорақалпоғистон Республикаси, Жиззах, Қашқадарё, Наманган, Сурхондарё, Самарқанд, Сирдарё, Тошкент, Фарғона ва Хоразм вилоятларида иккинчи суғориш ўтказилмаганлиги сабабли ғўза майдонлари чанқатиб қўйилган. Хусусан, Ангор, Бекобод, Боғдод, Бувайда, Данғара, Зарбдор, Зафаробод, Каттақўрғон, Кегейли, Косон, Косонсой, Миришкор, Музработ, Оқдарё, Оққўрғон, Пайариқ, Пастдарғом, Пахтачи, Поп, Тахтакўпир, Ҳозарасп, Чимбой, Чиноз, Чуст, Қамаши, Қизириқ, Қўшкўпир, Ғузор, Шароф Рашидов, Шеробод ва Шовот туманларида чанқаган ғўза майдонлари 30-35 фоизни ташкил этади;

учинчидан, ғўза зараркунандаларига қарши кураш ишлари тизимли ташкил этилмаганлиги сабабли Фарғона, Наманган ва Тошкент вилоятларида 23 минг гектар майдонга кўсак қурти, Сурхондарё вилоятида 24 минг гектар майдонга беда қандаласи ғўза ҳосилига сезиларли даражада зарар етказган.

Бундан ташқари, Ангор, Боёвут, Боғдод, Бўз, Жарқўрғон, Мирзачўл, Норин, Олтиариқ, Оқдарё, Оқолтин, Риштон, Ромитон, Улуғнор, Учкўприк, Учқўрғон, Хатирчи, Қумқўрғон, Ғиждувон ва Шўрчи туманларида ғўза майдонлари ўргимчаккана билан зарарланишига йўл қўйилган.

Республикада ғўза парваришида юзага келган фавқулодда ҳолатнинг салбий оқибатларини бартараф этиш, ривожланишда орқада қолган майдонларда қўшимча агротехник тадбирларни амалга ошириш бўйича 2018 йил 31 июль куни Ўзбекистон Республикаси Президенти Ш.М. Мирзиёев ҳузурида ўтказилган видеоселектор йиғилишида берилган топшириқлар ижросини таъминлаш мақсадида Вазирлар Маҳкамаси ҚАРОР ҚИЛАДИ:

1. Қорақалпоғистон Республикаси Вазирлар Кенгаши Раиси ва вилоятлар ҳокимларига, айниқса, Қашқадарё, Самарқанд ва Сурхондарё вилоятларининг 4 та сектор раҳбарларига ғўза парваришида агротехник тадбирларни белгиланган муддатларда ўтказиш, шунингдек, ривожланишда орқада қолган майдонларда қўшимча агротехник тадбирларни белгилаш ва амалга оширишда жиддий хато ва камчиликларга йўл қўйганлиги кўрсатиб ўтилсин.

2. Ўзбекистон Республикаси Қишлоқ хўжалиги вазирлиги, Сув хўжалиги вазирлиги манфаатдор вазирликлар ва идоралар Қашқадарё, Самарқанд ва Сурхондарё вилоятлари ҳокимликлари билан биргаликда икки кун муддатда Вазирлар Маҳкамасига мазкур вилоятларда ғўза парваришида йўл қўйилган жиддий хато ва камчиликларни бартараф этишга ҳамда август ойида муҳим агротехник тадбирларни амалга оширишга қаратилган Ҳукумат қарори лойиҳаларини киритсин.

3. Ғўза парваришида жиддий хато ва камчиликларга йўл қўйганлиги, мавсум давомида хотиржамликка берилиб, агротехник тадбирларни белгиланган муддатда тўғри ташкил этмаганлиги, ўз хизмат вазифаларига совуққонлик билан қараганлиги сабабли Зарбдор (туман ҳокими Н. Қўшбоқов, туман прокурори Ғ. Санақулов, туман ички ишлар бўлими бошлиғи О. Шерқулов, туман давлат солиқ инспекцияси бошлиғи М. Саидқулов), Ғузор (туман ҳокими О. Боймиров, туман прокурори С. Нурматов, туман ички ишлар бўлими бошлиғи К. Искандаров, туман давлат солиқ инспекцияси бошлиғи З. Ибрагимов), Боғдод (туман ҳокими С. Зокиров, туман прокурори О. Собиров, туман ички ишлар бўлими бошлиғи А. Сотиболдиев, туман давлат солиқ инспекцияси бошлиғи Ғ. Юсупов), Уйчи (туман ҳокими А. Турдиев, туман прокурори Б. Абдурахимов, туман ички ишлар бўлими бошлиғи Р. Усубжонов, туман давлат солиқ инспекцияси бошлиғи Р. Атаханов) туманларининг 4 та сектор раҳбарлари эгаллаб турган лавозимидан озод этилганлиги маълумот учун қабул қилинсин.

4. Ғўза парваришида юзага келган фавқулодда вазиятнинг салбий оқибатларини бартараф этишга қаратилган агротехник тадбирлар ўз вақтида ва сифатли амалга оширилишини тизимли ташкил қилиш асосида кафолатланган пахта ҳосилини яратиш мақсадида жорий йилнинг 5 сентябрига қадар республикада "Ғўза парваришида зарбдор 40 кунлик" эълон қилинсин.

5. Ўзбекистон Республикаси Бош вазирининг ўринбосари 3.Т. Мирзаев, Ўзбекистон Республикаси Бош прокуратураси (Самадов), Ички ишлар вазирлиги (Бобожонов), Давлат солиқ қўмитаси (Мусаев), Қорақалпоғистон Республикаси Вазирлар Кенгаши ва вилоятлар ҳокимликлари 4 та сектор раҳбарлари, фермерлар, сувчилар ва механизаторларнинг 2018 йил 5 сентябрга қадар доимий равишда далада бўлишини таъминлаган ҳолда "Ғўза парваришида зарбдор 40 кунлик"да:

ғўзани 5 маротаба (август ойида 4 маротаба, сентябрь ойида 1 маротаба) культивация қилиш;

ўсимликнинг ўсишини бошқарувчи ва қўшимча ҳосил олишни таъминловчи биостимуляторлар билан камида 2 марта ишлов бериш;

ғўза зараркунандаларига қарши биомаҳсулотларни далага чиқариш, ўргимчаккана, кўсак қурти ва беда қандаласи тушган майдонларда кимёвий ишлов ўтказиш;

ғўзани камида икки марта фақат шарбат усулида суғоришни ташкил қилиш, тунги суғориш ишларини алоҳида назоратга олиш;

жорий йилнинг 10 августига қадар барча ҳудудларда ғўзани чеканка қилиш ишлари сифатли ўтказилишини ташкил этсинлар.

6. Ўзбекистон Республикаси Бош вазирининг ўринбосарлари З.Т. Мирзаев ва А.С. Султанов, "Ўзкимёсаноат", "Ўзагрокимёҳимоя" ва "Ўзбекистон товар хомашё биржаси" акциядорлик жамиятлари Самарқанд вилоятига 6 минг тонна, Бухоро вилоятига 3 минг тонна, Қашқадарё ва Сурхондарё вилоятларига 4 минг тоннадан, Қорақалпоғистон Республикасига 5,5 минг тонна, жами 22,5 минг тонна азотли минерал ўғитларни тўрт кун муддатда етказиб берилишини таъминласин.

Самарқанд, Бухоро, Қашқадарё, Сурхондарё вилоятлари ҳокимлари ва Қорақалпоғистон Республикаси Вазирлар Кенгаши Раиси етказиб берилган минерал ўғитлар билан 128 минг гектар ривожланишдан орқада қолган ғўза майдонларини қўшимча озиқлантириш ишлари 5 кун муддатда якунланишини таъминласинлар.

7. Ўзбекистон Республикаси Ички ишлар вазирлиги Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда "Механизаторлар уйлари"га бириктирилган ички ишлар ходимларининг масъулиятини оширган ҳолда "Ғўза парваришида зарбдор 40 кунлик"да механизаторларнинг доимий равишда далада бўлишини, ишни ҳар куни "топшириқ-ҳисобот" тизими асосида самарали ташкил этилишини таъминласин.

Қорақалпоғистон Республикаси Вазирлар Кенгаши Раиси, вилоятлар ва туманлар ҳокимлари "механизаторлар уйлари"да механизаторлар учун ётоқ жой, иссиқ овқат ва бошқа зарур шароитларни яратиш учун масъул этиб белгилансин.

8. "Ўзагрокимёҳимоя" акциядорлик жамияти, Ўзбекистон Республикаси Ички ишлар вазирлиги Йўл ҳаракати хавфсизлиги бош бошқармаси Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда мавжуд ОВХ агрегатлари ва қўл аппаратларини отрядларга бириктирган ҳолда, биринчи навбатда ғўза зараркунандалари ўчоғи бўлган майдонларга кимёвий ишлов беришни, шунингдек, август ойида ғўза майдонларига икки марта тўлиқ биостимуляторлар билан ишлов беришни куннинг кечки пайтида "топшириқ-ҳисобот" тизими асосида ташкил этсин.

Ўзбекистон Республикаси Бош прокуратураси ҳузуридаги Агросаноат мажмуи ва озиқ-овқат хавфсизлиги таъминланиши устидан назорат қилиш инспекциясига "Механизаторлар уйлари"да барча шароитларнинг яратилиши, культиваторлар ва бошқа механизмларнинг "отряд" усулида ишлаши тизимнинг ишлаши устидан тизимли назорат ўрнатиш тавсия этилсин.

9. Ўзбекистон Республикаси Инновацион ривожланиш вазирлиги, Ўзбекистон Фанлар академияси, "Ўзагрокимёҳимоя" акциядорлик жамияти соҳа олимлари ва мутахассисларидан иборат ишчи гуруҳни шакллантирсин ва "Ғўза парваришида зарбдор 40 кунлик"да Сурхондарё вилоятида ғўза зараркунандаларига, айниқса, беда қандаласига қарши курашиш ишларида илмий ёндошув асосида амалий ёрдам бериш учун жорий йил 5 сентябргача хизмат сафарига юборсин.

10. Ўзбекистон Республикаси Сув хўжалиги вазирлиги:

Қашқадарё вилоятидаги юзага келган сув танқислигини юмшатиш мақсадида вазирлик ва унинг тизимидаги ташкилотлар ходимларидан 1000 нафарини ғўзани суғориш ишларига кўмаклашиш учун жалб қилсин;

Қорақалпоғистон Республикаси ва вилоятларда ҳудудий сув хўжалиги ташкилотлари ходимларини ғўзани суғориш учун фермер хўжаликларига номма-ном бириктирсин. Бунда:

мавжуд сув ресурсларини оқилона тақсимлаган ҳолда ғўзани яна икки марта шарбат усулида суғоришга;

етказиб берилган кўчма эгилувчан қувурлардан самарали фойдаланишга, сув таъминоти оғир майдонларни сув билан таъминлашга;

сувчилар учун барча зарур шарт-шароитларни яратишга, навбатлаб суғориш тизими жорий этилишига ва тунги суғоришга алоҳида эътибор қаратилсин.

11. Ўзбекистон Республикаси Бош вазирининг ўринбосари молия вазири Ж.А. Қўчқоров, Ўзбекистон Республикаси Молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси, "Агробанк" акциядорлик тижорат банки "Ғўза парваришида зарбдор 40 кунлик"да механизаторлар, сувчилар ва ишчиларга ҳар 5 кунда иш ҳақи нақд пулда бериб борилишини ташкил этсинлар.

12. Қорақалпоғистон Республикаси ва вилоятларда "Ғўза парваришида зарбдор 40 кунлик"да ғўза парвариши бўйича амалга оширилаётган ишларни ўрганиш ва амалий ёрдам бериш бўйича республика ишчи гуруҳлари таркиби иловага мувофиқ тасдиқлансин.

Республика ишчи гуруҳлари (Мирзаев, Самадов, Юсупов, Вахабов):

Қорақалпоғистон Республикаси ва вилоятларда "Ғўза парваришида зарбдор 40 кунлик"да ғўза парвариши бўйича ушбу қарор билан белгиланган агротехник тадбирлар бажарилиши вертолётлар ёрдамида контурма-контур ўрганилишини ташкил этсин;

ҳар бир ҳудудни ўрганиш натижалари бўйича Ўзбекистон Республикаси Вазирлар Маҳкамасига ёзма ахборот киритиб борсин.

13. Ўзбекистон Республикаси Мудофаа вазирлиги "Ғўза парваришида зарбдор 40 кунлик"да ғўзанинг ҳолатини ўрганиш учун республика ишчи гуруҳларига уларнинг буюртмаларига мувофиқ 4 та вертолёт ажратилишини таъминласин.

Республика ишчи гуруҳлари (Мирзаев, Самадов, Юсупов, Вахабов) учун ажратилган вертолётлар харажати "Ўзпахтасаноат" акциядорлик жамияти ҳамда "Ўздонмаҳсулот" акциядорлик компанияси томонидан тўлаб берилиши тўғрисидаги таклифларига розилик берилсин.

Белгилаб қўйилсинки, вертолётлар учун тўловлар фақатгина ғўзани ҳолатини ўрганишда республика ишчи гуруҳлари билан биргаликда ҳавога кўтарилган вақт давомийлиги учун амалга оширилади.

14. Ўзбекистон миллий телерадиокомпанияси ва Ўзбекистон Миллий ахборот агентлигига "Ғўза парваришида зарбдор 40 кунлик" давомида амалга оширилаётган ишлар, жумладан йўл қўйилаётган хато ва камчиликлар ҳақида махсус кўрсатувлар тайёрлаш ҳамда оммавий ахборот воситаларида ёритиб бориш тавсия этилсин.

15. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари З.Т. Мирзаев, қишлоқ хўжалиги вазири Б.Т. Юсупов ва сув хўжалиги вазири Ш.Р. Хамраев зиммасига юклансин.

Ўзбекистон Республикасининг Бош вазири                               А. Арипов

Вазирлар Маҳкамасининг

2018 йил  2 августдаги

613-сон қарорига

ИЛОВА

Қорақалпоғистон Республикаси ва вилоятларда

"Ғўза парваришида зарбдор 40 кунлик"да ғўза парвариши

бўйича амалга оширилаётган ишларни ўрганиш ва амалий

ёрдам бериш бўйича республика ишчи гуруҳлари

ТАРКИБИ

I ишчи гуруҳ таркиби:

(Тошкент, Сирдарё, Жиззах ва Самарқанд вилоятлари)

II ишчи гуруҳ таркиби:

(Андижон, Наманган ва Фарғона вилоятлари)

III ишчи гуруҳ таркиби:

(Қорақалпоғистон Республикаси, Хоразм ва Навоий вилоятлари)

IV ишчи гуруҳ таркиби:

(Сурхондарё, Қашқадарё ва Бухоро вилоятлари)

Қонун ҳужжатлари маълумотлари миллий базаси (www.lex.uz),

2018 йил 2 август