Ўзбекистон Республикаси Вазирлар Маҳкамасининг 04.03.2020 й. 121-сон "Тошкент шаҳридаги ""МЭИ" миллий тадқиқот университети" Федерал давлат бюджети олий таълим муассасаси филиали фаолиятини ташкил этишнинг қўшимча чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

04.03.2020 й.

N 121

ТОШКЕНТ ШАҲРИДАГИ ""МЭИ" МИЛЛИЙ

ТАДҚИҚОТ УНИВЕРСИТЕТИ" ФЕДЕРАЛ ДАВЛАТ

БЮДЖЕТИ  ОЛИЙ  ТАЪЛИМ  МУАССАСАСИ

ФИЛИАЛИ ФАОЛИЯТИНИ ТАШКИЛ ЭТИШНИНГ

ҚЎШИМЧА ЧОРА-ТАДБИРЛАРИ ТЎҒРИСИДА

Ўзбекистон Республикаси Президентининг "Тошкент шаҳрида "МЭИ" миллий тадқиқот университети" Федерал давлат бюджети олий таълим муассасаси филиалини ташкил этиш тўғрисида" 2019 йил 4 июндаги ПҚ-4350-сон қарори ижросини таъминлаш мақсадида Вазирлар Маҳкамаси ҚАРОР ҚИЛАДИ:

1. Тошкент шаҳридаги ""МЭИ" миллий тадқиқот университети" Федерал давлат бюджети олий таълим муассасаси филиалининг (кейинги ўринларда Филиал деб аталади) тузилмаси иловага мувофиқ тасдиқлансин.

Филиал ижрочи директорига, зарур ҳолларда, Ўзбекистон Республикаси Олий ва ўрта махсус таълим вазирлиги ҳамда ""МЭИ" миллий тадқиқот университети" Федерал давлат бюджети олий таълим муассасаси (Россия Федерацияси) билан келишган ҳолда, Филиалнинг тузилмасига олий таълим муассасаси учун белгиланган нормативларга мувофиқ ходимларнинг умумий чекланган сони доирасида ўзгартиришлар киритиш ҳуқуқи берилсин.

2. Ўзбекистон Республикаси Олий ва ўрта махсус таълим вазирлиги, Энергетика вазирлиги, "Иссиқлиқ электр станциялари" АЖ, "Ўзбекистон миллий электр тармоқлари" АЖ, "Ҳудудий электр тармоқлари" АЖ, "Ўзбекгидроэнерго" АЖ ""МЭИ" миллий тадқиқот университети" Федерал давлат бюджети олий таълим муассасаси (Россия Федерацияси) билан биргаликда икки ой муддатда Филиалда педагогик ва илмий салоҳиятга эга, юқори малакали, рус ва инглиз тилларини ўзлаштирган, ахборот технологияларини ҳамда фан ва техниканинг энг сўнгги ютуқларини ўқув жараёнига жорий эта оладиган профессор-ўқитувчилар таркибини шакллантириш чораларини кўрсин.

3. Белгилансинки, талабаларни тўлов-контракт асосида ўқитиш қиймати ""МЭИ" миллий тадқиқот университети" Федерал давлат бюджети олий таълим муассасаси (Россия Федерацияси), Ўзбекистон Республикаси Олий ва ўрта махсус таълим вазирлиги ҳамда Энергетика вазирлиги билан келишилган ҳолда Филиал томонидан тасдиқланади.

4. "Иссиқлик электр станциялари" АЖ, "Ўзбекистон миллий электр тармоқлари" АЖ, "Ҳудудий электр тармоқлари" АЖ ва "Ўзбекгидроэнерго" АЖ:

2020 йил 1 августга қадар Филиалга берилган - Тошкент шаҳар, Олмазор тумани, Қорақамиш 3-кўчаси манзилида жойлашган бино ва иншоотларнинг, шу жумладан, ўқув лаборатория бинолари ва спорт иншоотларининг реконструкция ишларини тугаллаш, шунингдек, тўлақонли ўқув жараёнини ташкил этиш мақсадида уларни замонавий ўқув-лаборатория ускуналари, компьютер ва ташкилий техника, ўқув ва илмий адабиётлар, инвентарлар, мебель ва бошқа моддий-техник воситалар билан таъминлаш;

2021 йил 1 августга қадар Филиал талабалари ва ўқитувчилари учун ётоқхона биноси қурилишини тугаллаш чораларини кўрсинлар.

5. Мазкур қарорнинг бажарилишини назорат қилиш Ўзбекистон Республикаси энергетика вазири А.С. Султанов, Ўзбекистон Республикаси олий ва ўрта махсус таълим вазири И.У. Маджидов зиммасига ҳамда Вазирлар Маҳкамасининг Таълим ва соғлиқни сақлаш масалалари котибиятига юклансин.

Ўзбекистон Республикасининг Бош вазири                       А. Арипов

Вазирлар Маҳкамасининг

2020 йил 4 мартдаги

121-сон қарорига

ИЛОВА

Тошкент шаҳридаги ""МЭИ" миллий тадқиқот

университети" Федерал давлат бюджети олий

таълим муассасаси филиалининг

ТУЗИЛМАСИ

Филиал (факультетлар, кафедралар ва бошқа таркибий бўлинмалар) ходимларининг чекланган умумий сони олий таълим муассасалари учун ўрнатилган нормативларга мувофиқ аниқланади.

Кафедралар ўқув юкламалари шаклланиб боришига мувофиқ босқичма-босқич ташкил этилади.

Қонун ҳужжатлари маълумотлари миллий базаси (www.lex.uz),

2020 йил 5 март