ВСЕ ЗАКОНОДАТЕЛЬСТВО УЗБЕКИСТАНА

ЎзР Конунчилиги / Соғлиқни сақлаш. Жисмоний тарбия ва спорт. Туризм / Жисмоний тарбия ва спорт / Аҳолининг жисмоний маданияти /

2019-2023 йиллар даврида Ўзбекистон Республикасида жисмоний тарбия ва оммавий спортни ривожлантириш Концепцияси (ЎзР ВМ 13.02.2019 й. 118-сон қарорига 1-илова)

Функция недоступна

Данная функция доступно только для клиентов (пользователей)

Полный текст документа доступен в платной версии. По вопросам звоните на короткий номер 1172

Вазирлар Маҳкамасининг

2019 йил 13 февралдаги

118-сон қарорига

1-ИЛОВА



2019-2023 йиллар даврида Ўзбекистон Республикасида

жисмоний тарбия ва оммавий спортни ривожлантириш

КОНЦЕПЦИЯСИ


Ривожланишнинг барча жиҳатларида глобал рақобат кучайиши шароитларида жаҳондаги ҳар бир мамлакат олдида бугунги кунда инсон капитали сифатини ошириш зарурлиги юзага келади. Бу миллатнинг саломатлигини - барча ёшдаги аҳолининг соғлом дунёқарашини, жисмоний, маънавий-интеллектуал саломатлигини асраш, жисмоний саломатлигини мустаҳкамлаш тўғрисида доимий ғамхўрлик қилиш масалаларига ёндашувларни тубдан қайта кўриб чиқишни талаб этади.

Ўзбекистон Республикасида жисмоний тарбиянинг юқори даражасига ва аҳолининг ҳаёти сифатига эришиш стратегик вазифани - мамлакатни барқарор ривожлантиришни амалда рўёбга чиқариш доирасида муҳим шарт ҳисобланади. Ўзбекистон Республикасини янада ривожлантириш бўйича Ҳаракатлар стратегиясини амалга ошириш доирасида мамлакат аҳолисининг барча қатламлари бутун ҳаёти давомида жисмоний тарбия ва спорт билан мунтазам шуғулланиши учун зарур шарт-шароитларни таъминлаш ушбу вазифани ҳал этишнинг асосий омилларидан бири бўлади.

Жамият олдида турган ўртача ва узоқ муддатли стратегик вазифаларни самарали амалга ошириш учун инсоннинг бутун ҳаёти давомида соғлом турмуш тарзини ҳамда жисмоний тарбия ва оммавий спорт билан узлуксиз шуғулланишнинг фойдасини тарғиб қилишга барча саъй-ҳаракатлар ва ресурсларни биргаликда йўналтириш, ушбу жараёнга барча давлат муассасалари, нодавлат муассасалар ва хўжалик юритувчи субъектларни жалб этишни таъминлаш талаб этилади.

Шу билан бирга, жисмоний тарбия ва оммавий спорт соҳасини тўлиқ кўламда ривожлантириш йўлидан бориб ҳозирги пайтда мамлакатда бунга тўсқинлик қилувчи бир қатор жиддий камчиликлар мавжудлигини англаш муҳимдир. Жумладан:

аҳолини, айниқса, ёшларни жисмоний тарбия ва оммавий спорт билан шуғулланишга кенг жалб этиш, ўсиб келаётган авлодни уйғун равишда маънавий ва жисмоний камол топтиришни таъминлаш учун шарт-шароитларни шакллантириш ишларини ташкил этишнинг паст даражаси, натижада - жисмоний тарбия ва оммавий спорт билан шуғулланишни истовчиларнинг етарлича қамраб олинмаслиги;

жисмоний тарбия ва оммавий спортни ривожлантириш тизимининг қизиқишни қўллаб-қувватлашга, шахснинг профессионал ва амалий кўникмаларига суст йўналтирилганлиги;

соҳада методик таъминлашнинг даражаси етарли эмаслиги, бу аҳолида жисмоний тарбия ва оммавий спорт билан шуғулланишга кучли ва амалий ижобий қизиқишни шакллантириш ва ривожлантиришни давом эттиришда тўсиққа айланмоқда;

олий маълумотли мутахассислар тақчиллиги жисмоний тарбия ва оммавий спорт соҳасида кўрсатилаётган хизматлар сифатини пасайтирибгина қолмасдан, балки уларнинг доирасини торайтиради;

кам комплектли спорт муассасаларининг машғулотлар ва машқлар сифатининг зарур даражасини таъминлаш имконини бермайдиган кадрлар таркиби ва моддий-техник жиҳозланиши салоҳияти паст, спортнинг айрим турлари бўйича спорт кадрлари, тренерлар ва педагог кадрлар етишмайди, бир қатор энг малакали кадрлар, яъни олий ва биринчи тоифали спорт кадрлари, тренерлар ва педагог кадрлар қисқариши тенденцияси кузатилмоқда, ходимларнинг умумий касбий савияси пасаймоқда;

спорт факультетлари талабалари контингентининг сифати ва тузилмаси талаб даражасида эмас. Спорт мутахассислигига кириш учун уларда салоҳият мавжудлигини ва танланган касбда ишлашдан манфаатдорлигини, болалар ва катта ёшдагилар билан умумий тил топиш қобилиятини, руҳий барқарорлик ва муомала қила билишнинг етарли даражасини аниқлаш юзасидан кирувчиларнинг умумий жисмоний тайёргарлигини, руҳий-ҳиссий маълумотларини баҳолашнинг аниқ тартиботлари ва холисона механизмлари мавжуд эмас;

спорт муассасалари тренерлари ва ходимлари учун улар салоҳияти ўсишига нималар тўсқинлик қилаётганлигини билиши керак бўлган мезонлар ва талабларнинг аниқ тавсифи мавжуд бўлган миллий стандартларнинг йўқлиги, бунинг натижасида спорт муассасалари раҳбарларини танлаш ва тайинлашнинг мавжуд тартиботи самарасиз бўлиб қолмоқда;

спорт муассасаларини бошқариш жараёнига ишни режалаштириш ва ташкил этишнинг замонавий инновацион усулларини, илғор ахборот-коммуникация технологияларини жорий этишнинг мавжуд даражаси қабул қилинаётган қарорлар амалга оширилиши ташкил этилишини тезкор таъминлаш ва бир вақтнинг ўзида уларнинг самарадорлигини кузатиш имконини бермайди;

спорт муассасалари айрим раҳбарларида зарур масъулият ва ташаббускорликнинг йўқлиги олдинга қўйилган вазифалар ва мақсадли кўрсаткичлар ўз вақтида ва сифатли бажарилишига салбий таъсир кўрсатмоқда;

спорт муассасалари фаолиятига бевосита раҳбарлик қилувчи ижро этувчи ҳокимият органлари ишининг очиқлиги ва шаффофлигининг даражаси етарли эмаслиги, жамоатчилик назоратининг заифлиги, баъзан эса мутлақо мавжуд эмаслиги ҳаддан ташқари бюрократияга ва коррупциянинг ҳар хил шаклларда намоён бўлишига олиб келмоқда;

спортчиларни ва жисмоний тарбия билан шуғулланувчи шахсларни тиббий хизматдан тўлиқ фойдаланиши ва тиббий хизматнинг зарур сифати амалда таъминланмаган, аҳолини соғломлаштириш учун жисмоний тарбиянинг мавжуд имкониятларидан самарасиз фойдаланилмоқда;

жисмоний тарбия ва оммавий спортни ривожлантириш соҳасига замонавий ахборот технологияларини ва мультимедиа маҳсулотларини жорий этишга зарур даражада эътибор берилмаяпти;

спорт муассасалари бир қисмининг моддий-техника базаси ҳолати, уларнинг ортиқча юкламага эга эканлиги, айрим ҳолларда фаолиятни ташкил этиш учун зарур бўлган тегишли ускуналар, кўргазмали қўлланмалар билан етарлича таъминланмаганлиги уларга юкланган функциялар етарлича самарали бажарилмаслигига олиб келмоқда;

жисмоний тарбия ва оммавий спортни оммалаштириш, шунингдек, соғлом турмуш тарзини тарғиб қилиш соҳасига инновацион технологияларнинг пассив қўлланилиши.

Юқорида санаб ўтилган ва ушбу соҳада йиллар давомида тўпланиб қолган бошқа муаммолар, айрим раҳбарлар тафаккурининг заифлиги ва ташаббус кўрсатмаслиги республикада жисмоний тарбия ва оммавий спорт тизимини замонавий талабларга мувофиқ янада такомиллаштириш йўлида тўсиқ бўлувчи омилларга айланмоқда.

Шу муносабат билан 2019-2023 йиллар даврида Ўзбекистон Республикасида жисмоний тарбия ва оммавий спортни ривожлантиришнинг янги концепциясини шакллантириш алоҳида аҳамият касб этади. Концепция қуйидаги асосий йўналишларни назарда тутади:



1-БОБ. АҲОЛИНИНГ БАРЧА ҚАТЛАМЛАРИНИ,

АЙНИҚСА, ЁШЛАРНИ ЖИСМОНИЙ ТАРБИЯ ВА ОММАВИЙ

СПОРТ БИЛАН КЕНГ ҚАМРАБ ОЛИШНИ ТАЪМИНЛАЙДИГАН

ИННОВАЦИОН ШАКЛЛАР ВА МЕХАНИЗМЛАРНИ ИШЛАБ

ЧИҚИШ ВА ЖОРИЙ ЭТИШНИ ТАШКИЛ ЭТИШ


1. Республика маҳаллалари, туманлари ва минтақалари бўйича тегишли ҳудудларда аҳолининг жинс-ёш таркиби хусусиятларини, ижтимоий-иқтисодий шарт-шароитларни ҳисобга олган ҳолда ўтказиладиган спорт тадбирларининг оммавийлиги ва мунтазамлилигини таъминлаб соғлом турмуш тарзини оммалаштириш, аҳолининг барча қатламларини жисмоний тарбия ва оммавий спорт билан шуғулланишга кенг жалб этиш ишлари доирасида спорт муассасалари, ижро этувчи ҳокимият органлари ва жойларда фуқароларнинг ўзини ўзи бошқариш органлари ўзаро ҳамкорлигининг намунавий моделини ишлаб чиқиш ва жорий этиш.


2. Мактабгача таълим ташкилотларидан бошлаб таълим муассасаларида жисмоний тарбиянинг инновацион усулларини такомиллаштириш ва қўллаш орқали болалар ва ўсмирларни жисмоний тарбия ва оммавий спорт билан мунтазам шуғулланишга жалб этиш, спорт хоналари, заллари ва майдончаларини ускуналар ва инвентарь билан жиҳозлаш, таълим муассасаларининг жисмоний тарбия ва спорт фаолиятини кадрлар билан таъмнилаш, таълим муассасаларида футбол, велоспорт, стол тенниси, бадминтон, енгил атлетика, волейбол, баскетбол ва бошқалар бўйича тўгараклар ва секциялар ташкил этиш.

3. Барча даражалардаги ҳокимликлар, мулкчиликнинг барча шаклларидаги муассасалар, ташкилотлар ва корхоналарда жисмоний тарбия жамоаларини ташкил этиш орқали аҳолини жисмоний тарбия ва оммавий спорт билан мунтазам шуғулланишга жалб этиш, ишлаб чиқариш жисмоний тарбиясини меҳнат шароитларини яхшилашга йўналтирилган тадбирлар тизимига киритиш, футбол, велоспорт, стол тенниси, бадминтон, енгил атлетика, волейбол, баскетбол ва бошқалар бўйича спорт мусобақаларини мунтазамлилик асосида (бир чоракда камида 1 марта) ўтказиш.


4. Ёшларни маънавий камол топиш ва жисмонан соғлом шахслар бўлиш руҳида тарбиялаш, уларни фойдали машғулотлар билан қамраб олишни, мафкуравий таҳдидлардан ҳимоя қилишни таъминлаш бўйича ишлар доирасида фуқароларнинг ўзини ўзи бошқарув органларининг спорт ташкилотлари билан ўзаро ҳамкорлигининг самарали механизмларини ишлаб чиқиш ва амалга ошириш.


5. Ҳаётнинг замонавий тенденциялари ва шарт-шароитларини ҳисобга олган ҳолда болалар ва катта ёшдагилар, исталган ёшдаги ҳаваскор спортчилар ва профессионаллар учун мўлжалланган янги шаклдаги оммавий жисмоний тарбия ва оммавий томоша тадбирларини ишлаб чиқиш ва жорий этиш, тадбирларнинг иштирокчилар ва томошабинлар учун томошабоплиги ва жозибадорлигини ошириш.


6. Спорт юлдузлари иштирокида спорт тадбирлари ва оммавий жисмоний тарбия тадбирлари ўтказиш учун таълим муассасалари, ишлаб чиқариш корхоналари, хусусий ва бизнес тузилмаларнинг, спорт муассасаларининг спорт инфратузилмасидан фаол фойдаланиш, болалар ва барча хоҳловчилар учун етакчи профессионал тренерларни жалб этган ҳолда очиқ машқлар ва дастхат-сессияларни ташкил этиш.


7. Аҳолининг турли қатламларини қамраб олишни кенгайтиришга мўлжалланган ўтказиладиган "Спорт - ҳаёт тарзи" спорт ва жисмоний тарбия - оммавий мавзули тадбирларнинг турлари хилма-хил бўлиши ва тез-тез ўтказилишини, янги медиа-технологиялардан фойдаланган ҳолда фаол иштирокчиларни моддий ва маънавий рағбатлантириш чораларини таъминлаш.


8. Тошкент шаҳридаги ихтисослаштирилган спорт таълим муассасаларида ва чет элдаги етакчи спорт марказларида таълим олиш учун минтақалардан иқтидорли болаларни танлаш мақсадида спортнинг оммавий турлари бўйича спорт таълим муассасалари ўртасида, айниқса, қизлар учун мунтазам равишда минтақавий спорт мусобақалари ўтказиш.


9. Вояга етмаган болаларнинг жисмоний тарбия ва оммавий спорт билан шуғулланишига ота-оналар томонидан қаршилик кўрсатиш ҳолларининг олдини олиш мақсадида фуқароларнинг ўзини ўзи бошқариш органлари томонидан доимий мониторинг олиб бориш механизмини жорий этиш.


10. Аҳолининг ижтимоий муҳофаза қилинмаган қатламлари ва қулайроқ шарт-шароитлардаги фуқаролар учун жисмоний тарбия ва оммавий спорт билан шуғулланиш учун тенг имкониятлар яратиш, аҳолининг кам таъминланган қатламлари (даромаднинг паст даражаси, тўлиқ бўлмаган оила, шу кабилар) болалари шуғулланадиган спорт муассасалари фаолиятини, шунингдек, чекка туманларда (шу жумладан, тоғлик жойлар ва анклавлар) жойлашган спорт муассасалари фаолиятини қўшимча равишда қўллаб-қувватлаш.



2-БОБ. ИЛҒОР ЖАҲОН ТАЖРИБАСИ АСОСИДА

ЖИСМОНИЙ ТАРБИЯ ВА ОММАВИЙ СПОРТНИ

РИВОЖЛАНТИРИШНИ ИЛМИЙ-МЕТОДИК

ТАЪМИНЛАШНИ ТАКОМИЛЛАШТИРИШ


11. Жисмоний тарбия ва оммавий спорт соҳасида, шу жумладан, инновацион ғоялар ва технологияларни ишлаб чиқишни қўллаб-қувватлаш учун илмий-тадқиқот ва инновацион фаолиятни ривожлантиришга инвестицияларни кенг жалб этиш, фуқароларда кичик ёшдан бошлаб соғлом турмуш тарзига, жисмоний тарбия ва спорт билан шуғулланишга, соғлом, кучли ва амалий ижобий қизиқишни сингдиришга йўналтирилган тизимнинг янада ривожланишини таъминлайдиган норматив-ҳуқуқий базани шакллантириш.


12. Янгиланган ўқув режалари ва дастурлар талабларини, шунингдек, етакчи жаҳон спорт марказларининг илғор тажрибасини, инновацион ривожланишнинг тегишли устуворликларини ҳисобга олган ҳолда ишлаб чиқилган сифати ва мазмунига кўра замонавий ўқув, ўқув-методик ва оммавий адабиётларни, янги авлод норматив ҳужжатларни тайёрлаш ва нашр этишни ташкил этиш.


13. "Жисмоний тарбия ва спорт" ихтисослаштирилган нашриёт маркази фаолиятини ташкил этиш. Ушбу мавзу бўйича матбаа маҳсулотларини тайёрлаш, нашр этиш ва тарқатиш, шу жумладан, жисмоний тарбия ва оммавий спорт соҳасидаги илғор илмий-методик адабиётларни ўзбек ва рус тилларига таржима қилиш ушбу ноширлик марказининг асосий мақсадлари ва фаолияти йўналишлари бўлиши керак.


14. Спортнинг оммавий турлари бўйича ўзбек ва рус тилларида электрон таълим ресурсларида машқ жараёнини ташкил этиш ва ўтказиш бўйича методик тавсияларнинг очиқ республика маълумотлар базасини ташкил этиш.



3-БОБ. ЯНГИЧА ФИКРЛАЙДИГАН ТРЕНЕР КАДРЛАРНИ

ТАНЛАШ ВА ТАЙЁРЛАШНИ ТАШКИЛ ЭТИШ


15. Муайян кўникма ва сифатларга эга бўлган абитуриентларнинг тренерлик касбида ишлашга иштиёқини аниқлаш учун Ўзбекистон давлат жисмоний тарбия ва спорт университетига талабаларни танлаш жараёнини такомиллаштириш.


16. Олий таълим муассасалари ва малака ошириш марказларида жисмоний тарбия ва спорт йўналишлари бўйича ўқув дастурларини янгилаш, амалий компонентлар улушини кўпайтириш, юқори натижаларни намойиш қилувчи энг тажрибали тренерлар раҳбарлигида машғулотларни мунтазамлилик асосида ўтказиш амалиётини жорий этиш.


17. Республикада ҳамма жойда ўқув-машқ жараёнига етакчи жаҳон мутахассисларини тизимли асосда жалб этишни ташкил этишга кўмаклашиш.


18. Спорт тайёргарлиги энг муваффақиятли тизимга эга бўлган мамлакатлардан мутахассисларни жалб этиб, янгича фикрлайдиган тренерлар ва маъмурий кадрларни тайёрлаш учун энг янги спорт технологияларидан фойдаланиб, спорт ихтисослигидаги хорижий олий таълим муассасалари ва спортчиларни тайёрлаш марказларининг филиалларини ташкил этиш.


19. Жисмоний тарбия ва спорт йўналиши бўйича сиртқи бўлимларга олий таълим муассасаларига ўқишга қабул қилиш квоталарини кўпайтириш, шунингдек, Ўзбекистон Республикаси Жисмоний тарбия ва спорт вазирлигининг тақдимномаси бўйича республиканинг тренер кадрлар етишмайдиган чекка тоғли ва чўл туманларидан (шаҳарларидан) абитуриентларни имтиёзли ўқишга қабул қилиш учун квоталар ажратиш.


20. Тренер касбининг юқори мақоми ва нуфузини таъминлашга қаратилган чора-тадбирлар кўриш, ўзини ўзи тўлақонли намоён қилиш ва профессионал ўсиш учун қулай шарт-шароитлар ва имкониятлар яратиш, давлатнинг муваффақиятли ривожланиши учун ёш авлодни тарбиялаш билан шуғулланадиган инсон сифатида тренернинг ижобий қиёфасини шакллантириш.



4-БОБ. ИННОВАЦИОН ФИКРЛАЙДИГАН

МАЪМУРИЙ КАДРЛАРНИ ТАЙЁРЛАШ

ВА ТАНЛАШНИ ТАШКИЛ ЭТИШ


21. Жисмоний тарбия ва оммавий спорт соҳасига маъмурий кадрлар тайёрлаш жараёнига спортни бошқаришнинг махсус дастурларини жорий этиш, профессионаллар, менежерлар, спорт тиббиёт ходимлари ва психологлар учун семинарлар ўтказиш, Sport Management (спортни бошқариш), Sport Leadership (спортда раҳбарлик қилиш), Sport Administration (спорт маъмуриятчилиги) йўналишлари бўйича етакчи жаҳон спорт марказларида тажриба орттиришларни ташкил этиш.


22. Спорт муассасалари раҳбарларининг улар ўртасида тажриба алмашишни рағбатлантириш, ривожлантириш бўйича дастурларда тизимли иштирок этишини таъминлаш, шунингдек, ишнинг илғор ва энг самарали усулларини ўзлаштиришга интилишда уларни қўллаб-қувватлаш.


23. Жисмоний тарбия ва оммавий спорт соҳасида давлат сиёсати ўз вақтида, сифатли ва тўлиқ кўламда амалга оширилиши учун Ўзбекистон Республикаси Жисмоний тарбия ва спорт вазирлиги ҳудудий бўлинмалари ва уларнинг раҳбарларининг мустақиллигини ошириш ва масъулиятини кучайтириш.



5-БОБ. СПОРТ ТИББИЁТИНИ ТАКОМИЛЛАШТИРИШ,

СОҒЛОМ ТУРМУШ ТАРЗИ ВА СОҒЛОМ ОВҚАТЛАНИШНИ

ТАРҒИБ ҚИЛИШ ЧОРА-ТАДБИРЛАРИНИ ИШЛАБ

ЧИҚИШ ВА АМАЛГА ОШИРИШ


24. Таълим муассасаларининг ўқув дастурларига ўқувчиларнинг жисмоний фаоллигини рағбатлантирувчи соғлом турмуш тарзи юритиш кўникмаларини шакллантириш ва соғлом овқатланиш бўйича тадбирлар ва махсус курсларни киритиш.


25. Хусусий иморатлар уйларида ва кўп квартирали уйларда яшайдиган шахсларнинг яқинда жойлашган ижтимоий мақсаддаги объектларнинг (таълим, тиббиёт, спорт ва дам олиш муассасалари) жисмоний тарбия-соғломлаштириш ва спорт иншоотларидан фойдаланишини таъминлаш йўли билан улар учун жисмоний фаолликни мажбурий қўллаб-қувватлаш механизмларини жорий этиш.


26. Спортчилар ва жисмоний тарбия билан шуғулланувчи шахсларнинг тиббий хизматлардан фойдаланишини кенгайтириш ва тиббий таъминлаш сифатини ошириш, аҳолини соғломлаштириш учун жисмоний тарбиядан фаол ва самарали фойдаланиш.


27. Реабилитация қилувчи тиббиёт соҳасида инновацион усуллар ва технологиялардан кенг фойдаланган ҳолда спортда интенсив жисмоний юкламалардан, шунингдек, спортчилар ва аҳоли касалликни бошдан кечирганидан, жароҳатланганидан кейин тиклаш тадбирларини амалга оширишда сифатли тиббий ёрдам кўрсатилишини тизимли асосда ташкил этиш.


28. Аҳоли соғлом турмуш тарзининг асоси сифатида соғлом овқатланишни кенг тушунтириш ишларини ташкил этиш ва тарғиб қилишни кучайтириш.


29. Озиқ-овқат маҳсулотларининг сифати ва хавфсизлигига қўйилаётган замонавий талабларга мувофиқ озиқ-овқат хом ашёсининг асосий турларини маҳаллий ишлаб чиқаришни кенгайтириш, алмаштириб бўлмайдиган компонентлар, спорт билан шуғулланувчилар учун махсус озиқ-овқат маҳсулотлари ва овқатга қўшиладиган биологик фаол қўшимчалар билан бойитилган озиқ-овқат маҳсулотлари ишлаб чиқаришни ривожлантириш.



6-БОБ. СЕЛЕКЦИЯ, СЕЛЕКЦИОНЕР

ТРЕНЕРЛАР ФАОЛИЯТИНИ ҚЎЛЛАБ-ҚУВВАТЛАШ

ЧОРА-ТАДБИРЛАРИНИ КУЧАЙТИРИШ ЙЎЛИ БИЛАН

ИСТЕЪДОДЛИ СПОРТЧИЛАРНИ ТАНЛАШ


30. Истеъдодли спортчиларни танлаш ва уларнинг натижаларини назорат қилиш бўйича минтақавий кенгашлар ташкил этиш, уларни мақсадли тайёрлаш, иқтидорли спортчиларни ихтисослаштирилган спорт мактабларига, таълим муассасалари ва спорт клубларига танлашда шаффофлик ва холисликни таъминлаш чора-тадбирларини амалга ошириш.


31. Истеъдодли спортчиларни аниқлаш учун спорт турлари бўйича республика мусобақалари ўтказилишини, шу жумладан, уч босқичли "Умид ниҳоллари", "Баркамол авлод" ва "Универсиада" спорт мусобақаларининг барча босқичлари танқидий таҳлил қилинишини ва мониторинг олиб борилишини жорий этиш.


32. Жисмоний тарбия ва спорт турлари бўйича спорт соҳасида ихтисослашаётган спорт мактаблари, таълим муассасалари ва спорт клублари ўртасида минтақавий, миллий ва халқаро ўқув-машқ йиғинлари ўтказиш.


33. Спорт турлари бўйича Ўзбекистон чемпионатлари ғолиблари ва совриндорларининг жаҳон чемпионатлари, Осиё ўйинлари ва бошқа халқаро мусобақаларда иштирокини таъминлаш чора-тадбирларини кўриш.


34. Спорт турлари бўйича инновацион тафаккурли селекционер тренерларни тайёрлаш ва қайта тайёрлашни ташкил этиш.



7-БОБ. ЖИСМОНИЙ ТАРБИЯ ВА ОММАВИЙ СПОРТНИ,

СОҒЛОМ ТУРМУШ ТАРЗИНИ ОММАЛАШТИРИШ ИШЛАРИНИ

ТАШКИЛ ЭТИШ ВА АМАЛГА ОШИРИШ ЖАРАЁНИДА ЮҚОРИ

ДАРАЖАЛИ АХБОРОТЛАШТИРИШНИ ВА МУЛЬТИМЕДИА

МАҲСУЛОТЛАРИДАН ФОЙДАЛАНИШНИ ТАЪМИНЛАШ


35. Барча спорт муассасаларининг бутунжаҳон Интернет ахборот тармоғидан фойдаланиши чора-тадбирларини кўриш, Ўзбекистон Республикаси Жисмоний тарбия ва спорт вазирлигининг замонавий жозибадор сайтини яратиш ва унинг доимий ишлашини таъминлаш.


36. "Спорт - турмуш тарзи" хэштеги остида жисмоний тарбия ва оммавий спортни оммавийлаштириш компаниясини ташкил этиш ва ижтимоий тармоқларда илгари силжитиш, SPORTS.UZ ахборот порталини яратиш, Ўзбекистон Республикаси Жисмоний тарбия ва спорт вазирлигининг вазирликнинг асосий вазифалари ва фаолияти устуворликларига янгича ёндашувларни акс эттирувчи логотипини яратиш.


37. Долзарб йўналишларда - жамоатчилик фикри мониторинги, ижтимоий сўровлар ўтказишда (Ўзбекистон Республикаси Жисмоний тарбия ва спорт вазири билан алоқа қилиш линиясини очиш, воқеалар календари, машқлар органайзери, аҳоли фаоллиги мониторинги) iSPORT мобил тармоқлари учун спорт иловаларини ишлаб чиқиш.


38. Ахборот технологияларини ва мультимедиа маҳсулотларини ривожлантиришда замонавий тенденцияларни ҳисобга олган ҳолда ўқув-машқ жараёни компьютерлаштирилиши даражасини ошириш.


39. Аҳоли орасида соғлом турмуз тарзи кўникмалари ва жисмоний фаолликни тарғиб қилиш ва бундай кўникмаларни шакллантиришнинг фойдаси бўйича ахборот-маърифий фаолиятни кучайтириш.


40. Жисмоний тарбия ва спортнинг миллий интеграциялаштирилган ахборот тизимини, шу жумладан, спортчилар фаолиятини рўйхатга олиш ва ҳисобга олиш бўйича - "Skm-sportsmen", тренерларнинг маълумотлар базасини таъминлаш бўйича - "Skm-trener" ва республиканинг жисмоний тарбия-соғломлаштириш ва спорт иншоотларини паспортлаштиришни таъминлаш бўйича - "Skm-sportinshoot" ахборот тизимлари орқали спорт натижалари мониторинги ва ютуқларни баҳолаш тизимларини ташкил этиш.


41. Илғор хорижий тажриба асосида жисмоний тарбия ва оммавий спорт соҳасида ахборот ва статистика маълумотларини тўплаш ва уларни пухта ишлаш тизими ва усулларини такомиллаштириш.



8-БОБ. ЭНЕРГИЯ ВА РЕСУРСЛАРНИ ТЕЖАЙДИГАН

ТЕХНОЛОГИЯЛАРНИ ФАОЛ ЖОРИЙ ЭТИШ АСОСИДА

ДАВЛАТ СПОРТ МУАССАСАЛАРИНИНГ МОДДИЙ-

ТЕХНИКА БАЗАСИНИ МУСТАҲКАМЛАШ


42. Замонавий энергия ва ресурсларни тежайдиган, инновацион қурилиш технологияларини фаол жорий этиш ва улардан фойдаланиш асосида спорт муассасалари инфратузилмаси бинолари ва объектларини, шунингдек, умумтаълим муассасаларининг спорт иншоотларини босқичма-босқич қуриш, реконструкция қилиш ва капитал таъмирлашни давом эттириш.


43. Умумтаълим мактаблари ва спорт муассасаларини энг янги технологиялардан фойдаланган ҳолда замонавий эргономик ва экологик мебель, тегишли ускуналар, замонавий спорт инвентари билан босқичма-босқич жиҳозлаш ва тўлиқ жиҳозлашни давом эттириш.


44. Минтақаларнинг ҳудудий-иқлим хусусиятларини ҳисобга олган, таниқли хорижий компанияларнинг илғор тажрибаси асосида қурилиш материалларидан, замонавий энергия ва ресурсларни тежайдиган технологиялардан фойдаланган ҳолда спорт объектлари лойиҳаларини ишлаб чиқиш учун Ўзбекистон Республикаси Жисмоний тарбия ва спорт вазирлиги ҳузурида ихтисослаштирилган лойиҳа институтини ташкил этиш.


9-БОБ. ЖИСМОНИЙ ТАРБИЯ ВА ОММАВИЙ СПОРТНИ,

ШУНИНГДЕК, СОҒЛОМ ТУРМУШ ТАРЗИНИ ОММАЛАШТИРИШ

БЎЙИЧА ИННОВАЦИОН ЧОРА-ТАДБИРЛАРНИ ИШЛАБ

ЧИҚИШ ВА АМАЛГА ОШИРИШ


45. Оммавий ахборот воситалари, радио, телевидение, бутунжаҳон Интернет ахборот тармоғи, босма маҳсулотлар, мулкчилик шаклларидан қатъи назар таълим муассасалари, корхоналар ва ташкилотларда жисмоний тарбия ва спорт билан мунтазам шуғулланувчи одамларнинг имкониятлари ва ютуқларини намойиш қилувчи тадбирларни ёритиш, шу жумладан, кўргазмали материаллар ва маъруза шаклларидан фаол фойдаланиш, жисмоний тарбия ва спорт масалалари бўйича ягона ахборот муҳитини шакллантиришдан кенг фойдаланиш йўли билан турли ёш гуруҳлари орасида жисмоний тарбия ва оммавий спортни, соғлом турмуш тарзини, салбий ҳодисалар профилактикасини тарғиб қилиш бўйича ишларни тизимли асосда комплекс ташкил этиш ва амалга оширишга йўналтирилган доимий ишлайдиган ахборот-тарғибот тизимини шакллантириш.


46. Аҳолининг барча қатламларида жисмоний тарбия ва оммавий спорт билан мунтазам шуғулланишдан манфаатдорликни шакллантириш соҳасида ахборот ва таълим воситалари самарадорлигини ошириш.


47. Оммалаштириш жараёнининг узлуксизлигини таъминлаш, оммавий дам олиш жойларида ва яшаш жойида шахсга (оила, мактабгача, мактаб, ўрта касб-ҳунар ва олий таълим муассасалари, ишлаб чиқариш жамоалари) тарбиявий таъсир кўрсатишнинг узвийлигига риоя қилиш.


48. Жисмоний тайёргарликнинг юқори даражасига эришишда фуқароларнинг жисмоний фаоллигини рағбатлантириш, соғлом турмуш тарзининг муҳим элементи сифатида спорт фаоллигини мустаҳкамлаш


49. Соғлом турмуш тарзини тарғиб қилувчи босма ва кўргазмали маҳсулотларни тарқатиш, телерадио дастурларини намойиш қилиш ва Интернет ресурсларини шакллантириш, жисмоний тарбия ва оммавий спортни оммалаштиришга етакчи спорт мутахассисларини, спортчилар, сиёсатчилар, жамоат арбобларини жалб этиш, ижтимоий рекламадан фойдаланиш.


50. Давлат, жамоат ташкилотлари, бизнес-тузилмалар ва хусусий шахсларнинг мавзули номинациялари бўйича совринлари учун "Спорт байрами" миллий фестивали, марафонлар, спорт мусобақалари ва биринчиликларини мунтазамлилик асосида ташкил этиш ва ўтказиш.



10-БОБ. 2019-2023 ЙИЛЛАР ДАВРИДА

ЎЗБЕКИСТОН РЕСПУБЛИКАСИДА ЖИСМОНИЙ

ТАРБИЯ ВА ОММАВИЙ СПОРТНИ РИВОЖЛАНТИРИШ

КОНЦЕПЦИЯСИНИ АМАЛГА ОШИРИШ ДОИРАСИДА

МУАММОЛИ МАСАЛАЛАРНИ КЎРИБ ЧИҚИШ


51. 2019-2023 йиллар даврида Ўзбекистон Республикасида жисмоний тарбия ва оммавий спортни ривожлантириш концепциясини амалга ошириш доирасида муаммоли масалаларни кўриб чиқиш Ўзбекистон Республикаси Жисмоний тарбия ва спорт вазирлиги томонидан амалга оширилади.


11-БОБ. 2019-2023 ЙИЛЛАР ДАВРИДА

ЎЗБЕКИСТОН РЕСПУБЛИКАСИДА ЖИСМОНИЙ

ТАРБИЯ ВА ОММАВИЙ СПОРТНИ РИВОЖЛАНТИРИШ

КОНЦЕПЦИЯСИНИ АМАЛГА ОШИРИШДАН

КУТИЛАЁТГАН НАТИЖАЛАР


52. Жисмоний тарбия ва оммавий спорт соҳасини модернизация қилишнинг олдинга қўйилган вазифаларини ҳал этиш иқтисодиётни инновацион ривожлантиришни таъминлашнинг устувор йўналишларидан ва Ўзбекистон Республикасининг геосиёсий рақобатбардошлилигидан келиб чиқиб мамлакат инсон капиталини аниқ мақсадни кўзлаб шакллантиришнинг кенг имкониятларини таъминлайди.


53. 2019-2023 йиллар даврида Ўзбекистон Республикасида жисмоний тарбия ва оммавий спортни ривожлантириш концепциясини амалга ошириш:

аҳолини, айниқса, ёшларни жисмоний тарбия ва оммавий спорт билан шуғулланишга кенг жалб этиш учун қулай шарт-шароитлар яратишга;

аҳолини жисмоний тарбия ва оммавий спорт машғулотлари билан қамраб олиш тизимини бошқаришнинг инновацион усуллари жорий этилишини тезлаштиришга;

замонавий энергия ва ресурсларни тежайдиган инновацион қурилиш технологияларини жорий этиш, янги технологияларни ҳисобга олган ҳолда спорт объектлари ва инфратузилмасини жиҳозлаш ва тўлиқ жиҳозлаш асосида умумтаълим ва спорт муассасаларининг бинолари ва спорт иншоотларини қуриш, реконструкция қилиш ва капитал таъмирлашни кенгайтиришга;

спортнинг оммавий турларини, шунингдек, бошқа қўшимча омиллар ва йўналишларни (тиббий, психологик ва шу кабилар) ривожлантиришга;

аҳолининг барча қатламлари учун кўрсатиладиган жисмоний тарбия-соғломлаштириш ва спорт хизматларининг сифати, долзарблиги ва хилма хиллигини, манзиллилигини оширишга кўмаклашади.



Қонун ҳужжатлари маълумотлари миллий базаси (www.lex.uz),

2019 йил 14 февраль






















Время: 0.2116
по регистрации МЮ строгое соответствие
  • Все
  • действующие
  • утратившие силу
  • Русский
  • Ўзбекча
  • Оба языка
  • любая дата
  • точная дата
  • период
  • -

Свернуть поиск