язык интерфейса

ЎзР Конунчилиги

ЎзР Конунчилиги/ Базада янги/ Июнь, 2019 й./ Давлат органлари фаолиятининг қонуний асослари/ Алоҳида соҳалар фаолиятини ташкил этиш/ Ўзбекистон Республикаси Вазирлар Маҳкамасининг 03.06.2019 й. 454-сон "Жисмоний тарбия ва спорт" ягона ахборот тизимини яратиш чора-тадбирлари тўғрисида"ги Қарори

Вы можете получить доступ на один день к продукту Законодательство Руз.

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

03.06.2019 й.

N 454



"ЖИСМОНИЙ ТАРБИЯ ВА СПОРТ"

ЯГОНА АХБОРОТ ТИЗИМИНИ ЯРАТИШ

ЧОРА-ТАДБИРЛАРИ ТЎҒРИСИДА



Вазирлар Маҳкамасининг "2019-2023 йиллар даврида Ўзбекистон Республикасида жисмоний тарбия ва оммавий спортни ривожлантириш концепциясини тасдиқлаш тўғрисида" 2019 йил 13 февралдаги 118-сон қарорига мувофиқ спортчилар, тренерлар, жисмоний тарбия ўқитувчилари (йўриқчилари) ҳақидаги маълумотлар, таълим ташкилотлари ўқувчилари ва талабларининг спорт фанлари бўйича топширган синов имтиҳонлари натижаларини тизимлаштириш, шунингдек, республикадаги жисмоний тарбия-соғломлаштириш ва спорт иншоотлари тўғрисидаги маълумотларнинг тизимли мониторингини олиб бориш, бундай маълумотлар билан алмашиш ва уларни таҳлил қилиш мақсадида Вазирлар Маҳкамаси ҚАРОР ҚИЛАДИ:


1. Ўзбекистон Республикаси Жисмоний тарбия ва спорт вазирлиги, Ахборот технологиялари ва коммуникацияларини ривожлантириш вазирлиги, тасарруфида таълим ташкилотлари ҳамда жисмоний тарбия-соғломлаштириш ва спорт иншоотлари бўлган вазирликлар ва идораларнинг спортчилар, тренерлар, жисмоний тарбия ўқитувчилари (йўриқчилари) ҳақидаги маълумотлар, таълим ташкилотлари ўқувчилари ва талабларининг спорт фанлари бўйича синов имтиҳонларининг тизимлаштирилган натижалари, шунингдек, республикадаги жисмоний тарбия-соғломлаштириш ва спорт иншоотлари тўғрисидаги маълумотларни ўз ичига олган "Жисмоний тарбия ва спорт" ягона ахборот тизимини (кейинги ўринларда Ягона тизим деб аталади) яратиш ҳақидаги таклифига розилик берилсин.


2. Қуйидагилар:

Ягона тизим идоравий мансублиги ва мулкчилик шаклидан қатъий назар, давлат ва нодавлат мактабгача таълим, умумий ўрта таълим, касб-ҳунар таълими, олий таълим ташкилотларида, шунингдек, мактабдан ташқари спорт таълими ташкилотларида (кейинги ўринларда таълим ташкилотлари деб аталади) жорий қилиниши;

Ўзбекистон Республикаси Жисмоний тарбия ва спорт вазирлигининг "Сертификатлаштириш ва компьютерлаштириш маркази" давлат корхонаси (кейинги ўринларда Сертификатлаштириш ва компьютерлаштириш маркази деб аталади) томонидан спортчиларни рўйхатга ва уларнинг фаолиятини ҳисобга олиш бўйича "Skm sportsmen", тренерлар ҳақидаги маълумотлар базаси юритилишини таъминловчи "Skm trener" ҳамда республикадаги жисмоний тарбия-соғломлаштириш ва спорт иншоотларини паспортлаштиришни таъминловчи "Skm sportinshoot" кичик ахборот тизимларини ўз ичига олган "Skm tizim" ахборот тизими (кейинги ўринларда АТ деб аталади) ишлаб чиқилгани маълумот учун қабул қилинсин.


3. Қуйидагилар Ягона тизимнинг асосий вазифалари этиб белгилансин:

спортчилар, тренерлар, таълим ташкилотларининг жисмоний тарбия ўқитувчилари (йўриқчилари), шунингдек, республикадаги жисмоний тарбия-соғломлаштириш ва спорт иншоотлари ҳақидаги маълумотларнинг тизимли мониторингини олиб бориш, бундай маълумотлар билан алмашиш ва уларнинг таҳлил қилинишини таъминлаш;

таълим ташкилотлари ўқувчилари ва талабаларининг спорт фанлари бўйича синов имтиҳонларини топшириш натижаларини таҳлил қилиш;

спортчилар, тренерлар ва республикадаги жисмоний тарбия-соғломлаштириш ҳамда спорт иншоотларини рўйхатга ва фаолиятини ҳисобга олиш;

www.sport.uz ягона маълумотлар порталида жойлаштириладиган спортчилар, тренерлар, таълим ташкилотларининг жисмоний тарбия ўқитувчилари (йўриқчилари) ҳамда республикадаги жисмоний тарбия-соғломлаштириш ва спорт иншоотлари тўғрисидаги маълумотларнинг долзарблигини таъминлаш, шунингдек, маълумотлар Ўзбекистон Республикаси очиқ маълумотлар порталига жойлаштирилишини таъминлаш.


4. Қуйидагилар Ягона тизимни яратиш ва жорий қилиш чора-тадбирларини молиялаштириш манбалари этиб белгилансин:

Ўзбекистон Республикаси Жисмоний тарбия ва спорт вазирлиги ҳузуридаги Жисмоний тарбия ва спортни ривожлантириш жамғармасининг 150,0 млн сўм миқдоридаги маблағлари;

Сертификатлаштириш ва компьютерлаштириш марказининг ўз маблағлари;

ўз тасарруфида таълим ташкилотлари бўлган вазирликлар ва идораларнинг бюджетдан ташқари маблағлари;

тегишли таълим ташкилотларининг маблағлари;

хайрия маблағлари;

қонунчиликда тақиқланмаган бошқа манбалар.


5. Ўзбекистон Республикаси Жисмоний тарбия ва спорт вазирлиги Ахборот технологиялари ва коммуникацияларини ривожлантириш вазирлиги билан биргаликда:

тегишли вазирлик ва идораларнинг таълим ташкилотлари контингенти тўғрисидаги мавжуд маълумотлар базалари билан интеграциялаштириш ҳамда маълумотлар алмашиш ҳисобга олинган ҳолда, Ягона тизимни яратиш бўйича техник топшириқлар ва технологик хусусиятларни, шунингдек, Ягона тизимнинг фаолият кўрсатиш тартибини икки ой муддатда ишлаб чиқсин ва тасдиқласин;

Ягона тизимни тасдиқланган техник топшириқларга мувофиқ 2019 йил 1 сентябрга қадар жорий қилсин ва ишга туширсин;

Интернет тармоғидан доимий фойдаланиш ва маълумотларнинг белгиланган квоталар доирасида ахборот ҳимоясини таъминлаган ҳолда, www.sport.uz ягона ахборот порталини бир ой муддатда "Uzinfocom" МЧЖнинг Давлат ахборот тизимларини яратиш ва қўллаб-қувватлаш бўйича ягона интегратор сервер майдонида жойлаштирсин.


6. Ўзбекистон Республикаси Жисмоний тарбия ва спорт вазирлиги "Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Электрон ҳукумат ва рақамли иқтисодиёт лойиҳаларини бошқариш маркази" ДУК билан биргаликда яратилаётган Ягона тизимни икки ой муддатда "Электрон ҳукумат" тизимининг фойдаланилувчиларини идентификация қилиш ягона ахборот тизими, жисмоний ва юридик шахсларнинг марказий маълумотлар базалари билан интеграциялаштиришни таъминласин.


7. Қуйидагилар:

Ўзбекистон Республикаси Жисмоний тарбия ва спорт вазирлиги - Ягона ахборот тизимининг юритилиши, ушбу тизимга маълумотлар мунтазам киритилиши ва уларнинг долзарблиги таъминланиши мониторингини амалга оширадиган давлат органи;

Сертификатлаштириш ва компьютерлаштириш маркази - Ягона тизимни ишлаб чиқувчи ва оператор этиб белгилансин.

Ягона тизимни ишлаб чиқишда:

спортчилар, тренерлар ва жисмоний тарбия-соғломлаштириш ҳамда спорт иншоотлари ҳақидаги маълумотлар бўйича "Skm tizim" АТ билан автоматлаштирилган ҳолда маълумотлар алмашинуви таъминлансин;

республика таълим ташкилотларининг жисмоний тарбия ўқитувчилари (йўриқчилари) ҳақидаги маълумотлар базасини, шунингдек, таълим ташкилотлари ўқувчилари ва талабаларининг спорт фанлари бўйича синов имтиҳонлари натижаларининг таҳлилини ўз ичига олган алоҳида кичик тизим яратилсин;

республика таълим ташкилотларининг жисмоний тарбия ўқитувчилари (йўриқчилари) томонидан таълим ташкилотлари ўқувчилари ва талабаларининг спорт фанлари бўйича синов имтиҳонлари натижаларини, шунингдек, спорт мусобақалари ташкилотчилари томонидан спортчиларнинг мусобақаларда эришган спорт натижаларини www.sport.uz ахборот портали орқали киритиш имконияти инобатга олинсин;

спорт мактаблари ўқувчи-спортчиларининг бевосита тренер-ўқитувчиларига қонунчиликда белгиланган тартибда устамалар белгилаш ҳуқуқини берадиган спортдаги натижаларини www.sport.uz ягона ахборот порталида ҳисобга олиш ва улар билан танишиш имконияти таъминлансин;

спортчилар, тренерлар, таълим ташкилотларининг жисмоний тарбия ўқитувчилари (йўриқчилари), республикадаги жисмоний тарбия-соғломлаштириш ва спорт иншоотлари ҳақидаги маълумотлар www.sport.uz ягона ахборот порталида, шунингдек, Ўзбекистон Республикаси очиқ маълумотлар порталида жойлаштирилиши таъминлансин.


8. Ўзбекистон Республикаси Жисмоний тарбия ва спорт вазирлиги, Ахборот технологиялари ва коммуникацияларини ривожлантириш вазирлиги, Мактабгача таълим вазирлиги, Ҳалқ таълими вазирлиги, Олий ва ўрта махсус таълим вазирлиги, тасарруфида таълим ташкилотлари бўлган вазирликлар ва идоралар:

вазирликлар ва идоралар, шунингдек, таълим ташкилотларининг жисмоний тарбия ўқитувчилари (йўриқчилари) ҳақидаги маълумотлар ҳамда ўқувчиларнинг (талабалар) спорт фанлари бўйича синов имтиҳонлари натижаларини Ягона тизимга киритиш учун масъул бўлган тегишли мутахассислари учун семинарлар ташкил этилишини;

Ягона тизимга маълумотларни киритишга масъул бўлган жисмоний тарбия ўқитувчилари (йўриқчилари) ва спорт тадбирлари ташкилотчилари тегишли шахсларининг шахсий жавобгарлиги белгиланишини;

Ягона тизимдаги маълумотларни мунтазам равишда янгилаб бориш учун ўқитувчилар (йўриқчилар) ва масъул шахсларнинг Интернет тармоғи, тегишли ускуналар ва компьютер техникасидан фойдаланиш шароитларини;

Ягона тизимнинг узлуксиз ишлашини ва ахборот хавфсизлигини таъминлаш тадбирлари ўтказилишини таъминласин.


9. Ўзбекистон Республикаси Жисмоний тарбия ва спорт вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.


10. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдухакимов ва Ўзбекистон Республикаси жисмоний тарбия ва спорт вазири Д.Х. Набиев зиммасига юклансин.



Ўзбекистон Республикасининг Бош вазири                            А. Арипов



Қонун ҳужжатлари маълумотлари миллий базаси (www.lex.uz),

2019 йил 3 июнь