Марказий банк Бошқарувининг 08.06.2019 й. 13/11-сон "Тижорат банкларида касса ишини ташкил этиш, нақд пул ва бошқа қимматликларни инкассация қилишга доир йўриқномага ўзгартиришлар ва қўшимча киритиш ҳақида"ги Қарори (АВ томонидан 03.07.2019 й. 3028-2-сон билан рўйхатга олинган)

Функция недоступна

ЎЗБЕКИСТОН РЕСПУБЛИКАСИ

АДЛИЯ ВАЗИРЛИГИ ТОМОНИДАН

РЎЙХАТГА ОЛИНГАН

03.07.2019 й.

N 3028-2

ЎЗБЕКИСТОН РЕСПУБЛИКАСИ

МАРКАЗИЙ БАНКИ БОШҚАРУВИНИНГ

08.06.2019 й.

N 13/11

ҚАРОРИ

Тижорат банкларида касса ишини ташкил этиш,

нақд пул ва бошқа қимматликларни инкассация

қилишга доир йўриқномага ўзгартиришлар ва

қўшимча киритиш ҳақида

Ўзбекистон Республикасининг "Ўзбекистон Республикасининг Марказий банки тўғрисида"ги, "Банклар ва банк фаолияти тўғрисида"ги қонунлари ва Ўзбекистон Республикаси Президентининг 2019 йил 5 февралдаги ПҚ-4160-сон "Жаҳон банки ва Халқаро молия корпорациясининг "Бизнес юритиш" йиллик ҳисоботида Ўзбекистон Республикасининг рейтингини яхшилашга доир қўшимча чора-тадбирлар тўғрисида"ги қарорига мувофиқ Ўзбекистон Республикаси Марказий банки Бошқаруви ҚАРОР ҚИЛАДИ:

1. Ўзбекистон Республикаси Марказий банки Бошқарувининг 2018 йил 28 апрелдаги 16/21-сон қарори (рўйхат рақами 3028, 2018 йил 29 июнь) (Қонун ҳужжатлари маълумотлари миллий базаси, 02.07.2018 й., 10/18/3028/1418-сон) билан тасдиқланган Тижорат банкларида касса ишини ташкил этиш, нақд пул ва бошқа қимматликларни инкассация қилишга доир йўриқномага иловага мувофиқ ўзгартиришлар ва қўшимча киритилсин.

2. Мазкур қарор расмий эълон қилинган кундан эътиборан кучга киради.

Марказий банк раиси                                              М. Нурмуратов

Қарорга

ИЛОВА

Тижорат банкларида касса ишини ташкил этиш,

нақд пул ва бошқа қимматликларни инкассация

қилишга доир йўриқномага киритилаётган

ўзгартиришлар ва қўшимча

1. 15-банддаги "Банк биносида жойлашмаган амалиёт (операцион) кассалардаги нақд пуллар" деган сўзлар "Амалиёт кассаларидаги нақд пуллар" деган сўзлар билан алмаштирилсин.

2. 52-банднинг биринчи хатбошисидан иккинчи жумла чиқариб ташлансин.

3. 109-банднинг биринчи хатбошиси қуйидаги таҳрирда баён этилсин:

"109. Мижознинг инкассация сумкасига (қопига) нақд пул тушумлари билан биргаликда тижорат банкларининг ҳисоб-китоб чеклари ҳам солинган бўлса, назоратчи ҳар бир ҳисоб-китоб чекини тўғри расмийлаштирилганлигини (имзолар мавжудлигини, сўз ва рақам билан ёзилган суммаларнинг ўзаро мос келишини, уларни тўлов учун қабул қилинган хўжалик юритувчи субъектнинг масъул ходимининг имзоси мавжудлигини) текширган ҳолда кассирлардан қабул қилиб олиши керак.".

4. 126-бандда:

ўн тўртинчи хатбошида "кўк йўлли бўлиши шарт." деган сўзлар "кўк йўлли;" деган сўзлар билан алмаштирилсин;

қуйидаги мазмундаги ўн бешинчи хатбоши билан тўлдирилсин:

"100 000 сўмлик банкнотлар учун - эни 15 mm бўлган иккита тўқ жигарранг йўлли бўлиши шарт.".

ўн бешинчи хатбоши ўн олтинчи хатбоши деб ҳисоблансин.

5. 131-банд қуйидаги таҳрирда баён этилсин:

"131. Пул дасталарини полиэтилен пакетларга жойлаштирилиш орқали банкнотлар боғлами шакллантирилганда, ҳар бир полиэтилен пакетга 10 та пул дастаси солиниб, пакетнинг очиқ томонини пайвандлаб, ёпиштириш учун пул боғламларини шакллантириш ускунасига жойланади. Бунда, пул боғламларини шакллантириш ускунаси қопқоғига ўрнатилган клишедаги банк реквизитлари полиэтилен пакетнинг очиқ тарафига автоматик тарзда босилади. Агар, банкнотлар боғламини шакллантиришда фойдаланиладиган полиэтилен пакет, иккита полиэтилен бўлакларини пайвандлаш орқали ишлаб чиқарилган бўлса, бундай ҳолларда пул боғламларини шакллантириш ускунаси қопқоғига ўрнатилган кассир клишесидаги банк реквизитлари полиэтилен пакетнинг иккала томонига ҳам босилиши лозим. Ҳар бир кассир ўзи санаган пулларнинг боғламини шакллантиришда, ўзига бириктирилган клишедан фойдаланиши шарт.".

6. 132-банднинг биринчи хатбошисидаги "ва 50 000" деган сўзлар ", 50 000 ва 100000" деган сўзлар билан алмаштирилсин.

7. 150-банднинг иккинчи хатбошисидаги "муҳри билан тасдиқланган" деган сўзлар "муҳри билан тасдиқланган (тадбиркорлик субъектларидан муҳр билан тасдиқлаш талаб этилмайди)" деган сўзлар билан алмаштирилсин.

8. 9-бобнинг номи қуйидаги таҳрирда баён этилсин:

"9-боб. Банк томонидан чакана амалиётлар ва

банк биносидан ташқарида жойлашган бошқа

кассаларни ташкил этиш тартиби".

9. 154-банддаги "мижозларга" деган сўз "жисмоний шахсларга" деган сўзлар билан алмаштирилсин.

10. 171-банд қуйидаги таҳрирда баён этилсин:

"171. Банк томонидан хўжалик юритувчи субъект мурожаатига асосан томонлар ўртасида тузилган шартномага кўра, хўжалик юритувчи субъектнинг ҳузурида белгиланган тартибда банк кассалари ташкил этилиши мумкин. Бунда, ушбу ташкил этилган кассаларда қандай касса хизматларини кўрсатилиши, банк ва хўжалик юритувчи субъект ўртасида имзоланган шартномага асосан белгилаб олинади. Банк биносидан ташқарида ташкил этилган битта касса орқали ҳам жисмоний шахсларга ҳам ҳўжалик юритувчи субъектларга касса хизматларини кўрсатиш тақиқланади.

Шунингдек, банкка тегишли мини-банк биносида ҳам барча зарурий шароитлар яратилган ҳамда хавфсизлик чоралари тўлиқ таъминланган бўлса, белгиланган тартибда кассалар ташкил этилиши ҳамда чакана амалиёт кассаси орқали жисмоний шахсларга ва мини-банк айланма кассаси орқали мини-банк мижозлари бўлган хўжалик юритувчи субъектларга касса хизматлари кўрсатилиши мумкин.".

11. 193-банддан "тўртбурчак муҳр босилади ёки" деган сўзлар чиқариб ташлансин.

12. 242-банднинг биринчи хатбошидаги "суриштирув органлари" деган сўзлар "терговга қадар текширувни амалга оширувчи органлар, суриштирув органлари" деган сўзлар билан алмаштирилсин.

13. Йўриқноманинг 8а-иловасидан "М.Ў.(топширувчининг муҳри)" деган сўзлар чиқариб ташлансин.

14. Йўриқноманинг 9-иловасидан "Нақд пул чекини тақдим этган мижознинг муҳри учун жой" деган сўзлар чиқариб ташлансин.

15. Йўриқноманинг 12-иловасидаги "Жами бир кунда" ва "сўмлик қимматликлар чиқим қилинди" деган сўзлар тегишли равишда "Касса мудирига" ва "сўмлик қимматликлар топширилди" деган сўзлар билан алмаштирилсин.

16. Йўриқноманинг 25-иловасидаги "ва 50000" деган сўзлар ", 50000 ва 100000" деган сўзлар билан алмаштирилсин.

Қонун ҳужжатлари маълумотлари миллий базаси (www.lex.uz),

2019 йил 3 июль

"Ўзбекистон Республикаси қонун ҳужжатлари тўплами",

2019 йил 8 июль, 27-сон, 493-модда