язык интерфейса

ЎзР Конунчилиги

ЎзР Конунчилиги/ Базада янги/ Сентябрь, 2018 й./ Таълим тўғрисида/ Ўзбекистон Республикаси Президентининг 05.09.2018 й. ПҚ-3931-сон "Халқ таълими тизимига бошқарувнинг янги тамойилларини жорий этиш чора-тадбирлари тўғрисида"ги Қарори

Вы можете получить доступ на один день к продукту Законодательство Руз.

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

05.09.2018 й.

N ПҚ-3931



ХАЛҚ ТАЪЛИМИ ТИЗИМИГА

БОШҚАРУВНИНГ ЯНГИ ТАМОЙИЛЛАРИНИ

ЖОРИЙ ЭТИШ ЧОРА-ТАДБИРЛАРИ ТЎҒРИСИДА



Ўзбекистон Республикаси Президентининг 2018 йил 5 сентябрдаги "Халқ таълими бошқарув тизимини такомиллаштириш бўйича қўшимча чора-тадбирлар тўғрисида"ги ПФ-5538-сон Фармонига мувофиқ:


1. 2018 йил 1 ноябрдан бошлаб қуйидагилар Ўзбекистон Республикаси Халқ таълими вазирлигининг (кейинги ўринларда Вазирлик деб юритилади) идоравий бўйсунувига ўтказилсин:

олий таълим муассасалари ҳузуридаги халқ таълими ходимларини қайта тайёрлаш ва уларнинг малакасини ошириш бўйича ҳудудий марказлар;

Ўзбекистон Республикаси Молия вазирлиги ҳузуридаги бюджетдан ташқари Республика мақсадли китоб жамғармаси.


2. Вазирликнинг Қорақалпоғистон Республикаси Халқ таълими вазирлиги, вилоятлар халқ таълими бошқармалари ва Тошкент шаҳар халқ таълими бош бошқармасининг методик хизмат бўлимларини, шунингдек, туман (шаҳар) халқ таълими бўлимларининг ўқув-тарбия жараёнини методик таъминлаш шўъбаларини тугатиш тўғрисидаги таклифига розилик берилсин.


3. Қуйидагилар ташкил этилсин:

а) халқ таълими ходимларини қайта тайёрлаш ва уларнинг малакасини ошириш бўйича ҳудудий марказлар тузилмасида методик хизмат бўлимлари;

б) Қорақалпоғистон Республикаси Халқ таълими вазирлиги, вилоятлар халқ таълими бошқармалари ва Тошкент шаҳар халқ таълими бош бошқармаси ҳузурида юридик шахс мақомисиз туманлараро умумтаълим муассасаларини методик таъминлаш марказлари;

в) Вазирликнинг марказий аппарати таркибида вазирнинг Назорат-ҳуқуқий хизмати, қуйидагилар унинг асосий вазифалари этиб белгилансин:

давлат органлари ва бошқа ташкилотларнинг халқ таълими муассасалари фаолиятига асоссиз аралашувига, педагог кадрларнинг шаъни ва қадр-қиммати камситилишига, уларнинг меҳнатга мажбурланишига, таълим-тарбия жараёнига тўсқинлик қилишнинг ҳар қандай шаклларига, ўқитувчи ва ўқувчиларнинг ҳуқуқлари бузилишига йўл қўймаслик бўйича қонун ҳужжатларида назарда тутилган чораларни кўриш;

халқ таълими муассасаларида ички назоратни амалга ошириш, коррупцияга оид ҳуқуқбузарликлар ва бошқа қонунга хилоф ҳаракатлар содир этилишининг, шунингдек, Вазирлик тизими ходимлари томонидан касбга оид одоб-ахлоқ қоидалари бузилишининг олдини олиш ва профилактика қилиш.


4. Вазирлик ҳузурида қуйидагилар тузилсин:

а) давлат унитар корхонаси шаклидаги Халқ таълими соҳасида лойиҳа ҳужжатларига техник топшириқларни ишлаб чиқиш ва қурилиш объектлари сифатини мониторинг қилиш бўйича инжиниринг компанияси.

Белгилаб қўйилсинки:

"Халқ таълими соҳасида лойиҳа ҳужжатларига техник топшириқларни ишлаб чиқиш ва қурилиш объектлари сифатини мониторинг қилиш бўйича инжиниринг компанияси" ДУК ишлар ва хизматларнинг ягона етказиб берувчиси ҳисобланади, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузуридаги ягона буюртмачи хизматлари у билан лойиҳа ҳужжатларига техник топшириқларни ишлаб чиқиш ва қурилиш объектлари сифатини мониторинг қилиш бўйича тўғридан-тўғри шартномалар тузади, ушбу шартномалар махсус ахборот порталида рўйхатдан ўтказилиши шарт;

манзилли рўйхатларга киритилган давлат умумий ўрта таълим муассасаларини (кейинги ўринларда - умумтаълим муассасалари) қуриш, реконструкция қилиш ва капитал таъмирлаш қийматидан ажратмалар "Халқ таълими соҳасида лойиҳа ҳужжатларига техник топшириқларни ишлаб чиқиш ва қурилиш объектлари сифатини мониторинг қилиш бўйича инжиниринг компанияси" ДУКнинг даромад манбалари ҳисобланади;

б) юридик шахс мақомисиз Халқ таълими соҳасидаги ислоҳотларга кўмаклашиш жамғармаси (кейинги ўринларда - Кўмаклашиш жамғармаси).

Қуйидагилар Кўмаклашиш жамғармаси маблағларини шакллантириш манбалари этиб белгилансин:

Ўзбекистон Республикаси Давлат бюджетидан ҳар йили, шу жумладан 2018 йил сентябрь ойида, 100 миллиард сўм миқдорида ажратиладиган маблағлар;

муассиси Вазирлик ҳисобланган корхоналар ихтиёрида солиқлар ва бошқа мажбурий тўловлар тўланганидан кейин қоладиган соф фойда;

умумтаълим муассасаларининг мол-мулкини сотишдан тушган маблағларнинг 100 фоизи;

халқ таълими муассасалари фаолиятини текшириш натижалари бўйича Вазирликнинг ички аудит хизматлари томонидан аниқланган ва Ўзбекистон Республикаси Давлат бюджети, давлат мақсадли жамғармалари ва бюджетдан ташқари жамғармалар даромадига ундирилган ноқонуний сарфланган бюджет маблағларининг, талон-торож, растраталар, камомадлар суммаларининг 50 фоизи;

халқ таълими ходимларини қайта тайёрлаш ва уларнинг малакасини ошириш бўйича ҳудудий марказлар томонидан ташкил этилган халқ таълими тизими ходимларини қайта тайёрлаш курсларида ўқитишдан тушадиган маблағларнинг 5 фоизи;

халқ таълими муассасаларининг бюджетдан ташқари жамғармаларига тушадиган маблағларнинг 5 фоизи;

Кўмаклашиш жамғармасининг вақтинча бўш маблағларини жойлаштиришдан олинадиган даромадлар;

давлат-хусусий шериклик лойиҳаларини амалга оширишдан, шунингдек, Вазирликнинг ҳудудий бўлинмалари ва идоравий бўйсунувидаги ташкилотлар томонидан умумий ўрта ва мактабдан ташқари таълим соҳасида нодавлат хизматларни кўрсатиш билан шуғулланувчи юридик шахсларга (кейинги ўринларда - нодавлат умумтаълим ташкилоти) кўрсатиладиган пулли хизматлардан олинадиган даромадларнинг бир қисми;

юридик ва жисмоний шахсларнинг, шу жумладан Ўзбекистон Республикаси норезидентларининг ҳомийлик хайриялари;

халқаро молия ташкилотлари ва хорижий давлатларнинг грантлари ва техник кўмаклашиш маблағлари;

қонун ҳужжатлари билан тақиқланмаган бошқа маблағлар.

Белгилаб қўйилсинки, Кўмаклашиш жамғармасининг маблағлари қуйидаги мақсадларга сарфланади:

Вазирлик, унинг ҳудудий бўлинмалари ва идоравий бўйсунувидаги ташкилотлар ходимларига устамалар, мукофотлар ва бошқа рағбатлантирувчи тўловлар тўлаш;

фуқаролик-ҳуқуқий шартномалар асосида юқори малакали мутахассисларни, шу жумладан хорижий экспертлар ва хорижда яшайдиган ватандошларни Вазирликда ишлаш учун жалб этиш;

Вазирлик, унинг ҳудудий бўлинмалари ва идоравий бўйсунувидаги ташкилотлар балансидаги бино ва иншоотларни сақлаш, улардан фойдаланиш, уларни қуриш ва таъмирлаш, зарур анжомлар, шу жумладан мебель, алоқа, компьютерлар ва бошқа воситалар билан таъминлаш бўйича харажатларни молиялаштириш;

Вазирлик ходимларини, шу жумладан хорижий давлатларнинг илмий-тадқиқот, таълим ва бошқа муассасаларида ўқитиш, малакасини ошириш ва стажировкадан ўтказиш;

Вазирлик, унинг ҳудудий бўлинмалари ва идоравий бўйсунувидаги ташкилотлар фаолиятига замонавий ахборот-коммуникация технологияларини жорий этиш;

Вазирлик ходимларига мамлакатда ва хориждаги хизмат сафарлари харажатларини тўлаб бериш;

Вазирлик фаолиятини такомиллаштиришга қаратилган бошқа тадбирлар;

в) 2019 йил 1 январдан бошлаб юридик шахс мақомига эга Халқ таълимини ривожлантириш жамғармаси (кейинги ўринларда - Ривожлантириш жамғармаси).

Қуйидагилар Ривожлантириш жамғармаси маблағларини шакллантириш манбалари этиб белгилансин:

Ўзбекистон Республикаси Давлат бюджети параметрларида умумий ўрта ва мактабдан ташқари таълим соҳасини молиялаштириш учун ҳар йили назарда тутиладиган маблағларнинг камида 6 фоизи;

Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари маблағлари;

жисмоний ва юридик шахсларнинг, шу жумладан Ўзбекистон Республикаси норезидентларининг ҳомийлик хайриялари;

халқаро молия ташкилотлари ва хорижий давлатларнинг грантлари ва техник кўмаклашиш маблағлари;

Ривожлантириш жамғармасининг вақтинча бўш маблағларини жойлаштиришдан тушадиган даромадлар ва қонун ҳужжатларида тақиқланмаган бошқа тушумлар.

Белгилансинки, Ривожлантириш жамғармасининг маблағлари қуйидаги мақсадларга сарфланади:

умумтаълим муассасаларини қуриш, реконструкция қилиш ва капитал таъмирлаш, шу жумладан зарурат бўлганда ўқув корпусларини ўқув устахоналари ва лабораториялар ташкил этган ҳолда кенгайтириш, спорт заллари ва майдончаларини ҳамда бошқа инфратузилма объектларини барпо этиш бўйича ишларни молиялаштириш;

замонавий талабларни ҳисобга олган ҳолда ва тасдиқланган нормативлардан келиб чиқиб, умумтаълим муассасаларини энг янги ўқув-лаборатория, илмий ва ишлаб чиқариш ускуналари, мусиқа асбоблари, спорт ускуналари ва анжомлари, компьютер техникаси ҳамда ўқув ахборот-коммуникация технологияларининг бошқа элементлари, шунингдек, ўқув мебели ва анжомлари билан жиҳозлашни (қўшимча жиҳозлашни) молиялаштириш;

унинг ижроия дирекциясини Вазирлик томонидан тасдиқланадиган йиллик харажатлар сметасига мувофиқ таъминлаш.


5. Белгилаб қўйилсинки:

2019 йил 1 январдан бошлаб Ўзбекистон Республикаси Давлат бюджети маблағлари Кўмаклашиш жамғармасига истеъмол нархларининг тегишли йилдаги прогноз индексига тенг коэффициентни қўллаган ҳолда ажратилади;

2018-2020 йилларда Кўмаклашиш жамғармаси маблағларининг камида 50 фоизи халқ таълими тизимини ва умумтаълим муассасаларида ўқув жараёнини рақамлаштириш бўйича харажатларни қоплашга йўналтирилади;

Ўзбекистон Республикаси Давлат бюджетининг халқ таълими муассасаларини молиялаштириш учун назарда тутилган охиригача фойдаланилмай қолган бюджет маблағлари ҳисобига шакллантирилган қўшимча манбалари умумтаълим муассасаларини ривожлантириш бўйича тадбирларни амалга оширишга йўналтирилади;

штат бирликларини қисқартириш, замонавий ахборот-коммуникация технологияларини жорий этиш ва бошқа харажатларни оптималлаштириш ҳисобидан бўшатилган маблағлардан фақат Вазирлик томонидан фойдаланилади;

2020 йил 1 январдан бошлаб халқ таълими муассасаларини қуриш, реконструкция қилиш, капитал ва жорий таъмирлаш, уларга туташ ҳудудларни ободонлаштиришда буюртмачи функцияси "Халқ таълими соҳасида лойиҳа ҳужжатларига техник топшириқларни ишлаб чиқиш ва қурилиш объектлари сифатини мониторинг қилиш бўйича инжиниринг компанияси" ДУКнинг ҳудудий бўлинмаларига ўтади.


6. Вазирлик ҳузуридаги Мультимедиа умумтаълим дастурларини ривожлантириш марказининг номи Халқ таълими соҳасида ахборот-коммуникация технологияларини ривожлантириш маркази деб ўзгартирилсин, Вазирликка, унинг ҳудудий бўлинмалари ва идоравий бўйсунувидаги ташкилотларга ҳамда умумтаълим муассасаларига Марказ билан тўғридан-тўғри шартномалар тузиш ҳуқуқи берилсин, ушбу шартномалар махсус ахборот порталида рўйхатдан ўтказилсин.


7. Қуйидагилар Вазирликнинг асосий вазифалари этиб белгилансин:

умумий ўрта ва мактабдан ташқари таълим соҳасида ягона давлат сиёсатини ишлаб чиқиш ва амалга ошириш, ўқувчиларнинг маънавий-ахлоқий, интеллектуал ва жисмоний ривожланиши даражасини янада ошириш;

умумий ўрта таълимнинг давлат таълим стандартларига ва мактабдан ташқари таълимга қўйиладиган давлат талабларига мувофиқ умумтаълим муассасалари фаолиятига методик раҳбарлик қилиш;

ўқитувчи касбининг мақоми ва обрўсини ошириш, умумтаълим муассасалари, шунингдек, халқ таълими тизими ходимларини моддий ва ижтимоий қўллаб-қувватлашни таъминлаш, уларнинг самарали ишлаши учун муносиб шарт-шароитлар яратиш;

ўқувчиларнинг ўқув, психологик ва жисмоний юкламаларини оптималлаштиришни ҳисобга олган ҳолда ўқув-тарбия жараёнига таълимнинг инновацион шаклларини, замонавий педагогик ва ахборот технологияларини, касбга йўналтириш, таълим ва тарбиянинг самарали усулларини жорий этиш;

умумтаълим муассасаларида чет тилларини ўқитиш самарадорлигини таъминлашга йўналтирилган комплекс чора-тадбирларни амалга ошириш;

мазмун ва сифат жиҳатидан халқаро талабларга жавоб берадиган, илғор педагогик ва ахборот-коммуникация технологияларини қўллаган ҳолда янгиланган ўқув режалари ва дастурларига мувофиқ ишлаб чиқилган ўқув ва ўқув-методик адабиётларнинг янги авлодини тайёрлаш ва нашр этишни ташкил қилиш;

таълим хизматлари нодавлат секторини янада ривожлантириш, халқ таълими соҳасида давлат-хусусий шериклик учун қулай шарт-шароитлар яратиш;

педагог кадрларни танлаш, тайёрлаш, қайта тайёрлаш ва уларнинг малакасини оширишнинг илғор ва шаффоф ташкилий-ҳуқуқий механизмларини жорий этиш;

Меҳрибонлик уйлари фаолиятини такомиллаштириш, ота-оналар қаровисиз қолган болаларнинг ижтимоий-психологик реабилитациясини ва ҳуқуқий ҳимоясини таъминлаш, уларнинг жамиятга интеграциялашувига кўмаклашиш ва ижтимоий-меҳнат кўникмаларини ривожлантириш;

ривожланишида турли нуқсонлар бўлган ҳамда даволанишга ва соғломлаштиришга муҳтож бўлган болаларнинг ижтимоий кафолатларини таъминловчи чора-тадбирлар самарадорлигини янада ошириш, уларнинг таълим-тарбия (шу жумладан, инклюзив таълим-тарбия) олишига хизмат қиладиган мослашув муҳитини яратиш, имконияти чекланган болалар учун ихтисослаштирилган таълим муассасалари (мактаблар, мактаб-интернатлар) фаолиятини такомиллаштириш;

ўқувчиларни умуминсоний қадриятлар, юксак маънавият, инсонпарварлик руҳида тарбиялаш, уларнинг қалби ва онгига мустақиллик ғояларини янада чуқур сингдириш, миллий менталитетга ёт ғояларга қарши иммунитетни мустаҳкамлаш;

умумий ўрта ва мактабдан ташқари таълим муассасалари томонидан давлат таълим стандартлари ва талаблари бажарилишини тизимли мониторинг қилиш;

умумтаълим мактабларининг 10-11-синф ўқувчиларини касбга ўқитишни таъминлаш бўйича фаолиятни мувофиқлаштириш;

таълим муассасаларининг моддий-техника базасини мустаҳкамлаш, таълим муассасаларида бино ва иншоотлардан самарали фойдаланиш ишларини мувофиқлаштириш ва мониторинг қилиш.


8. Қуйидагилар:

Ўзбекистон Республикаси Халқ таълими вазирлигининг ташкилий тузилмаси 1-иловага* мувофиқ;

Ўзбекистон Республикаси Халқ таълими вазирлиги марказий аппаратининг тузилмаси 2-иловага* мувофиқ тасдиқлансин.


9. Вазирлик тизими бошқарув ходимларининг чекланган сони ўтказилаётган халқ таълими ходимларини қайта тайёрлаш ва уларнинг малакасини ошириш ҳудудий марказлари ходимлари сонини инобатга олмаган ҳолда 2384 нафар, шу жумладан Вазирликнинг марказий аппарати ходимлари сони 140 нафар, шунингдек, ишлаб чиқариш ходимлари сони 3552 нафар этиб белгилансин.

Ўзбекистон Республикаси халқ таълими вазирига:

Вазирлик марказий аппаратининг тасдиқланган тузилмасига бошқарув ходимларининг белгиланган умумий сони доирасида ўзгартиришлар киритиш;

Қорақалпоғистон Республикаси Халқ таълими вазирлиги, вилоятлар халқ таълими бошқармалари, Тошкент шаҳар халқ таълими бош бошқармаси, туман (шаҳар) халқ таълими бўлимлари, бошқа идоравий бўйсунувдаги ташкилотларнинг низомлари ва тузилмаларини, шунингдек, улар бошқарув ходимларининг чекланган сонини тасдиқлаш;

Кўмаклашиш жамғармасининг маблағлари ҳисобидан Вазирлик ва унинг ҳудудий бўлинмалари ва идоравий бўйсунувидаги ташкилотларнинг бошқарув ходимлари штатига қўшимча мутахассис бирликларини киритиш;

педагог кадрларни танлаш, тайёрлаш, қайта тайёрлаш ва уларнинг малакасини ошириш тартибини белгилаш;

умумтаълим муассасаларининг ўқув ва ўқув-методик комплексларини нашр этиш ва етказиб бериш тартибини белгилаш;

Вазирликка юклатилган вазифалар ва функцияларни бажариш доирасида Кўмаклашиш жамғармаси маблағлари ҳисобидан давлат органлари ва ташкилотлари, лойиҳа институтлари, илмий ва олий таълим муассасалари, етакчи халқаро ва хорижий ташкилотларнинг мутахассисларини, шунингдек, уларнинг халқ таълими соҳасидаги экспертларини консультантлар сифатида жалб этиш;

малакали маҳаллий ва хорижий мутахассисларни, хорижда фаолият юритаётган ватандошларни ишга қабул қилиш;

халқ таълими тизимини молиялаштириш учун зарур харажатлар бўйича таклифларни шакллантириш ҳамда, зарур бўлганда, хорижий қарз, грантлар ва бошқа маблағларни жалб этиш тадбирларини амалга ошириш;

Вазирликнинг, унинг ҳудудий бўлинмалари ва идоравий бўйсунувидаги ташкилотларнинг, шунингдек, умумтаълим муассасаларининг кўчмас мулки ва бошқа мулкини самарали бошқаришни ташкил этиш;

идоравий бўйсунувдаги ташкилотлар, шунингдек, умумтаълим ва мактабдан ташқари муассасаларни ташкил этиш тўғрисида қарорлар қабул қилиш ҳуқуқи берилсин.


10. Вазирлик, Ўзбекистон Республикаси Молия вазирлиги, Хусусийлаштирилган корхоналарга кўмаклашиш ва рақобатни ривожлантириш давлат қўмитаси, Савдо-саноат палатаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг халқ таълими тизимида давлат-хусусий шерикликнинг қуйидаги шаклларини жорий этиш тўғрисидаги таклифлари маъқуллансин:

нодавлат умумтаълим ташкилотлари биноларини қуриш учун беғараз асосда доимий фойдаланиш учун ер участкаларини бериш;

мавжуд умумтаълим муассасаларини реконструкция қилиш ва жиҳозлаш шарти билан нодавлат умумтаълим муассасалари объектларини қуриш учун ер участкаларини беғараз бериш;

юкланганлик коэффициенти паст бўлган ёхуд реконструкция қилиш ёки таъмирлашни (қайта жиҳозлашни) талаб этадиган мавжуд умумтаълим муассасаларини ижарага бериш;

концессия асосида қурилиш учун ер участкаси ёки реконструкция қилиш ва жиҳозлаш учун бино ажратиш;

бўш турган давлат мулки объектларини, шу жумладан фаолият кўрсатмаётган умумтаълим муассасаларининг биноларини қонун ҳужжатларида белгиланган тартибда "нол" харид қийматида сотиш;

хусусий шерикнинг мулки негизида ташкил этилган нодавлат умумтаълим ташкилотларини моддий-техник ва молиявий таъминлаш.

Белгилаб қўйилсинки:

халқ таълими соҳасида давлат-хусусий шериклик Ўзбекистон Республикаси Вазирлар Маҳкамаси томонидан белгиланадиган бошқа шаклларда ҳам амалга оширилиши мумкин;

давлат-хусусий шериклик тўғрисидаги келишув Вазирлик томонидан ўтказиладиган танлов натижалари асосида тузилади. Мазкур банднинг еттинчи хатбошисида назарда тутилган ҳолда танлов ўтказилмайди;

хусусий шерик билан давлат-хусусий шериклик тўғрисидаги келишувни давлат томонидан шерик сифатида Вазирлик тузади ва хусусий шерик томонидан келишув шартларининг бажарилишини мониторинг қилади;

умумтаълим ва мактабдан ташқари муассасаларнинг ер участкалари ва кўчмас мулкини Ўзбекистон Республикаси халқ таълими вазири билан келишмасдан бегоналаштириш тақиқланади.


11. Белгилансинки, хусусий шерик зиммасига давлат-хусусий шериклик шаклидан келиб чиққан ҳолда инвестиция мажбуриятларининг қуйидаги турлари юкланиши мумкин:

ижтимоий кўмакка муҳтож оилалардан муайян миқдордаги ўқувчиларни имтиёзли равишда ўқитиш;

ўзига ўтказилаётган умумтаълим муассасаларининг мавжуд ўқувчилар контингентини сифатли ўқитишни таъминлаш;

хусусий шерикка бириктирилган умумтаълим муассасаларини қуриш, реконструкция қилиш, капитал таъмирлаш ва жиҳозлаш ишларини амалга ошириш;

болаларни болалар ёзги соғломлаштириш оромгоҳларига юбориш;

ўқувчиларни замонавий дарсликлар, мактаб формаси, анжомлар ва бошқа мактаб буюмлари билан таъминлаш;

давлат-хусусий шериклик тўғрисидаги келишувда назарда тутиладиган бошқа мажбуриятлар.


12. Давлат-хусусий шериклик тўғрисидаги келишувларнинг амал қилиш муддатлари қуйидагича белгилансин:

нодавлат умумтаълим муассасалари биноларини қуриш учун беғараз асосда доимий фойдаланиш учун ер участкалари берилганда - камида 30 йил;

мавжуд умумтаълим муассасаларини реконструкция қилиш ва жиҳозлаш шарти билан нодавлат умумтаълим муассасалари объектларини қуриш учун ер участкалари беғараз берилганда - камида 20 йил;

юкланганлик коэффициенти паст бўлган ёхуд реконструкция қилиш ёки таъмирлашни (қайта жиҳозлашни) талаб этадиган мавжуд умумтаълим муассасалари ижарага берилганда - камида 30 йил;

концессия асосида қурилиш учун ер участкаси ёки реконструкция қилиш ва жиҳозлаш учун бинолар берилганда - 15 йилгача;

бўш турган давлат мулки объектлари, шу жумладан фаолият кўрсатмаётган умумтаълим муассасаларининг бинолари "нол" харид қийматида сотилганда - камида 30 йил;

умумтаълим муассасаларининг фойдаланилмаётган бинолари (ёки уларнинг бир қисми) хусусий шерикларга мақсадли фойдаланиш учун ижара тўловининг "нол" ставкаси билан ижарага берилганда - 30 йилгача;

хусусий шерикнинг мулки негизида ташкил этилган нодавлат умумтаълим ташкилотлари моддий таъминланганда - камида 10 йил.

Тадбиркорлик субъектларига давлат-хусусий шериклик шартларида берилган объектларда фаолият бошлаган нодавлат умумтаълим ташкилотининг келишувнинг амал қилиш муддати давомида ўз фаолиятини қайта ихтисослаштириши тақиқланади.


13. Ўзбекистон Республикаси Президентининг 2017 йил 15 сентябрдаги "Нодавлат таълим хизматлари кўрсатиш фаолиятини янада ривожлантириш чора-тадбирлари тўғрисида"ги ПҚ-3276-сон қарорида назарда тутилган имтиёзларнинг амал қилиш муддати 2025 йил 1 январга қадар узайтирилсин.

Қуйидагилар:

Ўзбекистон Республикасида ишлаб чиқарилмайдиган, белгиланган тартибда шакллантириладиган рўйхатлар бўйича нодавлат умумтаълим муассасаларини жиҳозлаш ва фаолиятини таъминлаш учун олиб кириладиган замонавий ўқув ва лаборатория ускуналари, компьютер техникаси, дастурий маҳсулотлар, ўқув ва илмий-методик адабиётлар, анжомлар ва моддий-техник ресурслар 2025 йил 1 январга қадар муддатга божхона тўловларидан (божхона расмийлаштируви учун йиғимлар бундан мустасно);

Вазирлик ўқитувчиларнинг ўз касб фаолиятини амалга ошириши чоғида ҳуқуқ ва эркинликлари бузилганлиги тўғрисидаги даъволар бўйича давлат божи тўлашдан озод қилинсин.


14. Ички ишлар вазирлиги Вазирликнинг буюртманомалари бўйича хорижий ўқитувчилар ва мутахассисларга, шунингдек, уларнинг оила аъзоларига белгиланган тартибда кўп марталик визалар берилиши ва узайтирилишини, шунингдек, Ўзбекистон Республикасидаги турар жойи бўйича вақтинча прописка қилиниши ва вақтинча прописка муддати узайтирилишини таъминласин.


15. Бандлик ва меҳнат муносабатлари вазирлиги Вазирликнинг буюртманомаларига мувофиқ республикага хорижий ўқитувчилар ва мутахассисларни жалб этиш учун белгиланган тартибда рухсатнома берилишини (узайтирилишини), шунингдек, ушбу хорижий фуқароларга Ўзбекистон Республикаси ҳудудида меҳнат фаолиятини амалга ошириш ҳуқуқига тасдиқномалар берилишини (узайтирилишини) таъминласин.


16. 2018/2019 ўқув йилидан бошлаб А. Авлоний номидаги Халқ таълими тизими раҳбар ва мутахассис ходимларини қайта тайёрлаш ва малакасини ошириш институтида умумтаълим муассасалари раҳбарларини халқ таълими соҳасида менежерлик кўникмаларини шакллантириш курслари (кейинги ўринларда - курслар) ташкил этилсин.

Вазирлик:

бир ой муддатда курсларни ташкил этиш тартибини тасдиқласин;

умумтаълим муассасалари раҳбарлари халқ таълими тизими раҳбар кадрлари малакасини ошириш учун назарда тутилган маблағлар доирасида босқичма-босқич курсларда ўқитилишини таъминласин.


17. Вазирлик ва Қурилиш вазирлиги 2019 йил 1 мартга қадар муддатда халқ таълими муассасалари бино ва иншоотларининг ҳолатини ялпи хатловдан ва техник кўрикдан ўтказсин ҳамда натижалари бўйича ушбу муассасаларни реконструкция қилиш, капитал таъмирлаш, мебель, инвентарь ва бошқа техника воситалари билан жиҳозлашнинг 2020-2022 йилларга мўлжалланган манзилли дастурини Ўзбекистон Республикаси Вазирлар Маҳкамасига киритсин.

Белгилансинки, умумтаълим муассасаларини қуриш, реконструкция қилиш ва капитал таъмирлашнинг манзилли рўйхатлари ҳар йили Вазирлик томонидан Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда шакллантирилади ҳамда навбатдаги йилги Ўзбекистон Республикасининг ривожланиш давлат дастурларига киритилади.


18. 2018-2021 йилларда Ўзбекистон Республикаси халқ таълими тизимини янада такомиллаштириш бўйича чора-тадбирлар дастури 3-иловага* мувофиқ тасдиқлансин.

Вазирлик ва идоралар раҳбарлари зиммасига чора-тадбирлар дастурида назарда тутилган тадбирлар ўз вақтида ва самарали амалга оширилиши учун шахсий жавобгарлик юклансин.


19. Вазирлик:

а) Олий ва ўрта махсус таълим вазирлиги, Мактабгача таълим вазирлиги, "Ўзбеккино" миллий агентлиги, Ўзбекистон Миллий телерадиокомпанияси, Ўзбекистон матбуот ва ахборот агентлиги билан биргаликда 2018 йил 1 ноябрга қадар муддатда ўқитувчи касбининг нуфузи ва ижтимоий мақомини ошириш бўйича маърифий дастурни ишлаб чиқсин ва тасдиқласин, унда қуйидагилар назарда тутилсин:

Ўзбекистон Миллий телерадиокомпаниясининг "Madaniyat va marifat" телеканалини таълим тизимининг бош ахборот шериги этиб белгилаш;

жамиятда ўқитувчи касбининг нуфузини кенг тарғиб қилиш, ўқувчилар эришаётган ютуқларни оммалаштириш, таълим соҳасидаги долзарб муаммоларни ёритиш, махсус телевизион таълим дастурларини узатиш бўйича тизимли ишларни йўлга қўйиш;

маҳаллий ижро этувчи ҳокимият органлари, вазирлик ва идоралар, шунингдек, таълим муассасалари фаолияти билан боғлиқ бошқа ташкилотлар раҳбарларининг телевидение ва бошқа оммавий ахборот воситаларида мамлакатда амалга оширилаётган кенг кўламли ислоҳотларнинг мазмун-моҳияти ва аҳамиятини тушунтириш юзасидан чиқишларини ташкил этиш;

б) Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси, Ер ресурслари, геодезия, картография ва давлат кадастри давлат қўмитаси билан биргаликда 2019 йил 1 январга қадар муддатда умумтаълим муассасалари мулкини пухта хатловдан ўтказсин ва натижалари бўйича улардан самарали фойдаланиш бўйича "йўл хариталари"ни тасдиқласин;

в) Ўзбекистон Республикаси Бандлик ва меҳнат муносабатлари вазирлиги билан биргаликда уч ой муддатда 2019 йил 1 сентябрдан бошлаб директорлар менежерлик кўникмаларига эга бўлишига доир мажбурий талабни ўз ичига олган директорларни сертификатлаштириш тизимини босқичма-босқич жорий этишни, шунингдек, директор ўринбосарларининг масъулиятини оширишни назарда тутган ҳолда умумтаълим муассасалари раҳбарларига қўйиладиган малака талабларини қайта кўриб чиқсин.


20. Қуйидагиларга:

Ўзбекистон Республикаси Бош вазирининг ўринбосари А.А. Абдуҳакимов зиммасига ушбу қарорга мувофиқ ташкил этилаётган муассасалар ва ташкилотлар фаолияти самарали ва тўлақонли ташкил этилиши, улар ишида юзага келадиган муаммолар ўз вақтида ҳал этилиши учун;

Ўзбекистон Республикаси Бош вазирининг ўринбосари - молия вазири Ж.А. Қўчқоров зиммасига ушбу қарорда назарда тутилган, шу жумладан Вазирликнинг тегишли жамғармаларига ўтказилиши шарт бўлган зарур маблағлар Ўзбекистон Республикаси Давлат бюджетидан ўз вақтида ва тўлиқ ҳажмда ажратилиши учун;

Ўзбекистон Республикаси Бош вазирининг ўринбосари - Ўзбекистон Республикаси Инвестициялар бўйича давлат қўмитаси раиси С.Р. Холмурадов зиммасига халқ таълими тизими муассасаларининг реал эҳтиёжлари 2019 йил ва кейинги йилларда Ўзбекистон Республикасининг ривожлантириш давлат дастурларига тўлиқ киритилиши, халқ таълимини, шу жумладан муваффақиятли халқаро мактаб тармоқларини ривожлантириш учун халқаро грантлар ва хорижий инвестициялар жалб этилиши учун шахсий жавобгарлик юклансин.


21. Молия вазирлиги ушбу қарорни амалга ошириш учун зарур маблағларни 2018 йилда ажратсин, 2019 йилдан бошлаб эса ҳар йили Ўзбекистон Республикаси Давлат бюджети параметрларида назарда тутсин.


22. Ўзбекистон Республикаси Вазирлар Маҳкамаси:

бир ой муддатда Вазирлик тўғрисидаги низомни, шу жумладан унинг раҳбарлари, ходимлари ва бўлинмалари фаолияти самарадорлигини баҳолаш тизимини тасдиқласин;

2018 йил 1 декабрга қадар Ўзбекистон Республикаси Халқ таълими вазирлиги, Мактабгача таълим вазирлиги ҳамда Олий ва ўрта махсус таълим вазирлиги ўртасида узлуксиз таълимни таъминлаш соҳасида идоралараро ҳамкорликнинг самарали ва барқарор механизмини ишлаб чиқсин ва жорий этсин.


23. Қуйидагилар:

Вазирликнинг марказий аппарати Тошкент шаҳар, Шайхонтоҳур тумани, Шайхонтоҳур кўчаси, 3-уйда;

"Халқ таълими соҳасида лойиҳа ҳужжатларига техник топшириқларни ишлаб чиқиш ва қурилиш объектлари сифатини мониторинг қилиш бўйича инжиниринг компанияси" ДУК Тошкент шаҳар, Мирзо Улуғбек тумани, Буюк Ипак йўли кўчаси, 243-уйда жойлаштирилсин.


24. Ўзбекистон Республикаси Президентининг 2017 йил 30 сентябрдаги "Ўзбекистон Республикаси Халқ таълими вазирлиги фаолиятини такомиллаштириш тўғрисида"ги ПҚ-3304-сон қарори ўз кучини йўқотган деб ҳисоблансин.

Республика таълим маркази ҳамда Ўқувчиларни касб-ҳунарга йўналтириш ва психологик-педагогик ташхис республика маркази ходимларига Вазирликнинг тегишли лавозимлари учун назарда тутилган меҳнатга ҳақ тўлаш ва моддий рағбатлантириш шартлари татбиқ этилсин.


25. Вазирлик Адлия вазирлиги, бошқа манфаатдор вазирлик ва идоралар билан биргаликда икки ой муддатда қонун ҳужжатларига ушбу қарордан келиб чиқадиган ўзгартиш ва қўшимчалар тўғрисида Ўзбекистон Республикаси Вазирлар Маҳкамасига таклифлар киритсин.


26. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти Администрацияси Раҳбари З.Ш. Низомиддинов, Ўзбекистон Республикаси Президентининг маслаҳатчиси А.А. Абдуваҳитов, Ўзбекистон Республикаси Президенти маслаҳатчисининг биринчи ўринбосари Б.М. Мавлонов ва Ўзбекистон Республикаси Бош вазирининг ўринбосари А.А. Абдуҳакимов зиммасига юклансин.



Ўзбекистон Республикаси Президенти                             Ш. Мирзиёев



*) Иловалар рус тилидаги матнда берилган.



Қонун ҳужжатлари маълумотлари миллий базаси (www.lex.uz),

2018 йил 6 сентябрь


"Ўзбекистон Республикаси қонун ҳужжатлари тўплами",

2018 йил 10 сентябрь, 36-сон, 728-модда