Ўзбекистон ССЖ Президенти ҳузуридаги Вазирлар Маҳкамасининг 15.08. 1991 й. 221-сон "В.И.Ленин номидаги Тошкент давлат дорилфунуни ҳузуридаги юридик институтини Тошкент давлат юридик институтига айлантириш ҳақида"ги Қарори

Функция недоступна

ЎЗБЕКИСТОН ССЖ

ПРЕЗИДЕНТИ ҲУЗУРИДАГИ

ВАЗИРЛАР МАҲКАМАСИНИНГ

ҚАРОРИ

15.08. 1991 й.

N 221

В.И.ЛЕНИН НОМИДАГИ

ТОШКЕНТ ДАВЛАТ ДОРИЛФУНУНИ

ҲУЗУРИДАГИ ЮРИДИК ИНСТИТУТИНИ

ТОШКЕНТ ДАВЛАТ ЮРИДИК ИНСТИТУТИГА

АЙЛАНТИРИШ ҲАҚИДА

Давлат ва ҳуқуқни муҳофаза қилиш органларида ишлаш учун юқори малакали юридик кадрлар тайёрлашни янада яхшилаш, шунингдек, бозор иқтисодиёти шароитида жумҳурият халқ хўжалигини улар билан таъминлаш мақсадларида Вазирлар Маҳкамаси ҚАРОР ҚИЛАДИ:

1. 1991 йил 10 августдан эътиборан Ўзбекистон ССЖ Олий ва ўрта махсус таълим вазирлигининг В.И.Ленин номидаги ТошДУ ҳузуридаги юридик институти негизида, ЎзССЖ Адлия вазирлиги тасарруфига ўтказган ҳолда, Тошкент давлат юридик институти ташкил этилсин.

Жумҳуриятда юридик кадрлар тайёрлаш, давлат, хўжалик ва ижтимоий-маданий қурилиш соҳаларида илмий тадқиқотларнинг ҳамда илмий-амалий ишланмаларнинг сифат жиҳатидан янги ва самарали тизимини яратиш бўйича ЎзССЖ Адлия вазирлиги билан юридик институти ўртасидаги ўзаро алоқалар ҳақида 1991 йил 5 августда шартнома тузилганлиги маълумот учун қабул қилинсин.

2. ЎзССЖ Олий ва ўрта махсус таълим вазирлиги бир ой муддат ичида В.И.Ленин номидаги ТошДУ ҳузуридаги юридик институтининг фойдаланишида бўлган асосий фондлар, оборот маблағлар, бинолар, ўқув корпуслари, ётоқхоналар ва уларга ёндош бўлган ҳудудлар ва бошқа мулклар ЎзССЖ Адлия вазирлигига ўтказилсин.

3. ЎзССЖ Адлия вазирлиги бир ой муддат ичида институтнинг низомини, тузилишини ҳамда штатлари рўйхатини ишлаб чиқсин ва тасдиқласин.

4. ЎзССЖ Молия вазирлиги Тошкент давлат юридик институтини маблағ билан таъминлаш масаласини кўриб чиқсин ва ҳал қилсин.

5. ЎзССЖ Президенти ҳузуридаги Вазирлар Маҳкамасининг 1991 йил 29 мартдаги 73-сон қарори ўз кучини йўқотган деб ҳисоблансин.

Вазирлар Маҳкамасининг Раиси                                     И. Каримов