Ўзбекистон Республикаси Вазирлар Маҳкамасининг 24.12.2019 й. 1030-сон "Илм-фан ва таълим соҳасидаги давлат ташкилотларида илмий, илмий-педагогик ва меҳнат фаолияти билан шуғулланувчи илмий даражага эга ходимларга қўшимча ҳақ тўлаш тартиби тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

24.12.2019 й.

N 1030

ИЛМ-ФАН ВА ТАЪЛИМ

СОҲАСИДАГИ ДАВЛАТ ТАШКИЛОТЛАРИДА

ИЛМИЙ,  ИЛМИЙ-ПЕДАГОГИК  ВА  МЕҲНАТ

ФАОЛИЯТИ БИЛАН ШУҒУЛЛАНУВЧИ ИЛМИЙ

ДАРАЖАГА  ЭГА  ХОДИМЛАРГА  ҚЎШИМЧА

ҲАҚ ТЎЛАШ ТАРТИБИ ТЎҒРИСИДА

Ўзбекистон Республикасининг "Илм-фан ва илмий фаолият тўғрисида"ги Қонуни ҳамда Ўзбекистон Республикаси Президентининг "2019-2023 йилларда Мирзо Улуғбек номидаги Ўзбекистон Миллий университетида талаб юқори бўлган малакали кадрлар тайёрлаш тизимини тубдан такомиллаштириш ва илмий салоҳиятни ривожлантириш чора-тадбирлари тўғрисида" 2019 йил 17 июндаги ПҚ-4358-сон қарорига мувофиқ, шунингдек, кадрлар салоҳиятини ошириш, илм-фан ва таълим соҳасида юқори малакали кадрларнинг билим ва тажрибаларини амалда қўллашни молиявий рағбатлантириш учун қўшимча шарт-шароитлар яратиш мақсадида Вазирлар Маҳкамаси ҚАРОР ҚИЛАДИ:

1. Илм-фан ва таълим соҳасидаги давлат ташкилотларида (кейинги ўринларда ташкилот деб аталади) илмий-педагогик ва меҳнат фаолияти билан шуғулланувчи ходимларнинг лавозим маошига:

фан номзоди ёки фалсафа доктори (PhD) (ёки хорижий мамлакатларда уларга тенглаштирилган даражалар) (кейинги ўринларда фалсафа доктори деб аталади) илмий даражасига эга шахслар учун - лавозим маошининг 30 фоизигача;

фан доктори (Doctor of Science) (ёки хорижий мамлакатларда унга тенглаштирилган даража) (кейинги ўринларда фан доктори деб аталади) илмий даражасига эга шахслар учун - лавозим маошининг 60 фоизигача қўшимча ҳақ тўлаш тизими жорий этилсин.

2. Илм-фан ва таълим соҳасидаги давлат ташкилотларида илмий, илмий-педагогик ва меҳнат фаолияти билан шуғулланувчи илмий даражага эга ходимларга қўшимча ҳақ тўлаш тартиби тўғрисидаги низом 1-иловага мувофиқ тасдиқлансин.

3. Белгилансинки:

а) қўшимча ҳақ ушбу қарорга мувофиқ тегишли мезонларни бажарилишини баҳолаш натижалари бўйича ҳамда таркибий бўлинма раҳбарининг ишчи комиссияга тақдимномаси ва ташкилот коллегиал органи қарори асосида ҳар бир ходимнинг илмий-педагогик ва меҳнат фаолиятига қўшган аниқ ҳиссасини ҳисобга олган ҳолда белгиланади;

б) ушбу қарор билан жорий этилаётган қўшимча ойлик ва бир марталик тўловлар миқдори бир ойда - фалсафа доктори илмий даражасига эга ходимлар учун лавозим маошининг 30 фоизидан ҳамда фан доктори илмий даражасига эга ходимлар учун лавозим маошининг 60 фоизидан ошмаслиги керак;

в) Ўзбекистон Республикаси Давлат бюджетидан молиялаштириладиган ташкилотлар ходимларига ушбу қарорга мувофиқ қўшимча ҳақ белгиланиши билан боғлиқ харажатларни молиялаштириш Ўзбекистон Республикаси Давлат бюджети маблағлари ҳисобидан амалга оширилади;

г) ушбу қарорга мувофиқ қўшимча ҳақ тўлаш билан боғлиқ бўлган харажатларни молиялаштириш учун Ўзбекистон Республикаси Давлат бюджети маблағлари ҳажмини режалаштириш фалсафа доктори илмий даражасига эга ходимлар лавозим маошининг 30 фоизи миқдорида қўшимча ҳақ ва фан доктори илмий даражасига эга бўлган ходимлар лавозим маошининг 60 фоизи миқдоридаги қўшимча ҳақнинг энг кўп ҳажми илмий даражага эга бўлган ходимларнинг ҳақиқий сонидан келиб чиққан ҳолда банд бўлган штат бирлиги сони бўйича амалга оширилади.

4. Ташкилотнинг коллегиал органи (кейинги ўринларда - коллегиал орган) ушбу Низомга мувофиқ муайян мезонлар асосида ишчи комиссия мажлисининг хулосасига кўра ходимга қўшимча ҳақ миқдори ва тўлов даврини белгилаш тўғрисида қарор қабул қилади.

Бунда, коллегиал орган ходимга белгиланган қўшимча ҳақ миқдорининг тўғри белгиланишига жавобгар ҳисобланади.

5. Тизимида ташкилотлар мавжуд бўлган вазирлик ва идрралар Инновацион ривожланиш вазирлиги билан биргаликда:

ушбу қарорга мувофиқ ходимларга қўшимча ҳақ белгиланишининг асосланганлиги, шунингдек, уларни тўлаш учун ажратилган маблағлардан мақсадли фойдаланилишини доимий назорат қилиб борсин;

ҳар йили 25 декабрга қадар Ўзбекистон Республикаси Молия вазирлигига ушбу қарорга мувофиқ қўшимча ҳақ тўлаш ҳуқуқига эга бўлган ходимларнинг банд бўлган штат бирлиги сони тўғрисида, шунингдек, уларни тўлаш учун ажратилган маблағлар, шу жумладан, молия йили охирида сарф қилинмаган молия ҳажми тўғрисидаги маълумотларни тақдим этиб борсин;

бир ой муддатда манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.

6. Вазирлар Маҳкамасининг "Бюджет ташкилотларини маблағ билан таъминлаш тартибини такомиллаштириш тўғрисида" 1999 йил 3 сентябрдаги 414-сон қарорига (Ўзбекистон Республикаси ҚТ, 1999 й., 9-сон, 51-модда) 2-иловага мувофиқ ўзгартириш ва қўшимчалар киритилсин.

7. Мазкур қарорнинг бажарилишини назорат қилиш Ўзбекистон Республикаси инновацион ривожланиш вазири И.Ю. Абдураҳмонов ҳамда Вазирлар Маҳкамасининг Телекоммуникациялар, IT-технологиялар ва инновацион фаолиятни ривожлантириш, ахборот хавфсизлигини таъминлаш котибияти зиммасига юклансин.

Ўзбекистон Республикасининг Бош вазири                                    А. Арипов

Вазирлар Маҳкамасининг

2019 йил 24 декабрдаги

1030-сон қарорига

2-ИЛОВА

Вазирлар Маҳкамасининг "Бюджет ташкилотларини

маблағ билан таъминлаш тартибини такомиллаштириш

тўғрисида" 1999 йил 3 сентябрдаги 414-сон қарорига

киритилаётган ўзгартириш ва қўшимчалар

1. 6-банд қуйидаги мазмундаги хатбоши билан тўлдирилсин:

"Ўзбекистон Республикаси Президенти ёки Вазирлар Маҳкамасининг қарорларида назарда тутилган бошқа мақсадлар".

2. Иловада:

а) 26-банд қуйидаги матндаги хатбоши билан тўлдирилсин:

"Ўзбекистон Республикаси Президенти ёки Вазирлар Маҳкамасининг қарорларида назарда тутилган бошқа мақсадлар";

б) 29-бандда:

қуйидаги матндаги бешинчи хатбоши билан тўлдирилсин:

"Ўзбекистон Республикаси Президенти ёки Вазирлар Маҳкамасининг қарорлари асосида бюджет ташкилотини ривожлантириш жамғармасига ажратилган маблағлар ушбу қарорларда назарда тутилган мақсадларга сарфланади";

бешинчи хатбоши олтинчи хатбоши деб ҳисоблансин.

Қонун ҳужжатлари маълумотлари миллий базаси (www.lex.uz),

2019 йил 25 декабрь