Қишлоқ хўжалиги, мелиорация ва йўл-қурилиш техникаларини техник кўрикдан ўтказиш тартиби тўғрисида Низом (ЎзР ВМ 17.04.2019 й. 325-сон қарорига 1-илова)

Функция недоступна

Вазирлар Маҳкамасининг

2019 йил 17 апрелдаги

325-сон қарорига

1-ИЛОВА

Қишлоқ хўжалиги, мелиорация ва

йўл-қурилиш техникаларини техник

кўрикдан ўтказиш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Мазкур Низом тракторлар, трактор тиркамалари, ўзиюрар ва қишлоқ хўжалиги машиналари, мелиорация ва йўл-қурилиш техникаларини, сервис ва таъмирлаш жиҳозлари ва бошқа ускуналарни (кейинги ўринларда техника деб аталади) мажбурий техник кўрикдан (кейинги ўринларда-техник кўрик деб аталади) ўтказиш тартибини белгилайди.

2. Техникаларнинг техник кўрикдан ўтказилишини назорат қилиш Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекцияси (кейинги ўринларда Инспекция деб аталади) томонидан, техник кўрик бўйича кўрсатиладиган хизматлар Инспекция ҳузуридаги "Агросаноат мажмуида хизматлар кўрсатиш маркази" давлат унитар корхонаси (кейинги ўринларда Марказ деб аталади) томонидан мазкур Низомга мувофиқ ўтказилади.

3. Ушбу Низомда қуйидаги асосий тушунчалар қўлланилади:

қишлоқ хўжалиги, мелиорация ва йўл-қурилиш техникалари - қишлоқ ва ўрмон хўжалигига мўлжалланган барча турдаги тракторлар (ғилдиракли, занжирли ва ярим занжирли), ўзиюрар машиналар (ўзиюрар қишлоқ хўжалиги машиналари, ўзиюрар мелиоратив ҳамда йўл-қурилиш техникалари), трактор тиркамалари, қишлоқ хўжалиги, йўл-қурилиш, мелиоратив ва бошқа мақсадларга мўлжалланган тупроққа ва экинларга ишлов берувчи, юк ортувчи, дон ва уруғни қайта ишлашга мўлжалланган машиналар, чорвачилик, паррандачилик ва ем-хашак ишлаб чиқариш машина ва технологик ускуналари, сув насослари, кичик механизация мосламалари;

ўзиюрар машиналар - ўзининг ҳаракатлантирувчи қурилмасига эга қишлоқ хўжалиги, мелиорация ва йўл-қурилиш техникалари;

махсус майдонча - техникаларни кўрикдан ўтказиш, зарур ҳолатларда тегишли ўлчов асбоб-ускуналаридан фойдаланиш имкониятига эга майдон;

техник кўрик далолатномалари - мавжуд техникалар сони ва улар ҳақидаги маълумотларни ўз ичига олган шакл;

техник кўрикдан ўтказилганлиги тўғрисидаги талон бланкаси - ҳар йили техник кўрик натижасига кўра ҳар бир техника учун бериладиган, махсус ҳимояланган бланка;

техник паспорт - трактор, тиркама ва ўзиюрар техникалар учун бериладиган, техникаларнинг эгаси, номи, русуми, заводи, двигатель, шасси ва бошқа рақамлари қайд этиладиган махсус ҳимояланган ҳужжат;

техник гувоҳнома - агрегат, машина, механизм ва ускуналар учун бериладиган, уларнинг эгаси, номи, русуми ва зарур рақамлари қайд этиладиган ҳужжат;

техникаларни юклашдан олдин техник кўрикдан ўтказиш - техникаларнинг умумий техник регламент ва давлат синови натижаларининг ижобий кўрсаткичларига мослигини кўриб чиқиш.

4. Техникаларни техник кўрикдан ўтказишда техникаларнинг техник ҳолати ва ускуналари "Йўл ҳаракати хавфсизлиги тўғрисида"ги Ўзбекистон Республикасининг Қонуни ва Йўл ҳаракати хавфсизлиги қоидалари, Ўзбекистон Республикаси Вазирлар Маҳкамасининг 2016 йил 18 мартдаги 80-сон қарори билан тасдиқланган "Қишлоқ хўжалиги техникалари конструкциясининг хавфсизлиги тўғрисидаги умумий техник регламент" (кейинги ўринларда Техник регламент деб аталади), стандартлар, қоидалар ва нормаларга мувофиқлиги баҳоланади.

5. Юридик ва жисмоний шахсларга, шу жумладан, хорижий юридик ва жисмоний шахсларга тегишли бўлган ва белгиланган тартибда Марказда рўйхатдан ўтказилган техникалар мазкур Низомга мувофиқ техник кўрикдан ўтказилиши керак.

6. Техникалар қуйидаги даврийликка мувофиқ техник кўрикдан ўтказилиши керак:

а) ишлаб чиқарилган йилидан, фойдаланиш ёки фойдаланмаслик, яроқли ёки яроқсизлигидан қатъи назар, барча турдаги техникалар, шунингдек ишлаб чиқарилган вақти аниқланмаган техникалар - бир йилда бир марта;

б) тиркамалар кўрикка шатакчи техника учун белгиланган муддатларда тақдим этилади;

в) навбатдаги техник кўрикдан ўтказишнинг илгари ўрнатилган муддатларидан қатъи назар, уларни Марказда рўйхатдан ўтказишда (қайта рўйхатдан ўтказишда);

г) нотариал идоралар, тендер комиссиялари ҳамда бошқаларга маълумотнома беришдан олдин;

д) техникаларнинг ҳисобдан чиқарилишидан олдин.

7. Техникаларнинг Марказ томонидан техник кўрикдан ўтказилганлиги учун белгиланган миқдорларда йиғим ундирилади.

Аввалги техник кўрикда носоз деб топилган техникалар қайта техник кўрикдан ўтказилганлиги учун йиғимлар умумий қоидалар асосида ундирилади.

2-БОБ. ТЕХНИК КЎРИКНИ

ТАШКИЛ ЭТИШ

8. Техник кўрикни ўтказиш мазкур Низомнинг 1-иловасидаги жадвал асосида режалаштирилади. Жадвалда техник кўрикни ўтказиш жойи, санаси ва вақти, кўрикка қўйилаётган техникалар сони тўғрисидаги маълумотлар кўрсатилади.

Жадвал юридик ва жисмоний шахсларнинг техникалари сони 10 та ва ундан ортиқ бўлганда уларнинг жойида, техника сони 10 тадан кам бўлганда жойлашган ҳудуддаги машина-трактор парки, муқобил машина-трактор парки ёки махсус майдончаларда йиғиш (жамлаш)ни назарда тутган ҳолда тузилади.

Техник кўрик кунлари техника эгаларининг буюртманомалари, об-ҳаво ва ишлаб чиқариш шароитлари ва бошқа ҳолатлар ҳисобга олинган ҳолда Марказнинг туман (шаҳар) бўлимлари томонидан белгиланади.

9. Кунлик техник кўрикка қўйиладиган техникалар сони мавжуд диагностика ва назорат-ўлчаш ускуналарининг кунлик иш унумидан келиб чиққан ҳолда белгиланади.

10. Техник кўрикни ўтказиш жадвали ва уни ўтказиш бўйича комиссия таркиби ҳар йили 15 январь кунига қадар Марказнинг туман (шаҳар) бўлими томонидан тайёрланади ва Инспекциянинг туман (шаҳар) бўлими томонидан тасдиқланади. Комиссия таркиби уч кишидан иборат бўлади.

Комиссия таркибига туман қишлоқ хўжалиги бўлими ва туман "Агросервис" МТП МЧЖ вакили ҳамда бошқа хўжалик бошқаруви органларининг вакили киритилиши мумкин.

11. Техникага мулк ҳуқуқи асосида эгалик қилувчи шахсларга (кейинги ўринларда мулкдор деб аталади) техник кўрик ўтказиладиган муддатлар тўғрисида билдиришнома юборилади, унга мазкур Низомнинг 2 ва 3-иловаларига мувофиқ техник кўрикка тақдим этиладиган техникалар тўғрисида далолатномалар илова қилинади. Техник кўрик далолатномаларида талаб этиладиган маълумотлар кўрсатилган ҳолда техникалар рўйхатига мувофиқ, мулкдор (жисмоний шахслар учун - мулк эгаси, юридик шахслар учун - ташкилот раҳбари) томонидан тўлдирилади. Техникалар гуруҳининг техник кўриги далолатномасида кўрсатилган техникалар тўғрисидаги маълумотлар Марказнинг рўйхатга олиш ҳужжатлари билан таққосланади.

12. Хизмат муддатини ўтаган ва белгиланган майдончаларга олиб келиш қийинчилик туғдирадиган техникалар иш (фаолият) олиб борилаётган ҳудудда ёки сақланаётган жойда кўрикдан ўтказилади.

13. Техникаларнинг техник кўриги ўтказиладиган жойи ва вақти Марказ томонидан белгиланади.

Техникалар навбатдаги техник кўрикка Марказ томонидан белгиланган жойларга тасдиқланган муддатдан кечиктирмасдан, мулкдорлар томонидан етказилиши шарт.

14. Бошқа юридик ёки жисмоний шахсларга ижарага берилган техникалар ижарага берувчида ёхуд улар вақтинчалик рўйхатдан ўтказилган жойда Марказ томонидан ижарага берувчи учун белгиланган муддатларда техник кўрикдан ўтказилади.

15. Техник кўрик бошланишидан камида ўн кун олдин мулкдор ёхуд унинг ишончли вакили Марказга қуйидаги ҳужжатларни:

юридик шахслар:

юридик шахснинг раҳбари, бош бухгалтер (бош бухгалтер функциясини бажарувчи шахс) томонидан тасдиқланган техник кўрик далолатномасининг бир нусхасини;

мукаммал таъмирлашда, хизмат сафарида бўлган, ижарага берилган ёки сотишга қўйилган техникалар сонини тасдиқловчи маълумотларни;

газ ёнилғисида ишлаш учун қайта жиҳозланган техникаларга ўрнатилган газ баллонларининг амалдаги техник жиҳатдан тартибга солиш соҳасидаги норматив ҳужжатларга мослиги ҳақидаги сертификатлаштириш органи томонидан берилган мувофиқлик сертификати нусхасини;

Саноат хавфсизлиги давлат қўмитасининг газ баллонларини синовдан ўтказиш ҳуқуқини берувчи рухсатномаси мавжуд бўлган ташкилот томонидан газ ёнилғисида ишлаш учун қайта жиҳозланган техникаларнинг газ баллонлари синовдан ўтказилганлиги тўғрисидаги далолатнома нусхасини;

техникаларни бошқарувчи тракторчи-машинистлар рўйхати ва уларнинг тракторчи-машинист гувоҳномалари нусхасини;

белгиланган йиғим тўланганлигини тасдиқловчи ҳужжатни тақдим этади;

жисмоний шахслар:

паспорт ёки шахсни тасдиқловчи бошқа ҳужжат (ҳарбий хизматчилар - шахсий гувоҳнома; хорижий фуқаролар - ички ишлар органларида рўйхатдан ўтказилганлиги тўғрисида белги қўйилган миллий паспортлари ёки Ўзбекистон Республикасида яшаш гувоҳномаси; фуқаролиги бўлмаган шахслар - Ўзбекистон Республикасида яшаш гувоҳномаси)ни;

техникани бошқариш ҳуқуқини берувчи ҳужжатни;

техниканинг рўйхатдан ўтказилгани тўғрисидаги техник паспорт ёки техник гувоҳномани;

Саноат хавфсизлиги давлат қўмитасининг газ баллонларини синовдан ўтказиш ҳуқуқини берувчи рухсатномаси мавжуд бўлган ташкилот томонидан газ ёнилғисида ишлаш учун қайта жиҳозланган техниканинг газ баллонлари синовдан ўтказилганлиги тўғрисидаги далолатномани;

сертификатлаштириш органи томонидан берилган газ ёнилғисида ишлаш учун қайта жиҳозланган техникаларга ўрнатилган газ баллонларининг мувофиқлик сертификати нусхасини;

белгиланган йиғим тўланганлигини тасдиқловчи ҳужжатни тақдим этади.

16. Мулкдорнинг касаллиги, фавқулодда ҳолатлар ёки бошқа узрли сабаб билан техник кўрикдан белгиланган муддатларда ўтказилмаган техникалар тасдиқловчи ҳужжат бўлган тақдирда, мулкдор соғайгандан ёки бошқа узрли сабаб ва фавқулодда ҳолат бартараф этилгандан кейин 10 кун мобайнида техник кўрикдан ўтказилади.

17. Марказ мулкдорга тегишли техникаларнинг техник ҳолатини текшириш учун махсус жиҳозланган транспорт воситалари, техникаларининг техник ҳолатини текширишни ташкил этиш ва ўтказиш учун зарур технологик жиҳозлар билан таъминланган ишлаб чиқариш-техник базага эга бўлиши шарт.

18. Юридик ва жисмоний шахсларга тегишли техникаларнинг техник ҳолатини текшириш учун диагностика станциялари ва махсус жиҳозланган транспорт воситаларининг ишлаб чиқариш-техник базаси:

а) техникаларнинг техник ҳолатини текшириш учун - Техник регламент, газда ишловчи техникалар - Саноат хавфсизлиги давлат қўмитасининг талабларига мувофиқ бўлиши;

б) техниканинг тормоз тизимини текшириш учун тормоз тизимининг техник диагностика, пневматик ва пневмогидравлик тормоз узатмаларида сиқилган ҳаво босими ва герметикликни (босим тушишини) назорат қилиш воситаларига, тиркамаларни улаш мосламасининг босиб туриш қурилмаси, руль бошқарувидаги умумий эркин юриш (люфтини) ўлчаш прибори, руль бошқаруви ва механизми (подвескаси) деталларидаги эркин юриш (люфтларни) текшириш тестери, чироқлар ёруғлигини бошқаришни ва кучини назорат қилиш прибори, шиналарни техник диагностика қилиш воситалари, газанализатори - учқундан ўт олдириш двигателларига эга техникаларнинг ишлаб бўлинган газларида ифлослантирувчи моддаларнинг мавжудлигини аниқлаш прибори, тутун ўлчаш прибори - сиқилишдан ўт олдириш двигателларига эга техникаларнинг ишлаб бўлинган газларида тутунни аниқлаш прибори, двигателнинг айланиш частотаси ва мой ҳароратини ўлчаш приборига, шовқинни ўлчаш прибори, ойналарнинг ёруғлик ўтказишини текшириш прибори, компрессор, қинчали манометр, зарур компьютер техникасига эга бўлиши лозим.

Айрим техник диагностика воситалари хавфсиз фойдаланиш бўйича талабларга мувофиқ бўлиш шарти асосида универсал техник воситалар билан алмаштирилиши мумкин.

Қўлланиладиган барча ўлчов воситалари тасдиқланган типда, қонун ҳужжатларига мувофиқ текширувдан ўтган бўлиши зарур.

19. Ишлаб чиқариш-техник базанинг майдони, техник диагностика воситаларининг сони ва хусусиятлари, меҳнат ва атроф-муҳитни муҳофаза қилишга оид талаблар қонун ҳужжатларига мувофиқ белгиланади.

20. Техникаларни текширишга тегишли мутахассисликка эга бўлган ёки диагностика қилиш технологияси, диагностика жиҳозларининг тузилиши ва ишлаш принциплари, диагностика воситаларини қўллаган ҳолда техник ҳолатни текшириш методлари, меҳнатни муҳофаза қилиш талаблари бўйича малакага эга шахслар қўйилиши мумкин.

21. Техникага ўрнатилган сиқилган табиий газ (кейинги ўринларда СТГ деб аталади) ва суюлтирилган нефть гази (кейинги ўринларда СНГ деб аталади) тизимларининг герметиклиги ҳамда агрегатлари ва узеллари уланган жойларнинг ишончлилиги Ўзбекистон Республикаси Вазирлар Маҳкамаси томонидан тасдиқланган Сиқилган табиий газда, суюлтирилган нефть газида ёки дизель ва газсимон ёқилғи аралашмасида ишлайдиган техникаларнинг хавфсизлиги тўғрисидаги умумий техник регламентга мувофиқ, Саноат хавфсизлиги давлат қўмитасининг газ баллонларини синовдан ўтказиш ҳуқуқини берувчи рухсатномаси мавжуд бўлган ташкилот томонидан газ ёнилғисида ишлаш учун қайта жиҳозланган техниканинг газ баллонлари синовдан ўтказилганлиги тўғрисидаги далолатномасига асосан кўриб чиқилади.

22. Техникага ўрнатилган СТГ ва СНГ тизимлари Саноат хавфсизлиги давлат қўмитасининг газ баллонларини синовдан ўтказиш ҳуқуқини берувчи рухсатномаси мавжуд бўлган ташкилот томонидан газ ёнилғисида ишлаш учун қайта жиҳозланган техниканинг газ баллонлари синовдан ўтказилганлиги тўғрисидаги далолатнома, сертификатлаштириш органи томонидан берилган газ ёнилғисида ишлаш учун қайта жиҳозланган техникаларга ўрнатилган газ баллонларининг мувофиқлик сертификати асосида техник кўрикдан ўтказилади.

23. Техник кўрик техникалар рўйхатдан ўтказилган жойда зарур шарт-шароитларга (техник диагностика ускуналарига, кўтариш мосламаларига ёки қараб чиқиш учун чуқурчаларга, назорат-ўлчаш асбобларига, асфальт ёки бетон қопланган бир текис горизонтал майдончага) ва малакали мутахассисларга эга бўлган ташкилотларда, техника хизмати кўрсатиш станцияларида ҳамда махсус жиҳозланган транспорт воситасида ўтказилади.

Ташкилотларда техник кўрик бошлангунга қадар барча диагностика аппаратлари текширилиши ва иш ҳолатига келтирилиши зарур.

Техника бошқа ҳудудда ишлатилаётганда унинг техник кўриги Марказ томонидан техника жойлашган ҳудудда ўтказилади ва далолатнома тузилиб, рўйхатга олинган ҳудудга юборилади ҳамда расмийлаштирилади.

3-БОБ. ТЕХНИКАЛАРНИ ТЕХНИК

КЎРИКДАН ЎТКАЗИШ

24. Қишлоқ хўжалиги, мелиорация ва йўл-қурилиш техникаларини техник кўрикдан ўтказиш мазкур Низомнинг 4-иловасига мувофиқ схема бўйича амалга оширилади.

Мулкдор мазкур низомнинг 15-бандида кўрсатилган маълумотларни ва техник кўрикдан ўтиш учун белгиланган йиғим суммаси тўланганлигини тасдиқловчи ҳужжатни илова қилган ҳолда тегишли техникани техник кўрикдан ўтказиш бўйича Марказга ёзма ариза тақдим этади.

25. Техникаларни техник кўрикдан ўтказиш билан боғлик аризалар 3 иш кунидан кечиктирилмасдан кўриб чиқилади. Алоҳида ҳолларда, қўшимча маълумот олиш талаб этилган ҳолларда аризалар 10 иш кунида кўриб чиқилади.

26. Мулкдор техникани техник кўрикдан ўтказиш учун Марказ томонидан белгиланган зарур шарт-шароитларга эга бўлган жамоавий гараж ҳудудига олиб келади, ёхуд хизмат муддатини ўтаган ва белгиланган жойларга олиб келиш қийинчилик туғдирадиган техникалар иш (фаолият) олиб борилаётган ҳудудда ёки сақланаётган жойида кўрикдан ўтказишга тайёрлайди.

27. Техник кўрик техниканинг ҳолати ва жиҳозлари техник регламентлар ёки стандартлар талабларига, техниканинг хавфсизлик қоидалари ва нормаларига мувофиқлигини кўриб чиқишдан иборат бўлади.

Газ ёнилғисида ишлаш учун қайта жиҳозланган техникаларни техник кўздан кечиришда газ баллонларининг фойдаланиш муддати, ишлаб чиқарилган йили, завод рақами, газ баллонларини синовдан ўтказиш муддатлари, газ баллони анжомларининг белгиланган талабларга мувофиқлиги текширилади.

28. Тиркамалар ва ярим тиркамаларнинг техник ҳолати автопоезд таркибида ва қўшимча равишда алоҳида турган ҳолатда текширувдан ўтказилади.

29. Техник кўрикдан ўтган техникаларга мазкур Низомнинг 2 ва 3-иловаларда кўрсатилган намунада 2 нусхада (Марказ ва мулкдор учун) далолатнома тузилади.

30. Далолатномага асосан мазкур Низомнинг 5 ва 6-иловаларга мувофиқ техник кўрикдан ўтганлиги тўғрисидаги талонга муҳр қўйилади ҳамда техник кўрикдан ўтказилган санаси, унинг амал қилиш муддати акс эттирилган ҳолда Марказ ходимининг имзоси билан тасдиқланади ва мулкдорга тақдим этилади.

Техниканинг техник кўрикдан ўтганлиги бўйича маълумот электрон базага киритилади.

31. Техник паспорт ёки техник гувоҳнома ўрнига дубликат берилаётганда, техника рўйхатга олинаётганда ва рўйхатдан чиқарилаётганда техник кўрикдан ўтказилганлик факти текшириб кўрилади.

Техник кўрикдан ўтганлиги тўғрисидаги талон йўқолганда (ёки яроқсизланганда) юридик ёки жисмоний шахс - мулкдорнинг ёзма аризасига кўра Марказнинг рўйхатдан (вақтинчалик рўйхатдан) ўтказилган жойдаги органи кўрикдан ўтказилганлик фактини текширади.

32. Техник кўрик натижалари Марказнинг электрон базасида, шунингдек, Марказнинг ҳисобга олиш ҳужжатларида қайд этилади.

33. Техник ҳолати ва жиҳозлари техника хавфсизлиги талабларининг бирортасига жавоб бермайдиган техника носоз ҳисобланади ва ундан фойдаланиш тақиқланади.

Бундай техникани такрорий кўрикдан ўтказиш олдинги кўрикдан ўтказилган кундан бошлаб 10 кундан кечикмай, ушбу Низомда белгиланган тартибда ўтказилади. Бу ҳолда техник ҳолатни текшириш фақат олдинги кўрикдан ўтказишда техника хавфсизлиги талабларига мувофиқ бўлмаган кўрсаткичлар бўйича ўтказилади ва умумий қоидалар асосида йиғим ундирилади.

Техника олдинги кўрикдан ўтказиш кунидан бошлаб 20 кундан ортиқ бўлган муддатда такрорий кўрикдан ўтказишга қўйилган тақдирда техник ҳолатни текшириш тўлиқ ҳажмда ўтказилади.

4-БОБ. МАВСУМИЙ ТЕХНИК

КЎРИКДАН ЎТКАЗИШ

34. Техникалар агротехник тадбирлар ва мавсумий ишлардан 20 кун олдин махсус комиссиялар томонидан мавсумий техник кўрикдан ўтказилади.

35. Махсус комиссия таркиби маҳаллий давлат ҳокимияти органлари томонидан тузилади ва тасдиқланади. Махсус комиссияга давлат ва жамоат ташкилотларидан мутахассислар жалб этилади. Мавсумолди техник кўригига техникаларни йиғиш ички ишлар органлари томонидан амалга оширилади.

36. Мавсумолди техник кўриги мавсум бошланишидан камида 10 кун олдин тўлиқ якунланиши лозим.

37. Мавсумолди техник кўригида техникаларнинг мавсумга тайёрлиги ўрганилади ва натижалари далолатнома асосида расмийлаштирилади. Мавсумий техник кўрикдан ўтган техникаларга техник кўрикдан ўтганлиги тўғрисидаги талон берилмайди.

38. Мавсумолди техник кўриги мажбурий ҳисобланмайди ва мавсумий техник кўрикдан ўтказилган техникалардан йиғим ундирилмайди.

5-БОБ. ТЕХНИКАЛАРНИ ЮКЛАШДАН

ОЛДИН ТЕХНИК КЎРИКДАН ЎТКАЗИШ

39. Маҳаллий корхоналарда ишлаб чиқарилган ёки хорижий давлатлардан импорт қилинган қишлоқ хўжалиги, мелиорация ва йўл-қурилиш техникалари истеъмолчига юклашдан ёхуд божхона органларида расмийлаштиришдан олдин ишлаб чиқарувчи, импортчи, харид қилувчи талабига асосан ёки назорат тартибида Техник регламент талабларига мос эканлиги бўйича техник кўрикдан ўтказилади.

40. Юклашдан олдинги техник кўрик Марказ томонидан, ишлаб чиқарувчи корхона ҳудудида ёки божхона омборида ўтказилади ва унинг якуни бўйича мазкур Низомга 7-иловасига мувофиқ далолатнома тузилиб, тегишли тартибда имзоланади ва мулкдорга тақдим этилади.

Юклашдан олдинги техник кўрикдан ўтган техникаларга техник кўрикдан ўтганлиги тўғрисидаги талон берилмайди.

41. Юклашдан олдинги техник кўрик жисмоний шахслар томонидан хориждан келтирилаётган ва ўз эҳтиёжи учун фойдаланиладиган техникалар учун қўлланилмайди.

42. Юклашдан олдинги техник кўрик белгиланган миқдорда тўловлар асосида амалга оширилади.

6-БОБ. ЯКУНЛОВЧИ ҚОИДАЛАР

43. Техник кўрикдан ўтказилганлиги тўғрисидаги штамп намунаси Марказ томонидан тасдиқланади. Штампларни тайёрлаш ва таъминлаш Марказ томонидан амалга оширилади.

44. Техник кўрикдан ўтказилганлиги тўғрисидаги талон қатъий ҳисобда турадиган бланка ҳисобланади, уни тайёрлаш, сақлаш, сарфлаш ва ҳисобга олиш белгиланган тартибда Марказ томонидан амалга оширилади.

Талон бланкаларини тайёрлаш харажатларини маблағ билан таъминлаш марказлаштирилган тартибда Марказнинг йиғимлардан тушган маблағлари ҳисобидан амалга оширилади.

45. Техникаларни рўйхатга қўйиш, рўйхатдан чиқариш, ҳисобдан чиқариш ва техник маълумотнома (ТМ-1) шаклидаги маълумотномалар беришда техникалар Марказ томонидан белгиланган жойда, одатдаги техник кўрикдан ўтказилади ва мажбурий техник кўрикдаги миқдорда тўлов ундирилади.

Техникаларни техник кўрикдан ўтказиш билан боғлиқ давлат хизматлари Инспекция бошлиғининг буйруғига асосан тўғридан-тўғри масъул инспекторлар томонидан ҳам кўрсатилиши мумкин.

46. Техникаларни техник кўрикка узрли сабабларсиз олиб келмаган ёки техник кўрикдан бўйин товлаган, техник кўрикдан ўтмаган техникани бошқарган, бошқаришга рухсат берган шахслар қонунчиликда назарда тутилган жавобгарликка тортилади.

Низомга

1-ИЛОВА

_____________________ вилояти (шаҳри), _____________туманида

қишлоқ хўжалиги, мелиорация ва йўл-қурилиш техникаларини

мажбурий техник кўрикдан ўтказиш режаси

     

Низомга

2-ИЛОВА

_______________ вилояти (шаҳри), ____________ туманида

қишлоқ хўжалиги, мелиорация ва йўл-қурилиш техникаларини

алоҳида (биттасини) техник кўрикдан ўтказиш

ДАЛОЛАТНОМАСИ

Тузилган санаси: 20 ____ йил "____" _______________

10. Техника

Далолатнома нусхасини олдим ва техник кўрикдан ўтмаган техникалардан фойдаланиш тақиқланиши ҳамда носоз техникадан фойдаланиш, фойдаланишга рухсат бериш МЖтКнинг тегишли моддалари билан маъмурий жавобгарликни келтириб чиқариши тўғрисида огоҳлантирилдим:

Низомга

3-ИЛОВА

___________________ вилояти (шаҳри), ______________ туманида

қишлоқ хўжалиги, мелиорация ва йўл-қурилиш техникаларини

мажбурий техник кўрикдан ўтишга тақдим этилаётган

техникалар тўғрисидаги

ДАЛОЛАТНОМА

ИНН:________________

Ташкилот балансида _____ та техника мавжуд.

          

ТЕХНИК КЎРИК НАТИЖАЛАРИ

Ташкилот (мулк эгаси)____________________________________________________ ҳисобида ____та қишлоқ хўжалиги, ____ та мелиоратив техника,____ та йўл-қурилиш, ____ та ўзиюрар машиналар, ___ та тиркама, ярим тиркамалар, жами ______ та техника техник кўрикка қўйилган. ____ та қишлоқ хўжалиги, ____ та мелиоратив техника, ____ та йўл-қурилиш, ____ та ўзиюрар машиналар, ___ та тиркама, ярим тиркамалар, жами ____ та техника техник кўрикдан ўтмади.

Техникалар текширилганда ____ та қишлоқ хўжалиги, ____ та мелиоратив техника,____ та йўл-қурилиш, ____ та ўзиюрар машиналар, ___ та тиркама, ярим тиркамалар, жами _____ та техника техник жиҳатдан носоз деб топилди.

Шу жумладан:

___ та техниканинг Техник регламент талабларига мос бўлмаган конструкциясидаги ўзгартириш мавжудлиги;

___ та техниканинг техника ва ёнғин хавфсизлиги талабларига жавоб бермаслиги;

___ та техниканинг двигатель қисмининг носозлиги;

___ та техниканинг тормоз тизимининг носозлиги;

___ та техниканинг руль бошқарувидаги носозликлар;

___ та техниканинг ташқи ёритиш приборларидаги носозликлар;

___ та техникада фойдаланиш учун яроқсиз қисмлар мавжудлиги;

___ та техниканинг ишланган газида зарарли моддалар мавжудлиги ва уларнинг тутунлилиги белгиланган нормалардан ортиқчалиги аниқланди. Ҳисобдаги техникалардан

___ таси бензин ёнилғиси билан, __ таси дизель ёнилғиси, ___таси суюлтирилган газ, __ таси сиқилган газ билан ишлайди.

Бензинда ишлайдиган текширилган ___ та техникадан ___таси, дизель ёнилғисида ишлайдиган ___тасидан ___таси, сиқилган табиий газда ишлайдиган ___таси ва суюлтирилган нефть газида ишлайдиган __дан __ таси носоз деб топилди.

_____та техник ҳолати носоз техниканинг Техник паспорти ёки Техник гувоҳномаси олиб қўйилганлиги, ДРБ ечиб олинганлиги тўғрисидаги белги _____________________________________________________________________________.

Табиий ва суюлтирилган газда ишлайдиган техникалар жиҳозларни ўрнатган ташкилот томонидан берилган ишга яроқлилиги тўғрисидаги маълумотнома асосида кўрикдан ўтказилади. Корхона маълумотномада қайд этилган кўрсаткичларга масъулдир.

Мажбурий техник кўрикдан ўтмаган техникалар қайта техник кўрикдан 20___ йил "___"______________ да ўтказилади.

Далолатнома нусхасини олдим ва техник кўрикдан ўтмаган техникалардан фойдаланиш тақиқланиши ҳамда носоз техникадан фойдаланиш, фойдаланишга рухсат бериш МЖтКнинг тегишли моддалари билан маъмурий жавобгарликни

Низомга

4-ИЛОВА

Қишлоқ хўжалиги, мелиорация ва йўл-қурилиш

техникаларини техник кўрикдан ўтказиш

СХЕМАСИ

         

Низомга

5-ИЛОВА

Трактор, тиркама, ўзиюрар қишлоқ хўжалиги,

мелиорация ва йўл-қурилиш техникаларининг

техник кўрикдан ўтганлиги тўғрисидаги талон

НАМУНАСИ

Трактор, тиркама, ўзиюрар қишлоқ хўжалиги,

мелиорация ва йўл-қурилиш техникаларининг

техник кўрикдан ўтганлиги тўғрисидаги талон

ТАВСИФИ

Техник кўрикдан ўтганлиги тўғрисидаги талон тўртбурчак шаклидаги, ўлчамлари 54 х 86 мм бўлган, зичлиги бир квадрат метрга 140+/-5 граммли 100% пахтадан олинган оч пушти рангли қоғоздан тайёрланади. Қоғоз қатлами орасига жойлашган, ультрабинафша нурда кўринадиган кўк ва оч яшил рангли тола ҳамда нурда яхши ажралиб турадиган "пахта чаноғи" кўринишидаги умумий "сув белги"си мавжуд.

Офсетли ёзув, минтақа коди, серияси - тўрт ҳарфли, номери - олти рақамли.

Бланка қуйидаги махсус ҳимояга эга:

кимёвий таъсирга бардошли бўёқдан фойдаланилади, юза қисмидаги катакларда нусха олишга ва сканер қилишга қарши ингичка чизиқлар мавжуд. Бир рангдан бошқа рангга расм чизиқлари бузилмасдан оҳиста жилоланиши таъминланган. Жуда катталаштирилганда микроматн кўринади, ультрабинафша нурда кўринмайдиган тасвирлар ва олтита рақамли сон кўринади. Махсус қабариқ ва ўйиқлар мавжуд.

Лотин алифбосидаги давлат тилидаги матндан фойдаланилган.

Олд томонида техниканинг русуми, давлат рўйхатидан ўтказиш рақами белгиси ҳамда орқа фонида техник кўрик ўтказилган йил яшил рангда (ҳар йили ўзгаради) кўрсатилади.

Талоннинг орқа томонида ўтказилган техник кўрик натижаси, жорий ва навбатдаги техник кўрикдан ўтиш санаси кўрсатилади.

Талондаги ёзувлар Марказ ходими томонидан амалга оширилади ҳамда унинг имзоси ва махсус штампи билан тасдиқланади.

Низомга

6-ИЛОВА

Қишлоқ хўжалиги, мелиорация ва йўл-қурилиш

машиналари, агрегатлари ҳамда ускуналарнинг

техник кўрикдан ўтганлиги тўғрисидаги талон

НАМУНАСИ

Қишлоқ хўжалиги, мелиорация ва йўл-қурилиш

машиналари, агрегатлар ҳамда ускуналарнинг

техник кўрикдан ўтганлиги тўғрисидаги талон

ТАВСИФИ

Техник кўрикдан ўтганлиги тўғрисидаги талон тўртбурчак шаклидаги, ўлчамлари 54 х 86 мм бўлган, зичлиги бир квадрат метрга 140+/-5 граммли 100% пахтадан олинган оч ҳаво рангли қоғоздан тайёрланади. Қоғоз қатлами орасига жойлашган, ультрабинафша нурда кўринадиган кўк ва оч яшил рангли тола ҳамда нурда яхши ажралиб турадиган "пахта чаноғи" кўринишидаги умумий "сув белги"си мавжуд.

Офсетли ёзув, минтақа коди, серияси - икки ҳарфли, номери - олти рақамли.

Бланка қуйидаги махсус ҳимояга эга:

кимёвий таъсирга бардошли бўёқдан фойдаланилади, юза қисмидаги катакларда нусха олишга ва сканер қилишга қарши ингичка чизиқлар мавжуд. Бир рангдан бошқа рангга расм чизиқлари бузилмасдан оҳиста жилоланиши таъминланган. Жуда катталаштирилганда микроматн кўринади, ультрабинафша нурда кўринмайдиган тасвирлар ва олтита рақамли сон кўринади. Махсус қабариқ ва ўйиқлар мавжуд.

Лотин алифбосидаги давлат тилидаги матндан фойдаланилган.

Олд томонида техниканинг русуми, давлат рўйхатидан ўтказиш рақами белгиси ҳамда орқа фонида техник кўрик ўтказилган йил пушти рангда (ҳар йили ўзгаради) кўрсатилади.

Талоннинг орқа томонида ўтказилган техник кўрик натижаси, жорий ва навбатдаги техник кўрикдан ўтиш санаси кўрсатилади.

Талондаги ёзувлар Марказ ходимлари томонидан амалга оширилади ҳамда унинг имзоси ва махсус штампи билан тасдиқланади.

Низомга

7-ИЛОВА

_____________________ вилояти (шаҳри), ___________________ туманида

қишлоқ хўжалиги, мелиорация ва йўл-қурилиш техникаларини

юклашдан олдин техник кўрикдан ўтказиш

ДАЛОЛАТНОМАСИ

Қонун ҳужжатлари маълумотлари миллий базаси (www.lex.uz),

2019 йил 18 апрель