Ўзбекистон Республикаси Марказий банкининг қимматбаҳо металлардан тайёрланган тангаларини сотиш ва қайтариб харид қилиб олиш тартиби тўғрисидаги Низом (АВ томонидан 20.08.2018 й. 3056-сон билан рўйхатга олинган Марказий банк Бошқарувининг 14.07.2018 й. 24/5-сон қарори билан тасдиқланган)

Функция недоступна

Ўзбекистон Республикаси

Адлия вазирлигида

2018 йил 20 августда 3056-сон

билан рўйхатга олинган

Ўзбекистон Республикаси

Марказий банки Бошқарувининг

2018 йил 14 июлдаги

24/5-сон қарорига

ИЛОВА

Ўзбекистон Республикаси Марказий банкининг

қимматбаҳо металлардан тайёрланган тангаларини

сотиш ва қайтариб харид қилиб олиш

тартиби тўғрисидаги

НИЗОМ

Мазкур Низом Ўзбекистон Республикасининг "Ўзбекистон Республикасининг Марказий банки тўғрисида"ги Қонуни ва Ўзбекистон Республикаси Президентининг 2018 йил 7 июндаги ПҚ-3778-сон "Ўзбекистон Республикасида қимматли металлардан ўлчовли ёмбилар ишлаб чиқаришни ташкил этиш ҳамда қимматли металлар бозори фаолиятини регламентга солиш чора-тадбирлари тўғрисида"ги қарорига мувофиқ Ўзбекистон Республикаси Марказий банкининг қимматбаҳо металлардан тайёрланган тангаларини (бундан буён матнда Марказий банк тангалари деб юритилади) сотиш ва қайтариб харид қилиб олиш тартибини белгилайди.

1-БОБ. УМУМИЙ ҚОИДАЛАР

1. Ўзбекистон Республикаси Марказий банки (бундан буён матнда Марказий банк деб юритилади) томонидан юбилей саналари, тарихий ва замонавий даврнинг муҳим воқеаларига бағишланган қимматбаҳо металлардан тайёрланган тангалар муомалага чиқарилади.

2. Марказий банк тангалари Ўзбекистон Республикаси ҳудудида номинал қиймати бўйича нақд пул шаклидаги қонуний тўлов воситаси, шунингдек номинал қийматидан юқори баҳоланувчи коллекция, инвестиция ва жамғариш объектлари сифатида муомалада бўлиши мумкин.

3. Марказий банк тангаларини сотиш ва қайтариб харид қилиб олиш Марказий банкнинг ҳудудий Бош бошқармалари ва тижорат банклари (бундан буён матнда банк шохобчаси деб юритилади) орқали амалга оширилади.

Марказий банкнинг расмий веб-сайтида Марказий банк тангаларини сотадиган ва қайтариб харид қилиб оладиган банк шохобчаларнинг манзили ҳақидаги маълумотлар эълон қилиниб борилади.

4. Тижорат банклари томонидан Марказий банк тангаларини сотиш ва қайтариб харид қилиб олиш Марказий банк ва тижорат банклари ўртасида тузиладиган шартномалар асосида амалга оширилади.

2-БОБ. МАРКАЗИЙ БАНК

ТАНГАЛАРИНИ СОТИШ

5. Марказий банк тангаларини сотиш жисмоний шахсларга нақд ва нақд пулсиз ҳисоб-китоб шаклида, юридик шахсларга тўловни пул маблағлари ўтказилиши йўли билан амалга оширилади.

6. Қимматбаҳо металл баҳоси ушбу Низомнинг 1-иловасига мувофиқ Лондон қимматбаҳо металлар ассоциациясининг эрталабки фиксинг (белгиланган) нархи ва сўмнинг АҚШ долларига нисбатан Марказий банк курсига мувофиқ ҳисоб-китоблар асосида белгиланади ҳамда Марказий банкнинг расмий веб-сайтида эълон қилади.

7. Марказий банк тангаларининг сотиш нархи ушбу Низомнинг 2-иловасига мувофиқ Марказий банк томонидан ҳар ҳафтада камида бир марта, миллий валютада, қимматбаҳо металл нархи ва Марказий банк Бошқаруви томонидан тасдиқланган маржага асосан белгиланади ҳамда Марказий банкнинг расмий веб-сайтида эълон қилинади.

3-БОБ. МАРКАЗИЙ БАНК ТАНГАЛАРИНИ

ҚАЙТАРИБ ХАРИД ҚИЛИБ ОЛИШ

8. Марказий банк тангаларини қайтариб харид қилиб олиш банк шохобчалари орқали амалга оширилади.

Банк шохобчалари томонидан қайтариб харид қилиб олинган Марказий банк тангалари уларнинг асиллик даражасини аниқлаш мақсадида Марказий банк ҳузуридаги Қимматбаҳо металлар агентлигининг Давлат асиллик даражасини белгилаш палатаси (бундан буён матнда Асиллик палатаси деб юритилади) томонидан техник экспертизадан ўтказилади.

Марказий банк тангаларининг асиллик даражасини аниқлаш мақсадида ўтказиладиган техник экспертиза учун тўлов Марказий банк тангаларининг эгаларидан ундирилмайди.

9. Марказий банк тангасини қайтариб харид қилиб олиш нархи мазкур Низомнинг 3-иловасига мувофиқ Марказий банк тангаси топширилган кундаги қимматбаҳо металл нархидан ва ушбу нархга қўлланиладиган Марказий банк Бошқаруви томонидан тасдиқлаган чегирмага асосан Марказий банк томонидан белгиланади.

10. Марказий банк тангаларини қайтариб харид қилиб олишда жисмоний шахс ёки юридик шахс вакилининг шахсини тасдиқловчи ҳужжати асосида мазкур Низомнинг 4-иловасига мувофиқ Марказий банк тангасини қайтариб харид қилиб олиш тўғрисида далолатнома расмийлаштирилади.

Бунда юридик шахснинг вакили Марказий банк тангасини тасарруф этиш ҳуқуқи борлиги тўғрисидаги ишончномани тақдим этиши керак.

11. Далолатнома уч нусхада тузилади ва улардан бир нусхаси банк шохобчасида, иккинчи нусхаси Марказий банк тангаси эгасида ҳамда учинчи нусхаси техник экспертиза ўтказилиши учун Марказий банк тангаси билан бирга Асиллик палатасига тақдим этилади.

12. Марказий банк тангалари банк шохобчалари томонидан 10 кун давомида техник экспертиза ўтказиш учун Асиллик палатасига юборилиши керак.

13. Асиллик палатаси томонидан 10 кун давомида техник экспертиза ўтказилиб, унинг натижалари ҳақида тузилган далолатнома Марказий банкка тақдим этилади.

14. Марказий банк Асиллик палатасининг техник экспертиза ўтказилганлиги тўғрисидаги далолатномасини олганидан сўнг, Марказий банк тангасини қайтариб харид қилиб олган банк шохобчаси орқали мазкур танга эгаси билан ҳисоб-китобларни 10 кун давомида амалга оширади.

4-БОБ. МАРКАЗИЙ БАНК ТАНГАСИНИНГ

АСИЛЛИК СЕРТИФИКАТИ

15. Марказий банк тангаси унинг техник хусусиятларини тасдиқловчи асиллик сертификати билан бирга муомалага чиқарилади. Асиллик сертификати идентификация серия рақамига эга бўлади.

16. Асиллик сертификати йўқолган ёки яроқсиз ҳолга келган тақдирда Марказий банк тангасининг эгаси банк шохобчасига тўлов асосида янги асиллик сертификатини олиш учун мурожаат қилиши мумкин.

Марказий банк тангаси сертификатининг янгиси берилиши 30 кун давомида Марказий банк тангасини Асиллик палатасида техник экспертизасидан ўтказиш орқали амалга оширилади.

5-БОБ. ЯКУНИЙ ҚОИДА

17. Мазкур Низом талабларининг бузилишида айбдор бўлган шахслар қонун ҳужжатларида белгиланган тартибда жавобгар бўлади.

Низомга

1-ИЛОВА

Қимматбаҳо металл қийматининг

ҲИСОБ-КИТОБИ

1 грамм қимматбаҳо металлнинг баҳоси қуйидаги формула асосида ҳисобланади:

PG/UZS = ((P W / Y) х ECB) вергулдан сўнг икки хонага қадар яхлитланади, бунда:

PG/UZS - бир грамм қимматбаҳо металл учун сўмдаги нарх;

PW - Лондон қимматбаҳо металлар ассоциацияси эрталабки фиксинг нархи (долл./тр.унц.);

Y - бир трой унциясининг метрик граммдаги эквиваленти (1 трой унцияси = 31,1035 грамм);

E CB - 1 АҚШ доллари учун Ўзбекистон Республикаси Марказий банкнинг сўмга нисбатан ўрнатилган курси.

Низомга

2-ИЛОВА

Ўзбекистон Республикаси Марказий

банкининг қимматбаҳо металлардан

тайёрланган тангалари қийматининг

ҲИСОБ-КИТОБИ

Ўзбекистон Республикаси Марказий банкининг қимматбаҳо металлардан тайёрланган тангаларини сотиш нархи қуйидаги формула асосида ҳисобланади:

= Vх PG/UZSх (1+) вергулдан сўнг икки хонага қадар яхлитланади, бунда:

- Ўзбекистон Республикаси Марказий банкининг қимматбаҳо металлардан тайёрланган тангалари учун сўмда тўланадиган қиймат;

V - Ўзбекистон Республикаси Марказий банкининг қимматбаҳо металлардан тайёрланган тангаларининг граммдаги оғирлиги;

PG/UZS - бир грамм қимматбаҳо металл учун сўмдаги нарх;

М - Ўзбекистон Республикаси Марказий банки Бошқаруви томонидан тасдиқланган маржа миқдори (фоизда).

Низомга

3-ИЛОВА

Ўзбекистон Республикаси Марказий

банкининг қимматбаҳо металлардан

тайёрланган тангаларини қайтариб

харид қилиб олиш қийматининг

ҲИСОБ-КИТОБИ

Ўзбекистон Республикаси Марказий банкининг қимматбаҳо металлардан тайёрланган тангаларининг қайтариб харид қилиб олиш нархи қуйидаги формула асосида ҳисобланади:

= Vх PG/UZSх (1-) вергулдан сўнг икки хонага қадар яхлитланади бунда:

- Ўзбекистон Республикаси Марказий банкининг қимматбаҳо металлардан тайёрланган тангалари учун сўмда тўланадиган қиймат;

V - Ўзбекистон Республикаси Марказий банкининг қимматбаҳо металлардан тайёрланган тангаларининг граммдаги оғирлиги;

PG/UZS - бир грамм учун сўмдаги нарх

D - Ўзбекистон Республикаси Марказий банки Бошқаруви томонидан тасдиқланган чегирма миқдори (фоизда).

Низомга

4-ИЛОВА

Ўзбекистон Республикаси Марказий банкининг

қимматбаҳо металлардан тайёрланган тангаларини

қайтариб харид қилиб олиш тўғрисидаги

ДАЛОЛАТНОМА

қуйидаги Ўзбекистон Республикаси Марказий банкининг қимматбаҳо металлардан тайёрланган тангалари қайтариб харид қилиб олиш учун қабул қилинди:

    

юқорида кўрсатилган рўйхатни тасдиқлайман ва Ўзбекистон Республикаси Марказий банки ҳузуридаги Қимматбаҳо металлар агентлигининг Давлат асиллик даражасини белгилаш палатаси томонидан техник экспертиза ўтказишга розилик бераман.

  

Қонун ҳужжатлари маълумотлари миллий базаси (www.lex.uz),

2018 йил 20 август

"Ўзбекистон Республикаси қонун ҳужжатлари тўплами",

2018 йил 27 август, 34-сон, 699-модда